Skanda Purana · Verses 2.5-3

// jaimini ruvāca // //
nirviṇṇacetasau tau tu tyaktvā veśyādisaṃgatim //
dhyāyaṃtau manasā viṣṇuṃ śuddhāhāravratāvubhau

kālena kiyatā prāptau nīlādrinilayaṃ hareḥ //
tīrtharājajale snātvā yathāvadvidhicoditam

prāsādadvāri tiṣṭhaṃtau sāṣṭāṃgaṃ praṇipatya ca //
bhagavaṃtaṃ nirīkṣaṃtau nāpaśyatāṃ tadā dvijā

vivarṇavadanau devamadṛṣṭvā ciṃtayākulau //
ārabhete hyanaśanaṃ bhagavaddarśanāvadhi

kīrtayaṃte bhagavato nāma kalmaṣanāśanam //
tṛtīyasyāṃ triyāmāyāṃ jyotirekamapaśyatām

trīṇyahāni punastau ca tadopāvasatāṃ sthirau //
madhye saptamarātrestu bhagavaṃtamapaśyatām

tridaśānāṃ stutīḥ śrutvā divyajñānau babhūvatuḥ //
apāstapāpanirmokau sākṣāddevamapaśyatām

śaṃkhacakragadāpāṇi divyālaṃkārabhūṣitam //
ratnapādukayoḥ pṛṣṭhe vinyastacaraṇāṃbujam

vyākośapuṃḍarīkākṣaṃ prasannavadanaṃ vibhum //
vāmapārśve sthitāṃ lakṣmīṃ vāmenāliṃgya bāhunā

nāgavallīdalaṃ baddhamādadānaṃ śriyā hṛtam //
ratnavetrakarāḥ kāścitkāściccāmarapāṇayaḥ

gaṃdhatailapradīpāstu ratnavartipradīpikāḥ //
kāściddadhānāḥ svakarairyovanāḍhyāḥ subhūṣitāḥ

paścādratnamayaṃ chatraṃ bibhratī kācidujjvalā//
dhūpapātraṃ mukhābhyāśe kṛṣṇāgurusudhūpitam

kāciddadhānā pramlocāṃ hasaṃtī vigrahaśriyā //
līlālakadṛśā devānanugṛhṇaṃtamagrataḥ

baddhāṃjalipuṭānnamrakandharānstuvataḥ pṛthak //
siddhānmunigaṇāndivyānsanakādīnsmitena ca

nāradādīṃśca gaṃdharvāndivyagānamanoharān //
dattāvadhānaṃ śravaṇe līlayaivānukampinam

prahlādādīnvaiṣṇavāgryānsvarūpaṃ dhyāyato'grataḥ //
cittākarṣaṇasaṃlīnāṃ vidadhānaṃ svavigrahe

vakṣaḥsthalapravilasatkaustubhapratibiṃbitaiḥ //
devādibhirviśvarūpamūrtteḥ svasyāḥ prakāśakam

uparyupari divyāyāḥ puṣpavṛṣṭeradhaḥ sthitam //
śrīsannidhānavigataśriyamapsarasāṃ gaṇam //

paśyaṃtaṃ vividhaṃ nityamaṅgahāramanoharam //
divyalīlāvilāsaṃ taṃ dṛṣṭvā tau dvijabāhujau

babhūvatuḥ kṣaṇātsarvavidyānāṃ pāragau dvijāḥ //
triḥ parikramya deveśaṃ kṛtāṃjalipuṭāvubhau //
sāṣṭāṃgapātapraṇatau tuṣṭuvāte mudānvitau

// puṇḍarīka uvāca // //
namaste jagadādhāra sargasthityaṃtakāraṇa //
nārāyaṇa namaste'stu paramātmanparāyaṇa

paramārthastvamevaiko bhavāpyayavivarjitaḥ //
nityānandasvarūpaṃ tvāṃ vidanti dhyānacakṣuṣaḥ

cinmātraṃ jagatāmīśamadhiṣṭhānaṃ parātparam //
kathaṃ nu mūḍhahṛdayāstvāṃ jānaṃti sunirmalam

kāmārthalipsāsaṃbhrātacetaso'tyaṃtaduḥkhinaḥ //
gatāgatapathe śrāṃtāḥ sukhabhājaḥ kadācana

anukaṃpaya māṃ nātha sudīnaṃ śaraṇāgatam //
mūḍhaṃ duṣkṛtakarmāṇaṃ patitaṃ bhavasāgare

ko'nyastvatsadṛśo bandhurbrahmāṃḍe nātha varttate //
svakarttavyānapekṣo yo dīnānāthadayālukaḥ

