Skanda Purana · Verses 3.29-2

// śrīsūta uvāca // //
snātvā sādhyāmṛte tīrthe nṛpaśāpavimokṣaṇe //
sarvatīrthaṃ tato gacchenmanujo niyamānvitaḥ

sarvatīrthaṃ mahāpuṇyaṃ mahāpātakanāśanam //
mahāpātakayukto vā yukto vā sarvapātakaiḥ

śuddhyeta tatkṣaṇādeva savartīrthanimajjanāt //
tāvatsarvāṇi pāpāni dehe tiṣṭhaṃti suvratāḥ

na yāvatsarvatīrthesminnimajjetpāpapūruṣaḥ /१
snānārthaṃ sarvatīrthe'smindṛṣṭvā yāṃtaṃ dvijā naram

vepaṃte sarvapāpāni nāśo'smākaṃ bhavediti //
garbhavāsādiduḥkhāni tāvadyāti naro bhuvi

na snāyātsarvatīrthe'sminyāvadbrāhmaṇapuṃgavāḥ//
anuṣṭhitairmahāyāgaistathā tīrthaniṣevaṇaiḥ

gāyatryādimahāmaṃtrajapairniyamapūrvakam //
caturṇāmapi vedānāmāvṛttyā śatasaṃkhyayā

śivaviṣṇvādidevānāṃ pūjayā bhakti pūrvakam //
ekādaśyāditithiṣu tathaivānaśanena ca//
yatphalaṃ labhate martyastallabhedatra majjanāt

// ṛṣaya ūcuḥ // //
sarvatīrthamiti khyātiḥ sūtāsya kathamāgatā //
brūhyasmākamidaṃ puṇyaṃ vistarācchṛṇvatāṃ mune

// śrīsūta uvāca // //
purā sucaritonāma munirniyamasaṃyutaḥ //

bhṛguvaṃśasamudbhūto jātyaṃdho jarayāturaḥ //
aśaktastīrthayātrāyāṃ netrābhāvena sa dvijāḥ

sarveṣāmeva tīrthānāṃ snātukāmo mahāmu niḥ //
dakṣiṇāṃbunidhau puṇyaṃ gaṃdhamādanaparvatam

gatvā śaṃkaramuddiśya tapastepe suduṣkaram //
trikālamarcayañchaṃbhumupavāsī jiteṃdriyaḥ

tathā triṣavaṇasnānāttathaivātithipūjakaḥ //
śiśire jalamadhyastho grīṣme paṃcāgnimadhyagaḥ

varṣāsvāsārasahana abbhakṣo vāyubhojanaḥ //
uddhūlanaṃ tripuṃḍraṃ ca bhasmanā dhārayansadā

jābālopaniṣadrītyā tathā rudrākṣadhārakaḥ //
evamugraṃ tapaścakre daśasaṃvatsaraṃ dvijaḥ

tapasā tasya saṃtuṣṭaḥ śaṃkaraścaṃdraśekharaḥ //
prādurāsīnmunestasya dvijāḥ sucaritasya vai

samāruhya mahokṣāṇaṃ bhūtavṛṃdaniṣevitaḥ //
girijārdha vapuḥ śūlī sūryakoṭisamaprabhaḥ

svabhāsā bhāsayansarvā diśo vitimirāstadā //
bhasmapāṃḍurasarvāṃgo jaṭāmaṃḍalamaṃḍitaḥ

anaṃtā dimahānāgavibhūṣaṇavibhūṣitaḥ //
prādurbhūtastataḥ śaṃbhuḥ prādāttasya vilocane

ātmāvalokanārthāya śaṃkaro girijāpatiḥ //
tataḥ sucarito viprāḥ śaṃbhunā dattadṛgdvayaḥ //
ālokya parameśānaṃ pratuṣṭāva prasannadhīḥ

// sucarita uvāca // //
jaya deva maheśāna jaya śaṃkara dhūrjaṭe

jaya brahmādipūjya tvaṃ tripuraghna yamāṃtaka //
jayomeśa mahādeva kāmāṃtaka jayāmala

jaya saṃsāravaidya tvaṃ bhūtapāla śivāvya ya //
triyaṃbaka namastubhyaṃ bhaktarakṣaṇadīkṣita

vyomakeśa namastubhyaṃ jaya kāruṇyavigraha //
nīlakaṇṭha namastubhyaṃ jaya saṃsāramocaka

maheśvara namastubhyaṃ paramānaṃdavigraha //
gaṃgādhara namastubhyaṃ viśveśvara mṛḍāvyaya

namastubhyaṃ bhagavate vāsudevāya śaṃbhave //
śarvāyogrāya garbhāya kailāsapataye namaḥ

rakṣa māṃ karuṇāsiṃdho kṛpādaṣṭyavalokanāt //
mama vṛttamanālocya trāhi māṃ kṛpayā hara

