Skanda Purana · Chapter 4.60

skaṃda uvāca //
uktā paṃcanadotpattirmitrāvaruṇanaṃdana //
idānīṃ kathayiṣyāmi mādhavāviṣkṛtiṃ parām

yāṃ śrutvā śraddhayā dhīmānpāpebhyo mucyate kṣaṇāt //
na ca śriyā viyujyeta saṃyujyeta vṛṣeṇa ca

āgatya maṃdarādadrerupeṃdraścaṃdraśekharam //
āpṛcchya tārkṣyarathagaḥ kṣaṇādvārāṇasīṃ purīm

divo dāsaṃ mahīpālaṃ samuccāṭya svamāyayā //
sthitvā pādodake tīrthe keśavākhya svarūpataḥ

mahimānaṃ paraṃ kāśyāṃ vicārya suvicārya ca //
dṛṣṭvā paṃcanadaṃ tīrthaṃ parāṃ mudamavāpa ha

uvāca ca prasannātmā puṃḍarīkavilocanaḥ //
agaṇyā api vaikuṃṭha guṇā vigaṇitā mayā

kva kṣīranīradhau saṃti tāvaṃto nirmalā guṇāḥ //
yāvaṃto vijayaṃ tetra kāśyāṃ paṃcanade hrade

śvetadvīpepi sāmagrī kva guṇānāṃ garīyasī //
īdṛśī yādṛśī kāśyāṃ dhūtapāpesti pāvanī

mude kaumodakī sparśastathā na mama jāyate // dhūtapāpāṃbu saṃparko yathā bhavati sarvathā

na kṣīranīradhijayā sukhaṃ me śliṣṭagātrayā //
tathā bhavedyathātra syātspṛṣṭayā dhūtapāpayā

itthaṃ paṃcanade tīrthe kṣīranīradhijādhavaḥ //
saṃpreṣya tārkṣyaṃ tryakṣāgre vṛttāṃtaviniveditum

ānaṃdakānanabhavaṃ divodāsa kṣamāpateḥ //
saṃvarṇayanguṇagrāmaṃ puṇyaṃ pāṃcanadodbhavam

sukhopaviṣṭaḥ saṃhṛṣṭaḥ sudṛṣṭirviṣṭaraśravāḥ //
dṛṣṭavāṃstapasā juṣṭamapuṣṭāṃgaṃ tapodhanam

sa ṛṣistaṃ samabhyetya puṃḍarīkākṣamacyutam //
upopaviṣṭakamalaṃ vanamālāvirājitam

śaṃkhapadmagadācakra caṃcatkaracatuṣṭayam //
kaustubhodbhāsitoraskaṃ pītakauśeyavāsasam

sunīleṃdīvararuciṃ susnigdha madhurākṛtim //
nābhīhradalasatpadma supāṭalaradacchadam

dāḍimībījadaśanaṃ kirīṭadyotitāṃbaram //
deveṃdravaṃditapadaṃ sanakādipariṣṭutam

divyarṣibhirnāradādyaiḥ parigītamahodayam //
prahlādādyairbhāgavataiḥ parinaṃditamānasam

dhṛtaśārṅgadhanurdaṃḍaṃ daṃḍitākhiladānavam//
madhukaiṭabhahaṃtāraṃ kaṃsavidhvaṃsasūcakam

kaivalyaṃ yatparaṃ brahma nirākāramagocaram //
taṃ puṃ mūrtyā pariṇataṃ bhaktānāṃ bhaktihetutaḥ

vedāviduryadākāraṃ naivopaniṣadoditam//
brahmādyā na ca gīrvāṇāścakre netrātithiṃ satam

praṇanāma mudāyuktaḥ kṣitivinyastamastakaḥ //
sa ṛṣistaṃ hṛṣīkeśamagnibiṃdurmahātapāḥ

tuṣṭāva parayā bhaktyā maulibaddhakarāṃjaliḥ //
adhyastavistīrṇaśilaṃ balidhvaṃsinamacyutam

tatra paṃcanadābhyāśe mārkaṃḍeyādi sevite //
goviṃdamagnibiṃduḥ sa stutavāṃstuṣṭamānasaḥ