uccāvacabhramādduḥkhaṃ jalayaṃtraghaṭīmiva //
ajasramadhikarttāraṃ paritrāhi kṛpāṃbudhe

yogakṣemābhisaṃdhānā ye mūḍhāstvāmupāsate //
līlāvimuktidaṃ te vai tvanmāyāparimohitāḥ // २८ /
nārāyaṇeti tvannāma kīrtitaṃ tu yadṛcchayā //
tvatto'dhikaṃ jagannātha caturvargaikasādhanam / २९ //
tvaṃ tu taistaiḥ pṛthagyajñaistāstāḥ siddhīḥ prayacchasi //
tvamekaḥ śaraṇaṃ nātha patitānāṃ bhavārṇave

jñānanaukāsamārūḍhaḥ karuṇākṣepaṇīkaraḥ //
paraṃ pāraṃ prabho netuṃ saṃsārābdhervicetanam

tvameka īśiṣe bhaktyānanyayā pariciṃtitaḥ //
ye'nye muktipradā devāḥ śāstreṣu pariniṣṭhitāḥ

duḥkhābdhikumbhayoniṃ te tvadbhaktiṃ prāpayaṃti vai

tanme prasīda bhagavanpadapaṃkaje te bhaktiṃ dṛḍhāṃ vitara nātha bhavābdhimuccaiḥ //
ghoraṃ sudustaramamuṃ hi yayā tareyamaṣṭāṃgayogajanitaśramavarjito'pi

dharmārthakāmanicayaiḥ kumatipragṛhyaiḥ kṣudrairamībhirahitālpasukhairna kāryam /
ājñāpayāṃghrinalinadvayaciṃtanedya sāṃdrānuvardhitasukhārṇavamajjanaṃ me

stutvetthaṃ jagadīśasya pādapadmāṃtike dvijaḥ //
papāta trāhi kṛṣṇeti vadanvāṣpārdrayā girā //
tasthau sa punarutthāya kṛtāṃjalipuṭaḥ stuvan

// ambarīṣa uvāca // //
prasīda deva sarvātmannasaṃkhyeyaśirobhuja //
asaṃkhya ghrāṇanayanapāṇipāda namo'stu te

ṣaṭtriṃśattattvātīto'si niṣprapaṃca prapaṃcakaḥ //
caturvidhajagaddhāma viśvamūrte namo'stu te

ekapādastripādaśca tīrthapādoṃ'tarikṣapāt //
yasya pādodbhavā gaṃgā punāti bhuvanatrayam

brahmahatyādipāpānāṃ śodhakaṃ yasya nāma vai //
kīrtitaṃ sarvaśubhadaṃ namastasmai śubhātmane

deva tvannāmakīrtyāpi jāyaṃte sarvasiddhayaḥ//
kautukāttvāṃ hi mṛgyaṃti vidvāṃso buddhiśālinaḥ

nātha tvatpādasalilaṃ saṃśrayāttāpahārakam//
tāpatrayābhibhūtasya bhaktiṃ me'tra dṛḍhāṃ kuru

ananyasvāmino me'dya nāstyanyatprārthanīyakam//
praṇipatya jagannātha tvāṃ prayāce sahasradhā

samastapuruṣārthasya bījaṃ tvatpādapaṃkaje //
yāvatprāṇāndhārayāmi tāvadbhaktirdṛḍhāstu me

sṛṣṭiṃ vinirmame cemāṃ yayā bhaktyā pitāmahaḥ //
saṃharatyakhilaṃ rudro lakṣmīścaiśvaryadāyinī

dīnānukaṃpiṃstāṃ bhaktiṃ prārthaye nānyamānasaḥ //
anādya vidyāpaṃkesminsudṛḍhe dustaraṃ bhṛśam

nimagnasya jagannātha nirālaṃbaṃ praṇaśyataḥ //
mahāmahimnastvadbhakternānyadasti parāyaṇam

śrutismṛtyādisaṃbhinnamārgāḥ saṃmohahetavaḥ //
tvadbhaktimapahāryete na pravarttitumīśvarāḥ

ananyaśaraṇaṃ svāminnanukampaya māṃ vibho //
iti stuvañjagannāthapādapadmāṃtike mudā

papāta daṇḍavadbhūmau prasīdeti vadanmuhuḥ //
tataste devatāḥ sarve stutvā saṃpūjya keśavam

tallīlāpāṃgasaṃtuṣṭāḥ prayātāstridivaṃ punaḥ //
tata unmīlitadṛśau puṇḍarīkāṃbarīṣakau

māyayā mohitau viṣṇoḥ svapnadṛṣṭamabudhyatām //
yāṃ dṛṣṭvā divyalīlāṃ hi sākṣātpalalacakṣuṣā

punarmānuṣabhāvau tau divyasiṃhāsanasthitam //
nīlajīmūtasaṃkāśaṃ phullapadmāyatekṣaṇam

