Skanda Purana · Verses 3.9-3

tataḥ sa vipraḥ pratyūṣe putraśokena pīḍitaḥ //
aśoka dattasaṃyukto bhāryayā vilalāpa ha

vilapaṃtaṃ samālokya goviṃdasvāminaṃ dvijāḥ //
vaṇiksamudradattākhyaḥ samāninye nijaṃ gṛham

samānīya samāśvāsya dayāyukto vaṇigvaraḥ //
svadhanānāṃ hi sarveṣāṃ rakṣitāramakalpayat

smaranmahāyativacaḥ putradarśanalālasaḥ //
sa tasthau vaṇijo gehe putrabhāryāsamanvitaḥ

aśokadattanāmā tu dvitīyo vipranaṃdanaḥ //
śastre caiva tathā śāstre babhūvātivicakṣaṇaḥ

tathānyāsvapi vidyāsu nāsti tatsadṛśo bhuvi //
kṛtavidyo dvijasutaḥ prakhyāto nagare'bhavat

atrāṃtare narapatiṃ pratāpamukuṭābhidham //
kāśīdeśādhipo mallaḥ kaścidabhyāyayau balī

pratāpamukuṭo rājā mallasyāsya jayāya saḥ //
balinaṃ dvijaputraṃ tamāhvayāmāsa bhṛtyakaiḥ

tamāgataṃ samālokya pratāpamukuṭo'bravīt //
aśokadatta sahasā mallamenaṃ balotkaṭam

durjayaṃ jahi saṃgrāme tvaṃ vai valavatāṃ varaḥ //
dākṣiṇātyamahāmallapatāvasmiñjite tvayā

yadiṣṭaṃ tava tatsarvaṃ dāsyāmyahaṃ na saṃśayaḥ //
iti tasya vacaḥ śrutvā valavāndvijanaṃdanaḥ

dākṣiṇātyamahāmallanṛpatiṃ samatāḍayat //
tāḍito dvijaputreṇa mallaḥ sa balinā balī

sadyo vivṛttanayanaḥ parāsurnyapatadbhuvi //
dvija putrasya tatkarma devairapi suduṣkaram

pratāpamukuṭo dṛṣṭvā prasannahṛdayo'bhavat //
dattvā vahudhanāngrāmānsamīpe'sthāpayattadā

sa kadācinmahārāja sahito dvijasūnunā //
saṃdhyāyāṃ vijane deśe cacāra turageṇa vai

dvijasūnusakhastatra dīnāṃ vāṇīmathāśṛṇot //
rājannalpāparādho'haṃ śatrupreraṇayāsakṛt

daṇḍapālena nihitaḥ śūle nirghṛṇacetasā //
dinamadya caturthaṃ me śūlasthasyaiva jīvataḥ

prāṇāḥ sukhena niryāṃti na hi duṣkṛtakarmaṇām //
bhṛśaṃ māṃ bādhate tṛṣṇā tāṃ nivāraya bhūpate

iti dīnāṃ samākarṇya vācaṃ rājā dvijā tmajam //
aśokadattanāmānaṃ dhairyavaṃtamabhāṣata

asmai niraparādhāya śūlaprotāya jaṃtave //
tṛṣṇārditāya dātavyaṃ dvijasūno tvayā jalam //

ityādiṣṭo narendreṇa sahasā dvijanandanaḥ //
jalapūrṇaṃ samādāya kalaśaṃ vegavānyayau

tacchmaśānaṃ samāsādya bhūtavetālasaṃkulam //
śūlaprotāya vai tasmai jalaṃ dātuṃ samutsukaḥ

dadarśātha sthitāṃ nārīṃ navayauvanaśālinīm //
udaikṣata mahākāṃtiṃ mūrtāmiva ratiṃ dvijaḥ //

tāmālokya tataḥ prāha dhairyavāndvijanaṃdanaḥ //
kāsi bhadre varārohe śmaśāne vijane sthitā

asyādhastātkimarthaṃ tvaṃ śūlaprotasya tiṣṭhasi //
iti tasya vacaḥ śrutvā sā prāha rucirānanā

puruṣo vallabho'yaṃ me śūle rājñā samarpitaḥ //
dhanaṃ yathā ca kṛpaṇaḥ paśya prāṇānna muṃcati

āsannamaraṇaṃ cainamanuyātumiha sthitā //
tṛṣito yācate vāri māmayaṃ vyathate muhuḥ

śūlaproto ddhatagrīvaṃ mumūrṣuṃ prāṇanāyakam//
nāsmi pāyayituṃ śaktā jalamenamadhaḥsthitā

aśokadattastacchrutvā karuṇāvaruṇālayaḥ //
tatkālasadṛśaṃ vākyaṃ tāṃ vadhūmabravīttadā

// aśokadatta uvāca // //
mātarmatskaṃdhamāruhya dehyasmai śītalaṃ jalam//
sā tatheti tamābhāṣya taruṇī tvarayānvitā

