Skanda Purana · Chapter 4.41

// skaṃda uvāca // //
uṣitvaivaṃ gṛhe vipro dvitīyādāśramātparam //
valīpalitasaṃyuktastṛtīyāśramamāviśet

apatyāpatyamālokya grāmyāhārānvisṛjya ca //
patnīṃ putreṣu saṃtyajya patnyā vā vanamāviśet

vasānaścarmacīrāṇi sāgnirmunyannavartanaḥ //
jaṭī sāyaṃprage snāyī śmaśrulonakhalomabhṛt

śākamūlaphalairvāpi paṃcayajñanna hāpayet //
ammūlaphalabhikṣābhirarcayedbhikṣukātithīn

anādātā ca dātā ca dāṃtaḥ svādhyāyatatparaḥ //
vaitānikaṃ ca juhuyādagnihotraṃ yathāvidhi

munyannaiḥ svayamānītaiḥ puroḍāśāṃśca nirvapet //
svayaṃkṛtaṃ ca lavaṇaṃ khādetsnehaṃ phalodravam

varjayeccheluśigrū ca kavakaṃ palalaṃ madhu //
munyannamāśvinemāsi tyajedyatpūrvasaṃcitam

grāmyāṇi phalamūlāni phālajānnaṃ ca saṃtyajet //
daṃtolūkhalako vā syādaśmakuṭṭotha vā bhavet

sadyaḥ prakṣālako vā syādathavā māsasaṃcayī //
triṣaḍdvādaśamāsānnaphalamūlādisaṃgrahī

naktāśye kāṃtarāśī vā ṣaṣṭhakālāśanopi vā //
cāṃdrāyaṇavratī vā syātpakṣabhugvātha māsabhuk//

vaikhānasa matasthastu phalamūlāśanopi vā //
tapasā śoṣayeddehaṃ pitṝndevāṃśca tarpayet

agnimātmani cādhāya vicaredaniketanaḥ //
bhikṣayetprāṇayātrārthaṃ tāpasānvanavāsinaḥ

grāmādānīya vāśnīyādaṣṭau grāsānvasanvane //
itthaṃ vanāśramī vipro brahmaloke mahīyate

ativāhyāyuṣobhāgaṃ tṛtīyamiti kānane //
āyuṣastu turīyāṃśe tyaktvā saṃgānparivrajet

ṛṇatrayamasaṃśodhya tvanutpādya sutānapi //
tathā yajñānaniṣṭvā ca mokṣamicchanvrajatyadhaḥ

manāgapi na bhūtānāṃ yasmādutpadyate bhayam //
sarvabhūtāni tasyeha prayacchaṃtyabhayaṃ sadā

eka eva carennityamanagniraniketanaḥ //
siddhyarthamasahāyaḥ syādgrāmamannārthamāśrayet

jīvitaṃ maraṇaṃ vātha nābhikāṃkṣetkvacidyatiḥ //
kālameva pratīkṣeta nirdeśaṃ bhṛtako yathā

sarvatra mamatā śūnyaḥ sarvatra samatāyutaḥ //
vṛkṣamūlaniketaśca mumukṣuriha śasyate

dhyānaṃ śaucaṃ tathā bhikṣā nityamekāṃtaśīlatā //
yateścatvārikarmāṇi paṃcamaṃ nopapadyate

vārṣikāṃścaturomāsānviharenna yatiḥ kvacit //
bījāṃkurāṇāṃ jaṃtūnāṃ hiṃsā tatra yato bhavet

gacchetpariharanjantūnpibetkaṃ vastraśodhitam//
vācaṃ vadedanudvegāṃ na krudhyetkenacitkvacit

caredātmasahāyaśca nirapekṣo nirāśrayaḥ //
nityamadhyātmanirato nīcakeśa nakho vaśī

kusuṃbhavāsā daṃḍāḍhyo bhikṣāśī khyātivarjitaḥ //
alābudārumṛdveṇu pātraṃ śastaṃ na paṃcamam

na grāhyaṃ taijasaṃ pātraṃ bhikṣukeṇa kadācana //
varāṭake saṃgṛhīte tatratatra dinedine

