Skanda Purana · Chapter 3.28

// vyāsa uvāca //
govatsānnairṛte bhāge dṛśyate lohayaṣṭikā //
svayaṃbhuliṃgarūpeṇa rudrastatra sthitaḥ svayam //
// śrīmārkaṇḍeya uvāca // //
mokṣatīrthe sarasvatyā nabhasye caṃdrasaṃkṣaye //
viprānsaṃpūjya vidhivattebhyo dattvā ca dakṣiṇām

ekaviṃśativārāṃstu bhaktyā piṃḍasya yatphalam //
gayāyāṃ prāpyate puṃsāṃ dhruvaṃ tadiha tarppaṇāt

lohayaṣṭyāṃ kṛte śrāddhe nabhasye caṃdrasaṃkṣaye //
pretayonivinirmuktāḥ krīḍaṃti pitaro divi

api naḥ saṃkule bhūyādyo vai dadyāttilodakam //
piṃḍaṃ vāpyudakaṃ vāpi pretapakṣe vidhūdaye

lohayaṣṭyāmamāvasyāṃ kāryaṃ bhādrapade janaiḥ //
śrāddhaṃ vai munayaḥ prāhuḥ pitaro yadi vallabhāḥ

kṣīreṇa tu tilaiḥ śvetaiḥ snātvā sārasvate jale //
pitṝṃstarpayate yastu tṛptāstatpitaro dhruvam

tatra śrāddhāni kurvīta saktubhiḥ payasā saha //
amāvāsyādinaṃ prāpya pitṝṇāṃ mokṣamicchakaiḥ

rudratīrthe tato dhenuṃ dadyādvastrādibhūṣitām //
viṣṇutīrthe hiraṇyaṃ ca pradadyānmokṣamicchukaḥ

gayāyāṃ pitṛrūpeṇa svayameva janārdanaḥ //
taṃ dhyātvā puṃḍarīkākṣaṃ mucyate ca ṛṇatrayāt

prārthayettatra gatvā taṃ devadevaṃ janārdanam //
āgato'smi gayāṃ deva pitṛbhyaḥ piṃḍaditsayā //
eṣa piṃḍo mayā dattastava haste janārdana

paralokagatebhyaśca tvaṃ hi dātā bhaviṣyasi //
anenaiva ca maṃtreṇa tatra dadyāddhareḥ kare

caṃdre kṣīṇe caturdaśyāṃ nabhasye piṃḍamāharet //
pitṝṇāmakṣayā tṛptirbhaviṣyati na saṃśayaḥ

ekaviṃśativārāṃśca gayāyāṃ piṃḍapātanaiḥ //
bhaktyā tṛptimavāpnoti lohayaṣṭyāṃ pitṛtarppaṇe

vāridastṛptimāpnoti sukhamakṣayyamatra hi //
phalapradaḥ sutānbhaktānārogyamabhayapradaḥ

vittaṃ nyāyārjitaṃ dattaṃ svalpaṃ tatra mahāphalam //
snānenāpi hi tattīrthe rudrasyānucaro bhavet

iti śrīskāṃde mahāpurāṇe ekākāśītisāhasryāṃ saṃhitāyāṃ tṛtīye brahmakhaṇḍe pūrvabhāge dharmāraṇyamāhātmye saṃkṣepatastīrthamāhātmya varṇanaṃ nāmāṣṭaviṃśo'dhyāyaḥ