Skanda Purana · Chapter 3.33

// rāma uvāca // //
jīrṇoddhāraṃ kariṣyāmi śrīmāturvacanādaham //
ājñā pradīyatāṃ mahyaṃ yathādānaṃ dadāmi vaḥ

pātre dānaṃ pradātavyaṃ kṛtvā yajñavaraṃ dvijāḥ //
nāpātre dīyate kiṃciddattaṃ na tu sukhāvaham

supātraṃ nauriva sadā tārayedubhayorapi //
lohapiṃḍopamaṃ jñeyaṃ kupātraṃ bhañjanātmakam

jātimātreṇa vipratvaṃ jāyate na hi bho dvijāḥ //
kriyā balavatī loke kriyāhīne kutaḥ phalam

pūjyāstasmātpūjyatamā brāhmaṇāḥ satyavādinaḥ //
yajñakārye samutpanne kṛpāṃ kurvaṃtu sarvadā

// brahmovāca // //
tatastu militāḥ sarve vimṛśya ca parasparam //
kecidūcustadā rāmaṃ vayaṃ śiloṃchajīvikāḥ

saṃtoṣaṃ paramāsthāya sthitā dharmaparāyaṇāḥ //
pratigrahaprayogeṇa na cāsmākaṃ prayojanam

daśasūnāsamaścakrī daśacakrisamo dhvajaḥ //
daśadhvajasamā veśyā daśaveśyāsamo nṛpaḥ

rājapratigraho ghoro rāma satyaṃ na saṃśayaḥ //
tasmādvayaṃ na cecchāmaḥ pratigrahaṃ bhayā vaham

ekāhikā dvijāḥ kecitkecitsvāmṛtavṛttayaḥ //
kumbhīdhānyā dvijāḥ kecitkecitṣaṭkarmatatparāḥ

trimūrtisthāpitāḥ sarve pṛthagbhāvāḥ pṛthagguṇāḥ //
kecidevaṃ vadaṃti sma trimūrtyājñāṃ vinā vayam

pratigrahasya svīkāraṃ kathaṃ kuryāma ha dvijāḥ //
na tāṃbūlaṃ strīkṛtaṃ no hyadmo dānena bhaṣitam

vimṛśya sa tadā rāmo vasiṣṭhena mahātmanā //
brahmaviṣṇuśivādīnāṃ sasmāra guruṇā saha //
smṛtamātrāstato devāstaṃ deśaṃ samupāgaman//
sūryakoṭipratīkāśīvamānāvalisaṃvṛtāḥ

rāmeṇa te yathānyāyaṃ pūjitāḥ parayā mudā

niveditaṃ tu tatsarvaṃ rāmeṇātisubuddhinā

adhidevyā vacanato jīrṇoddhāraṃ karomyaham //
dharmāraṇye harikṣetre dharmakūpasamīpataḥ

tataste vāḍavāḥ sarve trimūrttīḥ praṇipatya ca //
mahatā harṣavṛṃdena pūrṇāḥ prāptamanorathāḥ

arghyapādyādividhinā śraddhayā tānapūjayan //
kṣaṇaṃ viśramya te devā brahmaviṣṇuśivādayaḥ

ūcū rāmaṃ mahāśaktiṃ vinayātkṛtasaṃpuṭam

// devā ūcuḥ // //
devadruhastvayā rāma ye hatā rāvaṇādayaḥ //
tena tuṣṭā vayaṃ sarve bhānuvaṃśavibhūṣaṇa

uddharasva mahāsthānaṃ mahatīṃ kīrtimāpnuhi

labdhvā sa teṣāmājñāṃ tu prīto daśarathātmajaḥ //
jīrṇoddhāre'naṃtaguṇaṃ phalamicchannilāpatiḥ

devānāṃ saṃnidhau teṣāṃ kāryāraṃbhamathākarot //
sthaṃḍilaṃ pūrvataḥ kṛtvā mahāgiri samaṃ śubham

tasyopari bahiḥśālā gṛhaśālā hyanekaśaḥ //
brahmaśālāśca bahuśo nirmame śobhanākṛtīḥ

nidhānaiśca samāyuktā gṛhopakaraṇai rvṛtāḥ //
suvarṇakoṭisaṃpūrṇā rasavastrādipūritāḥ

dhanadhānyasamṛddhāśca sarvadhātuyutāstathā //
etatsarvaṃ kārayitvā brāhmaṇebhyastadā dadau

ekaikaśo daśadaśa dadau dhenūḥ payasvinīḥ //
catvāriṃśacchataṃ prādādgrāmāṇāṃ caturādhikam

traividyadvijaviprebhyo rāmo daśarathātmajaḥ //
kājeśena trayeṇaiva sthāpitā dvijasattamāḥ

tasmāttrayīvidya iti khyātirloke babhūva ha //
evaṃvidhaṃ dvijebhyaḥ sa dattvā dānaṃ mahādbhutam //

