Skanda Purana · Verses 2.27-3

// śrīnārāyaṇa uvāca //
khananokṣaṇalepādyaiḥ śodhite dharaṇītale //
catuṣpādaṃ nyasetpīṭhaṃ nānāraṅgasuśobhite

arcakaḥ prāṅmukhaḥ pīṭhapādānkoṇeṣu kārayet //
caturṣu teṣu dharmādīnsthāpayetsiṃharūpiṇaḥ

agnau dharmaṃ nyasecchvetaṃ jñānaṃ śoṇaṃ ca nairṛte //
vāyau tu pītaṃ vairāgyaṃ śyāmamaiśvaryamaiśake

manodhīcittāhaṅkārānkramātpūrvādidikṣva'tha //
vinyasetpīṭhagātreṣu haridraktasitāsitān

sthāpyā raktasitaśyāmā rajaḥsattvatamoguṇāḥ //
pīṭhasya paṭṭikāyāṃ tu trayopi munisattama//

antaḥkaraṇarūpeṣu gātreṣvatha caturṣvapi //
vimalādyā nyasecchaktīrdvedve ekaikagātrake

vimalotkarṣiṇīti dve gaurāṅgyau pūrvato nyaset //
vādayantyau śubhāṃ vīṇāṃ haridvastre svalaṃkṛte

jñānākriye nyasedyāmye pītavastre'ruṇadyutī //
ekā tālaṃ vādayantī mṛdaṅgamaparā tathā

yogāpraddhyau nyasetpaścācchyāme aruṇavāsasau //
saheva muralī cobhe vādayantyau pṛthakpṛthak

satyeśāne hemavarṇe uttarasyāṃ tato nyaset //
śyāmāṃśuke vādayantyāvubhe te parivādinīm

anugrahākhyā paṭṭikāyāṃ sthāpyaikā ca kṛtāñjaliḥ //
sarvā etāstu kartavyā dvibhujāḥ suvibhūṣaṇāḥ

pīṭhopari sitadvīpaṃ kurvīta śvetavāsasā //
tanmadhye'ṣṭadalaṃ padmaṃ kurvītojvalakarṇikam

dvādaśāṃśaṃ parityajya padmakṣetrasya bāhyataḥ //
vṛttaistribhistasya madhyaṃ vibhajetsamabhāgataḥ

tatrādyaṃ karṇikāsthānaṃ kesarāṇāṃ tu madhyamam //
patrāṇāṃ tu tṛtīyaṃ syāddalāgrāṇi tu bāhyataḥ

paritastasya ca puraṃ caturdvāraṃ prakalpayet //
raṅgadravyairbahuvidhairharidrākuṃkumādibhiḥ

kurvīta taṇḍulairvāpi tatra padmādi śobhanam //
padmasya karṇikāṃ madhye hemavarṇā suśobhayet

śoṇavarṇāni patrāṇi paritastasya cārcakaḥ //
kuryādaṣṭāpyaṣṭadikṣu svarṇavarṇāni vā mune

pūrvaṃ tu gopuraṃ śoṇaṃ śyāmaṃ kuryācca dakṣiṇam //
pītavarṇaṃ paścimaṃ ca sphaṭikābhaṃ tathottaram

antarāle ca puṣpāṇi citrāṇi purapadmayoḥ//
kṛtvā madhye'tha śrīkṛṣṇaṃ tadvāme rādhikāṃ nyaset

rādhākṛṣṇasyāsya tataḥ pṛṣṭhe saṃkarṣaṇaṃ nyaset//
caturbāhuṃ dhṛtacchatraṃ gaurāṅgaṃ nīlavāsasam

dakṣe nyasedbhagavataḥ pradyumnaṃ pītavāsasam //
caturbhujaṃ ghanaśyāmaṃ dhṛtvā cāmaramāsthitam

vāme'niruddhaṃ ca harernyasedaruṇavāsasam //
indranīlamaṇiśyāmaṃ saṃsthitaṃ dhṛtacāmaram

trayopyete tu kartavyā nānālaṃkāraśobhitāḥ //
anarghyaratnamukuṭāstāruṇyena manoharāḥ

tato'vatārāṃstu hareḥ kesareṣvaṣṭasu kramāt //
ekaikasminnyased dvaudvāvaṣṭasvevaṃ hi ṣoḍaśa

sthāpayedvāmanaṃ buddhaṃ pūrvasminkesare'grataḥ //
ghanaśyāmāvubhau hyetau karuṇau brahmacāriṇau

sitāṃśukau kare dakṣe bibhratau phullapaṅkajam //
abhayaṃ vāmahaste ca śāntau yajñopavītinau

kalkinaṃ parśurāmaṃ ca vahnikoṇe'tha vinyaset //
khaṅgapāṇistatra kalkī parśupāṇistathā'paraḥ

ubhau gaurau ca tāmrākṣau jaṭilau sitavāsasau //
yajñopavītinau kāryau tyaktakrodhamahārayau

hayagrīvavarāhau ca sthāpayedyāmyakesare //
hayagrīvo hayāsyaḥ syānnarāṃgaśca caturbhujaḥ