gosahasravadhaṃ pāpaṃ śrutireṣā sanātanī //
hṛdi sasneha bhāvena ceddrakṣetstriyamekadā

koṭidvayaṃ brahmakalpaṃ kuṃbhīpākī na saṃśayaḥ //
ekakālaṃ caredbhaikṣaṃ na kuryāttatra vistaram

vidhūmesanna musale vyaṃgāre bhuktavajjane //
vṛtte śarāvasaṃpāte bhikṣāṃ nityaṃ caredyatiḥ

alpāhāro rahaḥsthāyī ttviṃdriyārtheṣvalolupaḥ //
rāgadveṣavirnirmukto bhikṣurmokṣāya kalpate

āśrame tu yatiryasya muhūrtamapi viśramet //
kiṃ tasyānekataṃtreṇa kṛtakṛtyaḥ sa jāyate

saṃcitaṃ yadgrahasthena pāpamāmaraṇāṃtikam //
nirdhakṣyati hi tatsarvamekarātroṣito yatiḥ

dṛṣṭvā jarābhibhavanamasahyaṃ rogapīḍitam //
dehatyāgaṃ punargarbhaṃ garbhakleśaṃ ca dāruṇam

nānāyoni nivāsaṃ ca viyogaṃ ca priyaiḥ saha //
apriyaiḥ saha saṃyogamadharmādduḥkhasaṃbhavam

punarnirayasaṃvāsaṃnānānarakayātanāḥ //
karmadoṣasamudbhūtā nṛṇāṃgatiranekadhā

deheṣvanityatāṃ dṛṣṭvā nityatā paramātmanaḥ //
kurvīta muktaye yatnaṃ yatrayatrāśrame rataḥ

karapātrīti vikhyātā bhikṣāpātravivarjitā //
teṣāṃ śataguṇaṃ puṇyaṃ bhavatyeva dinedine

āśramāṃścaturastvevaṃ kramādāsevya paṃḍitaḥ //
nirdvaṃdvastyaktasaṃgaśca brahmabhūyāya kalpate

asaṃyataḥ kubuddhīnāmātmā baṃdhāya kalpate //
dhīmadbhiḥ saṃyataḥ sopi padaṃ dadyādanāmayam

śruti smṛti purāṇaṃ ca vidyopaniṣadastathā //
ślokāḥ maṃtrāṇi bhāṣyāṇi yaccānyadvāṅmayaṃ kvacit

vedānuvacanaṃ jñātvā brahmacarya tapo damaḥ //
śraddhopavāsaḥ svātaṃtryamātmanojñānahetavaḥ

sa hi sarvairvijijñāsya ātmaivāśramavartibhiḥ //
śrotavyastvatha maṃtavyo draṣṭavyaśca prayatnataḥ

ātmajñānena muktiḥ syāttacca yogādṛte nahi//
sa ca yogaściraṃ kālamabhyāsādeva sidhyati

nāraṇyasaṃśrayādyogo na nānāgraṃtha ciṃtanāt//
na dānairna vratairvāpi na tapobhirna vā makhaiḥ

na ca padmāsanādyogo na vā ghrāṇāgravīkṣaṇāt //
na śauce na na maunena na maṃtrārādhanairapi

abhiyogātsadābhyāsāttatraiva ca viniścayāt //
punaḥpunaranirvedātsidhyedyogo na cānyathā

ātmakrīḍasya satataṃ sadātmamithunasya ca //
ātmanyeva su tṛptasya yogasiddhirna dūrataḥ

atrātmavyatirekeṇa dvitīyaṃ yo na paśyati //
ātmārāmaḥ sa yogīṃdro brahmībhūto bhavediha

saṃyogastvātmamanasoryoga ityucyate budhaiḥ //
prāṇāpānasamāyogo yoga ityapi kaiścana

viṣayeṃdriya saṃyogo yoga ityapyapaṃḍitaiḥ //
viṣayāsaktacittānāṃ jñānaṃ mokṣaśca dūrataḥ

durnivārā manovṛttiryāvatsā na nivartate //
kiṃ vadaṃtyapiyogasya tāvannedīyasī kutaḥ

