Skanda Purana · Chapter 4.55

// skaṃda uvāca //
anyepi ye gaṇāstatra kāśyāṃ liṃgāni cakrire //
tāṃśca te kathayiṣyāmi kuṃbhayone niśāmaya

gaṇena piṃgalākhyena piṃgalākhyeśasaṃjñitam //
liṃgaṃ pratiṣṭhitaṃ śaṃbhoḥ kapardīśādudagdiśi

tasya darśanamātreṇa pāpānāṃ jāyate kṣayaḥ //
vīrabhadro mahāprīto devadevasya śūlinaḥ

vīrabhadreśvaraṃ liṃgaṃ dhyāyedadyāpi niścalaḥ //
tasya darśanamātreṇa vīrasiddhiḥ prajāyate

avimukteśvarātpaścādvīrabhadreśvaraṃ naraḥ //
samarcya na raṇe bhaṃgaṃ kadācidapi cāpnuyāt

vīrabhadraḥ svayaṃ sākṣādvīramūrtidharo mune //
saṃharedviprasaṃghātamavimuktanivāsināma

bhadrayā bhadrakālyā ca bhāryayā śubhayā yutam //
vīrabhadraṃ narobhyarcya kāśīvāsaphalaṃ labhet

kirātena kirāteśaṃ liṃgaṃ kāśyāṃ pratiṣṭhitam //
kedārāddakṣiṇe bhāge bhaktānāmabhayapradam

caturmukho gaṇaḥ śrīmānvṛddhakāleśa sannidhau //
caturmukheśvaraṃ liṃgaṃ dhyāyedadyāpi niścalaḥ

bhaktāścaturmukheśasya caturānanavaddivi //
pūjyaṃte surasaṃghātaiḥ sarvabhogasamanvitāḥ// 4.2.55.१ ०//
nikuṃbheśvaramālokya nikuṃbhagaṇapūjitam //
pūjayitvā vrajangrāmaṃ kāryasiddhimavāpnuyāt //
kubereśa samīpetu śivaloke mahīyate

paṃcākṣeśaṃ mahāliṃgaṃ mahādevasya dakṣiṇe //
samabhyarcya naraḥ kāśyāṃ jātismṛtimavāpnuyāt

bhārabhūteśvaraṃ liṃgaṃ bhārabhūtagaṇārcitam//
aṃtargṛhottaradvāri dhyātvā śivapure vaset

bhārabhūteśvaraṃ liṃgaṃ yaiḥ kāśyāṃ na vilokitam //
bhārabhūtāḥ pṛthivyāste'vakeśina iva drumāḥ

gaṇena tryakṣasaṃjñena liṃgaṃ tryakṣeśvaraṃ param //
trilocanapurobhāge śīlyetādyāpi kuṃbhaja

tasya liṃgasya ye bhaktāste tu dehāvasānataḥ //
tryakṣā eva prajāyaṃte nātra kāryā vicāraṇā

kṣemako nāma gaṇapaḥ kāśyāṃ mūrtidharaḥ svayam //
viśveśvaraṃ sarvagataṃ dhyāyedadyāpi niścalaḥ

kṣemakaṃ pūjayedyastu vārāṇasyāṃ mahāgaṇam //
vighnāstasya pralīyaṃte kṣemaṃ syācca padepade

deśāṃtaraṃ gato yastu tasyāgamanakāmyayā //
kṣemakaṃ pūjanīyotra kṣemeṇāśu sa āvrajet

lāṃgalīśvaramālokya liṃgaṃ lāṃgalinārcitam //
viśveśāduttarebhāge na naro rogabhāgbhavet

lāṃgalīśaṃ sakṛtpūjya paṃcalāṃgaladānajam //
phalaṃ prāpnotyavikalaṃ sarvasaṃpatkaraṃ param

virādheśvaramārādhya virādhagaṇapūjitam//
sarvāparādhayuktopi nāparādhyati kutracit

dinedineparādho yaḥ kriyate kāśivāsibhiḥ //
sa yāti saṃkṣayaṃ kṣipraṃ virādheśa samarcanāt

nairṛte daṃḍhapāṇastu virādheśaṃ prayatnataḥ//
natvā sarvāparādhebhyo mucyate nātra saṃśayaḥ

sumukheśaṃ mahāliṃgaṃ sumukhākhyagaṇārcitam //
paścimābhimukhaṃ liṃgaṃ dṛṣṭvā pāpaiḥ pramucyate

snātvā pilipilā tīrthe sumukheśaṃ vilokya ca //
sadaiva sumukhaṃ paśyeddharmarājaṃ na durmukham

āṣāḍhinārcitaṃ liṃgamāṣāḍhīśvarasaṃjñakam //
dṛṣṭvāṣāḍhayāṃ naro bhaktyā sarvaiḥ pāpaiḥ pramucyate

udīcyāṃ bhārabhūteśādāṣāḍhīśaṃ samarcayan //
āṣāḍhyāṃ paṃcadaśyāṃ vai na pāpaiḥ paritapyate

śuciśuklacaturdaśyāṃ paṃcadaśyāmathāpi vā //
kṛtvā sāṃvatsarīṃ yātrāmanenā jāyate naraḥ

