Skanda Purana · Chapter 4.14

// gaṇāvūcatuḥ //
alakāyāḥ purobhāge pūraiśānīmahodayā //
asyāṃ vasaṃti satataṃ rudrabhaktāstapodhanāḥ

śivasmaraṇasaṃsaktāḥ śivavrataparāyaṇāḥ //
śivasātkṛtakarmāṇaḥ śivapūjāratāḥ sadā

sābhilāṣāstapasyaṃti svargabhogostvitīha naḥ //
te'tra rudrapure ramye rudrarūpadharā narāḥ

ajaikapādahirbudhnya mukhyā ekādaśāpi vai //
rudrāḥ parivṛḍhāścātra triśūlodyatapāṇayaḥ

puryaṣṭakaṃ ca duṣṭebhyo devadhrugbhyo hyavaṃti te //
prayacchaṃti varānnityaṃ śivabhaktajane varāḥ

etairapi tapastaptaṃ prāpya vārāṇasīṃ purīm //
īśāneśaṃ mahāliṃgaṃ paristhāpya śubhapradam

īśāneśa prasādena diśyaiśyāṃ hi digīśvarāḥ //
ekādaśāpyekacarā jaṭāmukuṭamaṃḍitāḥ

bhālanetrā nīlagalāḥ śuddhāṃgā vṛṣabhadhvajāḥ //
asaṃkhyātāḥ sahasrāṇi ye rudrā adhibhūtalam

te'syāṃ puri vasaṃtyaiśyāṃ sarvabhogasamṛddhayaḥ //
īśāneśaṃ samabhyarcya kāśyāṃ deśāṃtareṣvapi

vipannāstena puṇyena jāyaṃte 'trapurohitāḥ //
aṣṭamyāṃ ca caturdaśyāmīśāneśaṃ yajaṃti ye

ta eva rudrā vijñeyā ihāmutrāpyasaṃśayam //
kṛtvā jāgaraṇaṃ rātrāvīśāneśvara saṃnidhau

upoṣyabhūtāṃyāṃkāṃcinna naro garbhabhākpunaḥ //
svargamārge kathāmitthaṃ śṛṇvanviṣṇugaṇoditām

śivaśarmā divāpyuccairapaśyaccaṃdracaṃdrikām //
āhlādayaṃtīṃ bahuśaḥ samaṃ sarveṃdriyairmanaḥ

camatkṛtya camatkṛtya koyaṃ loko harergaṇau //
papraccha śivaśarmā tau procatustaṃ ca tau dvijam

gaṇāvūcatuḥ // //
śivaśarmanmahābhāga loka eṣa kalānidheḥ //
pīyūṣavarṣibhiryasya karairāpyāyyate jagat

pitā somasya bho vipra jajñe'trirbhagavānṛṣiḥ //
brahmaṇo mānasātpūrvaṃ prajāsargaṃ vidhitsataḥ

anuttaraṃ nāma tapo yena taptaṃ hi tatpurā //
trīṇivarṣasahasrāṇi divyānītīha nau śrutam

ūrdhvamācakrame tasya retaḥ somatvamīyivat //
netrābhyāṃ tacca susrāva daśadhā dyotayaddiśaḥ

taṃ garbhaṃ vidhinā diṣṭā daśa devyo dadhustataḥ //
sametya dhārayāmāsurnaiva tāḥ samaśaknuvan

yadā na dhāraṇe śaktāstasya garbhasya tā diśaḥ //
tatastābhiḥ sajūḥ somo nipapāta vasuṃdharām

patitaṃ somamālokya brahmā lo kapitāmahaḥ //
rathamāropayāmāsa lokānāṃ hitakāmyayā

sa tena rathamukhyena sāgarāṃtāṃ vasuṃdharām //
triḥsaptakṛtvo druhiṇaścakārāmuṃ pradakṣiṇam

tasya yatplavitaṃ tejaḥ pṛthivīmanvapadyata //
tathauṣadhyaḥ samudbhūtā yābhiḥ saṃdhāryate jagat

salabdhatejā bhagavānbrahmaṇā vardhitaḥ svayam //
tapastepe mahābhāga padmānāṃ daśatīrdaśa

avimuktaṃ samāsādya kṣetraṃ paramapāvanam //
saṃsthāpya liṃgamamṛtaṃ caṃdreśākhyaṃ svanāmataḥ

bījauṣadhīnāṃ toyānāṃ rājābhūdagrajanmanām //
prasādāddevadevasya viśveśasya pinākinaḥ

