Skanda Purana · Chapter 2.26

// nārada uvāca // //
itthaṃ tadvacanaṃ śrutvā dharmadattaḥ savismayaḥ //
praṇamya daṇḍavadbhūmau vākyametaduvāca ha

//
// dharmadatta uvāca // //
ārādhayaṃti sarve'pi viṣṇuṃ bhaktā'rtināśanam //
yajñairdānairvrataistīrthaistapobhiśca yathāvidhi

viṣṇuprītikaraṃ teṣāṃ kiṃcitsānnidhyakārakam //
yatkṛtvā tāni cīrṇāni sarvāṇyapi bhavaṃti hi

// gaṇāvūcatuḥ // //
sādhu pṛṣṭaṃ tvayā vipra śṛṇuṣvaikāgramānasaḥ //
setihāsakathāṃ puṇyāṃ kathyamānāṃ purābhavām

kāṃcipuryāṃ purā colaścakravartī nṛpo'bhavat //
yasyākhyayaiva te deśāścolā iti prathāṃ gatāḥ

yasmiñchāsati bhūcakraṃ daridro vā'pi duḥkhitaḥ//
pāpabuddhiḥ sarugvāpi naiva kaścidabhūnnaraḥ

yasyāpyunnatayajñasya tāmraparṇyāstaṭāvubhau //
suvarṇayūpaiḥ śobhāḍhyāvāstāṃ caitrarathopamau

sa kadācidagādrājā hyanaṃtaśayanaṃ dvija //
yatrā'sau jagatāṃ nātho yoganidrāmupāśritaḥ

tatra śrīramaṇaṃ devaṃ saṃpūjya vidhivannṛpaḥ //
maṇimuktāphalairdivyaiḥ svarṇapuṣpaiśca śobhanaiḥ

praṇamya daṇḍavadbhūmāvupaviṣṭaḥ sa tatra vai //
tāvadbrāhmaṇamāyāṃtamapaśyaddevasannidhau

devārcanārthaṃ pāṇau tu tulasyudakadhāriṇam//
svapurīvāsinaṃ tatra viṣṇudāsāhvayaṃ dvijam

sa tatrābhyetya viprarṣirdevadevamapūjayat //
viṣṇusūktena saṃsnāpya tulasīmaṃjarīdalaiḥ

tulasīpūjayā tasya ratnapūjāṃ purā kṛtām //
ācchāditāṃ samālokya rājā kuddho'bravīdidam

// cola uvāca // //
māṇikyasvarṇapūjā'tra śobhāḍhyā yā kṛtā mayā //
viṣṇudāsa kathaṃ seyamācchannā tulasīdalaiḥ

viṣṇubhaktiṃ na jānāsi varāko'si mato mama //
yastvimāmatiśobhāḍhyāṃ pūjāmācchādayasyaho //

iti tadvacanaṃ śrutvā sakrodhaḥ sa dvijottamaḥ //
rājño gauravamullaṃghya jagāda vacanaṃ tadā

// viṣṇudāsa uvāca // //
rājanbhaktiṃ na jānāsi garvito'si nṛpaśriyā //
kiyadviṣṇuvrataṃ pūrvaṃ tvayā cīrṇaṃ vadasva tat

//gaṇāvūcatuḥ//
tadbrāhmaṇavacaḥ śrutvā prahasya sa nṛpottamaḥ//
viṣṇudāsaṃ tadā garvāduvāca vacanaṃ dvijam

//rājovāca//
itthaṃ cedvadase vipra viṣṇubhaktyā'tigarvitaḥ//
bhaktiste kiyatī viṣṇordaridrasyā'dhanasya ca

yajñadānādikaṃ naiva viṣṇostuṣṭikaraṃ kṛtam //
nā'pi devālayaṃ pūrvaṃ kṛtaṃ vipra tvayā kvacit

īdṛśasyā'pi te garva eṣa tiṣṭhati bhaktitaḥ //
tacchṛṇvaṃtu vaco me'dya sarve'pyete dvijātayaḥ

sākṣātkāramahaṃ viṣṇoreṣa vādo gamiṣyati //
paśyaṃtu sarve'pi tato bhaktiṃ jñāsyaṃti cāvayoḥ

// gaṇāvūcatuḥ // //
ityuktvā sa nṛpo'gacchannijarājagṛhaṃ tadā //
ārabhadvaiṣṇavaṃ satraṃ kṛtvā''cāryaṃ tu mudgalam

ṛṣisaṃghasamājuṣṭaṃ bahvannaṃ bahudakṣiṇam //
yacca brahmakṛtaṃ pūrvaṃ gayākṣetre samṛddhimat

viṣṇudāso'pi tatraiva tasthau devālaye vratī //
yathoktaniyamānkurvanviṣṇostuṣṭikarānsadā

māghorjayorvrataṃ samyaktulasīvanapālanam //
ekādaśyāṃ harerjāpyaṃ dvādaśākṣaravidyayā

upacāraiḥ ṣoḍaśabhirnṛtyagītādimaṃgalaiḥ //
nityaṃ viṣṇostathā pūjāṃ vratānyetāni so'karot

nityaṃ saṃsmaraṇaṃ viṣṇorgacchanbhuvi svapannapi //
sarvabhūtasthitaṃ viṣṇumapaśyatsamadarśanaḥ //

māghakārtikayornityaṃ viśeṣaniyamānapi //
akarodviṣṇutuṣṭyarthaṃ sodyāpanavidhiṃ tathā

evaṃ samārādhayatoḥ śriyaḥ patiṃ tayośca coleśvaraviṣṇudāsayoḥ //
agāddhi kālaḥ sumahānvratasthayostanniṣṭhasarveṃdriyakarmaṇostadā

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe kārtikamāsamāhātmye colarājaviṣṇudāsabrāhmaṇavivādakathanaṃnāma ṣaḍviṃśo'dhyāyaḥ