Skanda Purana · Chapter 4.13

gaṇāvūcatuḥ // //
imāṃ gaṃdhavatīṃ puṇyāṃ purīṃ vāyorvilokaya //
vāruṇyā uttare bhāge mahābhāgyanidhe dvija

asyāṃ prabhaṃjano nāma jagatprāṇodigīśvaraḥ //
ārādhya śrīmahādevaṃ dikpālatvamavāptavān

purā kaśyapadāyādaḥ pūtātmeti ca viśrutaḥ //
dhūrjaṭe rājadhānyāṃ sa cacāra vipulaṃ tapaḥ

vārāṇasyāṃ mahābhāgo varṣāṇāmayutaṃ śatam //
sthāpayitvā mahāliṃgaṃ pāvanaṃ pavaneśvaram

yasya darśanamātreṇa pūtātmā jāyate naraḥ //
pāpakaṃcukamutsṛjya sa vasetpāvane pure

tatastasyogratapasā tapasāphaladaḥ śivaḥ //
āvirāsīttato liṃgājjyotīrūpo maheśvaraḥ

uvāca ca prasannātmā karuṇāmṛtasāgaraḥ //
uttiṣṭhottiṣṭha pūtātmanvaraṃ varaya suvrata

anena tapasogreṇa liṃgasyārādhanena ca //
tavādeyaṃ na pūtātmaṃstrailokye sacarācare

// pūtātmovāca //
devadevamahādeva devānāmabhayaprada //
brahmanārāyaṇeṃdrādi sarvadevapadaprada

vedāstvāṃ na ca viṃdaṃti kimātmaka iti prabho//
prāptāḥ śatapathatvaṃ ca netinetītivādinaḥ

brahmaviṣṇvopi girāṃ gocaro na ca vākpateḥ//
pramatheśaṃ kathaṃ stotuṃ mādṛśaḥ prabhavetprabho

prasahya pramimīteśa bhaktirmāṃstutikarmaṇi //
karomi kiṃ jagannātha na vaśyānīṃdriyāṇi me

viśvaṃ tvaṃ nāsti vai bhedastvamekaḥ sarvago yataḥ //
stutyaṃ stotā stutistvaṃ ca saguṇo nirguṇo bhavān

sargātpurā bhavāneko rūpanāma vivarjitaḥ //
yoginopi na te tattvaṃ viṃdaṃti paramārthataḥ

yadaikalo na śaknoṣi raṃtuṃ svairacara prabho //
tadicchā tavayotpannā sevyā śaktirabhūttava

tvameko dvitvamāpannaḥ śivaśaktiprabhedataḥ //
tvaṃ jñānarūpo bhagavānsvecchā śaktisvarūpiṇī

ubhābhyāṃ śivaśaktibhyā yuvābhyāṃ nijalīlayā //
utpāditā kriyāśaktistataḥ sarvamidaṃ jagat

jñānaśaktirbhavānīśa icchāśaktirumā smṛtā //
kriyāśaktiridaṃ viśvamasya tvaṃ kāraṇaṃ tataḥ

dakṣiṇāṃgaṃ tava vidhirvāmāṃgaṃ tava cācyutaḥ //
caṃdrasūryāgninetrastvaṃ tvanniḥśvāsaḥ śrutitrayam

tvatsvedādaṃbunidhayastava śrotraṃ samīraṇaḥ //
bāhavaste daśadiśo mukhaṃ te brāhmaṇāḥ smṛtāḥ

rājanyavaryāste bāhu vaiśyā ūrusamudbhavāḥ //
padbhyāṃ śūdrastaveśāna keśāste jaladāḥ prabho

tvaṃ puṃ prakṛtirūpeṇa brahmāṃḍamasṛjaḥ purā//
madhye brahmāṃḍamakhilaṃ viśvametaccarācaram

atastvatto na manye'haṃ kiṃcidbhinnaṃ jaganmaya //
tvayi sarvāṇi bhūtāni sarvabhūtamayo bhavān

namastubhyaṃ namastubhyaṃ namastu'bhyaṃ namonamaḥ //
ayameva varo nātha tvayi me'stu sthirā matiḥ

