Skanda Purana · Chapter 3.19

// // // vyāsa uvāca // //
indrasare naraḥ snātvā dṛṣṭvā ceṃdreśvaraṃ śivam //
saptajanmakṛtātpāpānmucyate nātra saṃśayaḥ

// yudhiṣṭhira uvāca // //
kena cādau nirmitaṃ tattīrthaṃ sarvottamottamam //
yathāvadvarṇaya tvaṃ me bhagavandvijasattama

// vyāsa uvāca // //
indreṇaiva mahārāja tapastaptaṃ suduṣkaram//
grāmāduttaradigbhāge śatavarṣāṇi tatra vai

śivoddeśaṃ mahāghoramekāṃguṣṭhena bhārata //
urddhvabāhurmahātejāḥ sūryasyābhimukho'bhavat //

vṛtrasya vadhato jñātaṃ yatpāpaṃ tasya nuttaye //
ekāgraḥ prayato bhūtvā śivasyārādhane rataḥ

tapasā ca tadā śaṃbhustoṣitaḥ śaśiśe kharaḥ //
tatrājagāma jaṭilo bhasmāṃgo vṛṣabhadhvajaḥ

khaṭvāṃgī paṃcavaktraśca daśabāhustrilocanaḥ //
gaṃgādharo vṛṣārūḍho bhūtapretādiveṣṭitaḥ

suprasannaḥ suraśreṣṭhaḥ kṛpālurvaradāyakaḥ //
tadā hṛṣṭamanā devo devendramidamūcivān

// hara uvāca // //
yattvaṃ yācayase deva tadahaṃ prada dāmi te

// indra uvāca // //
yadi tuṣṭosi deveśa kṛpāsiṃdho maheśvara //
brahmahatyā hi māṃ deva udvejayati nityaśaḥ

vṛtrāsurasya hanane jātaṃ pāpaṃ surottama //
tatpāpaṃ nāśaya vibho mama duḥkhapradaṃ sadā

// hara uvāca // //
dharmāraṇye surapate brahmahatyā na pīḍayet //
hatyā gavāṃ dvijātīnāṃ bālasya yoṣitāmapi

vacanānmama deveṃdra brahmaṇaḥ keśavasya ca //
yamasya vacanājjiṣṇo hatyā naivātra tiṣṭhati //
praviśya tvaṃ mahārāja atotra snānamācara

// indra uvāca // //
yadi tvaṃ mama tuṣṭo'si kṛpāsiṃdho maheśvara //
mannāmnā ca mahādeva sthāpito bhava śaṃkara

tathetyuktvā mahādevaḥ suprasanno harastadā //
darśayāmāsa tatraiva liṃgaṃ pāpapraṇāśanam

kūrmapṛṣṭhātsamutpādya ātmayogena śaṃbhunā //
sthitastatraiva śrīkaṇṭhaḥ kālatrayavido viduḥ

vṛtrahatyāsamuttrastadevarājasya sannidhau //
indreśvarastadā tatra dharmā raṇye sthito nṛpa

sarvapāpaviśuddhyarthaṃ lokānāṃ hitakāmyayā //
indreśvaraṃ tu rājeṃdra puṣpadhūpādikaiḥ sadā

pūjayecca naro bhaktyā sarvapāpaiḥ pramucyate //
aṣṭamyāṃ ca caturdaśyāṃ māghamāse viśeṣataḥ

sarvapāpaviśuddhyarthaṃ śivaloke mahīyate //
nīlotsargaṃ tu yo martyaḥ karoti ca tadagrataḥ

uddharetsapta gotrāṇi kulamekottaraṃ śatam //
sāṃgarudrajapaṃ yastu caturddaśyāṃ karoti vai

sarvapāviśuddhātmā labhate paramaṃ padam

sauvarṇanayanaṃ kṛtvā madhye ratnasamanvitam //
yo dadāti dvijātibhya indratīrthe tathottame

andhatā na bhave ttasya janmāni ṣaṣṭisaṃkhyayā //
nirmalatvaṃ sadā teṣāṃ nayaneṣu prajāyate //
mahārogāstathā cānye snātvā yāṃti tadagrataḥ

pūjite caikacitte na sarvarogātpramucyate //
snātvā kuṇḍe naro yastu saṃtarpayati yaḥ pitṝn

tasya tṛptāḥ sadā bhūpa pitaraśca pitāmahāḥ //
ye vai grastā mahārogaiḥ kuṣṭhādyaiścaiva dehinaḥ

snānamātreṇa saṃśuddhā divyadehā bhavaṃti te //
jvarādikaṣṭamāpannā narāḥ svātmahitāya vai

snāna mātreṇa saṃśuddhā divyadehā bhavaṃti te //
snātvā ca pūjayeddevaṃ mucyate jvarabandhanāt

ekāhikaṃ dvyāhikaṃ ca cāturthaṃ vā tṛtīyakam //
viṣamajvarapīḍā ca māsapakṣādikaṃ jvaram

indreśvaraprasādācca naśyate nātra saṃśayaḥ //
vijvaro jāyate nūnaṃ satyaṃsatyaṃ ca bhūpate

vandhyā ca durbhagā nārī kākavandhyā mṛtaprajā //
mṛtavatsā mahāduṣṭā snātvā kuṇḍe śivāgrataḥ //
pūjayedekacittena snānamātreṇa śuddhyati

evaṃvidhāśca bahuśo varāndattvā pinākadhṛk //
gato'sau svapuraṃ pārtha sevyamānaḥ surāsuraiḥ

tataḥ śakro mahātejā gato vai svapuraṃ prati //
jayaṃtenāpi tatraiva sthāpitaṃ liṃgamuttamam

jayaṃtasya harastuṣṭastasmilliṃge stutaḥ sadā //
trikālaṃ putrasaṃyuktaḥ pūjanārthaṃ sureśvaraḥ

āyāti ca mahābāho tyaktvā sthānaṃ svakaṃ hi vai //
etatsarvaṃ samākhyātaṃ sarvasaukhyapradāyakam

indreśvaraṃ tu yatpuṇyaṃ jayaṃteśasya pūja nāt //
tadevāpnoti rājendra satyaṃsatyaṃ na saṃśayaḥ

snātvā kuṇḍe mahārāja saṃpūjyaikāgramānasaḥ //
sarvapāpaviśuddhātmā indraloke mahīyate

yaḥ śṛṇoti naro bhaktyā sarvapāpaiḥ pramucyate //
sarvānkāmānavāpnoti jayaṃteśapramādataḥ

iti śrīskāṃde mahāpurāṇa ekāśītisāhasryāṃ saṃhitāyāṃ tṛtīye brahmakhaṇḍe pūrvabhāge dharmāraṇyamāhātmye indreśvarajayaṃteśvaramahimavarṇanonāmaikonaviṃśo'dhyāyaḥ