Skanda Purana · Verses 2.4-5

// śrīṛṣaya ūcuḥ // //
sādhu sūta ciraṃ jīva ciramevaṃ praśādhi naḥ //
śrībhāgavatamāhātmyamapūrvaṃ tvansukhācchrutam

tatsvarūpapramāṇaṃ ca vidhiṃ ca śravaṇe vada //
tadvakturlakṣaṇaṃ sūta śrotuścāpi vadādhunā

// śrīsūta uvāca // //
śrīmadbhāgavatasyātha śrīmadbhagavataḥ sadā //
svarūpamekamevāsti saccidānandalakṣaṇam

śrīkṛṣṇāsaktabhaktānāṃ tanmādhuryyaprakāśakam //
samujjṛmbhati yadvākyaṃ viddhi bhāgavataṃ hi tat

jñānavijñānabhaktyaṅgacatuṣṭayaparaṃ vacaḥ //
māyāmardana dakṣaṃ ca viddhi bhāgavataṃ ca tat

pramāṇaṃ tasya ko veda hyanaṃtasyākṣarātmanaḥ //
brahmaṇe hariṇā taddikcatuḥślokyā pradarśitā

tadānaṃtyāvagāhena svepsitāvahanakṣamāḥ //
ta eva saṃti bho viprā brahmaviṣṇuśivādayaḥ

mitabuddhyādivṛttīnāṃ manuṣyāṇāṃ hitāya ca //
parīkṣicchukasaṃvādo yo'sau vyāsena kīrtitaḥ

grantho'ṣṭādaśasāhasro yo'sau bhāgavatābhidhaḥ //
kaligrāhagṛhītānāṃ sa eva paramāśrayaḥ

śrotāro 'tha nirūpyante śrīmadviṣṇukathāśrayāḥ //
pravarā avarāścati śrotāro dvividhā matāḥ

pravarāścātako haṃsaḥ śuko mīnādayastathā //
avarā vṛkabhūruṇḍavṛṣoṣṭrādyāḥ prakīrtitāḥ

akhilopekṣayā yastu kṛṣṇaśāstraśrutau vratī //
sa cātako yathāmbhodamukte pāthasi cātakaḥ

haṃsaḥ syātsāramādatte yaḥ śrotā vividhācchrutāt //
dugdhenaikyaṃ gatāttoyādyathā haṃso'malaṃ payaḥ

śukaḥ suṣṭu mitaṃ vakti vyāsaṃ śrotṛṃśca harṣayan //
supāṭhitaḥ śuko yadvacchikṣakaṃ pārśvagānapi

śabdaṃ nānimiṣo jātu karotyāsvādayanrasam //
śrotā snigdho bhavenmīno mīnaḥ kṣīranidhau yathā

yastudanrasikāñcchrotṝnvirautyajño vṛko hi saḥ //
veṇusvanarasāsaktānvṛko'raṇye mṛgānyathā

bhūruṇḍaḥ śikṣayedanyāñcchrutvā na svayamācaret //
yathā himavataḥ śṛṃge bhūruṇḍākhyo vihaṃgamaḥ

(bhāruṇḍa)
sarvaṃ śrutamupādatte sārāsārāndhadhīrvṛṣaḥ //
svādu drākṣāṃ khaliṃ cāpi nirviśeṣaṃ yathā vṛṣaḥ

sa uṣṭro madhuraṃ muñcanviparīte rameta yaḥ //
yathā nimbaṃ caratyuṣṭro hitvā''mramapi tadyutam

anye'pi bahavo bhedā dvayorbhṛṃgakharādayaḥ //
vijñeyāstattadācāraistattatprakṛtisaṃbhavaiḥ

yaḥ sthitvā'bhimukhaṃ praṇamya vidhivattyaktānyavādo harerlīlāḥ śrotumabhīpsate'tinipuṇo namro 'tha klṛptāñjaliḥ //
śiṣyo viśvasito'nucintanaparaḥ praśne'nuraktaḥ śucirnityaṃ kṛṣṇajanapriyo nigaditaḥ śrotā sa vai vaktṛbhiḥ

bhagavanmatiranapekṣaḥ suhṛdo dīneṣu sānukampo yaḥ //
bahudhābodhanacaturo vaktā saṃmānito munibhiḥ

atha bhāratabhūsthāne śrībhāgavatasevane //
vidhiṃ śṛṇuta bho viprā yena syātsukhasaṃtatiḥ