ityuktavati deveśa stasminpūtātmani prabhuḥ //
svamūrtitvaṃ samāropya dikpālapadamādadhe

sarvago mama rūpeṇa sarvatattvāvabodhakaḥ //
sarveṣāmāyuṣorūpaṃ bhavāneva bhaviṣyati

tava liṃgamidaṃ divyaṃ ye drakṣyaṃtīha mānavāḥ //
sarvabhogasamṛddhāste tvallokasukhabhāginaḥ

pavamāneśvaraṃ liṃgaṃ madhye janmasakṛnnaraḥ //
yathoktavidhinā pūjya sugaṃdhasnapanādibhiḥ

sugaṃdhacaṃdanaiḥ puṣpairmama loke mahīyate //
jyeṣṭheśātpaścimebhāge vāyukuṃḍottareṇa tu

pāvamānaṃ samārādhya pūto bhavati tatkṣaṇāt //
iti dattvā varāndevastasmim̐lliṃge layaṃ yayau

gaṇāvūcatuḥ //
iti gaṃdhavatī puryāḥ svarūpaṃ te nirūpitam //
tasyāḥ prācyāṃ kuberasya śrīmatyeṣālakāpurī

śaṃbhoḥ sakhitvamāpede nāthosyā bhaktiyogataḥ //
nidhīnāṃ padmamukhyānāṃ dātā bhoktā harārcanāt

// śivaśarmovāca // //
kosau kasya punaḥ kīdṛgbhaktirasya sadāśive //
yayā sakhitvamāpanno devadevasyadhūrjaṭeḥ

iti śrotuṃ mama manaḥ śrutigocaratāṃ gatam //
yuvayorvāksudhāsvāda medurodaramaṃtharam

gaṇāvūcatuḥ // //
śivaśarmanmahāprājña pariśuddheṃdriyeśvara //
sutīrthakṣālitāśeṣajanmajātamahāmala

suhṛdi premasaṃpanne tvayyanudyaṃ na kiṃcana //
sādhubhiḥ saha saṃvādaḥ sarvaśreyo'bhivṛddhaye

āsītkāṃpilyanagare somayājikulodbhavaḥ //
dīkṣito yajñadattākhyo yajñavidyāviśāradaḥ

vedavedāṃgavedārthānvedoktācāracaṃcuraḥ //
rājamānyo bahudhano vadānyaḥ kīrtibhājanam

agniśuśrūṣaṇarato vedādhyayanatatparaḥ //
tasya putro guṇanidhiścaṃdrabiṃbasamākṛtiḥ

kṛtopanayanaḥ sotha vidyāṃ jagrāha bhūriśaḥ //
atha pitrānabhijñāto dyūtakarmarato'bhavat

ādāyādāya bahuśo dhanaṃ mātuḥ sakāśataḥ //
dadāti dyūtakārebhyo maitrī taiśca cakāra saḥ

saṃtyakta brāhmaṇācāraḥ saṃdhyāsnānaparāṅmukhaḥ //
niṃdako vedaśāstrāṇāṃ devabrāhmaṇaniṃdakaḥ /

/
smṛtyācāravihīnastu gītavādyavinodabhāk //
naṭapākhaṃḍibhaṃḍaiśca baddhapremaparaṃparaḥ

preritopi jananyā sa na yāti pituraṃtikam //
gṛhakāryāṃtaravyagro dīkṣito dīkṣitāyinīm

yadā yadaiva tāṃ pṛcchedayeguṇanidhiḥ sutaḥ //
na dṛśyate mayā gehe kva yāti vidadhāti kim

tadā tadeti sā brūyādidānīṃ sa bahirgataḥ //
snātvā samarcya vai devānetāvaṃtamanehasam

adhītyādhyayanārthaṃ sa dvitrairmitraiḥ samaṃ yayau //
ekaputreti tanmātā pratārayati dīkṣitam

na tatkarma ca tadvṛttaṃ kiṃcidvetti sa dīkṣitaḥ //
sa ca keśāṃtakarmāsya kṛtvā varṣe'tha ṣoḍaśe

gṛhyoktena vidhānena pāṇigrāhamakārayat //
pratyahaṃ tasya jananī sutaṃ guṇanidhiṃ mṛdu

