Skanda Purana · Chapter 4.63

agastya uvāca // //
dṛṣṭvā kāśīṃ dṛgānaṃdāṃ tārakāre purāriṇā //
kimakāri samācakṣva prāptāṃ bahumanorathaiḥ

// skaṃda uvāca // //
pativratāpate 'gastya śṛṇu vakṣyāmyaśeṣataḥ //
mṛgāṃkalakṣmaṇotkaṃṭhaṃ kāśī netrātithīkṛtā

atha sarvajñanāthena bhaktavatsalacetasā //
jaigīṣavyo muniśreṣṭho guhāṃ tastho nirīkṣitaḥ

yamanehasamārabhya madaṃrādriṃ viniryayau //
adrīṃdra sutayā sārdhaṃ rudreṇokṣeṃdragāminā

taṃ vāsaraṃ puraskṛtya jagrāha niyamaṃ dṛḍham //
jaigīṣavyo mahāmedhāḥ kuṃbhayone mahākṛtī

viṣamekṣaṇa pādābjaṃ samīkṣiṣye yadā punaḥ //
tadāṃbuvipruṣamapi bhakṣayiṣyāmi cetyaho

kutaściddhāraṇāyogādathavā śaṃbhvanugrahāta //
anaśnannapibanyogī jaigīṣavyaḥ sthito mune

taṃ śaṃbhureva jānāti nānyo jānāti kaścana //
ataeva tataḥ prāptaḥ prathamaṃ pramathādhipaḥ

jyeṣṭhaśuklacaturdaśyāṃ somavārānurādhayoḥ //
tatparvaṇi mahāyātrā kartavyā tatra mānavaiḥ

jyeṣṭhasthānaṃ tataḥ kāśyāṃ tadābhūdapi puṇyadam //
tatra liṃgaṃ samabhavatsvayaṃ jyeṣṭheśvarābhidham

talliṃgadarśanātpuṃsāṃ pāpaṃ janmaśatārjitam //
tamorkodayamāpyeva tatkṣaṇādeva naśyati

jyeṣṭhavāpyāṃ naraḥ snātvā tarpayitvā pitāmahān //
jyeṣṭheśvaraṃ samālokya na bhūyo jāyate bhuvi

āvirāsītsvayaṃ tatra jyeṣṭheśvara samīpataḥ //
sarvasiddhipradā gaurī jyeṣṭhāśreṣṭhā samaṃtataḥ

jyeṣṭhe māsi sitāṣṭamyāṃ tatra kāryo mahotsavaḥ //
rātrau jāgaraṇaṃ kāryaṃ sarvasaṃpatsamṛddhaye

jyeṣṭhāṃ gaurīṃ namaskṛtya jyeṣṭhavāpī pariplutā //
saubhāgyabhājanaṃ bhūyādyoṣā saubhāgyabhāgapi

nivāsaṃ kṛtavāñśaṃbhustasminsthāne yataḥ svayam //
nivāseśa iti khyātaṃ liṃgaṃ tatra paraṃ tataḥ //

nivāseśvaraliṃgasya sevanātsarvasaṃpadaḥ //
nivasaṃti gṛhe nityaṃ nityaṃ pratipadaṃ punaḥ

kṛtvā śrāddhaṃ vidhānena jyeṣṭhasthāne narottamaḥ //
jyeṣṭhāṃ tṛptiṃ dadātyeva pitṛbhyo madhusarpiṣā

jyeṣṭhatīrthe naraḥ kāśyāṃ dattvā dānāni śaktitaḥ //
jyeṣṭhānsvargānavāpnoti naro mokṣaṃ ca gacchati

jyeṣṭheśvaro rcyaḥ prathamaṃ kāśyāṃ śreyorthibhirnaraiḥ //
jyeṣṭhāgaurī tatobhyarcyā sarvajyeṣṭhamabhīpsubhiḥ

atha naṃdinamāhūya dhūrjaṭiḥ sa kṛpānidhiḥ //
śṛṇvatāṃ sarvadevānāmidaṃ vacanamabravīt