śrīsūta uvāca//
iti stuto mahādevastamenamidamabhyadhāt //
muniṃ sucaritaṃ viprā dayodanvānumāpatiḥ

// mahādeva uvāca // //
mune sucaritādya tvaṃ varaṃ varaya kāṃkṣitam //
varaṃ dātuṃ tavāyātaḥ puṇyesminnāśrame śubhe //
itīrito muniḥ prāha mahādevaṃ dayānidhim

//
// sucarita uvāca // //
bhagavaṃstvaṃ prasanno me yadi syāścaṃdraśekhara

tarhi tvāṃ pravṛṇomyaddhā varaṃ madabhikāṃkṣitam //
jarāpalitadehohaṃ kutracidgaṃtumakṣamaḥ

sarvatīrtheṣu ca snātumākāṃkṣā mama vidyate //
tasmātsarveṣu tīrtheṣu snānena manujo hi yat //
phalaṃ prāpnoti me brūhi tatphalā vāptisādhanam

// mahādeva uvāca // //
ahamāvāhayiṣyāmi tīrthānyatraiva kṛtsnaśaḥ

rāmasya setunā pūte nage'smingaṃdhamādane //
ityuktvā sa mahādevaḥ parvate gandhamādane

tīrthānyāvāhayāmāsa muniprītyarthamuttamaḥ //
tatassucaritaṃ prāha śaṃkaraḥ karuṇānidhiḥ

mune sucaritedaṃ tu mahāpātakanāśanam //
sāṃnidhyātsarvatīrthānāṃ sarvatīrthābhidhaṃ smṛtam

mayātra sarvatīrthānāṃ manasākarṣaṇādidam //
mānasaṃ tīrthamityākhyāṃ lapsyate bhuktimuktidam

ataḥ sucaritātra tvaṃ snāhi sadyo vimuktaye //
mahāpātakasaṃghānāṃ dāvānalasamadyutau //

kāmamohabhayakrodhalobharogādināśane //
vinā vedāṃtavijñānaṃ sadyonirvāṇakāraṇe

janmamṛtyvādinakraughasaṃsārārṇavatāraṇe //
kumbhīpākādisakalanarakāgnivināśane

itīritaḥ sucaritaḥ śambhunā madanāriṇā //
sasnau viprāḥ sarvatīrthe mahādevasya saṃnidhau

snātvotthitaḥ sucarito dadṛśe'khilamānavaiḥ //
jarāpalitanirmuktastaruṇo'tīva sundaraḥ

dṛṣṭvā svadehasauṃdaryaṃ tataḥ sucarito muniḥ //
ślāghayāmāsa tattīrthaṃ bahudhā'nye ca tāpasāḥ

mahādevaḥ sucaritaṃ babhāṣe tadanaṃtaram //
asya tīrthasya tīre tvaṃ vasansucarita dvija //

snānaṃ kuruṣva satataṃ smaranmāṃ muktidāyakam //
deśāṃtarīyatīrtheṣu mā vraja brāhmaṇottama

asya tīrthasya māhātmyānmāmaṃte prāpsyasi dhruvam//
anye'pi ye'tra snāsyaṃti te'pi māṃ prāpnuyurdvija

ityuktvā bhagavānīśastatraivāṃtaradhīyata //
tasminnaṃtarhite rudre tataḥ sucarito muniḥ

anekakālaṃ nivasansarvatīrthasya tīrataḥ //
snānaṃ samācaraṃstīrthe mānase niyamānvitaḥ

dehāṃte śaṃkaraṃ prāpa sarvabandhavimocitaḥ //
sāyujyaṃ cāpi saṃprāpa sarvatīrthasya vaibhavāt

evaṃ vaḥ kathitaṃ viprāḥ sarvatīrthasya vaibhavam //
etatpaṭhanvā śṛṇvanvā mucyate sarva pātakaiḥ

iti śrīskāṃde mahāpurāṇa ekāśītisāhasryāṃ saṃhitāyāṃ tṛtīye brahmakhaṇḍe setumāhātmye sarvatīrthapraśaṃsāyāṃ sarvatīrthasvarūpa kathanaṃnāmaikonatriṃśo'dhyāyaḥ