śāsti snehārdrahṛdayā krodhanaste pitetyalam //
yadi jñāsyati te vṛttaṃ tvāṃ ca māṃ tāḍayiṣyati

ācchādayāmi te nityaṃ pituragre kuceṣṭitam //
lokamānyosti te tātaḥ sadācārairna vai dhanaiḥ

brāhmaṇānāṃ dhanaṃ putra sadvidyā sādhusaṃgamaḥ //
sacchrotriyāstvanūcānā dīkṣitāḥ somayājinaḥ //

iti rūḍhimiha prāptāstava pūrvapitāmahāḥ //
tyaktvā durvṛttasaṃsargaṃ sādhusaṃgarato bhava

sadvidyā sumano dhehi brāhmaṇācāramācara //
tavānurūpārūpeṇa vayasākulaśīlataḥ

ūnaviṃśatiko'si tvameṣā ṣoḍaśavārṣikī //
tava patnī guṇanidhe sādhvī madhurabhāṣiṇī

etāṃ saṃvṛṇu sadvṛttāṃ pitṛbhaktiyutā bhava //
śvaśuropi hi te mānyaḥ sarvatra guṇaśīlataḥ

tato'patrapase kiṃ na tyaja durvṛttatāṃ śiśo //
mātulāste'tulāḥ putra vidyāśīlakulādibhiḥ//

tebhyopi na bibheṣi tvaṃ śuddhosyubhaya vaṃśataḥ //
paśyaitānprativeśmasthānbrāhmaṇānāṃ kumārakān

gṛhepi śiṣyānpaśyaitānpituste vinayocitān //
rājāpi śroṣyati yadā tava duśceṣṭitaṃ suta

śraddhāṃ vihāya te tāte vṛttilopaṃ kariṣyati //
bālaceṣṭitamevaitadvadaṃtyadyāpi te janāḥ

anaṃtaraṃ hasiṣyaṃti yuktaṃ dīkṣitatāstviti //
sarvepyākṣārayiṣyaṃti tava vipraṃ ca māṃ ca vai

mātuścaritraṃ tanayo dhatte durbhāṣaṇairiti //
pitā pitena pāpīyāñcchrutismṛtipathīnakim

tadaṃghrilīnamanaso mama sākṣī maheśvaraḥ //
na cartusnātayāpīha mukhaṃ duṣṭasya vīkṣitam

aho balīyānsavidhiryena jātā bhavāniti //
pratikṣaṇaṃ jananyeti śikṣyamāṇotidurmadaḥ

na tatyāja ca taddharmaṃ durbodho vyasanī yataḥ //
mṛgayā madya paiśunya veśyācauryadurodaraiḥ

sapāradārairvyasanairebhiḥ kotra na khaṃḍitaḥ //
yadyanmadhye gṛhe paśyettattannītvā sudurmatiḥ

arpayeddyūtakārāṇāṃ sakupyaṃ vasanādikam //
navaratnamayīṃ mātuḥ karataḥ piturūrmikāma

svapaṃtyāstvekadā''dāya durodarikare'rpayat //
ekadā gacchatā rājabhavanānnijamudrikā

dīkṣitena parijñātā daivāddyūtakṛtaḥ kare //
uvāca dīkṣitastaṃ ca kuto labdhā tvayormikā //
pṛṣṭastenātha nirbaṃdhādasakṛtpratyuvāca kim

mamākṣipasi viproccaiḥ kiṃ mayā caurya karmaṇā //
labdhā mudrā tvadīyena putreṇaiṣā mamārpitā

mama māturhi pūrve dyurjitvānīto hi śāṭakaḥ //
na kevalaṃ mamāpyetadaṃgulīyaṃ samarpitam

anyeṣāṃ dyūtakartṛṇāṃ bhūri tenārpitaṃ vasu //
ratnakupyadukūlāni bhṛṃgāruprabhṛtīni ca

