Skanda Purana · Chapter 3.46

// śrīrāma uvāca//
paṃpāraṇye vayaṃ dīnāstvayā vānarapuṃgava//
āśvāsitāḥ kārayitvā sakhyamādityasūnunā

tvāṃ dṛṣṭvā pitaraṃ bandhūnkausalyāṃ jananīmapi //
na smarāmo vayaṃ sarvānme tvayopakṛtaṃ bahu

madarthaṃ sāgarastīrṇo bhavatā bahu yojanaḥ //
talaprahārābhihato maināko'pi nagottamaḥ

nāgamātā ca surasā madarthaṃ bhavatā jitā //
chāyāgrahāṃ mahākrūrāma vadhīdrākṣasīṃ bhavān

sāyaṃ suvelamāsādya laṃkāmāhatya pāṇinā //
ayāsī rāvaṇagṛhaṃ madarthaṃ tvaṃ mahākape

sītāmanviṣya laṃkāyāṃ rātrau gatabhayo bhavān//
adṛṣṭvā jānakīṃ paścādaśokavanikāṃ yayau

namaskṛtya ca vaidehīmabhijñānaṃ pradāya ca //
cūḍāmaṇiṃ samādāya madarthaṃ jānakīkarāt

aśokavanikāvṛkṣānabhāṃkṣīstvaṃ mahākape //
tatastvaśītisāhasrānkiṃkarānnāma rākṣasān

rāvaṇapratimānyuddhe patyaśvebharathākulān //
avadhīstvaṃ madarthe vai mahābalaparākramān

tataḥ prahastatanayaṃ jaṃbumālinamāgatam //
avadhīnmaṃtritanayānsapta saptārcivarcasaḥ

paṃca senāpatīnpaścādanayastvaṃ yamālayam //
kumāramakṣamavadhīstatastvaṃ raṇamūrdhani

tata indrajitā nīto rākṣaseṃdra sabhāṃ śubhām //
tatra laṃkeśvaraṃ vācā tṛṇīkṛtyāvamanya ca

abhāṃkṣīstvaṃ purīṃ laṃkāṃ madarthaṃ vāyunaṃdana //
punaḥ pratinivṛttastvamṛṣyamūkaṃ mahāgirim

evamādi mahāduḥkhaṃ madarthaṃ prāptavānasi //
tvamatra bhūtale śeṣe mama śokamudīrayan

ahaṃ prāṇānparityakṣye mṛto'si yadi vāyuja //
sītayā mama kiṃ kāryaṃ lakṣmaṇenānujena vā

bharatenāpi kiṃ kāryaṃ śatrughnena śriyāpi vā //
rājyenāpi na me kāryaṃ paretastvaṃ kape yadi

uttiṣṭha hanumanvatsa kiṃ śeṣe'dya mahītale //
śayyāṃ kuru mahābāho nidrārthaṃ mama vānara

kandamūlaphalāni tvamāhārārthaṃ mamāhara //
snātumadya gamiṣyāmi śīghraṃ kalaśamānaya

ajināni ca vāsāṃsi darbhāṃśca samupāhara //
brahmāstreṇāvabaddho'haṃ mocitaśca tvayā hare

lakṣmaṇena saha bhrātrā hyauṣadhānayanena vai //
lakṣmaṇaprāṇadātā tvaṃ paulastyamadanāśanaḥ

sahāyena tvayā yuddhe rākṣasā nrāvaṇādikān //
nihatyātibalānvīrānavāpaṃ maithilīmaham

hanūmannaṃjanāsūno sītāśokavināśana //
kathamevaṃ parityajya lakṣmaṇaṃ māṃ ca jānakīm

aprāpayitvāyodhyāṃ tvaṃ kimarthaṃ gatavānasi //
kva gatosi mahāvīra mahārākṣasakaṇṭaka

iti paśyanmukhaṃ tasya nirvākyaṃ raghunaṃdanaḥ //
prarudannaśrujālena secayāmāsa vāyujam

vāyuputrastato mūrcchāmapahāya śanairdvijāḥ //
paulastyabhayasaṃtrastalokarakṣārthamāgatam

