સ્કંદ પુરાણ · શ્લોક 3.21-3

॥ શ્રીસૂત ઉવાચ ॥ ॥
જટા તીર્થાભિધે તીર્થે સર્વપાતકનાશને ॥
સ્નાનં કૃત્વા વિશુદ્ધાત્મા લક્ષ્મીતીર્થં તતો વ્રજેત્

યંયં કામં સમુદ્દિશ્ય લક્ષ્મીતીર્થે દ્વિજોત્તમાઃ ॥
સ્નાનં સમાચરેન્મર્ત્યસ્તંતં કામં સમશ્નુતે

મહાદારિદ્ર્યશમનં મહાધાન્યસમૃદ્ધિદમ્ ॥
મહાદુઃખપ્રશમનં મહાસંપદ્વિવર્ધનમ્

અત્ર સ્નાત્વા ધર્મપુત્રો મહદૈશ્વર્યમાપ્તવાન્ ॥
ઇન્દ્રપ્રસ્થે વસન્પૂર્વં શ્રીકૃષ્ણેન પ્રચોદિતઃ

॥ ઋષય ઊચુઃ ॥ ॥
યથૈશ્વર્યં ધર્મપુત્રો લક્ષ્મીતીર્થે નિમજ્જનાત્ ॥
આપ્તવાન્કૃષ્ણવચનાત્તન્નો બ્રૂહિ મહામુને

॥ શ્રીસૂત ઉવાચ ॥ ॥
ઇન્દ્રપ્રસ્થે પુરા વિપ્રા ધૃતરાષ્ટ્રેણ ચોદિતાઃ ॥
ન્યવસન્પાંડવાઃ પંચ મહાબલપરાક્રમાઃ

ઇન્દ્રપ્રસ્થં યયૌ કૃષ્ણઃ કદાચિત્તાન્નિરીક્ષિતુમ્ ॥
તમાગતમેભિપ્રેક્ષ્ય પાંડવાસ્તે સમુત્સુકાઃ

સ્વગૃહં પ્રાપયામાસુર્મુદા પરમયા યુતાઃ ॥
કઞ્ચિત્કાલમસૌ કૃષ્ણસ્તત્રાવાત્સીત્પુરોત્તમે

કદાચિત્કૃષ્ણમાહૂય પૂજયિત્વા યુધિષ્ઠિરઃ ॥
પપ્રચ્છ પુંડરીકાક્ષં વાસુદેવં જગત્પતિમ્

॥ યુધિષ્ઠિર ઉવાચ ॥ ॥
કૃષ્ણકૃષ્ણ મહાપ્રાજ્ઞ યેન ધર્મેણ માનવાઃ ॥
લભંતે મહદૈશ્વર્યં તન્નો બ્રૂહિ મહામતે ॥
ઇત્યુક્તો ધર્મપુત્રેણ કૃષ્ણઃ પ્રાહ યુધિષ્ઠિરમ્

॥ શ્રીકૃષ્ણ ઉવાચ ॥ ॥
ધર્મપુત્ર મહાભાગ ગન્ધમાદનપર્વતે

લક્ષ્મી તીર્થમિતિ ખ્યાતમસ્ત્યૈશ્વર્યૈકકારણમ્ ॥
તત્ર સ્નાનં કુરુષ્વ ત્વમૈશ્વર્યં તે ભવિષ્યતિ

તત્ર સ્નાનેન વર્ધંતે ધનધાન્યસમૃદ્ધયઃ ॥
સર્વે સપત્ના નશ્યંતિ ક્ષાત્રમેષાં વિવર્દ્ધતે

તીર્થે સસ્નુઃ પુરા દેવા લક્ષ્મીનામનિ પુણ્યદે ॥
અલભન્ત્સર્વમૈશ્વર્યં તેન પુણ્યેન ધર્મજ