// agnibiṃduruvāca // //
oṃ namaḥ puṃḍarīkākṣa bāhyāṃtaḥ śaucadāyine //
sahasraśīrṣā puruṣaḥ sahasrākṣaḥ sahasrapāt

namāmi te padadvaṃdvaṃ sarvadvaṃdvanivārakam //
nirdvaṃdvayā dhiyā viṣṇo jiṣṇvādi suravaṃdita

yaṃ stotuṃ nādhigacchaṃti vāco vācaspaterapi //
tamīṣṭe ka iha stotuṃ bhaktiratra balīyasī

api yo bhagavānīśo manaḥprācāmagocaraḥ //
samādṛśairalpadhībhiḥ kathaṃ stutyo vacaḥ paraḥ

yaṃ vāco na viśaṃtīśaṃ manatīha mano na yam //
mano girāmatītaṃ taṃ kaḥ stotuṃ śaktimānbhavet

yasya niḥśvasitaṃ vedāḥ sa ṣaḍaṃgapadakramāḥ //
tasya devasya mahimā mahānkairavagamyate

ataṃdritamanobuddhīṃdriyā yaṃ sanakādayaḥ //
dhyāyaṃtopi hṛdākāśe na viṃdaṃti yathārthataḥ

nāradādyairmunivarairābāla brahmacāribhiḥ //
gīyamānacaritropi na samyagyodhigamyate

taṃsūkṣmarūpamajamavyayamekamādyaṃ bahmādyagocaramajeyamanaṃtaśaktim //
nityaṃ nirāmayamamūrtamaciṃtyamūrtiṃ kastvāṃ carācara carācarabhinna vetti

ekaikameva tava nāmaharenmurāre janmārjitāghamaghināṃ ca mahāpadāḍhyam //
dadyātphalaṃ ca mahitaṃ mahato makhasya japtaṃ mukuṃdamadhusūdanamādhaveti

nārāyaṇeti narakārṇava tāraṇeti dāmodareti madhuheti caturbhujeti //
viśvaṃbhareti virajeti janārdaneti kvāstīha janma japatāṃ kva kṛtāṃtabhītiḥ

ye tvāṃ trivikrama sadā hṛdi śīlayaṃti kādaṃbinī rucira rociṣamaṃbujākṣam //
saudāmanīvilasitāṃśukavītamūrte tepi spṛśaṃti tava kāṃtimaciṃtyarūpām

śrīvatsalāṃchanaharecyutakaiṭabhāre goviṃdatārkṣya rathakeśavacakrapāṇe //
lakṣmīpate danujasūdana śārṅgapāṇe tvadbhaktibhāji na bhayaṃkvacidasti puṃsi

yairarcitosi bhagavaṃstulasīprasūnairdūrīkṛtaiṇamadasaurabhadivyagaṃdhaiḥ //
tānarcayaṃti divi devagaṇāḥsamastā maṃdāradāmabhiralaṃ vimalasvabhāvān

yadvāci nāma tava kāmadamabjanetra yacchrotrayostava kathā madhurākṣarāṇi //
yaccittabhittilikhitaṃ bhavatosti rūpaṃ nīrūpabhūpapadavī nahi tairdurāpā

ye tvāṃ bhajaṃti satataṃ bhuviśeṣaśāyiṃstāñchrīpate pitṛpatīṃdra kuberamukhyāḥ //
vṛṃdārakā divi sadaiva sabhājayaṃti svargāpavargasukhasaṃtatidānadakṣa

ye tvāṃ stuvaṃti satataṃ divitānstuvaṃti siddhāpsaromaragaṇā lasadabjapāṇe //
viśrāṇayatyakhilasiddhidakovinā tvāṃ nirvāṇacārukamalāṃ kamalāyatākṣa

tvaṃ haṃsi pāsi sṛjasi kṣaṇataḥ svalīlā līlāvapurdhara viriṃcinatāṃghriyugma//
viśvaṃ tvameva paraviśvapatistvameva viśvasyabījamasi tatpraṇatosmi nityam

stotā tvameva danujeṃdraripo stutistvaṃ stutyastvameva sakalaṃ hi bhavānihaikaḥ //
tvatto na kiṃcidapi bhinnamavaimi viṣṇo tṛṣṇāṃ sadā kṛṇuhi me bhavajāṃbhavāre

iti stutvā hṛṣīkeśamagnibiṃdurmahātapāḥ //
tasthau tūṣṇīṃ tato viṣṇuruvāca varado munim