bhājanāni vicitrāṇi kāṃsya tāmramayāni ca //
nagnīkṛtyaprati dinaṃ baddhyaṃte dyūtakāribhiḥ

na tena sadṛśaḥ kaścidākṣiko bhūmimaṃḍale //
adya yāvattvayā vipra durodaraśiromaṇiḥ

kathaṃ nājñāyi tanayo 'vinayānayakovidaḥ //
iti śrutvā trapābhāra vinamratarakaṃdharaḥ

prāvṛtya vāsasā mauliṃ prāviśannijamaṃdiram //
mahāpativratāmāsya patnīṃ provāca tāmatha

dīkṣitāyini kutrāsi kva te guṇanidhiḥ sutaḥ //
atha tiṣṭhatu kiṃ tena kva sā mama śubhormikā

aṃgodvartana kāle yā tvayā meṃ'gulito hṛtā //
navaratnamayīṃ śīghraṃ tāmānīya prayaccha me

iti śrutvātha tadvākyaṃ bhītā sā dīkṣitāyinī //
provāca sā tu mādhyāhnīṃ kriyāṃ niṣpādayatvatha

vyagrāsmi devapūjārthamupahārādi karmaṇi //
samayoyamatikrāmedatithīnāṃ priyātithe

idānīmeva pakvānnakaraṇavyagrayā mayā //
sthāpitā bhājane kvāpi vismṛteti na vedmyaham

dīkṣita uvāca // //
haṃho satputrajanani nityaṃ satyaprabhāṣiṇi //
yadāyadā tvāṃ saṃpṛcche tanayaḥ kva gatastviti

tadātadeti tvaṃ brūyā nāthedānīṃ sa nirgataḥ //
adhītyādhyayanārthaṃ ca dvitrairmitraiḥ sayugbahiḥ

kutastvacchāṭakaḥ patni māṃjiṣṭho yo mayā'rpitaḥ //
laṃbate vastradhānyāṃyastathyaṃ brūhi bhayaṃ tyaja

sāṃprataṃ nekṣyate sopi bhṛṃgārurmaṇimaṃḍitaḥ //
paṭṭasūtramayīsāpi tripaṭī kva nṛpārpitā

kva dākṣiṇātyaṃ tatkāṃsyaṃ gauḍī tāmraghaṭī kva sā //
nāgadaṃtamayī sā kva sukhakautukamaṃcikā

kva sā parvatadeśīyā caṃdrakāṃtaśilodbhavā //
dīpikā vyagrahastāgrā sālaṃkṛcchālabhaṃjikā

kiṃ bahūktena kulaje tubhyaṃ kupyāmyahaṃ vṛthā //
tadābhyavahariṣyehamupayaṃsyāmyahaṃ yadā

anapatyosmi tenāhaṃ duṣṭena kuladūṣiṇā //
uttiṣṭhānaya darbhāṃbu tasmai dadyāṃ tilāṃjalim

aputratvaṃ varaṃ nṛṇāṃ kuputrātkulapāṃsanāt //
tyajedekaṃ kulasyārthe nītireṣā sanātanī

snātvā nityavidhiṃ kṛtvā tasminnevāhnikasyacit //
śrotriyasya sutāṃ prāpya pāṇiṃ jagrāha dīkṣitaḥ

śrutvā tathā sa vṛttāṃtaṃ prāktanaṃ svaṃ viniṃdya ca //
kāṃciddiśaṃ samālocya niryayau dīkṣitāṃgajaḥ

ciṃtāmavāpa mahatīṃ kva yāmi karavāṇi kim //
nāhamabhyastavidyosmi na caivāsti dhanosmyaham

deśāṃtare hyasti dhanaḥ sadvidyaḥ sukhamedhate //
bhayamasti dhane caurātsavidyaḥ sarvato'bhayaḥ

yāyajūke kule janma kvakva me vyasanaṃ tathā //
aho balīyānsa vidhirbhāvikarmānusaṃdhayet

bhikṣituṃ nādhigacchāmi na me paricitaḥ kvacit //
na ca pārśve dhanaṃ kiṃcitkimatra śaraṇaṃ bhavet