અસુરાંશ્ચ મહાવીર્યાન્સમરે જઘ્નુરંજસા ॥
મહી લક્ષ્મીશ્ચ ધર્મશ્ચ તત્તીર્થસ્નાયિનાં નૃણામ્

ભવિષ્યત્યચિરાદેવ સંશયં મા કૃથા ઇહ ॥
તપોભિઃ ક્રતુભિર્દાનૈરાશીર્વાદૈશ્ચ પાંડવ

ઐશ્વર્યં પ્રાપ્યતે યદ્વલ્લક્ષ્મીતીર્થનિમજ્જનાત્ ॥
સર્વપાપાનિ નશ્યંતિ વિપ્રા યાંતિ લયં સદા ॥

વ્યાધયશ્ચ વિનશ્યંતિ લક્ષ્મીતીર્થનિષેવણાત્ ॥
શ્રેયઃ સુવિપુલં લોકે લભ્યતે નાત્ર સંશયઃ

સ્નાનમાત્રેણ વૈ લક્ષ્મ્યાસ્તીર્થેઽસ્મિ ન્ધર્મનંદન ॥
રંભામપ્સરસાં શ્રેષ્ઠાં લબ્ધવાનવધો નૃપઃ

સ્નાત્વાત્ર તીર્થે પુણ્યે તુ કુબેરો નરવાહનઃ ॥
સ મહાપદ્મમુખ્યાનાં નિધીનાં નાયકોઽ ભવત્

।
તસ્માત્ત્વમપિ રાજેંદ્ર લક્ષ્મીતીર્થે શુભપ્રદે ॥
સ્નાત્વા વૃકોદરમુખૈરનુજૈરપિ સંવૃતઃ

લપ્સ્યસે મહતીં લક્ષ્મીં જેષ્યસે ચ રિપૂનપિ॥
સંદેહો નાત્ર કર્તવ્યઃ પૈતૃષ્વસેય ધર્મજ

ઇત્યુક્તો ધર્મપુત્રોઽયં કૃષ્ણેનાદ્ભુતદર્શનઃ ॥
સાનુજઃ પ્રયયૌ શીઘ્રં ગન્ધમાદનપર્વતમ્

લક્ષ્મી તીર્થં તતો ગત્વા મહદૈશ્વર્યકારણમ્ ॥
સસ્નૌ યુધિષ્ઠિરસ્તત્ર સાનુજો નિયમાન્વિતઃ

લક્ષ્મતીર્થસ્ય તોયે સ સર્વપાતકનાશને ॥
સાનુજો માસમેકં તુ સસ્નૌ નિયમપૂર્વકમ્

ગોભૂતિલહિરણ્યાદીન્બ્રાહ્મણેભ્યો દદૌ બહૂન્ ॥
સાનુજો ધર્મપુત્રોઽસાવિંદ્રપ્રસ્થં યયૌ તતઃ

રાજસૂયક્રતું કર્તું તત એચ્છદ્યુધિષ્ઠિરઃ ॥
કૃષ્ણં સમાહ્વયામાસ યિયક્ષુર્ધર્મનંદનં

કૃષ્ણો ધર્મજદૂતેન સમાહૂતઃ સસંભ્રમઃ ॥
ચતુર્ભિરશ્વૈઃ સંયુક્તં રથમા રુહ્ય વેગિનમ્

સત્યભામાસહચર ઇંદ્રપ્રસ્થં સમાયયૌ ॥
તમાગતં સમાલોક્ય પ્રમોદાદ્ધર્મનંદનઃ

ન્યવેદયત્સ કૃષ્ણાય રાજસૂયોદ્યમં તદા ॥
અન્વમન્યત કૃષ્ણોપિ તથૈવ ક્રિયતામિતિ

વાક્યં ચ યુક્તિસંયુક્તં ધર્મપુત્રમભાષત ॥
પૈતૃષ્વસ્રેય ધર્માત્મઞ્ચ્છૃણુ પથ્યં વચો મમ ॥

