Skanda Purana · Chapter 3.27

// // sūta uvāca // //
tatra tasya samīpasthaṃ mārkaṃḍenopalakṣitam //
tīrthaṃ govatsasaṃjñaṃ tu sarvatra bhuvi saṃśrutam

tatrāvatīrya govatsasvarūpeṇāṃbikāpatiḥ //
svayaṃbhūliṃgarūpeṇa saṃsthito jagatāṃ patiḥ

āsīdbalāhakonāma rudrabhakto mahābalaḥ //
ākheṭakasamāyukto nṛpaḥ parapuraṃjayaḥ

mṛgayūthe sthitaṃ dṛṣṭvā govatsaṃ tatpadātinā //
ukto rājā mayā dṛṣṭaṃ kautukaṃ nṛpasattama

govatso mṛgayūthasya dṛṣṭo madhyasthito mayā //
teṣāmevānurakto'sau jananyā rahitastathā

draṣṭuṃ tu kautukaṃ rājā taṃ padātiṃ puraḥ sthitam //
uvāca darśayasveti govatsaṃ ca samāviśat

gatvāṭavīṃ tadā rājño darśitaḥ sa padātinā //
padātibhirmṛgānīkaṃ dudrāva trāsitaṃ yadā

pīlugulmaṃ prati gataṃ govatsaḥ prasthitastadā //
rājā taddharaṇākāṃkṣo prāviśadgulmamādarāt

tatra sthitaṃ sa govatsamapaśyannṛpatiḥ svayam //
yāvadgṛhṇāti taṃ tāvalliṃgaṃ jātaṃ samujvalam

taṃ dṛṣṭvā vismito rājā kimetadityaciṃtayat //
yāvacciṃtayate hyevaṃ dehaṃ tyaktvā divaṃ gataḥ

atrāṃtare gaganatale samaṃtataḥ śrūyate surajayakāragarjitam //
papāta puṣpavṛṣṭiraṃbarādrājā gataḥ śivabhuvanaṃ ca tatkṣaṇāt

tāvatpaśyati tannābhyaṃ govatsaṃ bālakaṃ sthitam //
nūnameṣa mahādevo vatsarūpī maheśvaraḥ

tamānetuṃ samudyukto rājā tamujjahāra ca //
tadā taddeva liṃgaṃ tu nottiṣṭhati kathaṃcana //
tadā devāḥ sahānena prārthayāmāsurīśvaram

// devā ūcuḥ // //
bhagavansarvadeveśa sthātavyaṃ bhavatā vibho//
śuklena liṃgarūpeṇa sarvalokahitaiṣiṇā

// śrīmahādeva uvāca //
sthāsyāmyahaṃ sadaivātra liṃgarūpeṇa devatāḥ //
yasmādbhādrapade māsi kṛṣṇapakṣe kuhū dine

tathā taddivase tatra snānaṃ kṛtvā vidhānataḥ //
liṃgaṃ ye pūjayiṣyaṃti na teṣāṃ vidyate bhayam

ṛte ca piṃḍadānena pūrvajāḥ śāśvatīḥ samāḥ //
raurave narake ghore kuṃbhīpāke ca ye gatāḥ

anekanarakasthāśca tiryagyonigatāśca ye //
sakṛtpiṃḍapradānena syātte ṣāmakṣayā gatiḥ

tato balāhako rājā sarvadevasamanvitaḥ //
sthāpayāmāsa talliṃgaṃ sarvadevasamīpataḥ

cakāra bahudānāni lokānāṃ hitakāmyayā //
yāvadarcayate hyevaṃ rudro'pi svayamāgataḥ

// rudra uvāca // //
asyāṃ rātrau tu manujāḥ śraddhābhaktisamanvitāḥ //
yercayiṣyaṃti deveśaṃ teṣāṃ puṇyamanaṃtakam

jāgaraṃ ye kariṣyaṃti gītaśāstrapuraḥsaram //
uddhariṣyaṃti te martyāḥ kulamekottaraṃ śatam

tāvadgarjjaṃti tīrthāni naimiṣaṃ puṣkaraṃ gayā //
prayāgaṃ ca prabhāsaṃ ca dvārakā mathurā'rbudaḥ

yāvanna dṛśyate liṃgaṃ govatsaṃ paramādbhutam//
yadā hi kurute bhāvaṃ govatsagamanaṃ prati

svavaṃśajāstadā sarve nṛtyaṃti harṣitā dhruvam

// sūta uvāca // //
yaccānyadadbhutaṃ tatra vṛttāṃtaṃ śṛṇu ta dvijā //
yena vai śrutamātreṇa sarvapāpakṣayo bhavet

yadā vai sthāpitaṃ liṃgaṃ sarvadevaiḥ purātanam //
viṣṇoḥ pratiṣṭhānaguṇātsarveṣāṃ ca divauka sām

aṇumātrapramāṇena pratyahaṃ samavarddhata //
tataste manujā devā bhītāstaṃ śaraṇaṃ yayuḥ