āśritya mānuṣaṃ bhāvaṃ nārāyaṇamajaṃ vibhum//
jānakīlakṣmaṇayutaṃ kapibhiḥ parivāritam

kālāṃbhodharasaṃkāśaṃ raṇadhūlisamukṣitam //
jaṭāmaṇḍalaśobhāḍhyaṃ puṇḍarīkāyatekṣaṇam

khinnaṃ ca bahuśo yuddhe dadarśa raghunaṃdanam //
stūyamānamamitraghnaṃ devarṣipitṛkinnaraiḥ

dṛṣṭvā dāśarathiṃ rāmaṃ kṛpābahulacetasam //
raghunāthakarasparśapūrṇagātraḥ sa vānaraḥ

patitvā daṇḍavadbhūmau kṛtāṃjalipuṭo dvijāḥ //
astauṣījjānakīnāthaṃ stotraiḥ śrutimanoharaiḥ

// hanūmānuvāca // //
namo rāmāya haraye viṣṇave prabhaviṣṇave //
ādidevāya devāya purāṇāya gadābhṛte

viṣṭare puṣpakaṃ nityaṃ niviṣṭāya mahātmane //
prahṛṣṭavānarānīkajuṣṭapādāṃbujāya te

niṣpiṣṭa rākṣaseṃdrāya jagadiṣṭavidhāyine //
namaḥ sahasraśirase sahasracaraṇāya ca

sahasrākṣāya śuddhāya rāghavāya ca viṣṇave //
bhaktārtihāriṇe tubhyaṃ sītāyāḥ pataye namaḥ

haraye nārasiṃhāya daityarājavidāriṇe //
namastubhyaṃ varāhāya daṃṣṭroddhṛtavasundhara

trivikramāya bhavate baliyajña vibhedine //
namo vāmanarūpāya namo maṃdaradhāriṇe

namaste matsyarūpāya trayīpālanakāriṇe //
namaḥ paraśurāmāya kṣatriyāṃtakarāya te

namaste rākṣasaghnāya namo rāghavarūpiṇe //
mahādeva mahābhīma mahākodaṇḍabhedine

kṣatriyāṃtakarakrūrabhārgavatrāsakāriṇe //
namo'stvahilyā saṃtāpahāriṇe cāpahāriṇe

nāgāyutavalopetatāṭakādehahāriṇe //
śilākaṭhinavistāravālivakṣovibhedine

namo māyā mṛgonmāthakāriṇe'jñānahāriṇe //
daśasyaṃdanaduḥkhābdhiśoṣaṇāgastyarūpiṇe

anekormisamādhūtasamudramadahāriṇe //
maithilīmānasāṃ bhojabhānave lokasākṣiṇe

rājeṃdrāya namastubhyaṃ jānakīpataye hare //
tārakabrahmaṇe tubhyaṃ namo rājīvalocana

rāmāya rāmacandrāya vareṇyāya sukhātmane //
viśvāmitrapriyāyedaṃ namaḥ kharavidāriṇe

prasīda devadeveśa bhaktānāmabhayaprada //
rakṣa māṃ karu ṇāsiṃdho rāmacandra namo'stu te

rakṣa māṃ vedavacasāmapyagocara rāghava //
pāhi māṃ kṛpayā rāma śaraṇaṃ tvāmupaimyaham

raghuvīra mahāmohamapākuru mamādhunā //
snāne cācamane bhukto jāgratsvapnasuṣuptiṣu

sarvāvasthāsu sarvatra pāhi māṃ raghunaṃdana //
mahimānaṃ tava stotuṃ kaḥ samartho jagattraye

tvameva tvanmahattvaṃ vai jānāsi raghunaṃdana //
iti stutvā vāyuputro rāmacaṃdraṃ ghṛṇānidhim

sītāmapyabhituṣṭāva bhaktiyuktena cetasā //
jānaki tvāṃ namasyāmi sarvapāpapraṇāśinīm

dāridryaraṇasaṃhartrīṃ bhaktānāmiṣṭadāyinīm //
videharājatanayāṃ rāghavānaṃdakāriṇīm

bhūmerduhitaraṃ vidyāṃ namāmi prakṛtiṃ śivām //
paulastyaiśvaryasaṃhartrīṃ bhaktābhīṣṭāṃ sarasvatīm

pativratādhurīṇāṃ tvāṃ namāmi janakātmajām //
anugrahaparāmṛddhimanaghāṃ harivallabhām

ātmavidyāṃ trayīrūpāmumārūpāṃ namāmya ham //
prasādābhimukhīṃ lakṣmīṃ kṣīrābdhitanayāṃ śubhām

namāmi candrabhaginīṃ sītāṃ sarvāṃgasuṃdarīm //
namāmi dharmanilayāṃ karuṇāṃ vedamātaram

padmālayāṃ padmahastāṃ viṣṇuvakṣasthalālayām //
namāmi candranilayāṃ sītāṃ candranibhānanām