tatra kūpaṃ vidhāyaikamamṛtodamiti smṛtam //
yasyāṃbupānasnānābhyāṃ naro'jñātātpramucyate

tuṣṭenadevadevena svamaulau yo dhṛtaḥ svayam //
ādāya tāṃ kalāmekāṃ jagatsaṃjavinīṃ parām

paścāddakṣeṇa śaptopi māsone kṣayamāpya ca //
āpyāyyatesau kalayā punareva tayā śaśī

sa tatprāpya mahārājyaṃ somaḥ somavatāṃ varaḥ //
rājasūyaṃ samājahre sahasraśatadakṣiṇam

dakṣiṇāmadadatsomastrīṃllokāniti nau śrutam //
tebhyo brahmarṣimukhyebhyaḥ sadasyebhyaśca bho dvija

hiraṇyagarbho brahmā'trirbhṛguryatrartvijobhavan //
sadasyobhūddharistatra munibhirbahubhiryutaḥ

taṃsinī ca kuhūścaiva dyutiḥ puṣṭiḥ prabhāvasuḥ //
kīrtirdhṛtiśca lakṣmīśca navadevyaḥ siṣevire

umayā sahitaṃ rudraṃ saṃtarpyādhvarakarmaṇā //
prāpa soma iti khyātiṃ dattāṃ somena śaṃbhunā

tatraiva taptavānsomastapaḥ paramaduṣkaram //
tatraiva rājasūyaṃ ca cakre caṃdreśvarāgrataḥ

tatraiva brāhmaṇaiḥ prītairityuktosau kalānidhiḥ //
somosmākaṃ brāhmaṇānāṃ rājā trailokyadakṣiṇaḥ

tatraiva devadevasya vilocanapadaṃ gataḥ //
devena prītamanasā trailokyāhlādahetave

tvaṃ mamāsya parāmūrtirityuktastattapobalāt //
jagattavodayaṃ prāpya bhaviṣyati sukhodayam

tvatpīyūṣamayairhastaiḥ spṛṣṭametaccarācaram //
bhānutāpaparītaṃ ca parā glāniṃ vihāsyati

etaduktvā maheśāno varānanyānadānmudā //
dvijarājatapastaptaṃ yadatyugraṃ tvayātra vai

yacca kratu kriyotsargastvayā mahyaṃ niveditaḥ //
sthāpitaṃ yattvidaṃ liṃgaṃ mama caṃdreśvarābhidham

tatotra liṃge tvannāmni somasomārdharūpadhṛk //
pratimāsaṃ paṃcadaśyāṃ śuklāyāṃ sarvagopyaham //

ahorātraṃ vasiṣyāmi trailokyaiśvaryasaṃyutaḥ //
tatotra pūrṇimāyāṃ tu kṛtā svalpāpi satkriyā

japahomārcanadhyānadānabrāhmaṇabhojanam //
mahāpūjā ca sā nūnaṃ mama prītyai bhaviṣyati

jīrṇoddhārādikaraṇaṃ nṛtyavādyādikārpaṇam //
dhvajāropaṇakarmādi tapasviyatitaparṇam

caṃdreśvare kṛtaṃ sarvaṃ tadānaṃtyāya jāyate //
anyacca te pravakṣyāmi śṛṇu guhyaṃ kalānidhe

abhaktāya ca nākhyeyaṃ nāstikāya śrutidruhe //
amāvāsyā yadā soma jāyate somavāsare

tadopavāsaḥ kartavyo bhūtāyāṃ sadbhirādarāt //
kṛtanityakriyaḥ soma trayodaśyāṃ niśāmaya

śanipradoṣe saṃpūjya liṃgaṃ caṃdreśvarāhvayam //
naktaṃ kṛtvā trayodaśyāṃ niyamaṃ parigṛhya ca

upoṣya ca caturdaśyāṃ kṛtvā jāgaraṇaṃ niśi //
prātaḥ somakuhūyoge snātvā caṃdrodavāribhiḥ

upāsya saṃdhyāṃ vidhivatkṛtasarvodaka kriyaḥ //
upacaṃdrodatīrtheṣu śrāddhaṃ vidhivadācaret

