Skanda Purana · Verses 2.30-2

// munaya ūcuḥ // //
cakāra kena vidhinā janmasnānaṃ śriyaḥ pateḥ //
anyānapyutsavānsarvānvidhivadbrūhi no mune

nāradena purā proktaṃ sarvaṃ te munisattama //
sa hi veda tamaḥpāre brahma brahmasuto muniḥ

tatsarvaṃ brūhi tattvena mune krautūhalaṃ hi naḥ //
aho bhāgyaṃ narapateriṃdradyumnasya bho mune

tasya tāvati karmāṃte atyadbhutamidaṃ mahat //
na śrutā hi na dṛṣṭā hi pratimā dārunirmitā

sajīvatanuvatsākṣādvāraṃ dadyānmanuṣyavat //
smāraṃsmāraṃ bhagavataścaritaṃ pāpanāśanam

caritaṃ tasya nṛpaterdurlabhaṃ martyavāsinām //
na santoṣo'sti bhagavañśṛṇvatāṃ no mahāmune

tadvadānukrameṇāsmānyātrāḥ sarvāghanāśanāḥ //
yāsāṃ saṃdarśanādvāso vaikuṇṭha iti niścitam

yātrāmāhātmyavaktāsau yatsākṣānmadhusūdanaḥ //
tanno vada mahābhāga jagatāṃ hitakāmyayā

//
// jaiminiruvāca // //
jyeṣṭhasnānaṃ pravakṣyāmi śṛṇudhvaṃ munayo'dhunā //
jyeṣṭhaśukladaśamyāṃ tu vrataṃ saṃkalpya vāgyataḥ

prātarutthāya kurvīta paṃcatīrthavidhānataḥ //
mārkaṃḍeya vaṭaṃ gatvā ācamya prayataḥ pumān

prārthayecchaṃkaraṃ natvā kṛtāṃjalipuṭo'grataḥ

atitīkṣṇa mahākāya kalpāṃtadahanopama //
bhairavāya namastubhyamanujñāṃ dātumarhasi

tataḥ praviśya tīrthaṃ tu vaidikaiḥ paṃca vāruṇaiḥ //
aghamarṣaṇasūktena trirāvṛttena vā dvijāḥ //
snātvā yathāvatsnāyīta mantreṇānena cāṃtataḥ

namaḥ śivāya śāṃtāya sarvapāpaharāya ca //
snānaṃ karomi deveśa mama naśyatu pātakam

saṃsārasāgare magnaṃ pāpagrastamacetanam //
trāhi māṃ bhaganetraghna tripurāre namo'stu te

evaṃ snātvā bahirgatvā dhautavāsā sapuṇḍrakaḥ //
devānṛṣīnpitṝṃścaiva tarpayitvā yathāvidhi

praviśya śaṃkarāgāraṃ spṛṣṭvā vṛṣaṇayorvṛṣam //
mantreṇānena bho viprāḥ sarvakratuphalaṃ labhet

dharmaścatuṣpādyajñastvaṃ svarṇaśṛṃgastrayīvapuḥ //
gopate vāharūpastvaṃ śūlinaṃ tvāṃ namāmyaham

aghoramantreṇa tataḥ pūjayedvṛṣavāhanam //
pañcabrahmabhirṛgbhistu saṃspṛśelliṃgamuttamam

aṃguṣṭhena spṛśelligaṃ muṣṭinā śaktimeva ca //
pūjayitvā tu vidhivatstutvā devaṃ puradviṣam

daśānāmaśvamedhānāṃ phalaṃ prāpnotyanuttamam //
mārkaṃḍeyavaṭe snātvā dṛṣṭvā devaṃ tu śaṃkaram

phalaṃ prāpnotyavikalaṃ rājasūyāśvamedhayoḥ //
ante śivasya sālokyaṃ prāpya jñānaṃ tato naraḥ

kramācca labhate muktiṃ jagannāthaprasādataḥ //
tato maunī vrajeddevaṃ nārāyaṇamanāmayam

taddakṣiṇasthitaṃ viṣṇurūpaṃ nyagrodhamuttamam //
darśanādapi pāpānāṃ pāpasaṃhatināśanam