vṛttihīnaṃ manaḥ kṛtvā kṣetrajñe paramātmani //
ekīkṛtya vimucyeta yogayuktaḥ sa ucyate

bahirmukhāni sarvāṇi kṛtvā khānyaṃtarāṇi vai //
manasyeveṃdriyagrāmaṃ manaścātmani yojayet

sarvabhāvavinirmuktaṃ kṣetrajñaṃ brahmaṇi nyaset //
etaddhyānaṃ ca yogaśca śeṣonyo graṃthavistaraḥ

yannāsti sarvalokeṣu tadastīti virudhyate //
kathyamānaṃ tadanyasya hṛdayenāvatiṣṭhate

svasaṃvedyaṃ hi tadbrahma kumārī strī sukhaṃ yathā //
ayogī naiva tadvetti jātyaṃdha iva vartikām

nityābhyasanaśīlasya svasaṃvedyaṃ hi tadbhavet //
tatsūkṣmatvādanirdeśyaṃ paraṃ brahma sanātanam

kṣaṇamapyekamudakaṃ yathā na sthiratāmiyāt //
vātāhataṃ yathā cittaṃ tasmāttasya na viśvaset

ato'nilaṃ niruṃdhīta cittasya sthairya hetave //
marunnirodhanārthāya ṣaḍaṃgaṃ yogamabhyaset

āsanaṃ prāṇasaṃrodhaḥ pratyāhāraśca dhāraṇā //
dhyānaṃ samādhiretāni yogāṃgāni bhavaṃti ṣaṭ

āsanānīha tāvaṃti yāvaṃtyo jīvayo nayaḥ //
siddhāsanamidaṃ proktaṃ yogino yogasiddhidam

etadabhyasanānnityaṃ varṣmadārḍhyamavāpnuyāt//

dakṣiṇaṃ caraṇaṃ nyasya vāmorūpari yogavit //
yāmyorūpari vāmaṃ ca padmāsanamidaṃ viduḥ

karābhyāṃ dhārayetpaścādaṃguṣṭhau dṛḍhabaṃdhavit//
bhavetpadmāsanādasmādabhyāsāddṛḍhavigrahaḥ

athavā hyāsane yasminsukhamasyopajāyate //
svastikādau tadadhyāsya yogaṃ yuṃjīta yogavit

na toyavahnisāmīpye na jīrṇāraṇyagoṣṭhayoḥ //
na daṃśamaśakākīrṇe na caitye na ca catvare

keśabhasmatuṣāṃgāra kīkasādi pradūṣite //
nābhyasetpūtigaṃdhādau na sthāne janasaṃkule

sarvabādhāvirahite sarveṃdriyasukhāvahe //
manaḥprasādajanane sragdhūpāmodamodite

nātitṛptaḥ kṣudhārto na na viṇmūtraprabādhitaḥ //
nādhvakhinno na ciṃtārto yogaṃ yuṃjīta yogavit //

ūrusthottānacaraṇaḥ savyenyasyottaraṃ karam //
uttānaṃ kiṃcidunnamya vaktraṃ viṣṭabhya corasā

nimīlitākṣaḥ sattvastho daṃtairdaṃtānna saṃspṛśet //
tālusthācalajihvaśca saṃvṛtāsyaḥ suniścalaḥ

sanniyamyeṃdriyagrāmaṃ nātinīcocchritāsanaḥ //
madhyamaṃ cottamaṃ cātha prāṇāyāmamupakramet

cale'nile calaṃ sarvaṃ niścale tatra niścalam //
sthāṇutvamāpnuyādyogī tato'nilaniruṃdhanāt

yāvaddehe sthitaḥ prāṇo jīvitaṃ tāvaducyate //
nirgate tatra maraṇaṃ tataḥ prāṇaṃ niruṃdhayet

yāvadbaddho maruddehe yāvacceto nirāśrayam //
yāvaddṛṣṭirbhuvormadhye tāvatkālabhayaṃ kutaḥ

kālasādhvasatobrahmā prāṇāyāmaṃ sadācaret //
yoginaḥ siddhimāpannāḥ samyakprāṇaniyaṃtraṇāt