// īśvara uvāca // //
śailāde praviśāśu tvaṃ guhāstyatra manoharā //
tadaṃtaresti me bhakto jaigīṣavyastapodhanaḥ

mahāniyamavānnaṃdistvagasthisnāyu śeṣitaḥ //
tamihānaya madbhaktaṃ maddarśana dṛḍhavratam

yadāprabhṛtyagāṃ kāśyā maṃdaraṃ sarvasuṃdaram //
mahāniyamavāneṣa tadārabhyojjhitāśanaḥ

gṛhāṇa līlākamalamidaṃ pīyūṣapoṣaṇam //
anena tasya gātrāṇi spṛśa sadyaḥ subṛṃhiṇā

tato naṃdī samādāya tallīlākamalaṃ vibhoḥ //
praṇamya devadeveśamāviśadgahvarāṃ guhām

naṃdī dṛṣṭvātha taṃ tatra dhāraṇādṛḍhamānasam //
tapogni pariśuṣkāṃgaṃ kamalena samaspṛśat

tapāṃte vṛṣṭisaṃyogācchālūra iva koṭare //
ullalāsa sa yogīṃdraḥ sparśamātrāttadabjajāt

atha naṃdī samādāya satvaraṃ munipuṃgavam //
devadevasya pādāgre namaskṛtya nyapātayat

jaigīṣavyotha saṃbhrāṃtaḥ purato vīkṣya śaṃkaram //
vāmāṃgasanniviṣṭādritanayaṃ praṇanāma ha

praṇamya daṃḍavadbhūmau pariluṭhya samaṃtataḥ //
tuṣṭāva parayā bhaktyā sa muniścaṃdraśekharam

// jaigīṣavya uvāca // //
namaḥ śivāya śāṃtāya sarvajñāya śubhātmane//
jagadānaṃdakaṃdāya paramānaṃdahetave

arūpāya sarūpāya nānārūpadharāya ca //
virūpākṣāya vidhaye vidhiviṣṇustutāya ca

sthāvarāya namastubhyaṃ jaṃgamāya namostute //
sarvātmane namastubhyaṃ namaste paramātmane

namastrailokyakāmyāya kāmāṃgadahanāya ca //
namo śeṣaviśeṣāya namaḥ śeṣāṃgadāya te //

śrīkaṃṭhāya namastubhyaṃ viṣakaṃṭhāya te namaḥ //
vaikuṃṭhavaṃdyapādāya namo'kuṃṭhitaśaktaye

namaḥ śaktyardhadehāya videhāya sudehine //
sakṛtpraṇāmamātreṇa dehidehanivāriṇe

kālāya kālakālāya kālakūṭa viṣādine //
vyālayajñopavītāya vyālabhūṣaṇadhāriṇe

namaste khaṃḍaparaśo namaḥ khaṃḍeṃ dudhāriṇe //
khaṃḍitāśeṣa duḥkhāya khaḍgakheṭakadhāriṇe

gīrvāṇagītanāthāya gaṃgākallolamāline //
gaurīśāya girīśāya giriśāya guhāraṇe //

caṃdrārdhaśuddhabhūṣāya caṃdrasūryāgnicakṣuṣe //
namaste carmavasana namo digvasanāyate

jagadīśāya jīrṇāya jarājanmaharāya te //
jīvāyate namastubhyaṃ jaṃjapūkādihāriṇe

namo ḍamaruhastāya dhanurhastāya te namaḥ //
trinetrāya namastubhyaṃ jagannetrāya te namaḥ

triśūlavyagrahastāya namastripathagādhara //
triviṣṭapādhināthāya trivedīpaṭhitāya ca

trayīmayāya tuṣṭāya bhaktatuṣṭipradāya ca //
dīkṣitāya namastubhyaṃ devadevāya te namaḥ

