સ્કંદ પુરાણ · શ્લોક 2.28-3

॥ શ્રીનારાયણ ઉવાચ ॥
આચમ્ય પ્રાણાનાયમ્ય તતોસૌ સ્વસ્થમાનસઃ ॥
નમસ્કૃત્યેષ્ટદેવાદીન્દેશકાલૌ ચ કીર્તયેત્

એકાન્તધર્મસિદ્યર્થં વાસુદેવસ્ય પૂજનમ્ ॥
કરિષ્ય ઇતિ સંકલ્પ્ય કુર્યાન્ન્યાસવિધિં તતઃ

ન્યાસે મન્ત્રા દ્વાદશાર્ણો ગાયત્રી વૈષ્ણવી તથા॥
નારાયણાષ્ટાક્ષરશ્ચ જ્ઞેયા વિષ્ણુષડક્ષરઃ

એતે દ્વિજાનાં વિહિતાસ્તદન્યેષાં ત્વિહ ત્રયઃ ॥
વાસુદેવાષ્ટાક્ષરશ્ચ હરિપઞ્ચાક્ષરસ્તથા ॥
ષડર્ણઃ કેશવસ્યેતિ ન્યાસે હોમે ચ સંમતાઃ

શ્રીવિષ્ણુપ્રતિમાંગેષુ સ્વાંગેષ્વિવ તતોઽખિલાન્ ॥
કુર્યાન્યાસાંશ્ચ તૈર્મન્ત્રૈસ્તતોર્ચાં વાસસાઽઽમૃજેત્

કલશં વામભાગે સ્વે સંસ્થાપ્યાવાહ્ય તત્ર ચ॥
તીર્થાનિ ગન્ધપુષ્પાદ્યૈરુપચારૈસ્તમર્ચયેત્

પૂજાદ્રવ્યાણિ ચાત્માનં પ્રોક્ષયિત્વા તદમ્બુના॥
શંખં ઘણ્ટાં ચ સંપૂજ્ય ભૂતશુદ્ધિં સમાચરેત્

આભ્યન્તરાગ્નિવાયુભ્યાં દગ્ધ્વા પાપાત્મકં વપુઃ ॥
શુદ્ધસ્ય સ્વાત્મનસ્ત્વૈક્યં ભાવયેદ્બ્રહ્મણા સ્થિરઃ

તતોઽક્ષરબ્રહ્મરૂપો રાધાકૃષ્ણં હૃદિ પ્રભુમ્ ॥
ધ્યાયેદવ્યગ્રમનસા પ્રાણાયામં સમાચરન્

અધોમુખં નાભિપદ્મં કદલીપુષ્પવત્સ્થિતમ્॥
વિભાવ્યાપાનપવનં પ્રાણેનૈક્યમુપાનયેત્

પદ્મનાલે તમાનીય સહ તેન તદમ્બુજમ્॥
આકર્ષેદૂર્ધ્વમથ તન્નદત્તીવ્રમુપૈતિ હૃત્ ॥
પ્રફુલ્લતિ ચ તત્રૈતદ્ધૃદયાકાશ ઉલ્લસત્

તેજોરાશિમયે તત્ર તતોપ્યધિકતેજસા ॥
દર્શનીયતમં શાન્તં ધ્યાયેચ્છ્રીરાધિકાપતિમ્

ઉપવિષ્ટં સ્થિતં વા તં દિવ્યચિન્મયવિગ્રહમ્ ॥
ધ્યાયેત્કિશોરવયસં કોટિકન્દર્પસુન્દરમ્

રૂપાનુરૂપસંપૂર્ણદિવ્યાવયવલક્ષિતમ્ ॥
શરચ્ચન્દ્રાવદાતાંગં દીર્ઘચારુભુજદ્વયમ્

આરક્તકોમલતલરમ્યાંગુલિપદામ્બુજમ્ ॥
તુંગારુણસ્નિગ્ધનખદ્યુતિલજ્જાયિતોડુપમ્

શિઞ્જત્કિંકિણિમઞ્જીરહંસકાંઘ્રિયુગશ્રિયમ્ ॥
સુવૃત્તજંઘાયુગલં સમજાનૂરુશોભનમ્

સદ્રત્નરશનાબદ્ધપીતામ્બરકટિશ્રિયમ્ ॥
ઉત્તુંગકુક્ષિનાભ્યન્તર્નિમ્નનાભિવલિત્રયમ્

વિતતોત્તુંગહૃદયં શ્રીવત્સાવર્ત્તશોભિતમ્ ॥
લલન્તીગુચ્છગુચ્છાર્દ્ધદેવચ્છન્દાદિભૂષિતમ્