sadābhyudite bhānau prasūrme mṛṣṭabhojanam//
dadyādadyātra kaṃ yāce yāceha jananī na me

iti ciṃtayatastasya bhānurastācalaṃ gataḥ //
etasminneva samaye kaścinmāheśvaro naraḥ

mahopahārānādāya nagarādbahirabhyagāt //
samabhyarcitumīśānaṃ śivarātrāvupoṣitaḥ

pakvānnagaṃdhamāghrāya kṣudhitaḥ sa tamanvagāt //
idamannaṃ mayā grāhyaṃ śivāyopaskṛtaṃ niśi

ityāśāmavalaṃbyātha dvāri śaṃbhorupāviśat //
dadarśa ca mahāpūjāṃ tena bhaktena nirmitām

vidhāya nṛtyagītādi bhaktāḥ suptāḥ kṣaṇaṃ yadā //
naivedyaṃ sa tadā''dātuṃ garbhāgāraṃ viveśa ha

dīpaṃ maṃdaprabhaṃ dṛṣṭvā pakvānnāvekṣaṇāya saḥ //
nijacailāṃcalādvartiṃ dattvā samudadīpayat

tataḥ pakkānnamādāya tvaritaṃ gacchato bahiḥ //
tasya pādatalāghātātprasuptaḥ kopyabudhyata

koyaṃkoyaṃ tvarāpannaścoroyaṃ gṛhyatāmiti //
yāvadbhūyātsamāgatya tāvatsa purarakṣakaiḥ

palāyamāno nihataḥ kṣaṇātpaṃcatvamāgataḥ //
abhakṣayacca naivedyaṃ bhāvipuṇyabalānna saḥ

atha baddhaḥ samāgatya pāśamudgarapāṇibhiḥ //
ninīṣubhiḥ sayaminīṃ yāmaiḥ sa vikaṭairbhaṭaiḥ

tāvatpāriṣadāḥ prāptāḥ kiṃkiṇījālamālitam //
divyaṃvimānamādāya taṃ netuṃ śūlapāṇayaḥ

śaṃbhorgaṇānsamālokya bhītaistairyamakiṃkaraiḥ //
avādipraṇatairitthaṃ durvṛttoyaṃ gaṇā dvijaḥ

kulācārapratīpoyaṃ pitrorvākyaparāṅmukhaḥ //
satyaśaucaparibhraṣṭaḥsaṃdhyāsnānavivarjitaḥ

āstāṃ dūre'sya karmāṇi śivanirmālyahārakaḥ //
pratyakṣato'tra vīkṣadhvamaspṛśyoyaṃ bhavādṛśām

śivanirmālyabhoktāraḥ śivanirmālyalaṃghakāḥ(?) //
śivanirmālyadātāraḥ sparśasteṣāṃ hyapuṇyakṛt

viṣamāloḍya vāpe yaṃ śreyovā'naśanaṃ param //
sevitavyaṃ śivasvaṃ na prāṇaḥ kaṃṭhagatairapi

yūyaṃ pramāṇaṃ dharmeṣu yathā na ca tathā vayam //
asti ceddharmaleśosya gaṇāstacchṛṇumo vayam

itthaṃ tadvākyamākarṇya procuḥ pāriṣadāstataḥ //
kiṃkarāḥ śivadharmā ye sūkṣmāste vai bhavādṛśaiḥ

sthūlalakṣyaiḥ kathaṃ lakṣyā lakṣyā ye sūkṣmadṛṣṭibhiḥ //
anenānena sā karma yatkṛtaṃ śṛṇuteha tat

pataṃtī liṃgaśirasi dīpacchāyā nivāritā //
svacailāṃcalato'nena dattvādīpe daśāṃ niśi

aparopi paro dharmo jātastatrāsya kiṃkarāḥ //
śṛṇvatā śivanāmāni prasaṃgādapigṛhṇataḥ

bhaktena vidhinā pūjā kriyamāṇā nirīkṣitā //
upoṣite na bhūtāyāmanena sthiracetasā

kaliṃgarājobhavitā'dhunāvidhutakalmaṣaḥ //
eṣa dvijavaro dūtā yūyaṃ yāta yathāgatāḥ

pārṣadairyamadūtebhyo mocitastviti sa dvijaḥ //
ariṃdamasya tanayaḥ kaliṃgādhiterdamaḥ

kramādrājyamavāpyātha pitaryuparate yuvā //
nānyaṃ dharmaṃ vijānāti durdamo bhūpatirdamaḥ