śrīviṣṇuruvāca //
agnibiṃdo mahāprājña mahatā tapasāṃnidhe //
varaṃ varaya suprītastavādeyaṃ na kiṃcana

agnibiṃduruvāca // //
yadi prītosi bhagavanvaikuṃṭheśa jagatpate //
kamalākāṃta taddehi yadiha prārthayāmyaham//

kṛtānujñotha hariṇā bhrūbhaṃgena sa tāpasaḥ //
kṛtapraṇāmo hṛṣṭātmā varayāmāsa keśavam

bhagavansarvagopīha tiṣṭha paṃcanade hrade //
hitāya sarva jaṃtūnāṃ mumukṣūṇāṃ viśeṣataḥ

lakṣmīśe na varo mahyameṣa deyo'vicārataḥ //
nānyaṃ varaṃ samīhehaṃ bhaktiṃ ca tvapadāṃbuje

iti śrutvā varaṃ tasyāgnibiṃdormadhusūdanaḥ //
prītaḥ paropakārārthaṃ tathetyāhābdhijāpatiḥ

// śrīviṣṇuruvāca // //
agnibiṃdo muniśreṣṭha sthāsyāmyahamiha dhruvam //
kāśībhaktimatāṃ puṃsāṃ muktimārgaṃ samādiśan

mune punaḥ prasannosmi varaṃ brūhi dadāmi te //
atīva mama bhaktosi bhaktistestu dṛḍhā mayi

ādāveva hi tiṣṭhāsurahamatra taponidhe //
tatastvayā samabhyarthi sthāsyāmyatra sadaiva hi

prāpya kāśīṃ sudurmedhāḥ kastyajejjñānavānyadi //
anarghyaṃ prāpya māṇikyaṃ hitvā kācaṃ ka īhate

alpīyasā śrameṇeha vapuṣo vyayamātrataḥ //
avaśyaṃ gatvarasyāśu yathāmuktistathā kva hi

vinimayya jarājīrṇaṃ dehaṃ pārthivamatra vai //
prājñāḥ kimu na gṛhṇīyuramṛtaṃ nairjaraṃ vapuḥ

na tapobhirna vā dānairna yajñairbahudakṣiṇaiḥ //
anyatra labhyate mokṣo yathā kāśyāṃ tanu vyayāt

api yogaṃ hi yuṃjānā yogino yatamānasāḥ //
naikenajanmanā muktāḥ kāśyāṃ muktā vapurvyayāt

idameva mahādānamidameva mahattapaḥ //
idameva vrataṃ śreṣṭhaṃ yatkāśyāṃ mriyate tanuḥ

sa eva vidvāñjagati sa eva vijiteṃdriyaḥ //
sa eva puṇyavāndhanyo labdhvā kāśīṃ na yastyajet

tāvatsthāsyāmyahaṃ cātra yāvatkāśī mune tviha //
pralayepi na nāśosyāḥ śivaśūlāgra susthiteḥ

ityākarṇya giraṃ viṣṇoragnibiṃdurmahāmuniḥ //
prahṛṣṭaromā provāca punaranyaṃ varaṃ vṛṇe

māpate mama nāmnātra tīrthe paṃcanade śubhe //
abhaktebhyopi bhaktebhyaḥ sthito muktiṃ sadādiśa

yetra paṃcanade snātvā gatvā deśāṃtareṣvapi //
narā paṃcatvamāpannā muktiṃ tebhyopi vai diśa

yetu paṃcanade snātvā tvāṃ bhajiṣyaṃti mānavāḥ //
calācalāpi dvairūpā mā tyākṣīcchrīśca tānnarān

// śrīviṣṇuruvāca // //
evamastvagnibiṃdotra bhavatā yadvṛtaṃmune//
tvannāmno'rdhena me nāma mayā saha bhaviṣyati

biṃdumādhava ityākhyā mama trailokyaviśrutā //
kāśyāṃ bhaviṣyati mune mahāpāpaugha ghātinī

ye māmatra narāḥ puṇyāḥ puṇye paṃcanade hrade //
sadā saparyayiṣyaṃti teṣāṃ saṃsārabhīḥ kutaḥ

vasusvarūpiṇī lakṣmīrlakṣmīrnirvāṇasaṃjñikā //
tatpārśvagā sadā yeṣāṃ hṛdi paṃcanade hyaham

