Skanda Purana · Verses 2.28-2

// jaiminiruvāca // //
tataḥ sa bhagavānmantramahimnā narakesarī //
indradyumnādibhiḥ sarvaidadṛśe'dbhutadarśanaḥ

lelihāno jagatsarvaṃ samaṃtājjvalajihvayā //
kālāgnirudraṃ sakalaṃ grasaṃtamiva cotthitam

rodasīkaṃdaraṃ vyāpya tejasā tapatā bhṛśam //
anekākṣimukhagrīvākarapādaśrutirvibhuḥ

sarvāścaryamayo devaḥ kevalaṃ tejaso nidhiḥ //
bhayatrastāḥ samudvignā neśāḥ stotumapi prabhum

taṃ tathāvidhamālokya nāradaḥ pitaraṃ tadā //
papraccha bhagavannitthaṃ kathameṣa prakāśate

// nārada uvāca // //
anugrahāyāvataratpratyutaiṣa bhayapradaḥ //
sarve bhayātsthiratarāḥ pralayāśaṃkino'dhunā

tvameva bhagavallīlāṃ jānāsi jagatāṃ pate

tacchrutvā nāradavacaḥ padmayoniḥ smitānanaḥ //
uvāca kautukaṃ vākyaṃ sarveṣāmupakārakam

// brahmovāca // //
avatīrṇaṃ jagannāthaṃ dṛṣṭvā dāruvapurdharam

avajñāsyaṃti vai lokāḥ sākṣādbrahmasvarūpiṇam //
atattvavedino mūḍhā mahimānaṃ vidaṃtviti

maṃtrito mantrarājena yenāsau parameṣṭhinā //
purābhimaṃtrito yena vidadāra mahāsuram

tādṛgrūpaṃ sudurdarśaṃ prāpyameti bhayapradam //
mūrtireṣā parā kāṣṭhā viṣṇoramitatejasaḥ //

yāmabhyarcya gatiṃ yāṃti punarāvṛttidurlabhām //
nṛsiṃhābhimukhaḥ stotramidamāha mudānvitaḥ

namo'stu te devavaraikasiṃha namo'stu pāpaughagajaikasiṃha //
namo'stu duḥkhārṇavapārasiṃha namo'stu tejomaya divyasiṃha

namo'stu sarvākṛticitrasiṃha namo'stu te kleśavimuktisiṃha //
namo'stu te divyavapurnṛsiṃha namo'stu te vīravaraikasiṃha

namo'stu te daityavidārasiṃha namo'stu deveṣvadhi devasiṃha //
namo'stu vedāṃtavanaikasiṃha namo'stu te yogiguhaikasiṃha

namo'stu te siṃha vṛṣaikasiṃha namo'stu nīlācalaśṛṃgasiṃha

// jaiminiruvāca // //
stutvetthaṃ divyasiṃhaṃ tamiṃdradyumnaṃ prajāpatiḥ //
siṃhayaṃtraṃ samālekhya tasyopari niveśya ca

dīkṣayitvā mantrarājaṃ sākṣādātharvaṇoditam //
āhurvaiṣṇavanirvāṇaṃ yaṃ vedāṃtaparāyaṇāḥ

yatra vedāśca catvāraḥ sākṣānnityaṃ pratiṣṭhitāḥ //
yamadhītya mahāmantraṃ manuḥ svāyaṃbhuvaḥ purā

sṛṣṭiṃ cakāra bhagavānprāptamasmāccaturmukhāt //
aṇimādiguṇā yasya phalaṃ syādānuṣaṃgikam

eka eva mahāmantraḥ puruṣārthacatuṣṭayam //
prāptuṃ kāraṇabhūto hi kiṃ punaḥ kṣudrakāmanām

eka eva mahāmaṃtraḥ sarvakratuphalapradaḥ //
sarvatīrthapradaḥ sarvadānavrataphalapradaḥ

yathāyaṃ sarvapāpaughatūlarāśerdavānalaḥ //
divyasiṃhākṛtirdevo maṃtrarājñastathā hyayam

enamabhyasya yatayo bhavaroga tyajaṃti hi //
yasya grahaṇamātreṇa grahāpasmārarākṣasāḥ