maṃdo dvādaśamātrastu mātrā laghvakṣarā matā //
madhyamo dviguṇaḥ pūrvāduttamastriguṇastataḥ

svedaṃ kaṃpaṃ viṣādaṃ ca janayetkramaśastvasau //
prathamena jayetsvedaṃ dvitīyena tu vepathum

viṣādaṃ hi tṛtīyena siddhaḥ prāṇotha yoginaḥ //
bhavetkramātsanniruddhaḥ siddhaḥ prāṇotha yoginā //
krameṇa sevyamānosau nayate yatra cecchati //

haṭhānniruddhaprāṇoyaṃ romakūpeṣu niḥsaret //
dehaṃvidārayatyeṣa kuṣṭhādijanayatyapi

tatpratyāyayitavyosau krameṇāraṇyahastivat //
vanyo gajo gajārirvā krameṇa mṛdutāmiyāt

karoti śāstṛnirdeśaṃ na ca taṃ parilaṃghayet //
tathā prāṇo hadisthoyaṃ yoginākramayogataḥ //
gṛhītaḥ sevyamānastu viśraṃbhamupagacchati

ṣaṭtriṃśadaṃgulo haṃsaḥ prayāṇaṃ kurute bahiḥ //
savyāpasavyamārgeṇa prayāṇātprāṇa ucyate

śuddhimeti yadā sarvaṃ nāḍīcakra manākulam //
tadaiva jāyate yogī kṣamaḥ prāṇanirodhane

dṛḍhāsano yathāśakti prāṇaṃ caṃdreṇa pūrayet //
recayedatha sūryeṇa prāṇāyāmoyamucyate

sravatpīyūṣadhāraughaṃ dhyāyaṃścaṃdrasamanvitam //
prāṇāyāmena yogīṃdraḥ sukhamāpnoti tatkṣaṇāt

raviṇā prāṇamākṛṣya pūrayedaudarīṃ darīm //
kuṃbhayitvā śanaiḥ paścādyogī caṃdreṇa recayet

jvalajvalanapuṃjābhaṃ śīlayannuṣmaguṃ hṛdi //
anena yāmyāyāmena yogīṃdraḥ śarmabhāgbhavet

itthaṃ māsatrayābhyāsādubhayāyāmasevanāt //
śuddhanāḍīgaṇo yogī siddhaprāṇobhidhīyate

yatheṣṭaṃ dhāraṇaṃ vāyoranalasya pradīpanam //
nādābhivyaktirārogyaṃ bhavennāḍīviśodhanāt

prāṇodehagatovāyurāyāmastannibaṃdhanam //
ekaśvāsamayī mātrā prāṇāyāmo nirucyate

prāṇāyāme'dhame gharmaḥ kaṃpo bhavati madhyame //
uttiṣṭheduttame deho baddhapadmāsano muhuḥ

prāṇāyāmairdaheddoṣānpratyāhāreṇa pātakam //
manodhairyaṃ dhāraṇayā dhyāneneśvaradarśanam

samādhinā labhenmokṣaṃ tyaktvā dharmaṃ śubhāśubham //
āsanena vapurdārḍhyaṃ ṣaḍaṃgamiti kīrtitam

prāṇāyāmadviṣaṭkena pratyāhāra udāhṛtaḥ //
pratyāhārairdvādaśabhirdhāraṇā parikīrtitā

bhavedīśvarasaṃgatyai dhyānaṃ dvādaśadhāraṇam //
dhyānadvādaśakenaiva samādhirabhidhīyate

samādheḥ parato jyotiranaṃtaṃ svaprakāśakam //
tasmindṛṣṭe kriyākāṃḍaṃ yātāyātaṃ nivartate

pavane vyomasaṃprāpte dhvanirutpadyate mahān //
ghaṃṭādīnāṃ pravādyānāṃ tataḥ siddhiradūrataḥ

prāṇāyāmena yuktena sarvavyādhikṣayobhavet //
ayuktābhyāsayogena sarvavyādhisamudbhavaḥ