āhlādarūpiṇīṃ siddhiṃ śivāṃ śivakarīṃ satīm //
namāmi viśvajananīṃ rāmacandreṣṭavallabhām //
sītāṃ sarvānavadyāṃgīṃ bhajāmi satataṃ hṛdā

// śrīsūta uvāca // //
stutvaivaṃ hanumānsītārāmacandrau sabhaktikam

ānaṃdāśrupariklinnastūṣṇīmāste dvijottamāḥ //
ya idaṃ vāyuputreṇa kathitaṃ pāpanāśanam

stotraṃ śrīrāmacaṃdrasya sītāyāḥ paṭhate'nvaham //
sa naro mahadaiśvaryamaśnute vāṃchitaṃ sa dā

anekakṣetradhānyāni gāśca dogdhrīḥ payasvinīḥ //
āyurvidyāśca putrāṃśca bhāryāmapi manoramām

etatstotraṃ sakṛ dviprāḥ paṭhannāpnotyasaṃśayaḥ //
etatstotrasya pāṭhena narakaṃ naiva yāsyati

brahmahatyādipāpāni naśyaṃti sumahāṃtyapi //
sarvapāpavinirmukto dehāṃte muktimāpnuyāt

iti stuto jagannātho vāyuputreṇa rāghavaḥ //
sītayā sahito viprā hanūmaṃtamathābravīt

// śrīrāma uvāca // //
ajñānādvā naraśreṣṭha tvayedaṃ sāhasaṃ kṛtam //
brahmaṇā viṣṇunā vāpi śakrāditridaśairapi

nedaṃ liṃgaṃ samuddhartuṃ śakyate sthāpitaṃ mayā //
mahādevāparādhena patito'syadya mūrcchitaḥ

itaḥ paraṃ mā kriyatāṃ drohaḥ sāṃbasya śūlinaḥ //
adyārabhya tvidaṃ kuṃḍaṃ tava nāmnā jagattraye

khyātiṃ prayātu yatra tvaṃ patito vānarottama //
mahāpātakasaṃghānāṃ nāśaḥ syādatra majjanāt

mahādevajaṭājātā gautamī saritāṃ varā //
aśvamedhasahasrasya phaladā snāyināṃ nṛṇām

tataḥ śataguṇā gaṃgā yamunā ca sarasvatī //
etannadītrayaṃ yatra sthale pravahate kape

militvā tatra tu snānaṃ sahasraguṇitaṃ smṛtam //
nadīṣvetāsu yatsnānātphalaṃ puṃsāṃ bhavetkape

tatphalaṃ tava kuṃḍe'sminsnānātprāpnotyasaṃśayam //
durlabhaṃ prāpya mānuṣyaṃ hanūmatkuṃḍatīrataḥ

śrāddhaṃ na kurute yastu bhaktiyuktena cetasā //
nirāśāstasya pitaraḥ prayāṃti kupitāḥ kape

kupyaṃti munayo'pyasmai devāḥ seṃdrāḥ sacāraṇāḥ //
na dattaṃ na hutaṃ yena hanūmatkuṃḍatīrataḥ

vṛthājīvita evāsāvihāmutra ca duḥkhabhāk //
hanūmatkuṃḍasavidhe yena dattaṃ tilodakam //
modaṃte pitarastasya ghṛtakulyāḥ pibaṃti ca

// śrīsūta uvāca // //
śrutvaitadvacanaṃ viprā rāmeṇoktaṃ sa vāyujaḥ

uttare rāmanāthasya liṃgaṃ svenāhṛtaṃ mudā //
ājñayā rāmacandrasya sthāpayāmāsa vāyujaḥ

pratyakṣameva sarveṣāṃ kapilāṃgūlaveṣṭitam //
haropi tatpucchajā taṃ bibharti ca valitrayam //
taduttarāyāṃ kakubhi gaurīṃ saṃsthāpayanmudā

// śrīsūta uvāca //
evaṃ vaḥ kathitaṃ viprā yadarthaṃ rāghaveṇa tu ///
liṃgaṃ pratiṣṭhitaṃ setau bhuktimuktipradaṃ nṛṇām

yaḥ paṭhedimamadhyāyaṃ śṛṇuyādvā samāhitaḥ //
sa vidhūyeha pāpāni śivaloke mahīyate

iti śrīskāṃde mahāpurāṇa ekāśītisāhasryāṃ saṃhitāyāṃ tṛtīye brahmakhaṇḍe setumāhātmye rāmanāthaliṃgapratiṣṭhākāraṇavarṇanaṃnāma ṣaṭcatvāriṃśo'dhyāyaḥ