śivālayeṣu sarveṣu dīpadānādṛte dvija//
grāmādhīśānsamāhūya sarvāntsvaviṣayasthitān

itthamājñāpayāmāsa sa me daṃḍyo bhaviṣyati //
yasya yasyābhito grāmaṃ yāvaṃtaśca śivālayāḥ

tatra tatra sadā dīpo dyotanīyo'vicāritam //
mamājñābhaṃgadoṣeṇa śiraśchetsyāmyasaṃśayam

iti tadbhayato dīptā dīpāḥ prati śivālayam //
anenaiva sa dharmeṇa yāvajjīvaṃ damo nṛpaḥ

dharmarddhi mahatīṃ prāpya kāladharmavaśaṃ gataḥ //
sadīpavāsanāyāgodbahūndīpānpradīpya vai

alakāyāḥ patirabhūdratnadīpaśikhāśrayaḥ //
evaṃ phalati kālena śive'lpamapi yatkṛtam

iti jñātvā śive kāryaṃ bhajanaṃ svasukhārthibhiḥ //
kva sa dīkṣitadāyādaḥ sarvadharma parāṅmukhaḥ

svārthadīpadaśodyota liṃgamauli tamoharaḥ //
kaliṃgaviṣaye rājyaṃ prāpto dharmaratiḥ sadā

śivālaye samuddīpya dīpānprāgvāsanodayāt //
kvaiṣā dikpālapadavī śivaśarmanvilokaya //
manuṣyadharmaṇānena sāṃprataṃ yeha bhujyate

gaṇāvūcatuḥ // //
sarvadaiva śivenāsau sakhitvaṃ ca yatheyivān //
tadapyekamanā vipra saṃśṛṇuṣva bravāvahai

pādme kalpe purā vipra brahmaṇo mānasātsutāt //
pulastyādviśravā jajñe tasya vaiśravaṇaḥ sutaḥ

teneyamalakā bhuktā purī viśvakṛtā kṛtā //
ārādhyaṃ tryaṃbakaṃ devamatyugratapasā purā

vyatīte tatra kalpe vai pravṛtte meghavāhane //
yājñadattirasauśrīdastapastepe suduḥsaham

bhaktiprabhāvaṃ vijñāya śaṃbhostaddīpamātrataḥ //
purīṃ purāreḥ saṃprāpya kāśikāṃ citprakāśikām

śivaikadaśamudbodhya citraratnapradīpakam //
ananyabhaktisnehāḍhyaṃ tanmahodhyānaniścalam

śivaikyasumahāpātraṃ tapogniparibṛṃhitam //
kāmakrodhamahāvighnapataṃgāghātavarjitam

prāṇasaṃrodhanirvātaṃ nirmalaṃ nirmalekṣaṇāt//
saṃsthāpya śāṃbhavaṃ liṃgaṃ sadbhāvakusumārcitam

tāvattatāpa sa tapastvagasthipariśeṣitam//
yāvadbabhūva tadvarṣma varṣāṇāmayutaṃ śatam

tataḥ saha viśālākṣyā devo viśveśvaraḥ svayam //
alakāpatimālokya prasannenāṃtarātmanā

liṃge manaḥ samādhāya sthitaṃ sthāṇusvarūpiṇam //
uvāca varadosmīti taptvālamalakāpate

unmīlya nayane yāvatsa paśyati tapodhanaḥ //
tāvadudyatsahasrāṃśu sahasrādhika tejasam

puro dadarśa śrīkaṃṭhaṃ caṃdracūḍamumādhavam //
tattejaḥ paribhūtākṣitejāḥ saṃmīlya locane

