Skanda Purana · Verses 3.11-2

// sūta uvāca // //
piṃgalā nāma yā veśyā mayā pūrvamudāhṛtā //
śivabhaktārcanātpuṇyāttyaktvā pūrvakalevaram

candrāṃgadasya sā bhūyaḥ sīmaṃtinyāmajāyata //
rūpaudāryaguṇopetā nāmnā vai kīrtimālinī

bhadrāyurapi tatraiva rājaputro vaṇikpateḥ //
vavṛdhe sadane bhānuḥ śucāviva mahātapāḥ

tasyāpi vaiśyanāthasya kumārastveka uttamaḥ //
sa nāmnā sunayaḥ prokto rājasūnoḥ sakhā'bhavat

tāvubhau paramasnigdhau rājavaiśyakumārakau//
citrakrīḍāvudārāṃgau ratnābharaṇamaṃḍitau

tasya rājakumārasya brāhmaṇaiḥ sa vaṇikpatiḥ //
saṃskārānkārayāmāsa svaputrasyāpi vistarāt

kāle kṛtopanayanau guruśuśrūṣaṇe ratau //
cakratuḥ sarvavidyānāṃ saṃgrahaṃ vinayānvitau

atha rājakumārasya prāpte ṣoḍaśahāyane //
sa eva ṛṣabho yogī tasya veśmanyupāyayau

sā rājñī sa kumāraśca śivayoginamāgatam //
muhurmuhuḥ praṇamyobhau pūjayāmāsaturmudā

tābhyāṃ ca pūjitaḥ so'tha yogīśo hṛṣṭamānasaḥ //
taṃ rājaputramuddiśya babhāṣe karuṇārdradhīḥ

// śivayogyuvāca // //
kaccitte kuśalaṃ tāta tvanmātuścāpyanāmayam //
kaccittvaṃ sarvavidyānāmakārṣīśca pratigraham

kaccidgurūṇāṃ satataṃ śuśrūṣātatparo bhavān //
kaccitsmarasi māṃ tāta tava prāṇapradaṃ gurum

evaṃ vadati yogīśe rājñī sā vinayānvitā //
svaputraṃ pādayostasya nipātyainamabhāṣata

eṣa putrastava guro tvamasya prāṇadaḥ pitā //
eṣa śiṣyastu saṃgrāhyo bhavatā karuṇātmanā

ato bandhubhirutsṛṣṭamanāthaṃ paripālaya //
asmai samyaksatāṃ mārgamupadeṣṭuṃ tvamarhasi

iti prasādito rājñyā śivayogī mahāmatiḥ //
tasmai rājakumārāya sanmārgamupadiṣṭavān

// ṛṣabha uvāca // //
śrutismṛtipurāṇeṣu prokto dharmaḥ sanātanaḥ //
varṇāśramānurūpeṇa niṣevyaḥ sarvadā janaiḥ

bhaja vatsa satāṃ mārgaṃ sadeva caritaṃ cara //
na devājñāṃ vilaṃghethā mā kārṣīrdevahelanam

godevaguruvipreṣu bhaktimānbhava sarvadā //
cāṃḍālamapi saṃprāptaṃ sadā saṃbhāvayātithim

satyaṃ na tyaja sarvatra prāpte'pi prāṇasaṃkaṭe //
gobrāhmaṇānāṃ rakṣārthamasatyaṃ tvaṃ vada kvacit

parasveṣu parastrīṣu devabrāhmaṇa vastuṣu //
tṛṣṇāṃ tyaja mahābāho durlabheṣvapi vastuṣu

satkathāyāṃ sadācāre sadvrate ca sadāgame //
dharmādisaṃgrahe nityaṃ tṛṣṇāṃ kuru mahāmate

snāne jape ca home ca svādhyāye pitṛtarpaṇe //
godevātithipūjāsu nirālasyo bhavānagha