taṃ dṛṣṭvā praṇameddūrādbhāvayanpuruṣottamam //
pradakṣiṇaṃ tataḥ kuryādimaṃ mantramudīrayan

amarastvaṃ sadā kalpa viṣṇorāyatanaṃ mahat //
nyagrodha hara me pāpaṃ viṣṇurūpa namo'stu te

namo'stvavyaktarūpāya mahāpralayasthāyine //
ekāśrayāya jagatāṃ kalpavṛkṣāya te namaḥ

stuvañjapettu tadbhaktyā mūle tasya janārdanam //
koṭijanmaśatodbhūtapāpādeva vimucyate

tacchāyākramaṇenāpi niṣpāpo jāyate naraḥ //
tataḥ suparṇaṃ praṇamedyānarūpaṃ hareḥ puraḥ

sthito bhaktinato viṣṇoḥ kṛtāṃjalipuṭo mudā //
chandomaya jagaddhāmanyānarūpa trivṛdvapuḥ

yajñarūpa jagadvyāpinprīyamāṇāya te namaḥ //
stutvetthaṃ garuḍaṃ pāpānmucyate'nekajanmajāt

vāṅmanaḥkarmaniyato gacchedevaṃ viciṃtayan //
praviśya devatāgāraṃ kṛtvā taṃ triḥ pradakṣiṇam

pūjayenmantrarājena sūktena puruṣasya vā //
dvādaśākṣaramaṃtreṇa yatra vā jāyate ruciḥ

pūjādhikāriṇaḥ sarve brahmakṣatraviśastataḥ //
anyeṣāṃ darśana bhaktyā tayornāmānukīrtanāt

paṃcopacāravidhinā pūjayetparameśvaram //
kṛtāṃjalipuṭo bhūtvā idaṃ stotramudīrayet

devadeva jagannātha saṃsārārṇavatāraka //
bhaktānugrāhaka sadā rakṣa māṃ pādayornatam

jaya kṛṣṇa jagannātha jaya sarvāghanāśana //
jayāśeṣajagadvaṃdya pādāṃbhoja namo'stu te

jaya brahmāṃḍakoṭīśa vedaniḥśvāsavātaka //
aśeṣajagadādhāra paramātmannamo'stu te

jaya brahmeṃdrarudrādi devaughapraṇatārtinut //
jayākhilajagaddhāmannaṃtaryāminnamo'stu te

jaya nirvyājakaruṇāpāthodhe dīnavatsala //
dīnānāthaikaśaraṇa viśvasākṣinnamo'stu te

saṃsārasiṃdhusalile mohāvartte sudustare //
ṣaḍūrmikuladuṣpāre kukarmagrāhadāruṇe

nirāśraye nirālaṃbe niḥsāre duḥkhaphenile //
tava māyāguṇairbaddhamavaśaṃ patitaṃ tataḥ

māṃ samuddhara deveśa kṛpāpāṃgavilokanaiḥ //
tatra magnaṃ suraśreṣṭha suprasādaprakāśaka

eka eva jagannātha bandhustvaṃ bhavabhīruṇām //
bubhukṣā ca pipāsā ca prāṇasya manasaḥ smṛtau

śokamohau śarīrasya jarā mṛtyurvapurbhavaḥ //
tvatsṛṣṭau tādṛśo nāsti yo dīnaparipālakaḥ

avatīrṇosi lokānāmanugrahadhiyā vibho //
pūrṇakāmasya te nātha kimanyatkāraṇaṃ kṣitau

tvatpādapadmamāsādya na ciṃtāsti jagatpate //
yataste caraṇāṃbhojaṃ caturvargekasādhanam

darśanātsarvalokānāṃ sarvavāṃchā phalapradam //
tataḥ sīradhvajaṃ śeṣamantreṇa paripūjayet

dvādaśākṣaramantreṇa nāmnā vā praṇavādinā //
ekāgramānaso bhūtvā praṇipatya prasādayet