ātmānaṃ cāpi mene sa kṛtakṛtyaṃ nareśvaraḥ //
brahmaṇā sthāpitāḥ pūrvaṃ viṣṇunā śaṃkareṇa ye

te pūjitā rāghaveṇa jīrṇoddhāre kṛte sati //
ṣaṭtriṃśacca sahasrāṇi gobhujā ye vaṇigvarāḥ

śuśrūṣārthaṃ pradattā vai devairhariharādibhiḥ//
saṃtuṣṭena tu śarveṇa tebhyo dattaṃ tu ceta nam

śvetāśvacāmarau dattau khaṅgaṃ dattaṃ sunirmalam //
tadā prabodhitāste ca dvijaśuśrūṣaṇāya vai

vivāhādau sadā bhāvyaṃ cāmarai maṃgalaṃ varam //
khaṅgaṃ śubhaṃ tadā dhāryyaṃ mama cihnaṃ kare sthitam

gurupūjā sadā kāryā kuladevyāḥ punaḥpunaḥ //
vṛddhyāgameṣu prāpteṣu vṛddhi dāyakadakṣiṇā

ekādaśyāṃ śanervāre dānaṃ deyaṃ dvijanmane //
pradeyaṃ bālavṛddhebhyo mama rāmasya śāsanāt

maṃḍaleṣu ca ye śuddhā vaṇigvṛttiratāḥ parāḥ //
sapādalakṣāste dattā rāmaśāsanapālakāḥ

māṃḍalīkāstu te jñeyā rājāno maṃḍaleśvarāḥ //
dvija śuśrūṣaṇe dattā rāmeṇa vaṇijāṃ varāḥ

cāmaradvitayaṃ rāmo dattavānkhaḍgameva ca //
kulasya svāminaṃ sūryaṃ pratiṣṭhāvidhipūrvakam //

brahmāṇaṃ sthāpayāmāsa caturvedasamanvitam //
śrīmātaraṃ mahāśaktiṃ śūnyasvāmihariṃ tathā

vighnāpadhvaṃsanārthāya dakṣiṇadvārasaṃsthitam //
gaṇaṃ saṃsthāpayāmāsa tathānyāścaiva devatāḥ

kāritāstena vīreṇa prāsādāḥ saptabhūmikāḥ //
yatkiṃ citkurute kāryaṃ śubhaṃ māṃgalyarūpakam

putre jāte jātake vānnāśane muṃḍane'pi vā //
lakṣahome koṭihome tathā yajñakriyāsu ca

vāstupūjāgrahaśāṃtyoḥ prāpte caiva mahotsave //
yatkiṃcitkurute dānaṃ dravyaṃ vā dhānyamuttamam

vastraṃ vā dhenavo nātha hema rūpyaṃ tathaiva ca //
viprāṇāmatha śūdrāṇāṃ dīnānāthāṃdhakeṣu ca

prathamaṃ bakulārkasya śrīmātuścaiva mānavaḥ //
bhāgaṃ dadyācca nirvighnakāryasiddhyai nirantaram

vacanaṃ me samullaṃghya kurute yo'nyathā naraḥ //
tasya tatkarmaṇo vighnaṃ bhaviṣyati na saṃśayaḥ

evamuktvā tato rāmaḥ prahṛṣṭenāṃtarātmanā //
devānāmatha vāpīśca prākārāṃstu suśobhanān

durgopakaraṇairyuktānpratolīśca suvistṛtāḥ //
nirmame caiva kuṃḍāni sarāṃsi sarasīstathā

dharmavāpīśca kūpāṃśca tathānyāndevanirmitān //
etatsarvaṃ ca vistārya dharmāraṇye manorame

dadau traividyamukhyebhyaḥ śraddhayā parayā punaḥ //
tāmrapaṭṭasthitaṃ rāmaśāsanaṃ lopayettu yaḥ

pūrvajāstasya narake pataṃtyagre na saṃtatiḥ //
vāyuputraṃ samāhūya tato rāmo'bravīdvacaḥ //

vāyuputra mahāvīra tava pūjā bhaviṣyati //
asya kṣetrasya rakṣāyai tvamatra sthitimācara

āṃjaneyastu tadvākyaṃ praṇamya śirasādadhau //
jīrṇoddhāraṃ tadā kṛtvā kṛtakṛtyo babhūva ha

śrīmātaraṃ tadābhyarcya prasannenāṃtarātmanā //
śrīmātaraṃ namaskṛtya tīrthānyanyāni rāghavaḥ

te'pi devāḥ svakaṃ sthānaṃ yayurbahmapurogamāḥ

dattvāśiṣaṃ tu rāmāya vāṃchitaṃ te bhaviṣyati //
ramyaṃ kṛtaṃ tvayā rāma viprāṇāṃ sthāpanādikam //

asmākamapi vātsalyaṃ kṛtaṃ puṇyavatā tvayā //
iti stuvaṃtaste devāḥ svāni sthānāni bhejire

iti śrīskānde mahāpurāṇa ekā śītisāhasryāṃ saṃhitāyāṃ tṛtīye brahmakhaṇḍe pūrvārdhe dharmāraṇyamāhātmye śrīrāmacandrasya purapratyāgamanavarṇanaṃnāma trayastriṃśo'dhyāyaḥ