Skanda Purana · Verses 2.28-3

// śrīnārāyaṇa uvāca //
ācamya prāṇānāyamya tatosau svasthamānasaḥ //
namaskṛtyeṣṭadevādīndeśakālau ca kīrtayet

ekāntadharmasidyarthaṃ vāsudevasya pūjanam //
kariṣya iti saṃkalpya kuryānnyāsavidhiṃ tataḥ

nyāse mantrā dvādaśārṇo gāyatrī vaiṣṇavī tathā//
nārāyaṇāṣṭākṣaraśca jñeyā viṣṇuṣaḍakṣaraḥ

ete dvijānāṃ vihitāstadanyeṣāṃ tviha trayaḥ //
vāsudevāṣṭākṣaraśca haripañcākṣarastathā //
ṣaḍarṇaḥ keśavasyeti nyāse home ca saṃmatāḥ

śrīviṣṇupratimāṃgeṣu svāṃgeṣviva tato'khilān //
kuryānyāsāṃśca tairmantraistatorcāṃ vāsasā''mṛjet

kalaśaṃ vāmabhāge sve saṃsthāpyāvāhya tatra ca//
tīrthāni gandhapuṣpādyairupacāraistamarcayet

pūjādravyāṇi cātmānaṃ prokṣayitvā tadambunā//
śaṃkhaṃ ghaṇṭāṃ ca saṃpūjya bhūtaśuddhiṃ samācaret

ābhyantarāgnivāyubhyāṃ dagdhvā pāpātmakaṃ vapuḥ //
śuddhasya svātmanastvaikyaṃ bhāvayedbrahmaṇā sthiraḥ

tato'kṣarabrahmarūpo rādhākṛṣṇaṃ hṛdi prabhum //
dhyāyedavyagramanasā prāṇāyāmaṃ samācaran

adhomukhaṃ nābhipadmaṃ kadalīpuṣpavatsthitam//
vibhāvyāpānapavanaṃ prāṇenaikyamupānayet

padmanāle tamānīya saha tena tadambujam//
ākarṣedūrdhvamatha tannadattīvramupaiti hṛt //
praphullati ca tatraitaddhṛdayākāśa ullasat

tejorāśimaye tatra tatopyadhikatejasā //
darśanīyatamaṃ śāntaṃ dhyāyecchrīrādhikāpatim

upaviṣṭaṃ sthitaṃ vā taṃ divyacinmayavigraham //
dhyāyetkiśoravayasaṃ koṭikandarpasundaram

rūpānurūpasaṃpūrṇadivyāvayavalakṣitam //
śaraccandrāvadātāṃgaṃ dīrghacārubhujadvayam

āraktakomalatalaramyāṃgulipadāmbujam //
tuṃgāruṇasnigdhanakhadyutilajjāyitoḍupam

śiñjatkiṃkiṇimañjīrahaṃsakāṃghriyugaśriyam //
suvṛttajaṃghāyugalaṃ samajānūruśobhanam

sadratnaraśanābaddhapītāmbarakaṭiśriyam //
uttuṃgakukṣinābhyantarnimnanābhivalitrayam

vitatottuṃgahṛdayaṃ śrīvatsāvarttaśobhitam //
lalantīgucchagucchārddhadevacchandādibhūṣitam

nānāsugandhipuṣpasraksvarṇayajñopavītinam //
unnidraśoṇapadmābhakarakaṃkaṇabhūṣaṇam

sūkṣmaparvāṃgulidyotannaikasadratnamudrikam //
ninādayantaṃ madhuraṃ veṇuṃ sarvamanoharam

vipulāṃsaṃ gūḍhajatruṃ mahābāhvaṃgadadyutim //
bhramatsugandhalubdhālijhaṃkāritavanasrajam

kambūpamagalabhrājatsadgraiveyakakaustubham //
śobhamānahanuṃ bimbīphalaśoṇādharadyutim

sitasmitakalārājatpūrṇacandranibhānanam //
tilapuṣpasamākāradarśanīyasunāsikam

samānakarṇavibhrājanmakarākṛtikuṇḍalam //
karṇoparilasaccitrapuṣpagucchāvataṃsakam

samasūkṣmaradajyotsnollasadgaṇḍasthalaśriyam //
padmapatrāyatāraktaprāntaramyavilocanam

pṛthutuṃgalalāṭaṃ ca kāmacāpāyitabhruvam //
vakrasūkṣmāsitasnigdhamanoharaśiroruham

nānāsadratnakhacitakirīṭadhṛtaśekharam //
premṇā nijaṃ vīkṣamāṇaṃ prasannaṃ snigdhayā dṛśā

dhyātvetthaṃ kṛṣṇamatha tadvāme rādhāṃ vicintayet //
dvibhujāṃ svarṇagaurāṃgīṃ kausumbhāmalavāsasam

samakarṇollasadratnabhūṣaṇāṃśukanāsikām //
kiśorīṃ mṛgaśāvākṣīṃ pīnonnataghanastanīm

kṛśamadhyāṃ pṛthuśroṇiṃ ratnakāñcīvibhūṣitām //
anekadivyābharaṇāṃ vikacābjānanasmitām

ratnāṃgulīyakeyūrakaṅkaṇādilasatkarām //
śiñjaddhaṃsakamañjīraśobhamānāṃghripaṅkajām

viśālabhālavilasatsatkāśmīralalāṭikām //
bimboṣṭhīṃ sukapolāṃ ca veṇīgrathitamālatīm

prekṣamāṇāṃ prabhuṃ premṇā dadhānāmambujaṃ kare //
dhyātvaivaṃ rādhikāṃ tatra prabhumarcettayā saha

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīvāsudevamāhātmye kriyāyoge śrīrādhākṛṣṇasvarūpadhyānanirūpaṇaṃ nāmā'ṣṭāviṃśo'dhyāyaḥ