jaya rāma sadārāma saccidānadavigraha //
avidyāpaṃkarahita nirmalākṛtaye namaḥ

jayākhilajagadbhāradhāraṇaśramavarjita //
tāpatrayavikarṣāya halaṃ kalayase sadā

prapannadīnatrāṇāya sphuṭanetrasaroruha //
tvameveśa parāśeṣakaluṣakṣālanaprabhuḥ

prasannakaruṇāsiṃdho dīnabandho namo'stu te //
carācarāphaṇāgreṇa dhṛtā yena vasundharā

māmuddharāsmādduṣpārādbhavāṃbhodherapārataḥ //
parāparāṇāṃ paramaparameśa namo'stu te

stutvaivaṃ nāgarājānaṃ balaṃ musaladhāriṇam //
pūjayejjagatāmādikāraṇāṃ bhadralocanām

stutvā jayāṃ tāṃ bho viprāḥ praṇipatya prasādayet //
jaya devi mahādevi prasīda bhavatāriṇi

sukhāraṇi śritavatāṃ jaya saṃtuṣṭikāriṇi//
kāryaṃ kāryasvarūpāṇāṃ kāraṇānāṃ ca kāraṇam

dhāraṇāṃ dhāryamāṇānāṃ tvāmādiṃ praṇamāmyaham //
vakṣaḥsthalasthitāṃ viṣṇoḥ śaṃbhorarddhāṃgadhāriṇīm

padmayoni mukhābjasthāṃ praṇamāmi jagatpriyām //
sṛṣṭisthitivināśādikarmaṇāṃ paramātmanaḥ

tvamekā śaktiratulā tvāṃ vinā so'pi neśvaraḥ //
tvāṃ sarvalokajananīṃ viṣṇumāyāṃ tapasvinīm

subhadrāṃ bhadrarūpāṃ tāṃ mūlabhūtāṃ namāmyaham //
tataḥ sāgarasnānāya prārthayetpuruṣottamam

namaste bhagavanviṣṇo jagadvyāpiṃścarācara //
nirvighnaṃ siddhimāyātu siṃdhusnānaṃ mama prabho

namaste jagatāmīśa śaṃkhacakragadādhara //
dehi deva mamānujñāṃ tava tīrthaniṣevaṇāt

tato maunaṃ vrajedviṣṇuṃ ciṃtayansaritāṃ patim //
ugrasenaṃ sthitaṃ mārge anujñāpya samāhitaḥ

ugrasena mahābāho valavannugravikrama //
labdhvā varaṃ suprasannātsamudrataṭamāsthitaḥ

tīrtharājakṛtasnānasusaṃpūrṇaphalaprada //
siṃdhusnānaṃ kariṣyāmi anujñāṃ dātumarhasi

tato gaccheddvijaśreṣṭhāḥ svargadvāraṃ tataḥ param //
yena devāḥ samāyāṃti kṣetre'sminpuruṣottame

bhūsvarge jagadīśasya darśanāya dinedine //
svargāvatāramārgeṇa tatrasthau vāṃ namāmyaham

māmapyūrdhvaṃ nayetāṃ vai sākṣiṇau karmaṇāṃ satām //
sāgarāṃbhaḥ samutpannau śreṣṭhau sarvaguṇānvitau

madhyena yuvayoryāmi svargadvāramapāvṛtam //
prārthayitvā tato gacchettīrtharājasya saṃnidhim

yaṃ dṛṣṭvā dūrataḥ pāpānmucyate mahato dhuvam //
prakṣālitakarāṃghrika ācāṃtaḥ śuciviṣṭare

āsīnaḥ prāṅmukhobhūtvā likhenmaṃḍalamagrataḥ //
caturasraṃ caturdvāraṃ catuḥsvastikakoṇakam

tanmadhye vilikhetpadmamaṣṭapatraṃ suśobhanam//
tato'ṣṭākṣaramaṃtraṃ tu karayośca tanau nyaset

