Skanda Purana · Verses 2.5-7

atha padmāvatīdarśanena śrīnivāsasya mohaprāptiḥ // // //
// śrīvarāha uvāca // //
samprāpya cālayaṃ divyamavatīrya hayottamāt //
visṛjya sānugānsarvāndevānkairātarūpakān

viśramadhvamiti procya viveśa maṇimaṇḍapam //
āruhya maṇisopānaṃ paṃcakakṣā atītya ca

muktāgṛhaṃ samāsādya tasmim̐llolāyite śubhe //
navaratnamaye maṃce saṃviveśāvaśo hariḥ

saṃsmaranpadmagarbhābhāṃ tāmevāyatalocanām //
tanumadhyāṃ pīnakucāṃ mandasmitasukhāṃbujām

kṣīrābdhitanayāmeva mene padmodbhavāṃ śubhām //
tasyāṃ gatamanā devaḥ śrīnivāso mumoha ca

// atha muhyamānaṃ śrīnivāsaṃ prati bakulamālikoktiḥ // //
tato madhyāhnasamaye kṛtvānnaṃ divyamuttamam //
sūpadaṃśaṃ sugandhaṃ ca devārhamatiśobhanam

śuddhānnaṃ pāyasānnaṃ ca gauḍaṃ mudgānnameva ca //
kṛtvā pañcavidhāpūpānpūrikāvaṭakānapi

devaṃ draṣṭuṃ yayau śīghraṃ sakhī vakulamālikā //
padmāvatīpadmapatrā citrarekhāsamanvitā

niveśya dvāri devasya tāḥ sarvāḥ pramadottamāḥ //
viveśa tatsamīpaṃ sā svayaṃ bakulamālikā

gatvā samīpaṃ devasya vavande bhaktibhāvataḥ //
dṛṣṭvātha devaṃ vivaśaṃ paryaṃke ratnabhūṣite

pādasaṃvāhanaṃ kṛtvā nimīlitavilocanam //
taṃ dhyāyantaṃ ca kimapi vyājahāra śucismitā

uttiṣṭha devadeveśa kiṃ śeṣe puruṣottama //
paramānnaṃ kṛtaṃ deva bhoktumāgaccha mādhava

kiṃ vā tvamārtavaccheṣe sarvalokārtināśana //
mṛgayāmaṭatā deva ki dṛṣṭaṃ bhavatā vane

avasthā te viśālākṣa kāmukasyeva dṛśyate //
kā dṛṣṭā devakanyā vā mānuṣī vā'hikanyakā //

brūhi me tvamacintyātmankanyāṃ tāṃ cittahāriṇīm

// śrīvarāha uvāca // //
tasyāstadvacanaṃ śrutvā niḥśvāsamakarodvibhuḥ //
niḥśvasaṃtaṃ punaḥ prāha prītā bakulamālikā

evaṃ manoharā kā sā tavāpi puruṣottama //
tāmavocaddhṛṣīkeśo vakṣyāmi śṛṇu tattvataḥ

// // atha śrīnivāsoktapadmāvatīpariṇayakāraṇāni //
// śrībhagavānuvāca // //
purā tretāyuge puṇye rāvaṇaṃ hatavānaham //
tadā vedavatī kanyā sāhāyyamakarocchriyaḥ

sītārūpābhavallakṣmīrjanakasya mahītalāt //
gate mayi tu mārīcaṃ hantuṃ pañcavaṭīvane

mamānujo'pi māmeva sītayā coditonvayāt //
tadantare rākṣasendro hartuṃ sītāmupāyayau

agnihotragato vahnistaṃ jñātvā rāvaṇodyamam //
ādāya sītāṃ pātāle svāhāyāṃ sanniveśya ca

tenaiva rakṣasā spṛṣṭāṃ purā vedavatīṃ śubhām //
agnau visṛṣṭadehāṃ tāṃ saṃhartuṃ rāvaṇaṃ punaḥ

sītāyā rūpasadṛśīṃ kṛtvā caivotsasarja ha //
sā rāvaṇahṛtā bhūtvā laṃkāyāṃ ca niveśitā

hate tu rāvaṇe paścātpunaragniṃ viveśa sā //
agnistu rakṣitāṃ lakṣmīṃ svāhāyāṃ mama jānakīm

dattvā haste ca māmāha sītayā sahitāṃ sakhīma //
iyaṃ vedavatī deva sītāyāḥ priyakāriṇī

sītārthaṃ rākṣasapure tena bandīkṛtā sthitā //
tasmādenāṃ vareṇaiva prīṇaya tvaṃ śriyā saha

iti vahnivacaḥ śrutvā sītā māmavadacchubhā //
mama prītikarī nityamiyaṃ vedavatī vibho

tasmātparaṃ bhāgavatīṃ devaināṃ varaya prabho

// śrībhagavānuvāca // //
tathā devi kariṣyāmi hyaṣṭāviṃśe kalau yuge //
tāvadeṣā brahmaloke vasatvamarapūjitā

paścāttu bhūmitanayā bhaviṣyati viyatsutā //
iti dattavarā pūrvaṃ mayā lakṣmyā ca sundarī

adya nārāyaṇapure sambhūtā dharaṇītalāt //
padmāsamā padmanetrī padmādattavarā satī

sakhībhiranurūpābhirvane puṣpāṇi cinvatī //
mṛgayāmaṭatā tatra mayā dṛṣṭā manoramā

tasyā rūpaṃ mayā vaktuṃ na śakyaṃ śatahāyanaiḥ //
lakṣmyeva ca tayā me'dya saṃgamo bhavitā yadi