krodhaṃ dveṣaṃ bhayaṃ śāṭhyaṃ paiśunya masadāgraham //
kauṭilyaṃ daṃbhamudvegaṃ yatnena parivarjaya

kṣātradharmarato'pi tvaṃ vṛthā hiṃsāṃ parityaja //
śuṣkavairaṃ vṛthālāpaṃ paranidāṃ ca varjaya

mṛgayā dyūtapāneṣu strīṣu strīvijiteṣu ca //
atyāhāramatikrodhamatinidrāmatiśramam

atyālāpamatikrīḍāṃ sarvadā parivarjaya //

atividyāmatiśraddhāmatipuṇyamatismṛtim //
atyutsāhamatikhyātimatidhairyaṃ ca sādhaya

sakāmo nijadāreṣu sakrodho nija śatruṣu //
salobhaḥ puṇyanicaye sābhyasūyo hyadharmiṣu

sadveṣo bhava pākhaṇḍe sarāgaḥ sajjaneṣu ca //
durbodho bhava durmaṃtre badhiraḥ piśunoktiṣu

dhūrttaṃ caṃḍaṃ śaṭhaṃ krūraṃ kitavaṃ capalaṃ khalam //
patitaṃ nāstikaṃ jihmaṃ dūrataḥ parivarjaya

ātmapraśaṃsā mā kārṣīḥ parijñāteṃgito bhava //
dhane sarvakuṭuṃbe ca nātyāsaktaḥ sadā bhava

patnyāḥ pativratāyāśca jananyāḥ śvaśurasya ca //
satāṃ gurośca vacane viśvāsaṃ kuru sarvadā

ātmarakṣāparo nityamapramatto dṛḍhavrataḥ //
viśvāsaṃ naiva kurvīthāḥ svabhṛtyeṣvapi kutra cit

viśvastaṃ mā vadhīḥ kaṃcidapi coraṃ mahāmate //
apāpeṣu na śaṃkethāḥ satyānna calito bhava

anāthaṃ kṛpaṇaṃ vṛddhaṃ striyaṃ bālaṃ nirāgasam //
parirakṣa dhanaiḥ prāṇairbuddhyā śaktyā balena ca

api śatruṃ vadhasyārhaṃ mā vadhīḥ śaraṇāgatam //
apyapātraṃ supātraṃ vā nīco vāpi mahattamaḥ

yo vā ko vāpi yāceta tasmai dehi śiropi ca //
api yatnena mahatā kīrtimeva sadārjaya

rājñāṃ ca viduṣāṃ caiva kīrtireva hi bhūṣaṇam //
satkīrtiprabhavā lakṣmīḥ puṇyaṃ satkīrtisaṃbhavam

satkīrtyā rājate lokaścaṃdraścaṃdrikayā nyathā //
gajāśvahemanicayaṃ ratnarāśiṃ nagopamam

akīrtyopahataṃ sarvaṃ tṛṇavanmuṃca satvaram //
mātuḥ kopaṃ pituḥ kopaṃ guroḥ kopaṃ dhanavya yam

putrāṇāmaparādhaṃ ca brāhmaṇānāṃ kṣamasva bhoḥ //
yathā dvijaprasādaḥ syāttathā teṣāṃ hitaṃ cara

rājānaṃ saṃkaṭe magnamuddhareyurdvijottamā //
āyuryaśo balaṃ saukhyaṃ dhanaṃ puṇyaṃ prajonnatiḥ

karmaṇā yena jāyeta tatsevyaṃ bhavatā sadā //
deśaṃ kālaṃ ca śaktiṃ ca kāryaṃ cā kāryameva ca

samyagvicārya yatnena kuru kāryaṃ ca sarvadā //
na kuryāḥ kasyacidbādhāṃ parabādhāṃ nivāraya

corānduṣṭāṃśca bādhethāḥ sunītyā śaktimattayā //
snāne jape ca home ca daive pitrye ca karmaṇi