ṣaḍbhirvarṇaiḥ ṣaḍaṃgānāṃ nyāsaḥ prokto manīṣibhiḥ//
śeṣau kukṣau ca pṛṣṭhe ca nyastavyau ca tataḥ punaḥ

pādayorjaṃghayorūrvoḥ sphicośca pārśvayoḥ punaḥ //
nābhau pṛṣṭhe bāhuyugme hṛdi kaṇṭhe ca kakṣayoḥ

oṣṭhayoḥ karṇayorakṣṇorgaṃḍayornāsayostathā //
bhruvorlalāṭe śirasi maṃtravarṇānyathākramam

vinyasya vyāpakaṃ sarvairnyāsaṃ kuryātsamāhitaḥ //
prāṇāyāmatrayaṃ kuryānmūlena paṃcaviṃśatim

badhnīyātkavacaṃ divyaṃ sarvapāpāpanodanam //
pūrve māṃ pātu goviṃdo vārijākṣastu dakṣiṇe

pradyumnaḥ paścime pātu hṛṣīkeśastathottare //
āgneyyāṃ narasiṃhastu nairṛtyāṃ madhusūdanaḥ

vāyavyāṃ śrīdharaḥ pātu aiśānyāṃ ca gadādharaḥ //
ūrdhvaṃ trivikramaḥ pātu adho vārāharūpadhṛk

sarvatra pātu māṃ devaḥ śaṃkhacakragadādharaḥ //
nārāyaṇo manaḥ pātu caitanyaṃ garuḍadhvajaḥ

pātu me buddhyahaṃkārau triguṇātmā janārdanaḥ //
iṃdriyāṇi sadā pātu daityavarganikṛntanaḥ

evaṃ baddhvā ca kavacaṃ niṣpāpo jāyate pumān //
ṣoḍaśairupacāraiśca manasā kalpitairnaraḥ

puruṣottamaṃ pūjayitvā yathāvadvidhito dvijāḥ //
āvāhya maṇḍale tasmindevadevamanāmayam

pūjayitvā vidhānena yathāśaktyupabṛṃhitaiḥ //
ātmānaṃ tīrtharājasya devadevasya ciṃtayan

evaṃ baddhāṃjalipuṭamimaṃ mantramudīrayet //
sudarśana namaste'stu koṭisūryasamaprabha

ajñānatimirāṃdhasya viṣṇormārgaṃ pradarśaya //
evaṃ saṃprārthya bho viprāstīrtharājajalāṃtike

jānubhyāmavaniṃ gatvā praṇamedbhaktibhāvitaḥ //
tīrtharāja namastubhyaṃ jalarūpāya viṣṇave

jīvanāya ca jaṃtūnāṃ paraṃ nirvāṇahetave

agniśca te yonirilā ca dehe retodhā viṣṇoramṛtasya nābhiḥ //
upaimi te rūpamananyahetumānaṃdasaṃpannamapranupraviśya

iti mantraṃ paṭhanviprāḥ praviśejjalamadhyataḥ //
āvāhayettīrtharājaṃ bhāvayañjagatāṃpatim

jalādhīśaṃ kṛtasnānaphaladāne'taḥ sthitam //
aghamarṣaṇasūktena nārāyaṇayutena ca

trirāvṛttena kurvīta pañcavāruṇakena ca //
sakṛdāvāhanādīni ṣaḍaṃgānyabhiṣecane //

āvāhanaṃ pura proktaṃ sannidhānamathocyate //
snāturiṣṭaphalaprāptau sānnidhyaparikalpanam

antaḥśuddhyarthamācāmetpītvā tadabhimaṃtritam//
bāhyāvayavaśuddhyarthaṃ mārjayetkuśavāriṇā

aṃtarbahirviśuddhyarthaṃ mantrapūtena vāriṇā //
trīnaṃjalīnmūrdhni siṃcetsiṃdhau nāṃtarjale japaḥ

triḥ snānāyātsvakṛtāghāni koṭijanmakṛtāni ca //
plāvitāni jale tasminbhāvayannaghanāśanam

utthāyācamya vidhivatprārthayenmantramuccaran //
tvamagnirjagatāṃ nātha retodhāḥ kāmadīpanaḥ

pradhānaṃ sarvabhūtānāṃ jīvānāṃ prabhuravyaya //
amṛtasyāraṇistvaṃ hi devayonirapāṃpate