yairna paṃcanadaṃ prāpya vasubhiḥ prīṇitā dvijāḥ //
āśulabhyavipattīnāṃ teṣāṃ tadvasuroditi

ta eva dhanyā lokesminkṛtakṛtyāsta eva hi //
prāpya yairmama sāṃnidhyaṃ vasavo mama sātkṛtāḥ

biṃdutīrthamidaṃ nāma tava nāmnā bhaviṣyati //
agnibiṃdo muniśreṣṭha sarvapātakanāśanam

kārtike biṃdutīrthe yo brahmacaryaparāyaṇaḥ //
snāsyatyanudite bhānau bhānujāttasya bhīḥ kutaḥ

api pāpasahasrāṇi kṛtvā mohena mānavaḥ //
ūrje dharmanade snāto niṣpāpo jāyate kṣaṇāt // '७४ //
yāvatsvasthosti dehoyaṃ yāvanneṃdriyaviklavaḥ //
tāvadvratāni kurvīta yato dehaphalaṃ vratam

ekabhaktena naktena tathaivāyācitena ca //
upavāsena dehoyaṃ saṃśodhyo śucibhājanam

kṛcchracāṃdrāyaṇādīni kartavyāni prayatnataḥ //
aśuciḥ śucitāmeti kāyo yadvratadhāraṇāt

vrataiḥ saṃśodhite dehe dharmo vasati niścalaḥ //
arthakāmau sanirvāṇau tatra yatra vṛṣa sthitiḥ

tasmādvratāni satataṃ caritavyāni mānavaiḥ //
dharmasānnidhya kartṛṇi caturvargaphalepsubhiḥ

sadā kartuṃ na śaknoti vratāni yadi mānavaḥ //
cāturmāsyamanuprāpya tadā kuryātprayatnataḥ

bhūśayyā brahmacaryaṃ ca kiṃcidbhakṣyaniṣedhanam //
ekabhaktādi niyamo nityadānaṃ svaśaktitaḥ

purāṇaśravaṇaṃ caiva tadarthācaraṇaṃ punaḥ //
akhaṃḍadīpodbodhaśca mahāpūjeṣṭadaivate

prabhūtāṃkurabījāḍhye deśe cāpi gatāgatam //
yatnena varjayeddhīmānmahādharmavivṛddhaye

asaṃbhāṣyā na saṃbhāṣyāścāturmāsya vratasthitaiḥ //
maunaṃ cāpi sadā kāryaṃ tathyaṃ vaktavyameva vā

niṣpāvāṃśca masūrāṃśca kodravānvarjayedvratī //
sadā śucibhirāstheyaṃ spraṣṭavyo nāvratī janaḥ

daṃtakeśāṃbarādīni nityaṃ śodhyāni yatnataḥ //
aniṣṭaciṃtā no kāryā vratinā hṛdyapi kvacit

dvādaśasvapi māseṣu vratino yatphalaṃ bhavet //
cāturmāsyavratabhṛtāṃ tatphalaṃ syādakhaṃḍitam

caturṣvapi ca māseṣu na sāmarthyaṃ vrate yadi //
tadorje vratinā bhāvyamapyabdaphalamicchatā

avrataḥ kārtiko yeṣāṃ gato mūḍhadhiyāmiha //
teṣāṃ puṇyasya leśopi na bhavetsūkarātmanām

kṛcchraṃ vā cātikṛcchraṃ vā prājāpatyamathāpi vā //
saṃprāpte kārtike māsi kuryācchaktyāti puṇyavān

ekāṃtaraṃ vrataṃ kuryāttrirātra vratameva vā //
paṃcarātraṃ saptarātraṃ saṃprāpte kārtike vratī

pakṣavrataṃ vā kurvīta māsopoṣaṇameva vā //
norjo vaṃdhyo vidhātavyo vratinā kenacitkvacit