hikkā śvāsaśca kāsaśca śiraḥ karṇākṣivedanāḥ // .
bhavaṃti vividhā doṣāḥ pavanasya vyatikramāt

yuktaṃ yuktaṃ tyajedvāyuṃ yuktaṃyuktaṃ ca pūrayet //
yuktaṃyuktaṃ ca badhnīyāditthaṃ sidhyati yogavit

iṃdriyāṇāṃ hi caratāṃ viṣayeṣu yadṛcchayā //
yatpratyāharaṇaṃ yuktyā pratyāhāraḥ sa ucyate

pratyāharati yaḥ khāni kūrmoṃgānīva sarvataḥ //
pratyāhṛti vidhānena sa syādvigatakalmaṣaḥ

nābhideśe vasedbhānustāludeśe ca caṃdramāḥ //
varṣatyadhomukhaścaṃdro grasedūrdhvamukho raviḥ

karaṇaṃ tacca kartavyaṃ yena sā prāpyate sudhā //
ūrdhvanābhiradhastālurūrdhvaṃ bhānuradhaḥśaśī //
karaṇaṃ viparītākhyamabhyāsādeva jāyate

kākacaṃcuvadāsyena śītalaṃ śītalaṃ pibet //
prāṇaṃ prāṇavidhānajño yogī bhavati nirjaraḥ

rasanāṃ tāluvivare nidhāyordhvamukho'mṛtam //
dhayannijarratāṃ gacchedāṣaṇmāsānna saṃśayaḥ

ūrdhvajihvaḥ sthiro bhūtvā somapānaṃ karoti yaḥ //
māsārdhena na saṃdeho mṛtyuṃ jayati yogavit

saṃpīḍya rasanāgreṇa rājadaṃtabilaṃ mahat //
dhyātvā sudhāmayīṃ devīṃ ṣaṇmāsena kavirbhavet

amṛtāpūrṇadehasya yogino dvitrivatsarāt //
ūrdhvaṃ pravartate reto hyaṇimādiguṇodayam

nityaṃ somakalāpūrṇaṃ śarīraṃ yasya yoginaḥ //
takṣakeṇāpi daṣṭasya viṣaṃ tasya na sarpati

āsanena samāyuktaḥ prāṇāyāmena saṃyutaḥ //
pratyāhāreṇa saṃpanno dhāraṇāmatha cābhyaset

hṛdaye paṃcabhūtānāṃ dhāraṇāṃ yaḥ pṛthakpṛthak //
manaso niścalatvena dhāraṇā sābhidhīyate

haritālanibhāṃ bhūmiṃ sa lakārāṃ savedhasam //
catuṣkoṇāṃ hṛdi dhyāyedeṣā syātkṣitidhāraṇā

kaṃṭheṃ'butattvamardheṃdunibhaṃ viṣṇusamanvitam //
vakārabījaṃ kuṃdābhaṃ dhyāyannaṃbujayediti

tālusthamiṃdragopābhaṃ trikoṇaṃ rephasaṃyutam //
rudreṇādhiṣṭhitaṃ tejo dhyātvā vahniṃ jayediti

vāyutattvaṃ bhruvormadhye vṛttamaṃjanasannibham //
yaṃbījamīśadaivatyaṃ dhyāyanvāyuṃ jayediti

ākāśaṃ ca marīcivārisadṛśaṃ yadbrahmaraṃdhrasthitaṃ yannāthena sadāśivena sahitaṃ śāṃtaṃ hakārākṣaram //
prāṇaṃ tatra vinīya paṃcaghaṭikaṃ ciṃtānvitaṃ dhārayedeṣā mokṣakapāṭapāṭanapaṭuḥ proktā nabhodhāraṇā

staṃbhanīplāvanīcaiva dahanībhrāmaṇī tathā //
śamanī ca bhavaṃtyetā bhūtānāṃ paṃca dhāraṇāḥ

dhyai ciṃtāyāṃ smṛto dhātuściṃtā tattve suniścalā //
etaddhyānamiha proktaṃ saguṇaṃ nirguṇaṃ dvidhā

saguṇaṃ vaṇarbhedena nirguṇaṃ kevalaṃ matam //
samaṃtraṃ saguṇaṃ viddhi nirguṇaṃ maṃtravarjitam

aṃtaśceto bahiścakṣuravasthāpya sukhāsanam//
samatvaṃ ca śarīrasya dhyānamudrātisiddhidā

nāśvamedhena tatpuṇyaṃ na ca vai rājasūyataḥ //
yatpuṇyamekadhyānena labhedyogī sthirāsanaḥ