vṛjinaṃ hara me sarvaṃ tīrtharāja namostu te //
janmakoṭisahasreṣu yatpāpaṃ pūrvamarjitam

tadaśeṣaṃ layaṃ yātu dehi me brahma śāśvatam//
snātvāpi ca tatastīramuttīryācamya vāgyataḥ

dhārayedvāsasī śukle puṃḍrakānujjvalākṛtīn //
śaṃkhacakragadāpadmatilakāni ca bhaktitaḥ

devānpitṝnyathānyāyaṃ ciṃtayanbhagavaddhiyā //
tarppayedvidhivadviprāḥ samyagavyagramānasaḥ

tataḥ pūrvavadālikhya maṇḍalaṃ cottarāmukhaḥ //
pūjayenmūlamantreṇa mantrairebhiśca bhaktitaḥ

nārāyaṇaṃ caturbāhuṃ śaṃkhacakragadādharam //
dharāramābhyāṃ sahitaṃ kevalaṃ vā dvijottamāḥ //
dhyātvāṃtaryāgasaṃtuṣṭaṃ bahirāvāhayettataḥ

āgaccha paramānaṃda jagadvyāpiñjaganmaya //
anugrahāya deveśa maṇḍale sannidhiṃ kuru

carācaramidaṃ sarvaṃ jagadatra pratiṣṭhitam//
tadantasthastvameveśa āsanaṃ kalpayāmi te

yasya pādāṃbuje dhaute dharmeṇa brahmarūpiṇā //
punāti tadbhavā gaṃgā jagatpādyaṃ dadāmyaham

anarghyaratnaghaṭitacūḍāmaṇikarotkaraiḥ //
brahmādayaḥ pādapadmaṃ ciṃtayaṃti dine dine //
anarghyāyajagaddhāmne arghyametaddadāmyaham

ācāṃtastīrtharājo vai yenāgastyasvarūpiṇā //
tasmai suvāsitaṃ vāri dadāmyācamanīyakam

yaḥ prāpya madhusaṃparkaṃ cakarṣa jalarūpiṇam //
aśeṣāghavikarṣāya madhuparkaṃ dadāmyaham

yaḥ kroḍarūpamāsthāya pralayārṇavaviplutām //
ujjahāra dharāmetāṃ snapayāmi tamaṃbhasā

brahmāṃḍakoṭayo yasya viśvarūpasya saṃvṛtiḥ //
ācchādanāya sarveṣāṃ pradade vāsasī śubhe //

vinā yenānuṣṭhito'pi yajñaḥ syādakṛto dhruvaḥ //
tasmai yajñeśvarāyedamupavītaṃ prakalpaye

yadaṃgasaṃgamāsāya śobhaṃte bhūṣaṇāni vai //
viśvālaṃkṛtaye tasmai bhūṣaṇāni prakalpaye

yadaṃgasaṃsparśimarutsaṃgānmalayajā drumāḥ //
sugaṃdharasasaṃpannāstasmai gaṃdhānulepanam

yasya saṃcitanādeva saumanasyaṃ hatāṃhasām //
tasmai sumanasāṃ mālāṃ sugaṃdhāṃ parikalpaye

yaṃ citte sthiramādāya bhavāgniparidhūpanam //
jahāti tasmai pradade sugaṃdhaṃ dhūpamuttamam

svatejasākhilamidaṃ dīpitaṃ yasya bhāsataḥ //
tasmai dīpapradīptāya dīpametaṃ dadāmyaham

carācaraṃ jagatsarvamatti yo yaśca bhāvayet //
anena ca punaḥ puṣṭau tasmādannaṃ nivedaye

yadīyamukharāgeṇa sahajāvāsitena ca //
mohitāḥ surasuṃdaryastasmai tāṃbūlamuttamam

pradakṣiṇaprakamaṇādbhavāṃgaṇavivarttanam //
haṃti yaḥ karuṇāṃbhodhistaṃ namāmi jagadgurum

maṃtrāstu kathitā hyeta upacāraiḥ pṛthakpṛthak //
āvāhya ciṃtayeddevaṃ bahiḥsaṃsthitamātmanaḥ