prāṇāḥ sthirā bhaviṣyanti satyamityavadhāraya

// atha viyadrājapuraṃ prati bakulamālikāgamanam// //
tvaṃ tatra gatvā tāṃ kanyāṃ dṛṣṭvā bakulamālike //
jānīhi rūpalāvaṇyādiyaṃ yogyeti cāsya vai //
anavadyā viśālākṣī padmendīvaralocanā

ityuktvā mohamāpannaṃ taṃ prāha bakulā punaḥ //
ito gacchāmi deveśa manojñā tava yatra sā

mārgaṃ vada ramādhīśa gamiṣye yena tāṃ prati //
evamukto ramādhīśastāṃ prāha vakulasrajam

ito gaccha mahābhāge śrīnṛsiṃhaguhā yataḥ //
tanmārgeṇāvatīryāsmādbhūdharendrānmanoramāt

agastyāśramamāsādya dṛṣṭvā liṃgaṃ tadarcitam //
agastyeśa iti khyātaṃ suvarṇamukharītaṭe

tīreṇaiva tato gaccha śukabrahmaṛṣervanam //
paśyantī svarṇamukharīṃ tatra kallolamālinīm

tatra padmasaronāma pāvanaṃ padmasaṃyutam //
tatra snātvā'tha tattīre tapantaṃ munisattamam

chāyāśukaṃ namaskṛtya kṛṣṇaṃ ca balasaṃyutam //
ārādhyamānaṃ muninā śukena satataṃ śubhe

indranīlamaṇiśyāmaṃ pītanirmalavāsasam //
tīrthayātrāṃ gamiṣyantaṃ balabhadraṃ sitākṛtim

upāsayantaṃ maṃtrāṇi muktānvitakaradvayam //
udyantaṃ pādukāyuktaṃ balabhadraṃ praṇamya ca

ādāya svarṇakamalaṃ saraso'smādvarānane //
tīrtvā suvarṇamukharīṃ vanānyupavanāni ca

araṇītīramāsādya viśramya ca vanāntare //
nārāyaṇapurīṃ dṛṣṭvā vismayaṃ ca gamiṣyasi

tasyāścopavane vṛkṣānpuṣpāḍhyānphalasaṃyutān //
panasāmraśirīṣāṃśca kundatindukapāṭalān

punnāganāgavaraṇarasālāṃkolacaṃpakān//
bakulāmalakānsālāṃstālahiṃtālapadmakān

jambūnimbakadambailāpippalīmadhukārjunān //
priyaṃguhiṃgukharjūramāyūrāśokalodhrakān

aśvatthodumbaraplakṣabadarībhūrjakīcakān //
ciñcākiṃśukamandāraśālmalībījapūrakān

pūganāraṃgalikucanārikelavanākulān //
mallikāmālatīkunda yūthikāketakīyutān

karavīrābjasaṃpannānrājaraṃbhāvirājitān //
mayūrakīragaruḍaśukasārasasaṃkulān

bhṛṃgajhaṃkāranibiḍānārāmānsumanoharān //
paśyantīṃ paramaṃ harṣamavāpya ca nadītaṭe

gatvā pūrvottare mārge purīmindrapurīsamām //
gaṅgayevāvṛtāṃ nityaṃ saritāraṇināmayā

ākāśarājanagarīṃ gatvā tatrocitaṃ kuru

// śrīvarāha uvāca // //
ityādiśya surādhīśaḥ sakhīṃ tāṃ bakulābhidhām //
visṛjya śayane śubhre sa śiśye śrīsamanvitaḥ

praṇamya devadeveśaṃ sakhī bakulamālikā //
guñjāmaṇisamākāraṃ raktāśvamadhiruhya sā

yathoktamārgeṇa yayau paśyantī vividhānmṛgān //
mattebhānparvatākārāñchvetadantavibhūṣitān //

kariṇīyūthasahitāñjaladādānatatparān //
siṃhāñchve(?)taghanaprakhyānsiṃhīyūthairanudrutān

śārdūlarkṣāṃśca khaḍgāṃśca śarabhāngavayānmṛgān //
kṛṣṇasārāṃśca gomāyūñchaśāṃśca priyakānapi

sārasāṃśca mayūrāṃśca mārjārānvanagocarān //
vṛkāñchukānsūkarāṃśca suvācaḥ pakṣiṇastathā

paśyantī vividhākārāṃstuṣyantī ca muhurmuhuḥ //
āsasādāraṇītīraṃ paścimaṃ pādapākulam

avatīryāruṇādaśvādagastyeśasamīpataḥ //
dṛṣṭvāgastyeśvaraṃ liṅgamagastyena supūjitam

tatra snātvā ca pītvā ca viśaśrāma nadītaṭe

//
// atha divyodyānasthapadmāvatīsakhīḥ prati bakulamālikoktiḥ // //
tatrāgatā rājagṛhādyoṣito devasaṃnidhau //
sakhīḥ padmālayāyāstā dṛṣṭvā bakulamālikā

gatvā samīpe tāsāṃ sā kiṃvadantīṃ sma pṛcchati

// bakulamālikovāca // //
kā yūyaṃ yoṣito brūta vicitrābharaṇasrajaḥ //
kutaḥ samāgatā hyatra kiṃ kāryaṃ vo'malānanāḥ

tāstu tasyā vacaḥ śrutvā smitapūrvamathābruvan //
śṛṇuṣvāvahitā devi vayaṃ vakṣyāmahe'dhunā

//
iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīveṃkaṭācalamāhātmye dharaṇīvarāhasaṃvāde padmāvatīdarśanena śrīnivāsasyamohaprāptyādivarṇanaṃnāma pañcamo'dhyāyaḥ