Skanda Purana · Chapter 4.24

gaṇāvūcatuḥ // //
śivaśarmannudarkaṃ te kathayāvo niśāmaya //
tvamatra vaiṣṇave loke bhuktvā bhogānsupuṣkalān

brahmaṇo vatsaraṃ pūrṇaṃ ramamāṇo'psarogaṇaiḥ //
sutīrthamaraṇopātta puṇyaśeṣeṇa vai punaḥ

bhaviṣyasi mahīpālo nagare naṃdivardhane //
rājyaṃ prāpyāsapatnaṃ ca samṛddhabalavāhanam

kṛṣṭibhirhṛṣṭapuṣṭaiśca ramyahāṭakabhūṣaṇaiḥ //
saṃjuṣṭamiṣṭāpūrtānāṃ dharmāṇāṃ nityakartṛbhiḥ

sadāsaṃpannasasyaṃ ca sūrvarakṣetrasaṃkulam//
sudeśaṃ suprajaṃ susthaṃ sutṛṇaṃ bahugodhanam

devatāyatanānāṃ ca rājibhiḥ parirājitam //
suyūpā yatra vai grāmāḥ suvittarddhi virājitāḥ

supuṣpa kṛtrimodyānāḥ sasadāphalapādapāḥ //
sapadminīkakāsārā yatra rājaṃti bhūmayaḥ

sadaṃbhā nimnagārājirna yatra janatā kvacit //
kulānyeva kulīnāni na cānyāyadhanāni ca

vibhramo yatra nārīṣu navidvatsu ca karhicit //
nadyaḥ kuṭilagāminyo na yatra viṣaye prajāḥ

tamoyuktāḥ kṣapā yatra bahuleṣu na mānavāḥ //
rajoyujaḥ striyo yatra na dharmabahulā narāḥ

dhanairanaṃdho yatrāsti mano naiva ca bhojanam //
anayaḥ syaṃdanaṃ yatra na ca vai rājapūruṣaḥ

daṃḍaḥ paraśukuddāla vālavya janarājiṣu //
ātapatreṣu nānyatra kvacitkrodhāparādhajaḥ

anyatrākṣikavṛṃdebhyaḥ kvacinna paridevanam //
ākṣikā eva dṛśyaṃte yatra pāśakapāṇayaḥ

jāḍyavārtā jaleṣveva strīmadhyā eva durbalāḥ //
kaṭhorahṛdayā yatra sīmaṃtinyo na mānavāḥ

auṣadheṣveva yatrāsti kuṣṭhayogo na mānave //
vedhopyaṃtaḥsuratneṣu śūlaṃ mūrtikareṣu vai

kaṃpaḥsāttvikabhāvottho na bhayātkvāpi kasyacit //
saṃjvaraḥ kāmajo yatra dāridryaṃ kaluṣasya ca

durlabhatvaṃ sadā kasya sukṛtena ca vastunaḥ //
ibhā eva pramattā vai yuddhaṃ vīcyorjalāśaye

dānahānirgajeṣveva drumeṣveva hi kaṃṭakāḥ //
janeṣveva vihārā hi na kasyaciduraḥsthalī

bāṇeṣu guṇaviśleṣo baṃdhoktiḥ pustake dṛḍhā //
snehatyāgaḥ sadaivāsti yatra pāśupate jane

daṃḍavārtā sadā yatra kṛtasaṃnyāsakarmaṇām //
mārgaṇāścāpakeṣveva bhikṣukā brahmacāriṇaḥ

yatra kṣapaṇakā eva dṛśyaṃte maladhāriṇaḥ //
prāyo madhuvratā eva yatra caṃcalavṛttayaḥ

ityādi guṇavaddeśe tvayirājyaṃ praśāsati //
dharmeṇa rājadharmajña śauṃḍīryaguṇaśālini