ratnasihāsanaṃ dattvā tatrāsīnaṃ viciṃtayet //
pādapadmadvaye dadyātpādyaṃ śyāmākapaṃkajaiḥ

dūrvāparājitābhyāṃ ca saṃskṛtaṃ mūlamaṃtraṇāt //
sauvarṇe rājate vāpi tāmre vā śaṃkha eva vā

arghyaṃ saṃskṛtya vidhivadvāricaṃdanapuṣpakaiḥ //
yavadūrvākuśāgraiśca phalasiddhārthakaistilaiḥ

dūrvākuśāgrairdevasya mūrdhni siṃcettadagrataḥ //
sāvaśeṣaṃ kṣipedbhūmāveṣo'rghavidhirīritaḥ

jātīphalairvā kaṃkolairlavaṃgaiḥ saṃskṛtaṃ jalam //
dadyādācamanārthaṃ tu madhuparkaṃ tato dadet //

madhusarpiryutaṃ gavyaṃ dadhi kāṃsye hi nirmale //
pātre sthitaṃ ca pihitaṃ pātreṇānyena tādṛśā //
susaṃskṛtaṃ phalayutaṃ snapane jalamucyate //

paṭṭakauśeyakāpāsanirmite vāsasī śubhe //
yathāśakti pradeye ca vittaśāṭhyaṃ na kārayet

hārakeyūramukuṭagraiveyādikabhūṣaṇam //
yathāśakti yathāsthānaṃ devasyāṃge niveśayet

upavītaṃ harerdadyātpaṭṭasūtravinirmitam //
kārpāsamathavā viprā gaṃdhacaṃdanasaṃskṛtam

caṃdracaṃdanakastūrīkuṃkumairanulepanam

tulasīdalamālāṃ ca jātīpaṃkajacaṃpakaiḥ //
aśokacchurapunnāganāgakesarakesaraiḥ

anyaiḥ sugaṃdhaiḥ kusumairmālā mālyamathāpi vā //
muktakāni ca puṣpāṇi dadyāddevasya mūrddhani

mālā sā prapadīnātu mālyaṃ kaṃṭhorusaṃmitam //
garbhakaṃ keśamadhye tu mūrdhni puṣpāṃjaliṃ kṣipet

saguggulvagurūśīrasitājyamadhucaṃdanaiḥ //
dhūpaṃ dadyātsugaṃdhāḍhyaṃ dīpaṃ gosarpiṣā śubham //
karpūragarbhayā vartyā tilatailena vā dadet

akhaṃḍitasamuddhautaṃ śālitaṃḍulanirmitam //
supakvamannaṃ surabhi sarpiṣā ca suvāsitam

saurabheyadadhikṣīrapakvaraṃbhāsitāyutam //
nānāvyaṃjanasaṃkīrṇaṃ sopadaṃśaṃ sapūpakam

nānāphalayutaṃ hṛdyaṃ sugaṃdhaṃ surasaṃ navam //
naivedyaṃ devadevasya prasthādūnaṃ na śasyate

dhūpe dīpe ca naivedye snāne'rghe madhuparkake //
vastre yajñopavīte ca dadyādācamanīyakam

anyatra kevalaṃ vāri saṃskṛtaṃ tvaupacārikam/
naivedyāṃte tvācamanaṃ dadyācca karaghṛṣṭikam

sagaṃdhacaṃdanaṃ viprāstāṃbūlaṃ ca dadettataḥ//
sakarpūralavaṃgailājātīkramukasaṃyutam

aṣṭottaraśataṃ japtvā mūlamaṃtramananyadhīḥ //
stutvā pradakṣiṇaṃ kṛtvā prārthayetpuruṣottamam

devadeva jagannātha sarvatīrthapravarttaka //
sarvatīrthamayaścāsi sarvadevamaya prabho

tvatprasādānmayā tīrtharāje snānaṃ hi yatkṛtam //
tadastu saphalaṃ deva yathoktaphalado bhava

siṃdhurājastvaṃ ca vibho dravarūpo'syasaṃśayam //
pāpālaye nimagnaṃ māṃ paritrāhi namo'stu te