નાનાસુગન્ધિપુષ્પસ્રક્સ્વર્ણયજ્ઞોપવીતિનમ્ ॥
ઉન્નિદ્રશોણપદ્માભકરકંકણભૂષણમ્

સૂક્ષ્મપર્વાંગુલિદ્યોતન્નૈકસદ્રત્નમુદ્રિકમ્ ॥
નિનાદયન્તં મધુરં વેણું સર્વમનોહરમ્

વિપુલાંસં ગૂઢજત્રું મહાબાહ્વંગદદ્યુતિમ્ ॥
ભ્રમત્સુગન્ધલુબ્ધાલિઝંકારિતવનસ્રજમ્

કમ્બૂપમગલભ્રાજત્સદ્ગ્રૈવેયકકૌસ્તુભમ્ ॥
શોભમાનહનું બિમ્બીફલશોણાધરદ્યુતિમ્

સિતસ્મિતકલારાજત્પૂર્ણચન્દ્રનિભાનનમ્ ॥
તિલપુષ્પસમાકારદર્શનીયસુનાસિકમ્

સમાનકર્ણવિભ્રાજન્મકરાકૃતિકુણ્ડલમ્ ॥
કર્ણોપરિલસચ્ચિત્રપુષ્પગુચ્છાવતંસકમ્

સમસૂક્ષ્મરદજ્યોત્સ્નોલ્લસદ્ગણ્ડસ્થલશ્રિયમ્ ॥
પદ્મપત્રાયતારક્તપ્રાન્તરમ્યવિલોચનમ્

પૃથુતુંગલલાટં ચ કામચાપાયિતભ્રુવમ્ ॥
વક્રસૂક્ષ્માસિતસ્નિગ્ધમનોહરશિરોરુહમ્

નાનાસદ્રત્નખચિતકિરીટધૃતશેખરમ્ ॥
પ્રેમ્ણા નિજં વીક્ષમાણં પ્રસન્નં સ્નિગ્ધયા દૃશા

ધ્યાત્વેત્થં કૃષ્ણમથ તદ્વામે રાધાં વિચિન્તયેત્ ॥
દ્વિભુજાં સ્વર્ણગૌરાંગીં કૌસુમ્ભામલવાસસમ્

સમકર્ણોલ્લસદ્રત્નભૂષણાંશુકનાસિકામ્ ॥
કિશોરીં મૃગશાવાક્ષીં પીનોન્નતઘનસ્તનીમ્

કૃશમધ્યાં પૃથુશ્રોણિં રત્નકાઞ્ચીવિભૂષિતામ્ ॥
અનેકદિવ્યાભરણાં વિકચાબ્જાનનસ્મિતામ્

રત્નાંગુલીયકેયૂરકઙ્કણાદિલસત્કરામ્ ॥
શિઞ્જદ્ધંસકમઞ્જીરશોભમાનાંઘ્રિપઙ્કજામ્

વિશાલભાલવિલસત્સત્કાશ્મીરલલાટિકામ્ ॥
બિમ્બોષ્ઠીં સુકપોલાં ચ વેણીગ્રથિતમાલતીમ્

પ્રેક્ષમાણાં પ્રભું પ્રેમ્ણા દધાનામમ્બુજં કરે ॥
ધ્યાત્વૈવં રાધિકાં તત્ર પ્રભુમર્ચેત્તયા સહ

ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં દ્વિતીયે વૈષ્ણવખણ્ડે શ્રીવાસુદેવમાહાત્મ્યે ક્રિયાયોગે શ્રીરાધાકૃષ્ણસ્વરૂપધ્યાનનિરૂપણં નામાઽષ્ટાવિંશોઽધ્યાયઃ