દુષ્કરો રાજસૂયોઽયં સર્વૈરપિ મહીશ્વરૈઃ ॥
અનેકશતપાદાતરથકુંજરવાજિમાન્

મહીપતિરિમં યજ્ઞં કર્તુમર્હતિ નેતરઃ ॥
દિશો દશ વિજેતવ્યા પ્રથમં વલિના ત્વયા

પરાજિતેભ્યઃ શત્રુભ્યો ગૃહીત્વા કરમુત્તમમ્ ॥
તેન કાંચનજાતેન કર્તવ્યોઽયં ક્રતૂત્તમઃ

રોચયે યુક્તિવિદહં ન હિ ત્વાં ભીષયામિ ભોઃ ॥
અતઃ ક્રતુસમારંભાત્પૂર્વં દિગ્વિજયં કુરુ

તતો ધર્માત્મજઃ શ્રુત્વા કૃષ્ણસ્ય વચનં હિતમ્ ॥
પ્રશંસન્દેવકીપુત્રમાજુહાવ નિજાનુજાન્

આહૂય ચતુરો ભ્રાતૄન્ધર્મજઃ પ્રાહ હર્ષયન્ ॥
અયિ ભીમ મહાબાહો બહુવીર્ય ધનંજય

યમૌ ચ સુકુમાગંગૌ શત્રુસંહારદીક્ષિતૌ ॥
ચિકીર્ષામિ મહાયજ્ઞં રાજસૂયમનુત્તમમ્

સ ચ સર્વાન્રણે જિત્વા કર્તવ્યઃ પૃથિવીપતીન્ ॥
અતો વિજેતું ભૂપાલાંશ્ચત્વરોઽપિ સસૈનિકાઃ

દિશશ્ચતસ્રો ગચ્છંતુ ભવંતો વીર્યવત્તરાઃ ॥
યુષ્માભિરાહતૈર્દ્રવ્યૈઃ કરિષ્યામિ મહાક્રતુમ્

ઇત્યુક્તાઃ સાદરં સર્વે વૃકોદરમુખાસ્તદા ॥
પ્રસન્નવદના ભૂત્વા ધર્મપુત્રાનુજાઃ પુરાત્

રાજ્ઞાં જયાય સર્વાસુ નિર્યયુર્દિક્ષુ પાંડવાઃ ॥
તે સર્વે નૃપતીઞ્જિત્વા ચતુર્દિક્ષુ સ્થિતાન્બહૂન્

સ્વવશે સ્થાપયિત્વા તાન્નૃપતીન્પાંડુનંદનાઃ ॥
તૈર્દત્તં બહુધા દ્રવ્યમસંખ્યાતમનુત્તમમ્

આદાય સ્વપુરં તૂર્ણમાયયુઃ કૃષ્ણસંશ્રયાઃ ॥
ભીમઃ સમાયયૌ તત્ર મહાબલપરાક્રમઃ

શતભારસુવર્ણાનિ સમાદાય પુરોત્તમમ્ ॥
સહસ્રં ભારમાદાય સુવર્ણાનાં તતોઽર્જુનઃ

શક્રપ્રસ્થં સમાયાતો મહાબલપરાક્રમઃ ॥
શતભારં સુવર્ણાનાં પ્રગૃહ્ય નકુલસ્તથા

સમાગતો મહાતેજાઃ શક્રપ્રસ્થં પુરોત્તમમ્ ॥
દત્તાન્વિભીષણેનાથ સ્વર્ણતાલાંશ્ચતુર્દશ

દાક્ષિણાત્યમહીપાનાં ગૃહીત્વા ધનસંચયમ્ ॥
સહદેવોપિ સહસા સમા યાતો નિજાં પુરીમ્

લક્ષકોટિસહસ્રાણિ લક્ષકોટિશતાન્યપિ ॥
સુવર્ણાનિ દદૌ કૃષ્ણો ધર્મપુત્રાય યાદવઃ

સ્વાનુજૈરાહૃતૈરેવમસં ખ્યાતૈર્મહાધનૈઃ ॥
કૃષ્ણદત્તૈરસંખ્યાતૈર્ધનૈરપિ યુધિષ્ઠિરઃ

કૃષ્ણાશ્રયોઽયજદ્વિપ્રા રાજસૂયેન પાંડવઃ ॥
તસ્મિન્યાગે દદૌ દ્રવ્યં બ્રાહ્મણેભ્યો યથેષ્ટતઃ