itthaṃ prapūjya deveśaṃ nārāyaṇamanāmayam //
tīrtharājakṛtasnānaḥ sarvatīrthaphalaṃ labhet

gavāṃ koṭipradānena kratukoṭikṛtena ca //
koṭibrāhmaṇabhojyena mahādānaiśca koṭiśaḥ //
yatpuṇyaṃ karmiṇāṃ proktaṃ tadanena hi labhyate

dhyānaṃ dānaṃ tapo jāpyaṃ śrāddhaṃ ca surapūjanam //
siṃdhurāje kṛtaṃ sarvaṃ koṭikoṭiguṇaṃ bhavet

api naḥ sa kule kaścitsiṃdhusnāyī bhaviṣyati //
devebhyaśca pitṛbhyaśca dāsyate ca tilodakam

kraṃdaṃti sarvapāpāni saṃbhrāṃtāḥ sarvapātakāḥ //
aniṣṭāni palāyante siṃdhusnānodyatasya vai

anyatīrthe kṛtaṃ pāpaṃ siṃdhutīre vinaśyati //
siṃdhutīre kṛtaṃ pāpaṃ sidhusnāne vinaśyati

siṃdhusnānarataṃ nityaṃ dṛṣṭvaiva yamakiṅkarāḥ //
diśo daśa palāyante siṃhaṃ dṛṣṭvā yathā mṛgāḥ

yamo'pi bhītastaṃ dṛṣṭvā praṇipatya prapūjya ca //
na śaknoti tadā sthātuṃ tasyāgre puṇyakarmiṇaḥ

vāṃchaṃti devatā nityaṃ mānuṣyaṃ prāpnuyāmahe //
samyakchu(chru?)ddhatanvo bhūtvā siṃdhusnānaṃ labhemahi

merumandaramātro'pi rāśiḥ pāpasya karmaṇaḥ //
siṃdhusnānena dagdhaḥ syāttūlarāśirivānalāt

apsu nārāyaṇaṃ devaṃ snānakāle smaretsadā //
sākṣādviṣṇusvarūpe'tra siṃdhau caiva viśeṣataḥ

brahmaghno vā surāpo vā goghno vā pañcapātakī //
sarve te niṣkṛtiṃ yāṃti siṃdhusnānānna saṃśayaḥ

kapilākoṭidānācca sindhusnānaṃ viśiṣyate //
sakṛtsiṃdhvavagāhena kulakoṭiṃ samuddharet

sarvatīrtheṣu yatpuṇyaṃ sarveṣvāyataneṣu ca//
tatphalaṃ labhate sarvaṃ sindhusnānānna saṃśayaḥ

ya icchetsaphalaṃ janma jīvitaṃ śrutameva vā //
sa pitṝṃstarpayetsiṃdhumabhigamya surāṃstathā

catvāraḥ sulabhā vedāḥ saṣaḍaṃga padakramāḥ //
sulabhāni kurukṣetre dānāni vividhāni ca

cāṃdrāyaṇāni kṛcchrāṇi tapāṃsi sulabhānyapi //
agniṣṭomādayo yajñāḥ sulabhā bahudakṣiṇāḥ

sindhutoyaiśca salilairdurlabhaṃ pitṛtarpaṇam //
māsaṃ tarpaṇamātreṇa piṃḍānāṃ pātanena ca

sindhau vai pitaraḥ sarve vimānānsūryavarcasaḥ //
sindhutarpaṇasaṃtuṣṭāḥ śrāddhapiṃḍasutarpitāḥ //
āruhya sahasā yāṃti brahmalokaṃ sanātanam

ādyaṃtayorjagannāthaṃ pūjayitvā yathāvidhi //
tīrtharāje'bhiṣicya svaṃ naraḥ syānmuktibhājanam

tatastīrthavisargaṃ ca kṛtvā śuddhamanāḥ pumān //
rāmaṃ kṛṣṇaṃ subhadrāṃ ca natvā rūpaṃ vicintayet

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe puruṣottamakṣetramāhātmye triṃśo'dhyāyaḥ