ānamravapuṣastasya skaṃdhaṃ padbhyāṃ ruroha vai //
dvijasūnurdadarśātha śoṇitaṃ nūtanaṃ patat

kimetaditi sopaśyadunnamya sahasā mukham //
bhakṣyamāṇaṃ tayā tatsa vijñāya dvijanaṃdanaḥ

aśokadatto jagrāha tasyāḥ pādaṃ sanūpuram//
tato'gānnūpuraṃ tyaktvā baddharatnaṃ vihāya tat

pratyuptānekaratnāḍhyaṃ tadādāyaca nūpuram//
aśokadattaḥ prayayau tacchmaśānānnṛpāṃtikam

smaśānavṛttaṃ tatsarvaṃ sa nṛpāya nivedya vai//
mahārghyaratnapratyuptaṃ nūpuraṃ ca dadau tadā

jñātvā tadvīracaritaṃ vīrairanyaiḥ suduṣkaram//
dadau madanalekhākhyāṃ sutāṃ tasmai mahīpatiḥ

kadācidatha tāddivyaṃ nūpuraṃ vīkṣya bhūpatiḥ//
asya nūpuravaryasya tulyaṃ vai nūpurāṃtaram

kuto vā labhyata iti sādaraṃ samaciṃtayat //
aśokadattastu tadā vijñāya nṛpakāṃkṣitam

nṛpurāṃtarasi ddhyarthaṃ ciṃtayāmāsa cetasā //
śmaśāne nūpuramidaṃ yataḥ prāptaṃ mayā purā

tāṃ nūpurāṃtaraprāptyai kutra drakṣyāmi sāṃpratam //
itthaṃ vitarkya bahudhā ni ścikāya mahāmatiḥ

vikreṣyāmi mahāmāṃsaṃ sametya pitṛkānanam//
tatra rākṣasavetālapiśācādiṣu sarvaśaḥ

maṃtrairāhūyamāneṣu sāpyāyāsya ti rākṣasī //
tāmāgatāṃ balādgṛhya tadgrahīṣyāmi nūpuram

rākṣasānāṃ sahasraṃ vā piśācānāṃ tathāyutam //
vetālānāṃ tathā koṭirna lakṣyaṃ balino mama

iti niścitya manasā śmaśānaṃ sahasā yayau //
vikrīṇāno mahāmāṃsaṃ maṃtrairāhūya rākṣasān

gṛhāṇetyuccayā vācā cacāra śrāvayandi śaḥ //
vikrīyate mahāmāṃsaṃ gṛhyatāṃgṛhyatāmiti

tatra rākṣasavetālāḥ kaṃkālāśca piśācakāḥ //
anye ca bhūtanivahāḥ samājagmuḥ praharṣitāḥ //

bhakṣayiṣyāmahe sarve māṃsamiṣṭatamaṃ tviti //
tatrāgacchatsu sarveṣu rakṣaḥkanyāsamāvṛtā

āyayau rākṣasī sāpi māṃsabhakṣaṇalālasā //
gaveṣayaṃstadā viprastāṃ samudvīkṣya rākṣasīm

seyaṃ dṛṣṭā puretyeṣa pratyabhijñānamāptavān //
tāmāha dvijaputro'nyaddehi me nūpuraṃ tviti

sā tasya vacanaṃ śrutvā prītā vākyamathā'bravīt //
mamaiva ca tvayā nītaṃ purā vīreṃdra nūpuram

gṛhāṇa ratnaruciraṃ dvitīyamapi nūpuram //
ityuktvā nūpuraṃ tasmai svasutāṃ ca dadau priyām

vidyutkeśyā tadā dattāṃ priyāṃ vidyutprabhābhidhām //
vipraḥ saṃprāpya mumude rūpayauvanaśāli nīm

vidyutkeśī tu jāmātre hemābjamapi sā dadau //
vidyutprabhāṃ nūpuraṃ ca hemābjamapilabhya saḥ

śvaśrūmābhāṣya sahasā punaḥ prāyānnṛpāṃtikam//
tataḥ pratāpamukuṭo nūpuraprāptinaṃditaḥ

śauryadhairyasamāyuktaṃ praśaśaṃsa dvijātmajam//
atha vidyutprabhāṃ vipraḥ so'bravīdrahasi priyām

mātrā tava kuto labdhametaddhemāṃbuja priye//
etattulyāni cānyāni yataḥ prāpsye varānane

dvijātmajaṃ tataḥ prāha patiṃ vidyutprabhā rahaḥ //
prabho kapālavisphoṭanāmno vetālabhūpateḥ

asti divyaṃ saraḥ kiṃciddhemāṃbujapariṣkṛtam //
tava śvaśrvā jalakrīḍāṃ vitanvaṃ tyedamāhṛtam

iti śrutvā vacastatra māṃ nayeti jagāda saḥ //
tataḥ sā sahasā vipraṃ ninye tatkāṃcanaṃ saraḥ

tataḥ sa hemapadmānāmājihīrṣurdvijātmajaḥ //
tadviprakāriṇaḥ sarvānvetālādīṃstato'vadhīt

svayaṃ kapālavisphoṭaṃ nihatāśeṣasainikam //
dadarśa vetālapatiṃ taṃ ca haṃtuṃ pracakrame

atrāṃtare mahātejā nāmnā vijñaptikautukaḥ //
vidyādharapatiḥ prāpya vimānenainamabravīt

aśokadattaṃ vipreṃdra sāhasaṃ mā kṛthā iti //
tadākarṇya dvijasuto vimānavarasaṃsthitam

dadarśa prabhayā yuktaṃ vidyādharapatiṃ divi //
tasya darśanamātreṇa śāpāmukto dvijā tmajaḥ

saṃtyajya mānuṣaṃ rūpaṃ divyaṃ rūpamavāptavān //
vimānavaramārūḍhaṃ divyābharaṇabhūṣitam