અન્નાનિ પ્રદદૌ તત્ર બ્રાહ્મણેભ્યો યુધિષ્ઠિરઃ ॥
વસ્ત્રાણિ ગાશ્ચ ભૂમિં ચ ભૂષણાનિ દદૌ તથા

અર્થિનઃ પરિતુષ્યંતિ યાવતા કાંચનાદિના ॥
તતોપિ દ્વિગુણં તેભ્યો દાપયામાસ ધર્મજઃ

ઇયંતિ દત્તાન્યર્થિભ્યો ધનાનિ વિવિધાન્યપિ ॥
ઇતીયત્તાં પરિચ્છેત્તું ન શક્તા બ્રહ્મકોટયઃ

અર્થિભિર્દીયમાનાનિ દૃષ્ટ્વા તત્ર ધનાનિ વૈ ॥
સર્વસ્વમપ્યહો રાજ્ઞા દત્તમિત્યબ્રવીજ્જનઃ

દૃષ્ટ્વા કોશાસ્તથા નંતાનનંતમણિકાંચનાન્

સ્વલ્પં હિ દત્તમર્થિભ્ય ઇત્યવોચઞ્જનાસ્તદા ॥
ઇષ્ટ્વૈવં રાજસૂયેન ધર્મપુત્રઃ સહાનુજઃ

બહુવિત્તસમૃદ્ધઃ સન્રેમે તત્ર પુરોત્તમે ॥
લક્ષ્મીતીર્થસ્ય માહાત્મ્યાદ્ધર્મપુત્રો યુધિષ્ઠિરઃ

લેભે સર્વમિદં વિપ્રા અહો તીર્થસ્ય વૈભવમ્ ॥
ઇદં તીર્થં મહાપુણ્યં મહા દારિદ્યનાશનમ્

ધનધાન્યપ્રદં પુંસાં મહાપાતકનાશનમ્ ॥
મહાનરકસંહર્તૃ મહાદુઃખનિવર્તકમ્

મોક્ષદં સ્વર્ગદં નિત્યં મહાઋણ વિમોચનમ્ ॥
સુકલત્રપ્રદં પુંસાં સુપુત્રપ્રદમેવ ચ

એતત્તીર્થસમં તીર્થં ન ભૂતં ન ભવિષ્યતિ ॥
એતદ્વઃ કથિતં વિપ્રા લક્ષ્મીતીર્થસ્ય વૈભવમ્

દુઃસ્વપ્નનાશનં પુણ્યં સર્વાભીષ્ટપ્રસાધકમ્ ॥
યઃ પઠેદિમમધ્યાયં શૃણુતે વા સભક્તિકમ્

ધનધાન્યસમૃદ્ધઃ સ્યાત્સ નરો નાસ્તિ સંશયઃ ॥
ભુક્ત્વેહ સકલાન્ભોગાન્દેહાંતે મુક્તિમાપ્નુયાત્

ઇતિ શ્રીસ્કાંદે મહાપુરાણ એકાશીતિસાહસ્યા સંહિતાયાં તૃતીયે બ્રહ્મખણ્ડે સેતુમાહાત્મ્યે લક્ષ્મીતીર્થપ્રશંસાયાં ધર્મપુત્રનિરતિશયસંપદવાપ્તિવર્ણનંનામૈકવિંશોઽધ્યાયઃ