rājasaṃ sāttvikaṃ cāpi tāmasaṃ nirguṇaṃ tathā //
caturvidhaṃ tu vijñeyaṃ śrībhāgavata sevanam

saptāhaṃ yajñavadyattu saśramaṃ satvaraṃ mudā //
sevitaṃ rājasaṃ tattu bahupūjādiśobhanam

māsena ṛtunā vāpi śravaṇaṃ svādasaṃyutam//
sāttvikaṃ yadanāyāsaṃ samastānandavarddhanam

tāmasaṃ yattu varṣeṇa sālasaṃ śraddhayā'yutam //
vismṛtismṛtisaṃyuktaṃ sevanaṃ tacca saukhyadam

varṣamāsadinānāṃ tu vimucya niyamāgraham //
sarvadā premabhaktyaiva sevanaṃ nirguṇaṃ matam

pārīkṣite'pi saṃvāde nirguṇaṃ tatprakīrtitam//
tatra saptadinākhyānaṃ tadāyurdinasaṃkhyayā

anyatra triguṇaṃ cāpi nirguṇaṃ ca yathecchayā //
yathā kathaṃcitkartavyaṃ sevanaṃ bhagavacchruteḥ

ye śrīkṛṣṇavihāraikabhajanāsvādalolupāḥ //
muktāvapi nirākāṃkṣāsteṣāṃ bhāgavataṃ dhanam

ye'pi saṃsārasaṃtāpanirviṇṇā mokṣakāṃkṣiṇaḥ //
teṣāṃ bhavauṣadhaṃ caitatkalau sevyaṃ prayatnataḥ

ye cāpi viṣayārāmāḥ sāṃsārikasukhaspṛhāḥ //
teṣāṃ tu karmamārgeṇa yā siddhiḥ sā'dhunā kalau //

sāmarthyadhanavijñānābhāvādatyantadurllabhā //
tasmāttairapi saṃsevyā śrīmadbhāgavatī kathā

dhanaṃ putrāṃstathā dārānvāhanādi yaśo gṛhān //
asāpatnyaṃ ca rājyaṃ ca dadyādbhāgavatī kathā

iha loke varānbhuktvā bhogānvai manasepsitān //
śrībhāgavatasaṃgena yātyante śrīhareḥ padam

yatra bhāgavatī vārtā ye ca tacchravaṇe ratāḥ //
teṣāṃ saṃsevanaṃ kuryāddehena ca dhanena ca

tadanugrahato'syāpi śrībhāgavatasevanam //
śrīkṛṣṇavyatiriktaṃ yattatsarvaṃ dhanasaṃjñitam

kṛṣṇārthīti dhanārthīti śrotā vaktā dvidhā mataḥ //
yathā vaktā tathā śrotā tatra saukhyaṃ vivarddhate

ubhayorvaiparītye tu rasābhāse phalacyutiḥ//
kintu kṛṣṇārthināṃ siddhirvilambenāpi jāyate

dhanārthinastu saṃsiddhirvidhisaṃpūrṇatāvaśāt //
kṛṣṇārthino'guṇasyāpi premaiva vidhiruttamaḥ

āsamāpti sakāmena kartavyo hi vidhiḥ svayam //
snāto nitya kriyāṃ kṛtvā prāśya pādodakaṃ hareḥ

pustakaṃ ca guruṃ caiva pūjayitvopacārataḥ //
brūyādvā śṛṇuyādvāpi śrīmadbhāgavataṃ mudā

payasā vā haviṣyeṇa maunaṃ bhojanamācaret //
brahmacaryyamadhaḥsuptiṃ krodhalobhādivarjjanam

kathānte kīrtanaṃ nityaṃ samāptau jāgaraṃ caret //
brāhmaṇānbhojayitvā tu dakṣiṇābhiḥ pratoṣayet

gurave vastrabhūṣādi dattvā gāṃ ca samarpayet //
evaṃ kṛte vidhāne tu labhate vāñchitaṃ phalam

dārāgārasutānrājyaṃ dhanādi ca yadīpsitam //
parantu śobhate nātra sakāmatvaṃ viḍambanam

kṛṣṇaprāptikaraṃ śaśvatpremānandaphalapradam //
śrīmadbhāgavataṃ śāstraṃ kalau kīreṇa bhāṣitam

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīmadbhāgavatamāhātmye caturtho'dhyāyaḥ

iti śrīskānde mahāpurāṇe dvitīye vaiṣṇavakhaṇḍe śrībhāgavatamahāpurāṇamāhātmyaṃ samāptam // २-६//