saubhāgyabhāji rūpāḍhye śauryaudāryaguṇānvite //
sīmaṃtinīnāṃ ramyāṇāṃ lāvaṇyavarjita suśriyām

rājñīnāmayutaṃbhāvi kumārāṇāṃ śatatrayam //
vṛddhakāla iti khyāta ugraḥ parapuraṃjayaḥ

vijitānekasamaraḥ śrīsaṃtarpitamārgaṇaḥ //
anekaguṇasaṃpūrṇaḥ pūrṇacaṃdranibhadyutiḥ

saṃtatāvabhṛthaklinna mūrdhajaḥ kṣitiṣarṣabhaḥ //
prajāpālanasaṃpannaḥ kośaprīṇitabhūsuraḥ

padāraviṃdaṃ gauviṃdaṃ hṛdi dhyāyannataṃdritaḥ //
vāsudevakathālāpaparikṣipta dinakṣapaḥ

kadācidupaviṣṭaḥsanmadhye rājasabhaṃ dvija //
dūrātkārpaṭikairdṛṣṭo vārāṇasyāḥ samāgataiḥ

tatkarmabhāvisadṛśaistadātvamabhinaṃditaḥ //
taiḥ sarvai rājaśārdūlasyāśīrvādairanekaśaḥ

śrīmadviśveśvaro devo viśveṣāṃ jagatāṃ guruḥ //
kāśīnāthastute kuryātkumaterapavarjanam

naiḥśreyasīṃ ca saṃpattiṃ yo deyātsmaraṇādapi //
kāśīnāthaḥ sa te diśyājjñānaṃ malavivarjitam

yena puṇyena te prāptaṃ rājyaṃ prājyamakaṃṭakam //
tatpuṇyaśeṣatobhūyādviśvanāthe matistava

yasya prasādātsulabhamāyuḥ putrāṃbarāganāḥ //
samṛddhayaḥ svargamokṣau sa viśveśaḥ prasīdatu

nāmaśravaṇamātreṇa yasya viśveśiturvibhoḥ //
mahāpātakavicchedaḥ sa viśveśo'stu te hṛdi

tvaṃ vṛddhakālo bhūpālaḥ śrutvetyāśīḥ paraṃparām //
smariṣyasīdaṃ vṛttāṃtaṃ pulakāṃkavapustadā

ākāragopanaṃ kṛtvā tebhyo dattvā dhanaṃ bahu //
sumuhūrtamanuprāpya sute rājyaṃ vidhāya ca

anaṃgalekhayā rājñyā tataḥ kāśīṃ gamiṣyasi //
dattvā dānāni bhūrīṇi prīṇayitvā'rthino janān

svanāmnā tatra saṃsthāpya liṃgaṃ nirvāṇakāraṇam //
prāsādaṃ tatra kṛtvoccaistadagre kūpamuttamam

vidhāya vidhivattatra kalaśāropaṇādikam //
maṇimāṇikya cāṃpeya dukūlebhāśvagodhanam

mahādhvajapatākāśca cchatracāmaradarpaṇam //
devopakaraṇaṃ bhūri viśrāṇya śramavarjitaḥ

vratopavāsaniyamaiḥ parikṣīṇakalevaraḥ //
madhyāhne nirjane tatra drakṣyasyekaṃ tapodhanam

atīvajīrṇavapuṣaṃ paripiṃgajaṭānvitam //
mūrtimaṃtaṃmiva prāṃśuṃ dharmaṃ janamanoharam

bhāraṃ śarīrayaṣṭeśca dṛḍhayaṣṭyāṃ samarpya ca //
garbhāgārādviniṣkramyābhyāyāṃtaṃraṃgamaṃḍape

upaviśya samīpe te prakṣyatyevamanukramāt //
kosi tvaṃ kimihāsi tvaṃ dvitīya iva kastvayam

prāsādaḥ kāritaḥ kena jānāsyeṣa tato vada //
asya liṃgasya kiṃ nāma prāyo jāne na vārdhakāt