śabdādīnāṃ ca tanmātrā yāvatkarṇādiṣu sthitā //
tāvadeva smṛtaṃ dhyānaṃ syātsamādhirataḥ param

dhāraṇā paṃcanāḍīkā dhyānaṃ syātṣaṣṭināḍikam //
dinadvāśakena syātsamādhiriha bhaṇyate

jalasaiṃdhavayoḥ sāmyaṃ yathā bhavati yogataḥ //
tathātmamanasoraikyaṃ samādhiriha bhaṇyate

yadā saṃkṣīyate prāṇo mānasaṃ ca pralīyate //
tadā samarasatvaṃ yatsa samādhirihocyate

yatsamatvaṃ dvayoratra jīvātmaparamātmanoḥ //
sanaṣṭasarvasaṃkalpaḥ samādhirabhidhīyate

nātmānaṃ na paraṃ vetti na śītaṃ noṣmameva ca //
samādhiyukto yogīṃdro na sukhaṃ na sukhetarat

kālyate naiva kālena lipyate naiva karmaṇā //
bhidyate na ca śastrāstrai yogī yuktaḥ samādhinā

yuktāhāravihāraśca yuktaceṣṭo hi karmasu //
yuktanidrāvabodhaśca yogī tattvaṃ prapaśyati

tattvavijñānamānaṃdaṃ brahma brahmavido viduḥ //
hetudṛṣṭāṃta rahitaṃ vāṅmanobhyāmagocaram

tatra yogī nirālaṃbe nirātaṃke nirāmaye //
ṣaḍaṃgayogavidhinā parebrahmaṇi līyate

yathā ghṛte ghṛtaṃ kṣiptaṃ ghṛtameva hi tadbhavet //
kṣīrekṣīraṃ tathā yogī tatra tanmayatāṃ vrajet

anasaṃjātapānīyairvidadhyādaṃgamardanam //
tyajetkaduṣṇaṃ lavaṇaṃ kṣīrabhojī sadā bhavet

brahmacārī jitakrodho jitalobho vimatsaraḥ //
abdamitthaṃ sadābhyāsātsa yogīti nigadyate

mahāmudrāṃ nabhomudrāmuḍḍīyānaṃ jalaṃdharam //
mūlabaṃdhaṃ tu yo vetti sa yogī yogasiddhibhāk

śodhanaṃ nāḍījālasya ghaṭanaṃ caṃdrasūryayoḥ //
rasānāṃ śoṣaṇaṃ samyaṅmahāmudrābhidhīyate

yoniṃ vāmāṃghriṇā''pīḍya kṛtvā vakṣasthale hanum //
hastābhyāṃ prasṛtaṃ pādaṃ dhārayeddakṣiṇaṃ ciram

prāṇena kukṣimāpūrya ciraṃ saṃrecayecchanaiḥ //
eṣā proktā mahāmudrā mahāghaughavināśinī

caṃdrāṃge tu samabhyasya sūryāṃge punarabhyaset//
yāvattulyā bhavetsaṃkhyā tato mudrāṃ visarjayet

na hi pathyamapathyaṃ vā rasāḥ sarvepi nīrasāḥ //
api ghoraṃ viṣaṃ pītaṃ pīyūṣamivajīryati

kṣayakuṣṭhagudāvarta gulmājīrṇapurogamāḥ //
tasya doṣāḥ kṣayaṃ yāṃti mahāmudrāṃ ca yobhyaset

kapālakuhare jihvā praviṣṭā viparītagā //
bhruvoraṃtargatā dṛṣṭirmudrā bhavati khecarī