uvāca devadeveśaṃ manorathapathātigam //
nijāṃghridarśanenātha dṛksāmarthyaṃ prayaccha me

ayameva varo nātha yattvaṃ sākṣānnirīkṣyase //
kimanyena vareṇeśa namaste śaśiśekhara

iti tadvacanaṃ śrutvā devadeva umāpatiḥ //
dadau darśanasāmarthyaṃ spṛṣṭvā pāṇitalena tam

prasārya nayane pūrvamumāmeva vyalokayat //
śaṃbhoḥ samīpe kāyoṣideṣā sarvāṃgasuṃdarī

anayā kiṃtapastaptaṃ mamāpi tapasodhikam //
aho rūpamaho prema saubhāgyaśrīraho bhṛśam

krūradṛgvīkṣate yāvatpunaḥpunaridaṃ vadan //
tāvatpusphoṭa tannetraṃ vāmaṃ vāmā vilokanāta

atha devyabravīddevaṃ kimasau duṣṭatāpasaḥ //
asakṛdvīkṣya māṃ vakti nyakkurvanme tapaḥprabhām

asakṛddakṣiṇenākṣṇā punarmāmevapaśyati //
asūyamāno me rūpaṃ premasaubhāgyasaṃpadaḥ

iti devīgiraṃ śrutvā prahasya prāha tāṃ prabhuḥ //
ume tvadīyaḥ putroyaṃ na ca krūreṇa cakṣuṣā

saṃpaśyate tapo lakṣmīṃ tava kiṃ tvadhivarṇayet //
iti devīṃ samābhāṣya tamīśaḥ punarabravīt

varāndadāmi te vatsa tapasānena toṣitaḥ //
nidhīnāmadhināthastvaṃ guhyakānāṃ bhaveśvaraḥ

yakṣāṇāṃ kinnarāṇāṃ ca rājā rājñāṃ ca suvrata //
patiḥ puṇyajanānāṃ ca sarveṣāṃ dhanado bhava

mayā sakhyaṃ ca te nityaṃ vatsyāmi ca tavāṃtike //
alakāṃ nikaṣāmitra tava prītivivṛddhaye

āgaccha pādayorasyāḥ pata te jananī tviyam //
iti dattvā varāndevaḥ punarāha śivāṃ śivaḥ //
prasādaṃ kuru deveśi tapasvinyaṃgaje'tra vai

devyuvāca // //
vatsa te niścalā bhaktirbhave bhavatu sarvadā //
bhavaikāṃṣeṃgo(?)gonetreṇa vāmena sphuṭitena ha

devena dattā ye tubhyaṃ varāḥ saṃtu tathaiva te //
kubero bhava nāmnā tvaṃ mama rūperṣyayā suta

tvayedaṃ sthāpitaṃ liṃgaṃ tava nāmnā bhaviṣyati //
siddhidaṃ sādhakānāṃ ca sarvapāpaharaṃ param

na dhanena viyujyeta na sakhyā na ca bāṃdhavaiḥ //
kubereśvaraliṃgasya kuryādyo darśanaṃ naraḥ

viśveśāddakṣiṇebhāge kubereśaṃ samarcayet //
naro lipyeta no pāpairna dāridryeṇa no'sukhaiḥ

iti dattvā varāndevo devyā saha maheśvaraḥ //
dhanadāyā viveśātha dhāma vaiśveśvaraṃ param

// gaṇāvūcatuḥ //
itthaṃ sakhitvaṃ śrīśaṃbhoḥ prāpaiṣa dhanadaḥ param //
alakāṃ nikaṣācaiṣa kailāsaḥ śaṃkarālayaḥ

puryāṃ yakṣeśvarāṇāṃ te svarūpamiti varṇitam //
yacchrutvā sarvapāpebhyo naro mucyedasaṃśayam

//
iti śrīskāṃde mahāpurāṇe ekāśītisāhasryāṃ saṃhitāyāṃ caturthe kāśīkhaṃḍe pūrvārddhe gaṃdhavatyalakāvarṇanaṃ nāma trayodaśodhyāyaḥ