śākāhāraṃ payohāraṃ phalāhāramathāpi vā //
caredyavānnāhāraṃ vā saṃprāpte kārtike vratī

nityanaimittikaṃ snānaṃ kuryādūrje vratī naraḥ //
brahmacaryaṃ caredūrje mahāvrataphalārthavān

bāhulaṃ brahmacaryeṇa yaḥ kṣipecchucimānasaḥ //
samastaṃ hāyanaṃ tena brahmacaryakṛtaṃ bhavet

yastu kārtikikaṃ māsamupavāsaiḥ samāpayet //
apyabdamapi teneha bhavetsamyagupoṣitam // ९६ /
śākāhārapayohārairūrjoṃ yairativāhitaḥ //
akhaṃḍitā śarattena tadāhāreṇa yāpitā

patrabhojī bhavedūrje kāṃsyaṃ tyājyaṃ prayatnataḥ //
yo vratī kāṃsyabhojī syānna tadvrataphalaṃ labhet

kāṃsyasya niyame dadyātkāṃsyaṃ sarpiḥ prapūritam //
ūrje na bhakṣayetkṣaudramatikṣudragatipradam

madhutyāge ghṛtaṃ dadyātpāyasaṃ ca saśarkaram //
abhyaṃge'bhyavahāre ca tailamūrje vivarjayet

bhūyātsa nārakī dehī tatrābhyaṃgādyatonagha //
tailatyāge tilāndadyāddroṇamātrānsa kāṃcanān

kārtike matsyabhojī yaḥ sa taimīṃ yonimṛcchati //
bāhule māṃsabhojī yaḥ sa kṛmiḥpūyaśoṇite

māṃsāśinopi ye bhūpāstyajeyustepi kārtike //
matsyamāṃsāni saṃtyajya kārttike vratatatparaḥ

matsyamāṃsādanāddoṣādbahirbhavati niścitam //
niyame matsyamāṃsānāṃ dadyātkārtikike vratī //
kūśmāṃḍāni samāṣāṇi daśasvarṇayutānyapi

kārtike mīnabhojī yaḥ sośnātyamṛtamevahi //
sughaṃṭāṃ satilāṃ maunī sahiraṇyāṃ pradāpayet

kārtike lavaṇaṃ tyaktaṃ yena vratabhṛtā satā //
tyaktāḥ sarve rasāstena tattyāgī gāṃ pradāpayet

bhūśayyāṃ kārtike kurvanna bhuvaṃ saṃspṛśedvratī //
paryaṃkaṃ bhūśayo dadyātsatūlaṃ sopadhānakam

dīpaṃ yaḥ kārtike dadyādakhaṃḍaṃ ghṛtavartikam //
mohāṃdha tamasaṃ prāpya sa na gacchati durgatim

yaḥ kuryātkārtike māse rajanyāṃ dīpakaumudīm //
tāmisraṃ cāṃdhatāmisraṃ na sa paśyetkadācana

pāpāṃdhakārasaṃkruddhaḥ kārtike dīpadānataḥ //
krodhāṃdhakāritamukhaṃ bhāskariṃ sa na vīkṣate

sa uddyotamayaṃ paśyettrailokyaṃ sacarācaram //
prabodhayenmamāgre yo dīpaṃ sojvalavartikam

paṃcāmṛtānāṃ kalaśairūrje māṃ snāpayennaraḥ //
kṣīrābdhitaṭamāsādya vasetkalpaṃ sa puṇyavān

pratikṣapaṃ kārtikike kurvañjyotsnāṃ pradīpajām //
mamāgre bhaktisaṃyukto garbhadhvāṃtaṃ na saṃviśet

ājyavartikamūrje yo dīpaṃ megre prabodhayet //
buddhibhraṃśaṃ na cāpnoti mahāmṛtyubhaye sati

kārtike māsi me yātrā yaiḥ kṛtā bhaktitatparaiḥ //
biṃdutīrthe kṛtasnānaisteṣāṃ muktirna dūrataḥ

vratinaḥ kārtike māsi snātasya vidhivanmama //
dāmodaragṛhāṇārghyaṃ danujeṃdraniṣūdana

snāne naimittike kṛṣṇa kārtike pāpaśoṣaṇe //
gṛhṇātvarghyaṃ mayā dattaṃ rādhayā sahito bhavān

imau maṃtrau samuccārya yorghyaṃ mahyaṃ prayacchati //
suvarṇaratna puṣpāṃbu yujā śaṃkhena puṇyavān

suvarṇapūrṇapṛthivī saṃkalpodakapūrvakam //
tena dattā bhavetsamyaksupātrāya suparvaṇi

ekādaśīṃ samāsādya prabodhakaraṇīṃ mama //
biṃdutīrthakṛtasnāno rātrau jāgaraṇānvitaḥ