na pīḍyate śaraugheṇa na ca lipyeta karmaṇā //
bādhyate na sa kālena yo mudrāṃ vetti khecarīm

cittaṃ carati khe yasmā jihvā carati khe gatā //
tenaiṣā khecarī nāma mudrā siddhairniṣevitā

yāvadbiṃduḥ sthito dehe tāvanmutyubhayaṃ kutaḥ //
yāvadbaddhā nabhomudrā tāvadbiṃdurna gacchati

uḍḍīnaṃ kurute yasmādahorātraṃ mahākhagaḥ //
uḍīyānaṃ tataḥ proktaṃ tatra baṃdho vidhīyate

jaṭhare paścimaṃ tānaṃ nābherūrdhvaṃ ca dhārayet //
uṅḍīyāno hyayaṃ baṃdho mṛtyorapi bhayaṃ tyajet

badhnāti hi śirājālamadhogāmi nabhojalam //
eṣa jālaṃdharo baṃdhaḥ kaṃṭhe duḥkhaughanāśanaḥ

jālaṃdhare kṛte baṃdhe kaṃṭhasakocalakṣaṇe //
na pīyūṣaṃ patatyagnau na ca vāyuḥ pradhāvati

pārṣṇibhāgena saṃpīḍya yonimākuṃcayedgudam//
apānamūrdhvamākṛṣya mūlabaṃdho vidhīyate

apānaprāṇayoraikye kṣayo mūtrapurīṣayoḥ //
yuvā bhavati vṛddhopi satataṃ mūlabaṃdhanāt

prāṇāpānavaśo jīvaḥ ūrddhvādhaḥ paridhāvati //
vāmadakṣiṇamārgeṇa caṃcalo na sthitiṃ labhet

guṇabaddho yathā pakṣī gatopyākṛṣyate punaḥ //
guṇairbaddhastathā jīvaḥ prāṇāyāmena kṛṣyate

apānaḥ karṣati prāṇaṃ prāṇopānaṃ ca karṣati //
ūrdhvādhaḥ saṃsthitāvetau saṃyojayati yogavit

hakāreṇa bahiryāti sakāreṇa viśetpunaḥ//
haṃsahaṃsetyato maṃtraṃ jīvo japati sarvadā

ṣaṭśatāni divārātrau sahasrāṇyekaviṃśatiḥ //
etatsaṃkhyānvitaṃ maṃtraṃ jīvo japati sarvadā //

ajapā nāma gāyatrī yogināṃ mokṣadāyinī //
asyāḥ saṃkalpamātreṇa naraḥ pāpaiḥ pramucyate

aṃtarāyā bhavaṃtīha yogino yogahānidāḥ //
śrūyate dūragā vārtā dūrasthaṃ dṛśyate puraḥ

yojanānāṃ śataṃ yātuṃ śaktiḥsyānnimiṣārdhataḥ//
aciṃtitāni śāstrāṇi kaṃṭhapāṭhī bhavaṃti hi

dhāraṇāśa ktiratyugrā mahābhāro laghurbhavet //
kṣaṇaṃ kṛśaḥ kṣaṇaṃ sthūlaḥ kṣaṇamalpaḥ kṣaṇaṃ mahān

parakāyaṃ praviśati tiraścāṃ vetti bhāṣitam //
divyagaṃdhaṃ tanau dhatte divyāṃ vāṇīṃ pravakti ca

prārthyate divyakanyābhirdivyaṃ dhārayate vapuḥ //
ityādayoṃtarāyāḥ syuryogasaṃsiddhisūcakāḥ

yadyebhiraṃtarāyairna kṣipyate'syeha mānasam //
tadagre tatsamāpnoti padaṃ brahmādi durlabham

yatprāpya na nivarteta yatprāpya na ca śocati //
tallabhyate ṣaḍaṃgena yogena kalaśodbhava

ekena janmanā yogaḥ kathamitthaṃ prasidhyati //
ṛte ca yogasaṃsiddheḥ kathaṃ muktirihāpyate

ubhe eva hi nirvāṇavartmanī kila kuṃbhaja //
kiṃ vā kāśyāṃ tanutyāgaḥ kiṃ vā yogoyamīdṛśaḥ