atvaro bhava nidrāyāṃ bhojane bhava satvaraḥ //
dākṣiṇyayuktamaśaṭhaṃ satyaṃ janamanoharam

alpākṣaramanaṃtārthaṃ vākyaṃ brūhi mahāmate//
abhīto bhava sarvatra vipakṣeṣu vipatsu ca

bhīto bhava brahmakule na pāpe guruśāsane //
jñātibaṃdhuṣu vipreṣu bhāryāsu tanayeṣu ca

samabhāvena vartethāstathā bhojanapaṃktiṣu //
satāṃ hitopadeśeṣu tathā puṇya kathāsu ca

vidyāgoṣṭhīṣu dharmyāsu kvacinmā bhūḥ parāṅmukhaḥ //
śucau puṇyajalasyāṃte prakhyāte brahmasaṃkule

mahādeśe śivamaye vastavyaṃ bhavatā sadā //
kulaṭā gaṇikā yatra yatra tiṣṭhati kāmukaḥ

durdeśe nīcasaṃbādhe kadācidapi mā vasa //
ekamevāśritopi tvaṃ śivaṃ tribhuvaneśvaram

sarvāndevānupāsīthāstaddināni ca mānayan //
sadā śuciḥ sadā dakṣaḥ sadā śāṃtaḥ sadā sthiraḥ

sadā vijita ṣaḍvargaḥ sadaikāṃto bhavānagha //
viprānvedavidaḥ śāṃtānyatīṃśca niyatojvalān

yugmam //
puṇyavṛkṣānpuṇyanadīḥ puṇyatīrthaṃ mahatsaraḥ //
dhenuṃ ca vṛṣabhaṃ ratnaṃ yuvatīṃ ca pativratām

ātmano gṛhadevāṃśca sahasaiva namaskuru //
utthāya samaye brāhme svācamya vimalāśayaḥ

namaskṛtyātmaguruve dhyātvā devamumāpatim//
nārāyaṇaṃ ca lakṣmīśaṃ brahmāṇaṃ ca vināyakam

skandaṃ kātyāyanīṃ devīṃ mahālakṣmīṃ sarasvatīm //
indrādīnatha lokeśānpuṇyaślokānṛṣīnapi

ciṃtayitvātha mārttaṃḍamudyaṃtaṃ praṇametsadā //
gaṃdhaṃ puṣpaṃ ca tāṃbūlaṃ śākaṃ pakvaphalādikam

śivāya dattvopabhuṃkṣva bhakṣyaṃ bhojyaṃ priyaṃ navam //
yaddattaṃ yatkṛtaṃ japtaṃ yatsnātaṃ yaddhutaṃ smṛtam

yacca taptaṃ tapaḥ sarvaṃ tacchivāya nivedaya//
bhuṃjānaśca paṭhanvāpi śayāno viharannapi //
paśyañchṛṇnvavadangṛhṇañchivamevānuciṃtaya

rudrākṣakaṃkaṇalasatkaradaṃḍayugmo mālāṃtarāladhṛtabhasma sitatripuṃḍūḥ //
paṃcākṣaraṃ paripaṭhanparamaṃtrarājaṃ dhyāyansadā paśupateścaraṇaṃ ramethāḥ

iti saṃkṣepato vatsa kathito dharmasaṃgrahaḥ //
anyeṣu ca purāṇeṣu vistareṇa prakīrtitaḥ

athāparaṃ sarvapurāṇaguhyaṃ niḥśeṣapāpaughaharaṃ pavitram//
jayapradaṃ sarvavipadvimocanaṃ vakṣyāmi śaivaṃ kavacaṃ hitāya te

iti śrīskāṃde mahāpurāṇa ekāśītisāhasryāṃ saṃhitāyāṃ tṛtīye brahmakhaṇḍe bhadrāyuṃ prati ṛṣabhopadeśavarṇanaṃ nāmaikādaśo'dhyāyaḥ