Skanda Purana · Chapter 3.26

// vyāsa uvāca // //
mārkaṃḍeyoddhāṭitaṃ vai svargadvāramapāvṛtam //
tatra ye dehasaṃtyāgaṃ kurvaṃti phalakāṃkṣayā

labhaṃte tatphalaṃ hyaṃte viṣṇoḥ sāyujyamāpnuyuḥ //
ataḥ kiṃ bahunoktena dvāravatyāṃ sadā naraiḥ

dehatyāgaḥ prakartavyo viṣṇorlokajigīṣayā //
anāśake jale vāgnau ye ca saṃti narottamāḥ //
sarvapāpavinirmuktā yāṃti viṣṇoḥ purīṃ sadā

anyopi vyādhirahito gacchedanaśanaṃ tu yaḥ //
sarvapāpa vinirmukto yāti viṣṇoḥ purīṃ naraḥ

śatavarṣasahasrāṇāṃ vasedaṃte divi dvijaḥ //
brāhmaṇebhyaḥ paraṃ nāsti pavitraṃ pāvanaṃ bhuvi

upavāsai stathā tulyaṃ tapaḥ karmma na vidyate //
nāsti vedātparaṃ śāstraṃ nāsti mātṛsamo guru

na dharmātparamastīha tapo nānaśanātparam //
snātvā yaḥ kurute 'trāpi śrāddhaṃ piṃḍodakakriyām

tṛpyaṃti pitarastasya yāvadbrahmadivāniśam //
tatra tīrthe naraḥ snātvā keśavaṃ yastu pūjayet

sa muktapātakaiḥ sarverviṣṇulokamavāpnuyāt //
tīrthānāmuttamaṃ tīrthaṃ yatra saṃnihito hariḥ

harate sakalaṃ pāpaṃ tasmiṃstīrthe sthitasya saḥ //
muktidaṃ mokṣakāmānāṃ dhanadaṃ ca dhanārthinām //
āyurdaṃ sukhada caiva sarvakāmaphalapradam

kimanyenātra tīrthena yatra devo janārddanaḥ //
svayaṃ vasati nityaṃ hi sarveṣāmanukampayā

tatra yaddīyate kiciddānaṃ śraddhāsamanvitam //
akṣayaṃ tadbhavetsarvamiha loke paratra ca

yajñairdānaistapo bhiśca yatphalaṃ prāpyate budhaiḥ //
tadatra snānamātreṇa śūdrairapi susevakaiḥ

tatra śrāddhaṃ ca yaḥ kuryādekādaśyāmupoṣitaḥ //
sa pitṝnuddhare tsarvānnarakebhyo na saṃśayaḥ

akṣayyāṃ tṛptimāpnoti paramātmā janārddanaḥ //
dīyate'tra yaduddiśya tadakṣayyamudāhṛtam

iti śrīskāṃde mahāpurāṇa ekāśītisāhasryāṃ saṃhitāyāṃ tṛtīye brahmakhaṇḍe pūrvabhāge dharmāraṇyamāhātmye dvārikāmāhātmyavarṇanaṃnāma ṣaḍviṃśo'dhyāyaḥ