// skaṃda uvāca // //
mune gaṇeṣu caiteṣu vārāṇasyāṃ sthiteṣviti //
svanāmnā sthāpya liṃgāni viśveśaparituṣṭaye //

viśveśaściṃtayāṃ cakre punaḥ kāśīpravṛttaye //
kaṃ vā hitaṃ prahityādya nirvṛtiṃ paramāṃ bhaje

yoginyastigmagurvedhāḥ śaṃkukarṇamukhāgaṇāḥ //
vyāvṛttyanāgatāḥ kāśyāḥ siṃdhugā iva siṃdhavaḥ

dhuvaṃ kāśyāṃ praviṣṭā ye te praviṣṭā mamodare //
teṣāṃ vinirgamo nāsti dīptegnau haviṣāmiva

yeṣāṃ hi saṃsthitiḥ kāśyāṃ liṃgārcanaratātmanām //
ta eva mama liṃgāni jaṃgamāni na saṃśayaḥ

sthāvarā jaṃgamāḥ kāśyāmacetanasacetanāḥ //
sarve mamaiva liṃgāni tebhyo druhyaṃti durdhiyaḥ

vāci vārāṇasī yeṣāṃ śrutau vaiśveśvarī kathā //
ta eva kāśī liṃgāni varāṇyarcyānyahaṃ yathā

vārāṇasīti kāśīti rudrāvāsa iti sphuṭam //
mukhādvinirgataṃ yeṣāṃ teṣāṃ na prabhavedyamaḥ

ānaṃdakānanaṃ prāpya ye nirānaṃdabhūmikām //
anyāṃ hṛdāpi vāṃchaṃti nirānaṃdāḥ sadātra te

adyaiva vāstumaraṇaṃ bahukālāṃtarepi vā//
kalikāla bhiyā puṃsāṃ kāśī tyājyā na karhicit

avaśyaṃbhāvino bhāvā bhaviṣyaṃti padepade //
salakṣmīnilayāṃ kāśīṃ te tyajaṃti kuto dhiyaḥ

varaṃ vighnasahasrāṇi soḍhavyāni padepade //
kāśyāṃ nānyatra nirvighnaṃ vāṃchedrājyamapi kvacit

kiyannimeṣasaṃbhogyāḥ saṃti lakṣmyāḥ padepade //
paraṃ niraṃtarasukhā'mutrāpyatrāpi kā śikā

viśvanātho hyahaṃ nāthaḥ kāśikāmuktikāśikā //
sudhātaraṃgā svargaṃgā trayyeṣā kinna yacchati

paṃcakrośyāparimitā tanureṣā purī mama //
avicchinnapramāṇardhirbhaktanirvāṇakāraṇam

saṃsārabhārakhinnānāṃ yātāyātakṛtāṃ sadā //
ekaiva me purī kāśī dhruvaṃ viśrāmabhṛmikā

maṃḍapaḥ kalpavallīnāṃ manorathaphalairalam //
phalitaḥ kāśikākhyoyaṃ saṃsārādhvajuṣāṃ sadā

cakravarteriyaṃ chatraṃ vicitraṃ sarvatāpahṛt //
kāśīnirvāṇarājasya mamaśūlocca daṃḍavat

nirvāṇalakṣmīṃ ye puṇyāḥ parivāṃchaṃti līlayā //
niraṃtarasukhaprāptyai kāśī tyājyā na tai nṛbhiḥ

mamānaṃdavane ye vai niraṃ tara vanaukasaḥ //
mokṣalakṣmīphalānyatra susvādūni labhaṃti te

nirmamaṃ cāpi nirmohaṃ yā māmapi vimohayet //
kairna saṃsmaraṇīyā sā kāśī viśvavimohinī//

nāmāpi madhuraṃ yasyāḥ parānaṃdaprakāśakam //
kāśyāḥ kāśīti kāśīti sā kaiḥ puṇyairna japyate

kāśīnāmasudhāpānaṃ ye kurvaṃti niraṃtaram //
teṣāṃ vartma bhavatyeva sudhāma vasudhāmayam

mamatārahitasyāpi mama sarvātmano dhruvam //
ta eva māmakā loke ye kāśīnāma jāpakāḥ

rahasyamiti vijñāya vārāṇasyā gaṇeśvaraiḥ //
sabrahmayoginī bradhraiḥ sthitaṃ tatraiva nānyathā

anyathā tāśca yoginyaḥ saraviḥ sapitāmahaḥ //
te gaṇā māṃ parityajya kathaṃ tiṣṭheyuranyataḥ

atīva bhadraṃ saṃjātaṃ kāśyāṃ tiṣṭhatsu teṣu hi //
ekopi bheda prabhavedrājye rājyāṃtaraṃ vinā

labdhapraveśāstāvaṃtaste sarve matsvarūpiṇaḥ //
yatiṣyaṃti yatovaśyaṃ madāgamanahetave

anyānapi preṣayāmi matpārśvaparivartinaḥ //
ye te tatra sthitāḥ śreṣṭhā apigaṃtāsmyahaṃ tataḥ

vicāryeti mahādevaḥ samāhūya gajānanam //
prāhiṇotkathayitveti gaccha kāśīmitaḥ suta

tatrasthitopi saṃsiddhayai yatasva sahito gaṇaiḥ //
nirvighnaṃ kuru cāsmākaṃ nṛpe vighnaṃ samācara

ādhāya śāsanaṃ mūrdhni gaṇādhīśotha dhūrjaṭeḥ //
pratasthe tvaritaḥ kāśīṃ sthitijñaḥ sthitihetave

iti śrīskāṃde mahāpurāṇa ekāśīti sāhasryāṃ saṃhitāyāṃ caturthe kāśīkhaṃḍe uttarārddhe kāśīvarṇana gaṇeśapreṣaṇaṃ nāma paṃcapaṃcāśattamo'dhyāyaḥ