Skanda Purana · Verses 2.4-6

// brahmovāca // //
taptacakāṃkitaṃ kṛtvā hyātmānamatha dīkṣitam //
padmākṣatulasīmālaṃ kiṃ phalaṃ brūhi keśava

// śrībhagavānuvāca // //
tulasīkāṣṭhasaṃbhūtāṃ yo mālāṃ vahate dvijaḥ //
apya'śauco'pyanācāro māmevaiti na saṃśayaḥ

dhātrīphalakṛtā mālā tulasīkāṣṭhasaṃbhavā //
dṛśyate yasya dehe tu sa vai bhāgavato naraḥ

tulasīdalajāṃ mālāṃ kaṇṭhasthāṃ vahate tu yaḥ //
mamottīrṇāṃ viśeṣeṇa sa namasyo divaukasām

tulasīdalajāṃ mālāṃ dhātrīphalakṛtāmapi //
dadāti pāpināṃ muktiṃ kiṃ punarmama sevinām

tulasīdalajāṃ mālāṃ mamottīrṇāṃ vahettu yaḥ //
patrepatre'śvamedhānāṃ daśānāṃ labhate phalam

tulasīkāṣṭhasaṃbhūtāṃ yo mālāṃ vahate naraḥ//
phalaṃ yacchāmyahaṃ vatsa pratyahaṃ dvārakodbhavam

nivedya bhaktyā māṃ mālāṃ tulasīkāṣṭhasaṃbhavām //
vahate yo naro bhaktyā tasya vai nāsti pātakam

sadā prītamanāstasya ahaṃ prāṇavaro hi saḥ //
tulasīkāṣṭhasaṃbhūtāṃ yo mālāṃ vahate naraḥ //
prāyaścittaṃ na tasyā'sti nā'śaucaṃ tasya vigrahe

tulasīkāṣṭhasaṃbhūtaṃ śirasaḥ kāṣṭhabhūṣaṇam //
bāhau kare ca martyasya dehe yasya sa me priyaḥ

tulasīkāṣṭhamālābhirbhūṣitaḥ puṇyamācaret //
pitṝṇāṃ devatānāṃ ca puṇyaṃ koṭiguṇaṃ bhavet

tulasīkāṣṭhamālāṃ tu pretarājasya dūtakāḥ //
dṛṣṭvā naśyaṃti dūreṇa vātoddhūtaṃ yathā dalam

yadgṛhe tulasīkāṣṭhaṃ patraṃ śuṣkamathā''rdrakam //
bhavaṃti tadgṛhe naiva pāpaṃ saṃkramate kalau

tulasī kāṣṭhamālābhirbhūṣito rbhramate bhuvi //
duḥsvapnaṃ durnimittaṃ ca na bhayaṃ śātravaṃ kvacit

dhārayaṃti na ye mālāṃ haitukāḥ pāpabuddhayaḥ //
narakānna nivartaṃte dagdhāḥ kopāgninā mama

tasmāddhāryā prayatnena mālā tulasisaṃbhavā //
padmākṣanirmitā bhaktyā phalairdhātryā supuṇyadā

tadūrdhvapuṃḍraśaṃkhādyairyuktastulasimūlake //
sandhyopāstyādikaṃ kuryātkuśapāṇirhiṃ māṃ smaran

kṛtasandhyādiko bhaktastataḥ saṃpūjayecca mām //
guruścettatra varteta ādau gatvā namedgurum

kiṃciddattvopāyanaṃ ca daṇḍavatpraṇamenmudā //
ācamyaikāgramanasā pūjāmaṇḍapamāviśet

upaviśyā''sane ramye kṛṣṇājinakuśottare //
samyakpadmāsanāsīno bhūtaśuddhiṃ samācaret

prāṇāyāmatrayaṃ kṛtvā mantreṇa ca jiteṃdriyaḥ //
udaṅmukhastataḥ kṛtvā hṛtpaṃkajamanuttamam//
vikāsaṃ tasya kurvīta vijñānaraviṇā hṛdi

karṇikāyāṃ nyaseccārkaṃ śaśinaṃ cāgnimeva ca //
trayaṃ trayātmake tasmiściṃtayedvaiṣṇavo naraḥ //
nānāratnamayaṃ pīṭhaṃ teṣāmupari vinyaset

tasminmṛduślakṣṇataraṃ bālārkasadṛśadyuti //
aṣṭaiśvaryadalaṃ padmaṃ mantrākṣaramayaṃ nyaset

tasmindevaṃ samāsīnaṃ koṭiśītāṃśusannibham //
caturbhujaṃ mahāpadmaśaṃkhacakragadādharam

padmapatraviśālākṣaṃ sarvalakṣaṇalakṣitam //
śrīvatsakaustubhoraskaṃ pītavastrānvitaṃ ca mām

vicitrābharaṇairyuktaṃ divyamaṃḍanamaṃḍitam //
divyacandanaliptāṃgaṃ divyapuṣpopaśobhitam