dāritāśeṣapāpāya namaste dīrghadarśine //
dūrāya duravāpyāya doṣanirdalanāya ca

doṣākara kalādhāra tyaktadoṣāgamāya ca //
namo dhūrjaṭaye tubhyaṃ dhattūrakusumapriya

namo dhīrāya dharmāya dharmapālāya te namaḥ //
nīlagrīva namastubhyaṃ namaste nīlalohita

nāmamātrasmṛtikṛtāṃ trailokyaiśvaryapūraka //
namaḥ pramathanāthāya pinākodyatapāṇaye //

paśupāśavimokṣāya paśūnāṃ pataye namaḥ //
nāmoccāraṇamātreṇa mahāpātakahāriṇe

parātparāya pārāya parāparaparāya ca //
namo'pāracaritrāya supavitrakathāya ca

vāmadevāya vāmārdhadhāriṇe vṛṣagāmine //
namo bhargāya bhīmāya natabhītiharāya ca

bhavāya bhavanāśāya bhūtānāṃpataye namaḥ //
mahādeva namastubhyaṃ maheśa mahasāṃpate

namo mṛḍānīpataye namo mṛtyuṃjayāya te //
yajñāraye namastubhyaṃ yakṣarājapriyāya ca

yāyajūkāya yajñāya yajñānāṃ phaladāyine //
rudrāya rudrapataye kadrudrāya ramāya ca

śūline śāśvateśāya śmaśānāvanicāriṇe //
śivāpriyāya śarvāya sarvajñāya namostu te

harāya kṣāṃtirūpāya kṣetrajñāya kṣamākara //
kṣamāya kṣitihartre ca kṣīragaurāya te namaḥ

aṃdhakāre namastubhyamādyaṃtarahitāya ca //
iḍādhārāya īśāya upedreṃdrastutāya ca

umākāṃtāya ugrāya namaste ūrdhvaretase //
ekarūpāya caikāya mahadaiśvaryarūpiṇe

anaṃtakāriṇe tubhyamaṃbikāpataye namaḥ //
tvamoṃkāro vaṣaṭkāro bhūrbhuvaḥsvastvameva hi

dṛśyādṛśya yadatrāsti tatsarvaṃ tvamu mādhava //
stutiṃ kartuṃ na jānāmi stutikartā tvameva hi //

vācyastvaṃ vācakastvaṃ hi vākca tvaṃ praṇatosmi te //
nānyaṃ vedmi mahādeva nānyaṃ staumi maheśvara

nānyaṃ namāmi gaurīśa nānyākhyāmādade śiva //
mūkonyanāmagrahaṇe badhironyakathāśrutau

paṃguranyābhigamane'smyaṃdho'nyaparivīkṣaṇe//
eka eva bhavānīśa ekakartā tvameva hi

pātā hartā tvamevaiko nānātvaṃ mūḍhakalpanā //
atastvameva śaraṇaṃ bhūyobhūyaḥ punaḥpunaḥ

saṃsārasāgare magnaṃ māmuddhara maheśvara //
iti stutvā maheśānaṃ jaigīṣavyo mahāmuniḥ

vācaṃyamo bhavatsthāṇoḥ purataḥ sthāṇusannibhaḥ //
iti stutiṃ samākarṇya muneścaṃdravibhūṣaṇaḥ //
uvāca ca prasannātmā varaṃ brūhīti taṃ munim

// jaigīṣavya uvāca // //
yadi prasanno deveśa tatastava padāṃbujāt //
mā bhavāni bhavānīśa dūraṃ dūrapadaprada

aparaśca varo nātha deyoyamavicārataḥ //
yanmayā sthāpitaṃ liṃgaṃ tatra sānnidhyamastu te