āvāhanārghyarahitaṃ piṃḍāndadyātprayatnataḥ //
vasurudrāditisutasvarūpapuruṣatrayam

mātāmahāṃstathoddiśya tathānyānapi gotrajān //
guruśvaśurabaṃdhūnāṃ nāmānyuccārya piṃḍadaḥ

kurvañchrāddhaṃ ca tīrthesmiñchraddhayoddharatekhilān //
gayāyāṃ piṃḍadānena yathā tupyaṃti pūrvajāḥ

tathā caṃdrodakuṃḍe'tra śrāddhaistṛpyaṃti pūrvajāḥ //
gayāyāṃ ca yathā mucyetsarvarṇātpitṛjānnaraḥ

tathā pramucyate carṇāccaṃdrode piṇḍadānataḥ //
yadā caṃdreśvaraṃ draṣṭuṃ yāyātkopi narottamaḥ

tadā nṛtyaṃti muditāstatpūrvaprapitāmahāḥ//
ayaṃ caṃdrodatīrthesmiṃstarpaṇaṃ naḥ kariṣyati

asmākaṃ maṃdabhāgyatvādyadi naiva kariṣyati//
tadātattīrtha saṃsparśādasmattṛptirbhaviṣyati

spṛśennāpi yadā maṃdastadā drakṣyati tṛptaye//
evaṃ śrāddhaṃ vidhāyātha spṛṣṭvā caṃdreśvaraṃ vratī//
saṃtarpya viprāṃśca yatīnkuryādvai pāraṇaṃ tataḥ

evaṃ vrate kṛte kāśyāṃ sadarśe somavāsare//
bhavedṛṇatrayānmukto mṛgāṃkamadanugrahāt

atra yātrā mahācaitryāṃ kāryā kṣetranivāsibhiḥ //
tārakajñānalābhāya kṣetravighnanivartinī

caṃdreśvaraṃ samabhyarcya yadyanyatrāpi saṃsthitaḥ //
aghaughapaṭalīṃ bhittvā somalokamavāpsyati

kalau caṃdreśamahimā nābhāgyairavagamyate//
anyacca te pravakṣyāmi paraṃ guhyaṃ niśāpate

siddhayogīśvaraṃ pīṭhametatsādhakasiddhidam //
surāsureṣu gaṃdharva nāgavidyādhareṣvapi

rakṣoguhyakayakṣeṣu kiṃnareṣu nareṣu ca //
saptakoṭyastu siddhānāmatra siddhā mamāgrataḥ ६५//
ṣaṇmāsaṃ niyatāhāro dhyāyanviśveśvarīmiha//
caṃdreśvarārcanāyātānsiddhānpaśyati so'gragān

siddhayogīśvarī sākṣādvaradā tasya jāyate //
tavāpi mahatī siddhiḥ siddhayogīśvarīkṣaṇāt

saṃti pāṭhānyanekāni kṣitau sādhakasiddhaye//
paraṃ yogīśvarī pīṭhādbhūpṛṣṭhenāśu siddhidam

yatra caṃdreśvaraṃ liṃgaṃ tvayedaṃ sthāpitaṃ śaśin//
idameva hi tatpīṭhamadṛśyamakṛtātmabhiḥ

jitakāmā jitakrodhā jitalobhaspṛhāsmitāḥ//
yogīśvarīṃ prapaśyaṃti mama śaktiparāṃ hitām

ye tu pratyaṣṭami janāstathā prati caturdaśi //
siddhayogīśvarīpīṭhe pūjayiṣyaṃti bhāvitāḥ

adṛṣṭarūpāṃ subhagāṃ piṃgalāṃ sarvasiddhidām //
dhūpanaivedyadīpādyaisteṣāmāvirbhaviṣyati

iti dattvā varāñchaṃbhustasmai caṃdramase dvija //
aṃtarhito maheśānastatra vaiśveśvare pure

tadārabhya ca loke'smindvijarājodhipobhavat //
diśovitimirāḥ kurvannijaiḥ prasṛmaraiḥ karaiḥ

somavāravratakṛtaḥ somapānaratā narāḥ //
somaprabheṇayānena somalokaṃ vrajaṃti hi //

caṃdreśvarasamutpattiṃ tathā cāṃdramasaṃ tapaḥ //
yaḥ śroṣyati naro bhaktyā caṃdraloke sa ijyate

agastiruvāca // //
śivaśarmaṇi śarmakāriṇīṃ pa thi divye śramahāriṇīṃ gaṇau //
kathayaṃtau tu kathāmimāṃ śubhāmuḍulokaṃ parijagmatustataḥ

iti śrīskāṃde mahāpurāṇa ekāśītisāhasryāṃ saṃhitāyāṃ caturthe kāśīkhaṃḍe pūrvārddhe somalokavarṇanaṃ nāma caturdaśo'dhyāyaḥ