Skanda Purana · Chapter 4.18

agastiruvāca // //
iti śṛṇvankathāṃ ramyāṃ śivaśarmā'tha māthuraḥ //
muktipuryāṃ susaṃsnāto māyāpuryāṃ gatāsukaḥ

netrayoḥ prāghuṇī cakre tataḥ saptarṣimaṃḍalam //
vrajansa vaiṣṇavaṃ lokamaṃte viṣṇupurīkṣaṇāt

uvāca ca prasannātmā stutaścāraṇamāgadhaiḥ //
prārthito devakanyābhistiṣṭha tiṣṭheti cakṣaṇam

sthitā sutāsu niḥśvasasya maṃdabhāgyā vayaṃ tviti //
gataḥ puṇyatamām̐llokānasau yatpuṇyavattamaḥ

iti śṛṇavanmukhāttāsāṃ vacanāni vimānagaḥ //
devau kasyāyamatulo lokastejomayaḥ śubhaḥ

iti dvijavacaḥ śrutvā procaturgaṇasattamau //
śivaśarmañchivamate sadā saptarṣayomalāḥ

vasaṃtīha prajāḥ sraṣṭuṃ viniyuktāḥ prajāsṛjā //
marīciratriḥ pulahaḥ pulastyaḥ kraturaṅgirāḥ

vasiṣṭhaśca mahābhāgo brahmaṇo mānasāḥ sutāḥ //
sapta brahmāṇa ityete purāṇe niścayaṃ gatāḥ

saṃbhūtiranasūyā ca kṣamā prītiśca sannatiḥ //
smṛtirūrjā kramādeṣāṃ patnyo lokasya mātaraḥ

eteṣāṃ tapasā caitaddhāryate bhuvanatrayam //
utpādya brahmaṇā pūrvamete proktā maharṣayaḥ

prajāḥ sṛjata re putrā nānārūpāḥ prayatnataḥ//
tataḥ praṇamya brahmāṇaṃ tapase kṛtaniścayāḥ

avimuktaṃ samāsādya kṣetraṃkṣetrajñadhiṣṭhitam //
muktaye sarvajaṃtūnāmavimuktaṃ śivena yat

pratiṣṭhāpya ca liṃgāni te svanāmnāṃkitāni ca //
śiveti parayā bhaktyā tepurugraṃ tapo bhṛśama

tuṣṭastattapasā śaṃbhuḥ prājāpatyapadaṃ dadau //
liṃgānyatrīśvarādīni dṛṣṭvā kāśyāṃ prayatnataḥ

prājāpatye'tra te loke vasaṃtyujjvalatejasaḥ //
gokarṇeśasya sarasaḥ pratyaktīre pratiṣṭhitam

liṃgamatrīśvaraṃ dṛṣṭvā brahmatejobhivardhate //
karkoṭa vāpyā īśāne marīceḥ kuṃḍamuttamam

tatra snātvā naro bhakttyā bhrājate bhāskaro yathā //
marīcīśvara saṃjñaṃ tu tatra liṃgaṃ pratiṣṭhitam

talliṃgadarśanādvipra mārīcaṃ lokamāpnuyāt //
kāṃtyā marīcimālīva śobhate puruṣarṣabhaḥ

pulaheśa pulastyeśau svargadvārasya paścime //
tau dṛṣṭvā manujo loke prājāpatye mahīyate

harikeśavane ramye dṛṣṭvaivāṃgiraseśvaram //
iha loke vasedvipra tejasāparibṛṃhitaḥ

varaṇāyāstaṭe ramye dṛṣṭvā vāsiṣṭhamīśvam //
kratvīśvaraṃ ca tatraiva labhate vasatiṃ tviha

kāśyāmetāni liṃgāni sevitāni śubhaiṣibhiḥ//
manobhivāṃchitaṃ dadyuriha loke paratra ca

gaṇāvūcatuḥ // //
śivaśarmanmahābhāga tiṣṭhate sātra suṃdarī //
aruṃdhatī mahāpuṇyā pativrataparāyaṇā

yasyāḥ smaraṇamātreṇa gaṃgāsnāna phalaṃ labhet //
aṃtaḥpuracarairdvitraiḥ pavitraiḥ sahito vibhuḥ

sadā nārāyaṇo devo yasyāścakre kathāṃ mudā //
kamalāyāḥ purobhāge pātivratya sutoṣitaḥ

pativratāsvaruṃdhatyāḥ kamale vimalāśayaḥ //
yathāsti na tathā'nyasyāḥ kasyāścitkāpi bhāmini

na tadrūpaṃ na tacchīlaṃ na tatkaulīnyameva ca //
na tatkalāsukauśalyaṃ patyuḥ śuśrūṣaṇaṃ na tat

na mādhuryaṃ na gāṃbhīryaṃ na cāryaparitoṣaṇam //
aruṃdhatyā yathā devi tathā'nyāsāṃ kvacitpriye

dhanyāstā yoṣito loke sabhāgyāḥ śuddhabuddhayaḥ //
aruṃdhatyāḥ prasaṃge yā nāmāpi parigṛhṇate

yadā pativratānāṃ tu kathāsmadbhavane bhavet //
tadā prāthamikīṃ rekhāmeṣā'laṃkurute satī // 4.1.18.३० !/
bruvatoriti saṃkathāṃ tathā gaṇayorvaiṣṇavayormudāvahām //
dhruvalokaupāgatastato nayanātithyamatathyavarjitaḥ

//
iti śrīskāṃde mahāpurāṇa ekāśītisāhasyāṃ saṃhitāyāṃ caturthe kāśīkhaṃḍe pūrvārddhe saptarṣilokavarṇanaṃnāmāṣṭādaśo'dhyāyaḥ