śāpānmuktaṃ sukarṇaṃ taṃ prāha vijñapti kautukaḥ //
ayaṃ sukarṇa te bhrātā gālavasya mahāmuneḥ

śāpādvetālatāṃ prāpa tatkanyāsparśapātakī //
tvaṃ ca śaptaḥ purā tena tatpāpasyānu modakaḥ

tavāyamalpapāpasya śāpo maddarśanāvadhiḥ //
kalpistatena muninā śāpāṃto nāsya kalpitaḥ

tadehi muktaśāposi sukarṇa svargamāruha //
tataḥ sukarṇastaṃ prāha vidyādharakulādhipam

vidyādharapate bhrātrā vinā jyeṣṭhena sāṃpratam //
sarvabhogayutaṃ svargaṃ naiva gaṃtuṃ samutsahe

śāpasyāṃto yathā bhūyānmama bhrātustathā vada //
tamuvāca mahātejāstathā vijñaptikautukaḥ

durnivāramimaṃ śāpamanyaḥ ko vā nivārayet //
kiṃ tu guhyatamaṃ kiṃcittava vakṣyāmi sāṃpratam

brahmaṇā sanakādibhyo munibhyaḥ kathitaṃ purā//
sarvatīrthāśraye puṇye dakṣiṇasyo dadhestaṭe

cakratīrthasamīpe tu tīrthamastimahattaram//
mahāpātakasaṃghāśca yasya darśanamātrataḥ

naśyaṃti tatkṣaṇādeva na jāne snānajaṃ phalam//
tatra gatvā tava jyeṣṭho yadi snāyānmahattare

vetālatvaṃ tyajennūnaṃ tadā gālavaśāpajam//
sukarṇastadvacaḥ śrutvā bhrātrā vetālarūpiṇā

sahitaḥ sahasā prāyāddakṣiṇasyodadhestaṭam //
dakṣiṇaṃ cakratīrthākhyāduttaraṃ gaṃdhamādanāt

brahmaṇā sanakādibhyaḥ kathitaṃ tīrthamabhyagāt //
tattīrthakūlamāsādya bhrātaraṃ cedamabravīt

bhrātargālavaśāpasya ghorasyāsya nivṛttaye //
tīrthe'sminnacirātsnāhi sarvatīrthottamottame

tasminna vasare viprāstasya tīrthasya śīkarāḥ //
nyapataṃstasya gātreṣu vāyunā vai samāhṛtāḥ

sa tacchīkarasaṃsparśāttyaktvā vetālatāṃ tadā //
tadeva mānuṣaṃ bhāvaṃ dvijaputratvamāptavān

tataḥ saṃkalpya sahasā tasmiṃstīrthottamottame //
manuṣyatvanivṛttyarthaṃ nimamajja dvijātmajaḥ

uttiṣṭhanneva sahasā divyaṃ rūpamavāptavān //
vimānavaramārūḍho devastrīparivāritaḥ

sarvābharaṇasaṃyuktaḥ saha bhrātrā sudarśanaḥ //
ślāghamānaśca tattīrthaṃ namaskatya punaḥpunaḥ

vijñaptikautukaṃ cāpi puraskṛtya divaṃ yayau //
tadāprabhṛti tattīrthaṃ vetālavaradābhidham

vetālatvaṃ vinaṣṭaṃ yacchīkarasparśamātrataḥ //
ya idaṃ tīrthamāsādya cakratīrthasya dakṣiṇe

snānaṃ kadācitkurvaṃti jīvanmuktā bhavaṃti te//
etattīrthasamaṃ puṇyaṃ na bhūtaṃ na bhaviṣyati

ghorāṃ vetālatāṃ tyaktvā divyatāṃ sa yadāptavān

atra saṃkalpya ca snātvā vetālavarade śubhe //
pitṛbhyaḥ piṃḍadānaṃ ca kuryādvai niyamānvitaḥ

evaṃ vaḥ kathitaṃ viprāstasya tīrthasya vaibhavam //
vetālavaradābhikhyā yathā cāsya samāgatā ///

yaḥ paṭhedimamadhyāyaṃ śṛṇuyādvā sa mucyate

iti śrīskānde mahāpurāṇa ekāśītisāhasryāṃ saṃhitāyāṃ tṛtīye brahmakhaṇḍe setumāhātmye vetālavaradatīrthapraśaṃsāyāṃ sudarśanasukarṇaśāpamokṣaṇaṃnāma navamo'dhyāyaḥ