śaṅkhādibhṛtsvarṇavarṇo dhṛtadivyasitāmbaraḥ //
varāhastu varāhāsyo narāṃgaḥ syāccaturbhujaḥ

śaṅkhacakragadābjāni dadhatpītāmbaraṃ tathā //
madhupiṃgalavarṇaśca karttavyo dvibhujo'tha vā

matsyakūrmmau nairṛte ca sthāpayetkesare tataḥ //
kaṭeradhastadākārāvūrddhvaṃ tau tu narākṛtī

vāme śaṃkhaṃ gadāṃ dakṣe pāṇau ca dadhatāvubhau //
śyāmasundaradehau ca karttavyau dhṛtabhūṣaṇau

dhanvantariṃ nṛsiṃhaṃ ca paścime kesare nyaset //
dhanvantariḥ śuklavāsā gaurāṃgo'mṛtakumbhadhṛt

siṃhavaktro nṛsiṃhastu nṛdehaḥ kesarānvitaḥ //
nīlotpalābho dvibhujo gadācakradharo bhaveta

vāyau nyasedubhau haṃsadattātreyau jaṭādharau //
yogiveṣau sitau daṇḍakamaṇḍalukarau tathā

uttare kesare vyāsaṃ nyasedgaṇapatiṃ tataḥ //
tatra vyāso viśālākṣaḥ kṛṣṇavarṇaḥ sitāmbaraḥ

dvibhujo dhṛtavedaśca supiśaṃgajaṭādharaḥ //
sitayajñopavītaśca karttavyaḥ sapavitrakaḥ

gajāsya ekadantaśca rakto gaṇapatirbhavet //
raktāmbaradharaścaiva nāgayajñopavītavān

tundilaśca caturbāhuḥ pāśāṅkuśavarāndadhat //
kareṇaikena ca dadhadramyāṃ pustakalekhinīm

nyasetkesara īśāne kapilaṃ pūjakastataḥ //
sanatkumāraṃ ca muniṃ naiṣṭhikabrahmacāriṇam

śuklāṃgaḥ kapilaḥ kāryo dhṛtacārusitāmbaraḥ //
dadhatkarābhyāmambhojamabhayaṃ śāntavigraham

pañcavārṣikabālābho digvastro'lpajaṭādharaḥ //
sanatkumāraśca muniḥ karttavyaḥ pūjakena tu

saṃsthāpya kesareṣvitthaṃ devatāḥ paṅkajasya tu //
nyasecca dalamadhyeṣu pārṣadānarccako'ṣṭasu

viṣvaksenaṃ ca garuḍaṃ tatrādau pūrvato nyaset //
tato dakṣakrameṇaiva prabalaṃ ca balaṃ nyaset

kumudaṃ kumudākṣaṃ ca sunandaṃ nandameva ca //
śrutadevaṃ jayantaṃ ca vinyasedvijayaṃ jayam

tataḥ pracaṇḍaṃ caṇḍaṃ ca puṣpadantaṃ ca sātvatam //
dvaudvāvevaṃ krameṇaiva sthāneṣvaṣṭasu vinyaset

caturbhujāḥ sarva ete śaṅkhāryabjagadādharāḥ //
kāryāḥ kiriṭinaḥ śyāmāḥ pītavastrāḥ subhūṣaṇāḥ

dalamadhyāntarāleṣu siddhīraṣṭasu vinyaset //
nānā maṃgalavādyānāṃ vādane nipuṇāḥ kramāt

aṇimā laghimā prāptiḥ prākāmyaṃ mahimā tathā //
īśitā vaśitā caivāṣṭamī kāmāvasāyitā

etāḥ suvarṇavarṇābhāḥ sarvābharaṇabhūṣitāḥ //
veṇuvīṇādihastāśca karttavyāścitravāsasaḥ

dalāgreṣvaṣṭasu tato vedāñchāstrāṇi ca nyaset //
tatra vedānnyaseddikṣu śāstrāṇi tu vidikṣu saḥ