tulasīkomaladalavanamālāvibhūṣitam //
koṭibālārkasadṛśaṃ kāntaṃ divyaśriyā saha

sarvalakṣaṇalakṣiṇyā samāśliṣṭatanuṃ śivam //
evaṃ dhyātvā japenmaṃtraṃ samāhitamanāḥ śuciḥ

sahasraṃ śatavāraṃ vā yathāśakti japenmanum //
manasaivā'rcanaṃ kṛtvā tato vidhivadācaret

saṃpradāyā'nurodhena śaṃkhaṃ sthāpya mamāgrataḥ //
dūrvāṃkuraiśca puṣpaiśca gaṃdhodena ca pūritam

dakṣiṇe gaṃdhapuṣpāṇāṃ pātraṃ sthāpya ca deśikaiḥ //
vāmabhāge nyasetkuṃbhaṃ vastrapūtaṃ suvāsitam

purato mama ghaṃṭāṃ ca dikṣu dīpānniyojayet //
anyatsarvaṃ sādhanaṃ ca yathāsthāneṣu vinyaset

arghyapādyā''camanīyamadhuparkasya kāraṇāt //
vinyasetpurato mahyaṃ catvāryamatrakāṇi vai

siddhārthā'kṣatapuṣpāṇi kuśāgraṃ tilacaṃdanam //
phalaṃ yavāścaturvaktra arghyapātre viniḥkṣipet

dūrvā viṣṇupadī śyāmā padmaṃ caiva caturthakam //
pādyapātre nyasetputra deśiko mama tuṣṭaye

kaṃkolaṃ ca lavaṃgaṃ ca phalaṃ mālatisaṃbhavam //
kuryādvai śraddhayā putra pātra ācamanīyake

gavyaṃ payo dadhi madhu ghṛtaṃ khaṃḍa samanvitam //
madhuparkasya pātre vai dadyādvai śraddhayā'rcakaḥ

uktānāṃ dravyajātīnāmalābhe patrapuṣpayoḥ //
tattadbhāvanayā kuryātsarvadā vidhikovidaḥ

karanyāsaṃ tataḥ kuryādaṃganyāsaṃ tathaiva ca //
paṃcāṃgaṃ vā ṣaḍaṃgaṃ vā vinyasetsaṃpradāyataḥ

mamā'nusmaraṇaṃ kāryamātmānaṃ matsamaṃ smaret //
pūjāraṃbhe caturvaktraṃ maṃgalaṃ tu paṭhennaraḥ

atha saṃpūjayecchaṃkhaṃ pāṃcajanyaṃ mama priyam //
yasya saṃpūjanādvatsa ānaṃdaḥ paramo mama //
śaṃkhasya pūjane vatsa maṃtrānetānudīrayet

tvaṃ purā sāgarotpanno viṣṇunā vidhṛtaḥ kare //
nirmitaḥ sarvadevaiśca pāṃcajanya namo'stu te

tava nādena jīmūtā vitrasaṃti surā'surāḥ //
śaśāṃkā'yutadīptābha pāṃcajanya namo'stu te

garbhā devārinārīṇāṃ vilīyaṃte sahasradhā //
tava nādena pātāle pāṃcajanya namo'stu te

darśanenaiva śaṃkhasya kiṃ punaḥ sparśane kṛte //
vilayaṃ yāṃti pāpāni himavadbhāskarodaye

natvā śaṃkhaṃ kare dhṛtvā maṃtrairebhistu vaiṣṇavaḥ //
yaḥ snāpayati māṃ bhaktyā tasya puṇyamanaṃtakam

suvāsitena tailena kuryādabhyaṃjanaṃ tataḥ //
kastūryā caṃdanenaiva kuryādudvartanādikam

sugaṃdhavāsitaistoyaiḥ snāpya maṃtrayutaiḥ śubhaiḥ //
arghyaṃ dattvā tato vatsa pādyamācamanīyakam //
madhuparkaṃ tato dadyādatha sarvopacārakān

vastrairābharaṇairdivyairalaṃkṛtya yathāvidhi //
puṣpaiḥ saṃpūjayetpīṭhaṃ tatra devaṃ nidhāya ca

vastrā'laṃkāragaṃdhādīnarpayecchraddhayā mama //
naivedyaṃ vividhaṃ dadyātpāyasā'pūpamiśritam //
sakarpūraṃ ca tāṃbūlaṃ bhaktyā caiva nivedayet

surabhīṇi ca puṣpāṇi bhaktyā samyaṅnivedayet//
dhūpaṃ daśāṃgamaṣṭāṃgaṃ dīpaṃ ca sumanoharam

pariṇīya praṇamyātha stutvā stutibhirādarāt //
śāyayitvā tu paryaṃke magalārghyaṃ nivedayet

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe brahmaviṣṇusaṃvāde mārgaśīrṣamāhātmye śaṃkhapūjāvidhikathanaṃnāma caturtho'dhyāyaḥ