// devā ūcuḥ // //
vṛddhiṃ saṃhara deveśa lokā nāṃ svasti tadbhavet//
evamukte tato liṃgādvāguvācāśarīriṇī

// śivavāṇyuvāca // //
he lokā mā bhayaṃ vo'stu upāyaḥ śrūyatāmayam //
kaściccaṃḍālamānīya matpuraḥ sthāpyatāṃ dhuvam

caṃḍālāṃśca samānīya dadhurdevasya te puraḥ//
tathāpi tasya vṛddhistu naiva nirvartate punaḥ

vāguvāca //
karmmaṇā yastu caṃḍālaḥ so'gre me sthāpyatāṃ janāḥ //
tacchrutvā mahadāścaryaṃ matiṃ cakurvilocane

mārgamāṇāstadā te tu grāmāṇi ca purāṇi ca //
kañcitkarmarataṃ pāpaṃ dadṛśurbrāhmaṇabruvam

vṛṣabhānbhārasaṃyuktānmadhyāhnevāhayattu saḥ //
kṣuttṛṭśramaparītāṃśca durbalānkrūramānasaḥ

asnātvāpi paryuṣitaṃ bhakṣayaṃtīha vai dvijāḥ //
taṃ samādāya deveśaṃ jagmuryatra jagadguruḥ

devālayāgrabhūmau taṃ sthāpayāsurādṛtāḥ //
bhasmī babhūva sahasā govatsāgre nirūpitaḥ

caṃḍālasthala ityeṣa prasiddhosau'bhavatkṣitau //
tatra sthitairna cādyāpi prāsādo daśyate hi saḥ //

tadāprabhṛti talliṃgaṃ sāmyabhāvamupāgatam //
dhautapāpmā gatastīrthaṃ dvijo liṃganirīkṣiṇāt

pratyahaṃ pūjayāmāsa govatsaṃ gata kilbiṣaḥ //
viśeṣātkṛṣṇapakṣasya caturddaśyāṃ samāgataḥ

etattadadbhutaṃ tasya devasya ca triśūlinaḥ //
śṛṇuyādyo naro bhaktyā sarvapāpaiḥ pramucyate

// bhūta uvāca // //
govatsamiti vikhyātaṃ narāṇāṃ puṇyadaṃ param //
anekajanmapāpaghnaṃ mārkaṃḍeyena bhāṣitam

tatra tīrthe sakṛtsnānaṃ rudralokapradaṃ nṛṇām //
pāpadehaviśuddhayarthaṃ pāpenopahatātmanām

kūpe tarpaṇataścaiva śrāddhataścaiva tṛptatā //
bhādrapade viśe ṣeṇa pakṣasyāṃte bhavetkalau

ekaviṃśativārāṃstu gayāyāṃ tarpaṇe kṛte //
pitṝṇāṃ paramā tṛptiḥ sakṛdvai gaṃgakūpake

tasmingovatsasāmīpye tiṣṭhate gaṃgakūpakaḥ //
tasmiṃstilodakenāpi sadgatiṃ yāṃti tarpitāḥ

pitaro narakādvāpi supuṇyena sumedhasā //
gopradānaṃ praśaṃsaṃti tasmiṃstīrthe munīśvarāḥ

viprāya svarṇadānaṃ tu rudraloke nayennaram //
sarasvatīśivakṣetre gaṃgā ca gaṃgakūpake

ekasthametattritayaṃ svargāpavargakāraṇam //
sevitaṃ carṣibhiḥ siddhaistīrthaṃ sarvatra viśrutam

pīluyugmaṃ sthitaṃ tatra tattīrthaṃ munisevitam //
snānātsvargapradaṃ caiva pānātpāpaviśuddhidam

kīrttanātpuṇyajananaṃ sevanānmuktidaṃ param //
tadvai paśyaṃti ye bhaktyā brahmahā yadi mātṛhā //

bālaghātī ca goghnaśca ye ca strīśūdraghātakāḥ //
garadāścāgnidāścaiva gurudroharatāśca ye

tapasvinindakāścaiva kūṭasākṣyaṃ karoti yaḥ //
vaktā ca paradoṣasya parasya guṇalopakaḥ

sarvapāpamayo'pyatra mucyate liṃgadarśanāt

iti śrīskāṃde mahāpurāṇa ekāśīti sāhasryāṃ saṃhitāyāṃ tṛtīye brahmakhaṇḍe pātālakhaṇḍe dharmāraṇyamāhātmye balāhakopākhyānavarṇanaṃnāma saptaviṃśo'dhyāyaḥ