pūrve nyasettu ṛgvedamakṣamālādharaṃ sitam //
kharvaṃ lambodaraṃ saumyaṃ padmanetraṃ sitāmbaram

yāmye nyasedyajurvedaṃ madhyamāṃgaṃ kṛśodaram //
piṃgākṣaṃ sthūlakaṇṭhaṃ ca pītaṃ cāruṇavāsasam

akṣasrajaṃ kare vāme dakṣe vajraṃ ca bibhratam //
paścime sāmavedaṃ ca prāṃśumādityavarcasam

dakṣe'kṣamālāṃ vāme ca dhṛtavantaṃ kare daram //
svarṇavastraṃ viśālākṣaṃ vinyasedgāyanodyatam

atharvāṇaṃ nyasetsaumye sitāṃgaṃ nīlavāsasam //
vāme'kṣasūtraṃ dakṣe ca khaṭvāṃgaṃ bibhrataṃ kare //
vahnyojasaṃ ca tāmrākṣaṃ vayasā sthaviraṃ tathā

agnikoṇe dharmaśāstraṃ nyasecca kamalāsanam //
śvetaṃ ca bibhrataṃ dorbhyāṃ muktāmālāṃ tathātulām

dīrghakeśanakhaṃ sāṃkhyaṃ nairṛte tundilaṃ nyaset /३/
japamālāṃ ca daṇḍaṃ ca karābhyāṃ bibhrataṃ sitam

nyasedvāyau tato yogaṃ svarṇavarṇaṃ kṛśodaram //
ūrunyastakaradvandvaṃ svanāsāgrakṛtekṣaṇam

pañcarātraṃ tatheśāne dhavalaṃ vanamālinam//
nyasetkarābhyāṃ dadhatamakṣamālāṃ ca lāṃgalam

eṣāṃ caturṇāṃ vāsāṃsi śvetasūkṣmaghanāni ca//
karttavyāni tathākṣīṇi padmapatrāyatāni ca

agrāṇāmantarāleṣu maharṣīṃśca sayoṣitaḥ //
vinyasetpaṭhato vedānpūrvāgneyādyanukramāt

marīciṃ kalayā yuktamatriṃ cāpyanasūyayā //
śraddhayāṃgirasaṃ sākaṃ pulastyaṃ ca havirbhuvā

gatyā yuktaṃ ca pulahaṃ kriyayā ca saha kratum //
khyātyā bhṛgumarundhatyā vaśiṣṭhaṃ saha vinyaset

dvibhujāḥ sarva evaite jaṭāśmaśrudharāḥ kṛśāḥ //
kāryāstapasvino daṇḍāndadhataśca kamaṇḍalūn

padmādbahirnyaseccā'ṣṭau diśāsu vidiśāsu ca //
dikpālānindrapramukhānsahayānānyathādiśam

prācyāmairāvatārūḍhaṃ nyasedindraṃ caturbhujam//
vajrāṃkuśāmbujavarāndadhataṃ svarṇasannibham

kausumbharamyavasanaṃ nānālaṃkāraśobhitam //
śoṇāpāṃgaṃ viśālākṣaṃ sarvalakṣaṇalakṣitam

agnikoṇe nyasedagniṃ tāmravarṇaṃ caturbhujam //
dadhānaṃ pāṇibhiścaiva śūlaṃ śaktiṃ srucaṃ sruvam

catuḥśuke haimarathe niṣaṇṇaṃ vāyusārathim //
trinetraṃ dhūmravasanaṃ piṅgaśmaśrujaṭekṣaṇam

yamaṃ nyaseddakṣiṇataḥ śyāmaṃ cāmīkarāmbaram//
caturbhujaṃ daṇḍakhaḍgaparaśuṃ pāśadhāriṇam//
unmattamahiṣārūḍhaṃ nānābhūṣaṇabhūṣitam

ūrddhvakeśaṃ virūpākṣaṃ nairṛtaṃ nairṛte nyaset//
khaḍgaṃ pāśaṃ ca dadhataṃ dvibhujaṃ naravāhanam

hariśmaśruṃ dhūmravarṇaṃ parivītāsitāmbaram //
hāṭakānekabhūṣāḍhyamavaiṣṇavabhayaṃkaram

tataḥ pratīcyāṃ varuṇamindranīlamaṇiprabham //
śvetāmbaraṃ caturbāhuṃ muktāhāra vibhūṣitam

saptahaṃsarathārūḍhaṃ dorbhyāṃ pāśaṃ ca bibhratam //
anyābhyāṃ ratnapātraṃ ca śaṃkhaṃ ca dadhataṃ nyaset

vāyau vāyuṃ haridvarṇaṃ dvibhujaṃ kṛṣṇavāsasam //
pṛṣatsthaṃ muktakeśaṃ ca vyāttāsyaṃ dhvajinaṃ nyaset

saumye nyasetkuberaṃ ca svarṇavarṇaṃ caturbhujam //
gadāśaktitriśūlāni ratnapātraṃ ca bibhratam

nīlāmbaraṃ śmaśrulaṃ ca śibikāyāṃ samāsthitam //
piśaṃgavāmanayanaṃ naikabhūṣaṃ ca varmiṇam