// īśvara uvāca // //
jaigīṣavya mahābhāga yaduktaṃ bhavatānagha //
tadastu sarvaṃ tebhīṣṭaṃ varamanyaṃ dadāmi ca

yogaśāstraṃ mayā dattaṃ tava nirvāṇasādhakam //
sarveṣāṃ yogināṃ madhye yogācāryo'stu vai bhavān

rahasyaṃ yogavidyāyā yathāvattvaṃ tapodhana //
saṃvetsyase prasādānme yena nirvāṇamāpsyasi

yathā nadī yathā bhṛṃgī somanaṃdī yathā tathā //
tvaṃ bhaviṣyasi bhakto me jarāmaraṇavarjitaḥ

saṃti vratāni bhūyāṃsi niyamāḥ saṃtyanekadhā //
tapāṃsi nānā saṃtyatra saṃti dānānyanekaśaḥ

śreyasāṃ sādhanānyatra pāpaghnānyapi sarvathā //
paraṃ hi paramaścaiṣa niyamo yastvayā kṛtaḥ

paro hi niyamaścaiṣa māṃ vilokya yadaśyate //
māmanālokya yadbhuktaṃ tadbhuktaṃ kevalatvagham

asamarcya ca yo bhuṅkte patrapuṣpaphalairapi //
retobhakṣī bhavenmūḍhaḥ sa janmānyekaviṃśatim

mahato niyamasyāsya bhavatānuṣṭhitasya vai //
nārhaṃti ṣoḍaśī mātrāmapyanye niyamā yamāḥ

ato maccaraṇābhyāśe tvaṃ nivatsyasi sarvathā //
ato naiḥśreyasīṃ lakṣmīṃ tatraiva prāpsyasi dhruvam

jaigīṣavyeśvaraṃ nāma liṃgaṃ kāśyāṃ sudurlabham //
trīṇi varṣāṇi saṃsevya labhedyogaṃ na saṃśayaḥ

jaigīṣavyaguhāṃ prāpya yogābhyasanatatparaḥ //
ṣaṇmāsena labhetsiddhiṃ vāñchitāṃ madanugrahāt

tava liṃgamidaṃ bhaktaiḥ pūjanīyaṃ prayatnataḥ //
vilokyā ca guhā ramyā parāsiddhimabhīpsubhiḥ

atra jyeṣṭheśvarakṣetre tvalliṃgaṃ sarvasiddhidam //
nāśayedaghasaṃghāni dṛṣṭaṃ spṛṣṭaṃ samarcitam

asmiñjyeṣṭheśvarakṣetre saṃbhojya śivayoginaḥ //
koṭibhojyaphalaṃ samyagekaikaparisaṃkhyayā

jaigīṣavyeśvaraṃ liṃgaṃ gopanīyaṃ prayatnataḥ //
kalau kaluṣabuddhīnāṃ purataśca viśeṣataḥ

kariṣyāmyatra sāṃnidhyamasmim̐lliṃge tapodhana//
yogasiddhipradānāya sādhakebhyaḥ sadaiva hi

dade śṛṇu mahābhāga jaigīṣavyāparaṃ varam //
tvayedaṃ yatkṛtaṃ stotraṃ yogasiddhikaraṃ param

mahāpāpaughaśamanaṃ mahāpuṇyapravardhanam //
mahābhītipraśamanaṃ mahābhaktivivardhanam

etatstotrajapātpuṃsāmasādhyaṃ naiva kiṃcana //
tasmātsarvaprayatnena japanīyaṃ susādhakaiḥ ४

iti dattvā varaṃ tasmai smarāriḥ smeralocanaḥ //
dadarśa brāhmaṇāṃ statra sametānkṣetravāsinaḥ

// skaṃda uvāca // //
niśamyākhyānamatulametatprājñaḥ prayatnataḥ //
niṣpāpo jāyate martyo nopasargaiḥ prabādhyate

iti śrīskāṃde mahāpurāṇa ekāśītisāhasryāṃ saṃhitāyāṃ caturthe kāśīkhaṃḍa uttarārdhe jyeṣṭheśākhyānaṃ nāma triṣaṣṭitamo'dhyāyaḥ