dīpānprobodhya bahuśo mamālaṃkṛtya śaktitaḥ //
tauryatrikavinodena purāṇaśravaṇādibhiḥ

mahāmahotsavaṃ kṛtvā yāvatpūrṇā tithirbhavet //
tatrānnadānaṃ bahuśaḥ kṛtvāmatprītaye naraḥ

mahāpātakayuktopi na viśetpramadodaram //
biṃdumādhavanāmānaṃ yo māmatra samarcayet

biṃdutīrthakṛtasnāno nirvāṇaṃ sa hi viṃdati //
ādimādhavanāmāhaṃ pūjyaḥ satyayuge mune

anaṃtamādhavo jñeyastretāyāṃ sarvasiddhidaḥ //
śrīdamādhavasaṃjñohaṃ dvāpare paramārthakṛt

kalau kalimaladhvaṃsī jñeyohaṃ biṃdumādhavaḥ //
kalau kalmaṣasaṃpannā na māṃ viṃdaṃti mānavāḥ

mamaiva māyayā mūḍhā bhedavādaparāyaṇāḥ//
mama bhaktiṃ prakurvāṇā ye viśveśaṃ dviṣaṃti vai

vidviṣo mama te jñeyāḥ piśācapadagāminaḥ //
paiśācīṃ yonimāpyāpi kālabhairavaśāsanāt

triṃśadvarṣa sahasrāṇi uṣitvā duḥkhasāgare //
viśveśānugrahādeva tato mokṣamavāpnuyuḥ

tasmāddveṣo na kartavyo viśveśe paramātmani //
viśveśa dveṣiṇāṃ puṃsāṃ prāyaścittaṃ yato nahi

manasāpi hi viśveśaṃ vidviṣaṃtīha ye'dhamāḥ //
adhyāsateṃdhatāmisraṃ mṛtāstenyatra saṃtatam

śivaniṃdāparā ye ca ye pāśupataniṃdakāḥ//
vidviṣo mama te jñeyā patato narake'śucau

aṣṭāviṃśati koṭīṣu narakeṣu krameṇa hi //
kalpaṃ kalpaṃ vaseyuste ye viśveśvaraniṃdakāḥ

viśveśānugrahaṃ prāpya munehamapi muktidaḥ //
madbhaktaistadviśeṣeṇa sevyo viśveśvaro'niśam

iyaṃ vārāṇasī jñeyā mune pāśupatasthalī //
tasmātpaśupatiḥ sevyaḥ kāśyāṃ niśreyasārthibhiḥ

atra paṃcanade tīrthe snāti viśveśvaraḥ svayam //
ūrje sadaiva sagaṇaḥ saskaṃdaḥ saparicchadaḥ

brahmā savedaḥ samakho brahmāṇyādyāśca mātaraḥ //
saptābdhayaḥ sasaritaḥ snāṃtyūrje dhūtapāpake

sacetanā hi yāvaṃtastrailokye dehadhāriṇaḥ //
tāvaṃtaḥ snātumāyāṃti kārtike dhūtapāpake

yairna paṃcanade snātaṃ prāpya kārtikikaṃ śubham//
jalabududavatteṣāṃ vṛthājanma śarīriṇām

ānaṃdakānanaṃ puṇyaṃ puṇyaṃ pāṃcanadaṃ tataḥ //
tatopi mama sānnidhyamagnibiṃdo mahāmune

anenaivānumānena viddhi paṃcanadasya vai //
mahimānaṃ mahāprājña sarvatīrthottamottamam

śrutvāpi yaṃ mahāprājño mahāpāpaiḥ pramucyate //
viṣṇormukhāditi śrutvā sognibiṃdurmahāmuniḥ

punaḥ praṇamya papraccha biṃdumādhavamacyutam

agnibiṃduruvāca //
bhagavañchrotumicchāmi biṃdumādhava tadvada //
katidhā tava rūpāṇi kāśyāṃ saṃti janārdana

bhaviṣyāṇyapi kānīha tāni me kathayācyuta //
yāni saṃpūjyate bhaktāḥ prāpsyaṃti kṛtakṛtyatām

//
iti śrīskāṃde mahāpurāṇa ekāśītisāhasryāṃ saṃhitāyāṃ caturthe kāśīkhaṃḍa uttarārdhe biṃdumādhavāvirbhāvonāma ṣaṣṭitamo'dhyāyaḥ