īśāne'tha mūhārudramarddhanārīśvaraṃ nyaset //
vāmārddhe pārvatī kāryā dakṣārddhe tatra śaṃkaraḥ

īśvarārddhe jaṭājūṭaṃ kartavyaṃ candrabhūṣitam //
umārddhe tilakaṃ kāryaṃ sīmantamalike tathā

bhasmanoddhūlitaṃ cārddhamarddhaṃ kuṃkumabhūṣitam //
nāgopavītaṃ cāpyarddhamarddhaṃ hāravibhūṣitam

vāmārddhe ca stanaḥ pīnaḥ karttavyaḥ kaṃcukīvṛtaḥ //
kaṭyāṃ ca raśanā haimī pāde kāñcananūpuram

kausumbhaṃ vasanaṃ caiva karau kaṃkaṇabhūṣitau //
triśūlamakṣasūtraṃ ca dadhatau ratnamudrikau

dakṣārddhe raśanā sārpī kāryā vastraṃ gajājinam //
karau ca nāgavalayau darpaṇotpaladhāriṇau

evaṃvidhaṃ mahādevaṃ nyasedvṛṣabhavāhanam //
itthamaṣṭadigīśānāṃ kuryātsthāpanamarcakaḥ

purādbahistataścāṣṭau sthāpayedarcako grahān//
svasvadikṣu sthitānsvasvānyārūḍhānsyandanāni ca

prācyāṃ diśi nyasettatra bhāskaraṃ pītavāsasam //
sindūravarṇaṃ dvibhujaṃ padmahastaṃ rathe sthitam

ekaṃ cakraṃ dvādaśāraṃ rathasyāsyātitejasaḥ //
saptāśvāśca haridvarṇā vāme santi niyojitāḥ

agnikoṇe tataḥ sthāpyo bhṛguḥ śvetaḥ sitāmbaraḥ //
daṇḍaṃ kamaṇḍaluṃ bibhraddvibāhuḥ saumyadarśanaḥ

citravarṇāśvadaśake sthito hemamaye rathe //
dakṣiṇe ca nyasedbhaumaṃ raktaṃ raktāmbaraṃ tathā

caturbhujaṃ gadāśaktitriśūlavaradhāriṇam //
tasya haimaṃ rathaṃ kuryādaruṇāṣṭahayānvitam

rāhuśca nairṛte koṇe nīlavāsāścaturbhujaḥ //
karālāsyastamorūpaścarmāsiśaktiśūladhṛt

bhṛṅgavarṇāṣṭaturage sthitaḥ kāryastvayorathe //
sauriśca paścime sthāpya indranīlasamadyutiḥ

dhanvī triśūlī dvibhujo mandākṣaścāsitāmbaraḥ //
śabalāṣṭāśvasaṃyukte sthitaḥ kārṣṇāyase rathe

vāyukoṇe tataścandraṃ sthāpayecca sitāmbaram //
śvetavarṇaṃ gadāhastaṃ dvibhujaṃ ca rathe sthitam

śatāracakratritaye syandane tasya cāmmaye //
kundābhāḥ santyubhayato yojitāsturagā daśa

uttare dvibhujaḥ saumyo varābhayakaroruṇaḥ //
haridvāsāṣṭapiṃgāśve kāryo haimarathe sthitaḥ

īśāne ca guruḥ sthāpyo hemavarṇaḥ sitāmbaraḥ //
dvibhujaḥ padmanayano dhṛtadaṇḍakamaṇḍaluḥ //
pāṇḍurāṣṭahaye haime niṣaṇṇaḥ syandanottame

aṃgadevānbhagavataḥ sthāpayeditthamarcakaḥ //
karṇikādripurāntāntasthāneṣu kramaśo'khilān

vāsudevāṃgadevānāṃ nyasenmūrttīstu vaibhavī //
pūgaphalānītarastu nyasetpuṣpākṣatādi vā

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīvāsudevamāhātmye kriyāyoge pūjāmaṇḍalaracanāvidhinirūpaṇaṃ nāma saptaviṃśo'dhyāyaḥ