caṃcaleṃdriyavṛttitvātkalikalmaṣajṛṃbhaṇāt //
alpāyuṣāṃ tathā nṛṇāṃ kveha yoga mahodayaḥ

ataeva hi jaṃtūnāṃ mahodayapadapradaḥ //
sadaiva sa dayāvārdhiḥ kāśyāṃ viśveśvaraḥ sthitaḥ

kāśyāṃ sukhena kaivalyaṃ yathālabhyeta jaṃtubhiḥ //
yogayuktyādyupāyaiśca na tathānyatra kutracit

kāśyāṃ svadehasaṃyogaḥ samyagyoga udāhṛtaḥ //
mucyate neha yogena kṣipramanyena kenacit

viśveśvaro viśālākṣī dyunadīkālabhairavaḥ //
śrīmānḍhuṃḍhirdaṃḍapāṇiḥ ṣaḍaṃgo yoga eṣa vai

etatṣaḍaṃgayo yogaṃ nityaṃ kāśyāṃ niṣevate //
saṃprāpya yoganidrāṃ sa dīrghāmamṛtamaśnute

oṃkāraḥ kṛttivāsāśca kedāraśca triviṣṭapaḥ //
vīreśvarothaviśveśaḥ ṣaḍaṃgoyamihāparaḥ

pādodakāsisaṃbheda jñānodamaṇikarṇikāḥ //
ṣaḍaṃgoyaṃ mahāyogo brahmadharmahradāvapi

ṣaḍaṃgasevanādasmādvārāṇasyāṃ narottama //
na jātu jāyate jaṃturjananī jaṭhare punaḥ

gaṃgāsnānaṃ mahāmudrā mahāpātakanāśanī //
etanmudrākṛtābhyāsopyamṛtatvamavāpnuyāt

kāśīvīthiṣu saṃcāro mudrā bhavati khecarī//
khecaro jāyate nūnaṃ khecaryā mudrayānayā

uḍḍīya sarvato deśādyānaṃ vārāṇasīṃ prati //
uṅḍīyāno mahābaṃdha eṣa muktyai prakalpate

jalasya dhāraṇaṃ mūrdhni viśveśa snānajanmanaḥ //
eṣa jālaṃdharo baṃdhaḥ samastasuradurlabhaḥ

vṛto vighnaśatenāpi yanna kāśīṃ tyajetsudhīḥ //
mūlabaṃdhaḥ smṛto hyeṣa duḥkhamūlanikṛṃtanaḥ

iti yogaḥ samākhyāto mayā te dvividho mune //
saṣaḍaṃgaḥ samudraśca muktaye śaṃbhubhāṣitaḥ

yāvanneṃdriya vaiklavyaṃ yāvadvyādhirna bādhate //
yāvatkālavilaṃbosti tāvadyogarato bhavet

ubhayoryogayormadhye kāśīyogoyamuttamaḥ //
kāśīyogaṃ samabhyasya prāpnuyādyogamuttamam

ādhivyādhisahāyinyā jarayā mṛtyuliṃgayā //
kālaṃ nikaṭato jñātvā kāśīnāthaṃ samāśrayeta

kāśīnāthaṃ samāśritya kutaḥ kālabhayaṃ nṛṇām //
kruddhopi jīvahṛtkālastacca kāśyāṃ sumaṃgalam

ātithyenehasiyathā pratīkṣetātithiṃ kṛtī //
kāśyāṃ kālaṃ tathāyāṃtaṃ bhāgyavānsaṃpratīkṣate

kaliḥ kālaḥ kṛtaṃkarma trikaṃṭakamitīritam //
etattrayaṃ na prabhavedānaṃdavanavāsinām

anyatrātarkitaḥ kālaḥ kalayiṣyatyasaṃśayam //
kālādabhayamiccheccettataḥ kāśīṃ samāśrayet

iti śrīskāṃde mahāpurāṇa ekāśītisāhasryāṃ saṃhitāyāṃ caturthe kāśīkhaṃḍe pūrvārddhe yogākhyānaṃ nāmaikacatvāriṃśo'dhyāyaḥ