ḍākinyo bhūtavetālapiśācā uragā grahāḥ //
dūrādeva palāyaṃte neśate vīkṣituṃ ca tam

maṃtrarājaṃ tato labdhvā indradyumnaścaturmukhāt //
nṛsiṃhaṃ śātavapuṣaṃ lakṣmīsaṃśritavakṣasam

cakraṃ pinākaṃ dadhataṃ caṃdrasūryāgnicakṣuṣam //
jānuprasāritakarasarojadvaṃdvamunnasam

yogapaṭṭāsanārūḍhadvātriṃśaddalapadmake //
maṃtravarṇamaye madhye karṇikāpraṇavojjvale

sukhāsīnaṃ sāṭṭahāsaṃ vīkṣaṃtaṃ śrīmukhāṃbujam //
saṭāmaṃḍitavaktrābjaṃ divyaratnojjvalākṛti

phaṇāsahasraṃ vistārya paścācchatrākṛtiṃ vibhoḥ //
dadarśa balabhadraṃ taṃ halalāṃgaladhāriṇam

prajaharṣa nṛpo dṛṣṭvā tādṛśaṃ puruṣottamam //
vismayāviṣṭacetāśca papraccha kamalāsanam

bhagavaṃścitrametadvai caritaṃ madhughātinaḥ //
vijñātuṃ kathamasmābhiḥ śakyaḥ syāllokabhāvana

yajñāṃte tādṛśaṃ rūpaṃ babhāra dārunirmitam //
rathasthaṃ bhagavāneva prāsādāṃtarnyaveśayat

māmāha pūrvaṃ vāṇī sā gaganāṃtaritā tadā //
apauruṣeyataruṇā caturmūrtirbhaviṣyati

idānīmeka evāsau dṛśyate supratiṣṭhitaḥ //
māyā vā tattvamatha vā tattvato me vada prabho

śravaṇe yadi māṃ vetsi bhājanaṃ bhavabhāvana //
śrutvaitatpratyuvācātha saṃśayānaṃ nṛpottamam

// brahmovāca // //
ādyā mūrtirbhagavato nārasiṃhākṛtirnṛpa //
nārāyaṇena prathitā madanugrahatastvayi

dāravī mūrtireṣeti pratimābuddhiratra vai //
mā bhūtte nṛpaśārdūla paraṃ brahmākṛtistviyam

khaṃḍanātsarvaduḥkhānāmakhaṃḍānaṃdadānataḥ //
svabhāvāddārureṣo hi paraṃ brahmābhidhīyate

itthaṃ dārumayo devaścaturvedānusārataḥ //
sraṣṭā sa jagatāṃ tasmādātmānaṃ cāpi sṛṣṭavān

śabdabrahma paraṃbrahma nānayorbheda iṣyate //
laye tu ekamevedaṃ sṛṣṭau bhedaḥ pravarttate

anyonyāpekṣiṇau bhūpa śabdārthau hi parasparam//
arthābhāvena śabdo'sti śabdābhāvena buddhyate

arthastasmāccaturvedāḥ śabdā hyarthāśca tādṛśāḥ //
ṛgvedarūpī haladhṛksāmavedo nṛkesarī

yajurmūrttistviyaṃ bhadrā cakramātharvaṇaṃ smṛtam //
vedaścaturddhā bhedo'yamekarāśirabhedataḥ

ataste saṃśayo mā bhūdekastu bahudhā vibhuḥ //
avatāreṣu cānyeṣu nyāyenaitena varttate

bhedābhedau tathā khyātau jagannāthasya te nṛpa //
yena te manasastuṣṭistena bhaktyā samācara

sarvarūpamayo hyeṣa sarvamaṃtramayaḥ prabhuḥ //
ārādhyate yathā yena tathā tasya phalapradaḥ

yathā suśuddhaṃ kanakaṃ svecchayā ghaṭitaṃ nṛpa //
tattatsaṃjñāmavāpyeha tattatsaṃtoṣakārakam

evaṃ mahimnā bhagavānatrāvirabhavannṛpa //
yasya yāvāṃstu viśvāsastasya siddhistu tāvatī

karmaṇā manasā vācā viśuddhenāṃtarātmanā //
samārādhaya goviṃdamatra dāruvapurddharam

caturvargaphalāvāptyai yathābhilaṣitaṃ tava //
anena maṃtrarājena viṣṇumenaṃ samarcaya

nātaḥ parataro maṃtro na bhūto na bhaviṣyati //
anenābhyarcito viṣṇuḥ prīto bhavati tatkṣaṇāt

dadāti svapuraṃ cāpi bhagavānbhaktavatsalaḥ //
yajñaistīrthairvratairdānaistapobhiścāpi tasya kim

nīlācalasthaṃ yo viṣṇuṃ dārumūrtimupāsti vai //
tattvaṃ bravīmi te bhūpa śrutvaitadavadhāraya

nyagrodhamūle kūle'sya siṃdhornīlācale sthitam //
dāruvyājāmṛtaṃ brahma dṛṣṭvā mucyenna saṃśaya

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe puruṣottamakṣetramāhātmye jaiminiṛṣisaṃvāde'ṣṭāviṃśo'dhyāyaḥ