śoṇādharaṃ cārunāsaṃ divyakuṇḍalabhūṣitam //
śaṃkhacakragadāpadmadhāriṇaṃ vanamālinam

pīnoraskaṃ cāruhāramanarghyamukuṭojjvalam //
śrīvatsakaustubhoraskaṃ divyāṃgadavibhūṣitam

pralaṃbabāhuṃ dīnārtaparitrāṇasamudyatam //
suvarṇasūtrasaṃnaddha madhyagraṃthimaṇīyutam

divya pītāṃbaradharaṃ divyasraggandhabhūṣitam //
svarṇapadmāsanāsīnaṃ sarvāṃgāliṃgitaśriyam

prapannasaṃtāpaharaṃ sudhāsāgaramulbaṇam //
aśeṣavāṃchāphaladaṃ kalpavṛkṣaṃ supuṣpitam

dakṣapārśvasthitaṃ tasya dadṛśāte halāyudham //
bibhartti yena brahmāṃḍaṃ balena mahatā vibhuḥ

/
taṃ balaṃ nāgarājānaṃ phaṇāsaptakamaṃḍitam //
kailāsaśikharottuṃga dhavalaṃ kuṇḍalojjvalam

vicitravanamālāḍhyaṃ divyanīlanicolinam //
satataṃ vāruṇīkṣība ghūrṇonnayanapaṃkajam

nimnapṛṣṭhonnatoraskaṃ kuṇḍalīkṛtavigraham //
śaṃkhacakragadāpadmasamujjvalacaturbhujam

nānālaṃkāraruciraṃ natakalmaṣanāśanam //
tayormadhye sthitāṃ bhadrāṃ subhadrāṃ kuṃkumāruṇām

sarvalāvaṇyavasatiṃ sarvadeva namaskṛtām //
lakṣmīṃ lakṣmīśahṛdayapaṃkajasthāṃ pṛthaksthitām

varābjadhāriṇīṃ devīṃ divyanepathyabhūṣaṇām //
prapannakalpalatikāṃ sarvakalmaṣanāśinīn

saṃsārārṇavamagnānāṃ tāriṇīṃ devatāraṇīm //
vāmapārśvasthitaṃ viṣṇoradrāṣṭāṃ cakramuttamam

dārvagranirmitaṃ viprāḥ svarṇabhaktisamujjvalam //
caturddhāvasthitaṃ viṣṇuṃ dṛṣṭvā tau dvijabāhujau

aruṇodayavelāyāṃ śramaṃ sārthamamanyatām //
saṃsmṛtya tāṃ svapnalīlāṃ vismayaṃ jagmatustadā

na dārupratimā ceyaṃ sākṣādbrahma prakāśate //
sadogatānāṃ viprāṇāṃ vākyaṃ śraddadhatuśca tau

kvāvāṃ mahāpātakinau yātanākramabhāginau //
kvedaṃ surasamākrāṃtasthitaṃ viṣṇoḥ pradarśanam

mūrkhayorāvayoraṣṭādaśavidyāpravīṇatā //
yasmāttasmānna ca bhrāṃtirjñānaṃ tatsamavādinaḥ

yadūcurdāravaṃ brahma tīrtharājataṭe sthitam //
vaṭamūle prakāśaṃtaṃ dṛṣṭvā jaṃturvimucyate

tadevāyaṃ jagannāthaścaturddhā saṃvyavasthitaḥ//
kṣitau yadāvatarati catūrūpaḥ prakāśate

tadāsya saṃnidhāvāvāṃ sthāsyāvaḥ prāṇadhāriṇau//
yāvannānyatra gacchāvaḥ kṣudrakāmaparāṅmukhau

iti niścitya munayo viṣṇau bhaktiparāyaṇau //
nārāyaṇākhyaṃ satataṃ japantau muktimāgatau //

// jaiminiruvāca // //
prasaṃgātkathitaṃ hyetadrahasyaṃ pāpanāśanam //
śṛṇvaṃti ye tu caritaṃ puṇḍarīkāṃbarīṣayoḥ

satataṃ c kīrtayaṃtaśca mudā paramaya yutāḥ //
vrajaṃti viṣṇunilayaṃ mudā paramayā yutāḥ //
vrajaṃti viṣṇunilayaṃ te'pi nirddhūtakalmaṣāḥ

iti śrīskāṃde mahāpurāṇa ekāśītisāhasryā saṃhitāyāṃ dvitīye vaiṣṇavakhaṇḍe puruṣottamakṣetramāhātmye jaiminiṛṣisaṃvāde pañcamo'dhyāyaḥ