pṛṣṭastvamiti te nātha tadā vṛddha tapasvinā //
kathayiṣyasyahaṃ rājā vṛddhakāla iti śrutaḥ

dākṣiṇātya iha prāptastvetayā saha kāṃtayā //
dhyāyāmi liṃgametacca prārthayāmi na kiṃcana

prāsādasyāsya jaṭila svayaṃkārayitā śivaḥ //
viśeṣato'syaliṃgasya nāma no vedmi niścitam

iti śrutvā narapatervākyaṃprāha jaṭādharaḥ //
satyamuktaṃ tvayaikaṃ hi liṃganāma na vetsi yat

paśyeyaṃ tvāmahaṃ nityamupaviṣṭaṃ suniścalam //
śruto bhaviṣyati tava prāsādo yena kāritaḥ

mamāgre tatsamācakṣva yadi jānāsi tattvataḥ //
ākarṇyeti vacastasya punaḥ prāha bhavāniti /

kartā kārayitā śaṃbhuḥ kimatathyaṃ bravīmyaham //
athavā ciṃtayā kiṃ me tapasvinnanayā vibho

iti tvayi sthite joṣaṃ sa punarvṛddhatāpasaḥ //
pipāsurasmi pānīyamānīyāśu prayaccha me

iti tena ca nunnastvaṃ vāryānīya ca kūpataḥ //
pāyayiṣyasi taṃ vṛddhaṃ tāpasaṃ tatkṣaṇācca saḥ

tadaṃbupānato bhūyātsupārvaṇa śaśiprabhaḥ //
taruṇo rūpasaṃpannaḥ kośonmuktorago yathā

jātāścaryeṇa bhavatā punarevābhyabhāṣi saḥ //
kaḥ prabhāvo hi bhagavanneṣa yena bhavānpunaḥ

parityajyātra jarasaṃ na vo bhrājasi sāṃpratam //
asti cedavakāśaste tato brūhi tapodhana

tapodhana uvāca // //
vṛddhakālakṣitipate jāne tvāṃ sumahāmate //
imāmapi ca jāne'haṃ tava patnīṃ pativratām

janmano'smādiyaṃ rājannāsīdviprasya kanyakā //
turvasorvedavapuṣaḥ śubhācārā śubhānanā

tena dattā vivāhārthaṃ naidhruvāya mahātmane //
sa ca kālavaśaṃ prāpto naidhruvo'prāptayauvanaḥ

vaidhavyaṃ pālayaṃtyeṣā mṛtā'vaṃtyāṃ śubhavratā //
tena puṇyena saṃjātā pāṃḍyasya nṛpateḥ sutā

pariṇītā tvayā rājanpativrataratā sadā //
tvayā saheha saṃprāptā muktiṃ prāpsyatyanuttamām

ayodhyāyāmathāvaṃtyāṃ mathurāyāmathāpi vā //
dvāravatyāṃ ca kāṃcyāṃ vā māyāpuryāmatho nṛpa

api pātakino ye ca kālena nidhanaṃ gatāḥ //
te hi svargādihāgatya kāśyāṃ mokṣamavāpnuyuḥ

avaimi tvāmapi nṛpadvijo'bhūḥ pūrvajanmani //
māthuraḥ śivaśarmākhyo māyāpuryāṃ bhavānmṛtaḥ

tatpuṇyātprāpya vaikuṃṭhaṃ bhuktvā bhogānmanoramān //
tatpuṇyaśeṣātkṣitipo jātastvaṃ naṃdivardhane

vṛddhakālāvanīpāla tenaiva sukṛtena ca //
mokṣakṣetramidaṃ prāpto muktiṃ prāpsyasyanuttamām

anyacca śṛṇu rājeṃdra tvayā yatsamudīritam //
kartā kārayitā śaṃbhuḥ prāsādasyeti tatsphuṭam

sukṛtaṃ naiva satatamākhyātavyaṃ kadācana //
kṛtaṃ mayeti kathanātpuṇyaṃ kṣayati tatkṣaṇāt

tasmātsarvaprayatnena gopanīyaṃ nidhānavat //
sukṛtaṃ kīrtanādvyarthaṃ bhavedbhasmahutaṃ tathā

niścitaṃ viśvanāthena preritena tvayā'nagha //
kṛtaṃ hi kṛtakṛtyena prāsādādiha vedmyaham

vṛddhakāleśvaraṃ nāma liṃgametanmahīpate //
jānīhyanādisaṃsiddhaṃ nimittaṃ kiṃtu vai bhavān

darśanātsparśanāttasya pūjanācchravaṇānnateḥ //
vṛddhakāleśaliṃgasya sarvaṃ prāpnoti vāṃchitam

kūpaḥ kālodako nāma jarāvyādhivighātakṛt //
yadīya jalapānena mātuḥstanyamapānavān

kṛtakūpodakasnānaḥ kṛtaitalliṃgapūjanaḥ //
varṣeṇa siddhimāpnoti manobhilaṣitāṃ naraḥ

na kuṣṭhaṃ na ca visphoṭā naraṃghā na vicarcikā //
pītātspṛṣṭātpratiṣṭhaṃti kaphaḥ kālatamodakāt

nāgnimāṃdyaṃ naiva śūlaṃ na meho na pravāhikā //
na mūtrakṛcchraṃ nā pāmā pānāyasyāsya sevanāt

bhūtajvarāśca ye kecidye kecidviṣamajvarāḥ //
te kṣipramupaśāmyaṃti hyetatkūpodasevanāt

tavāgrato mama jarā palitaṃ ca yathāvidhi //
etatkūpodapānena kṣaṇānnaṣṭaṃ navo'bhavam

vṛddhakāleśvare liṃge sevitena daridratā //
nopasargā na vā rogā na pāpaṃ nāghajaṃ phalam

uttare kṛttivāsasya vārāṇasyāṃ prayatnataḥ //
vṛddhakāleśvaraṃ liṃgaṃ draṣṭavyaṃ siddhikāmukaiḥ

ityuktvā taṃ mahīpālaṃ haste dhṛtvā tapodhanaḥ //
sānaṃgalekhā rājñīkaṃ tasmim̐lliṃge layaṃ yayau

mahākāla mahākāla mahākāleti kīrtanāt //
śatadhā mucyate pāpairnātra kāryā vicāraṇā

itthaṃ bhavitrī te muktiḥ kaiṭabhārātidarśanāt //
bhogānbhuktvā bahuvidhānvaikuṃṭha nagare śubhe

iti saṃhṛṣṭatanūruhaḥ sa vipro bhagavattadgaṇavaktrato niśamya //
svamudarkamathārkakoṭiramyaṃ harilokaṃ parilokayāṃcakāra

// maitrāvaruṇiruvāca // //
lopāmudre sa vipreṃdro bhogānbhuktvā manoramān //
māyāpuryāṃ kṛtaprāṇatyāga puṇyabalena ca

vaikuṃṭhalokādāgatya pattane naṃdivardhane //
bhaumāni bhuktvā saukhyāni putrānutpādya suṃdarān //

teṣu rājyaṃ vinikṣipya prāpya vārāṇasīṃ purīm //
viśveśvaraṃ samārādhya nirvāṇapadamīyivān

etatpuṇyatamākhyānaṃ viprasya śivaśarmaṇaḥ //
śrutvā pāpavinirmukto jñānaṃ paramamṛcchati//

iti śrīskāṃde mahāpurāṇa ekāśītisāhasryāṃ saṃhitāyāṃ caturthe kāśīkhaṃḍe pūrvāddhe śivaśarmanirvāṇaprāpaṇaṃ nāma caturviṃśodhyāyaḥ