Skanda Purana · Chapter 2.25

// dharmadatta uvāca // //
vilayaṃ yāṃti pāpāni tīrthe dānavratādibhiḥ //
pretadehasthitāyāste teṣu naivā'dhikāritā

tvadglānidarśanādasmātkhinnaṃ ca mama mānasam //
na vai nirvṛtimāyāti tvāmanuddhṛtya duḥkhitām

tasmādājanmacaritaṃ yanmayā kārtikavratam //
tatpuṇyasyārddhabhāgena sadgatiṃ tvamavāpnuhi

// nārada uvāca //
ityuktvā dharmadatto'sau yāvattāmabhyaṣecayat //
tulasīmiśratoyena śrāvayandvādaśākṣaram

tāvatpretatvanirmuktā jvaladagniśikhopamā //
divyarūpadharā jātā lāvaṇyena yatheṃdirā

tataḥ sā daṃḍavadbhūmau praṇanāmātha taṃ dvijam //
uvāca sā tadā vākyairharṣagadgadabhāṣiṇī

// // kalahovāca // //
tvatprasādāddvijaśreṣṭha vimuktā nirayādaham //
pāpābdhau majjamānāyāstvaṃ naubhūto'si me dhruvam

// nārada uvāca // //
itthaṃ vadantī sā vipraṃ dadarśā''yātamaṃbarāt //
vimānaṃ bhāsvaraṃ yuktaṃ viṣṇurūpadharairgaṇaiḥ

atha sā tadvimānā'gryaṃ dvāḥsthābhyāmavaropitā //
puṇyaśīlasuśīlābhyāmapsarogaṇasevitā

tadvimānaṃ tadā'paśyaddharmadattaḥ savismayaḥ//
papāta daṇḍavadbhūmau dṛṣṭvā tau viṣṇurūpiṇau

puṇyaśīlasuśīlau ca tamutthāpyā''nataṃ dvijam //
abhinandya tato vākyamūcaturdharmasaṃyutam

// gaṇāvūcatuḥ // //
sādhusādhu dvijaśreṣṭha yastvaṃ viṣṇurataḥ sadā //
dīnā'nukampī sarvajño viṣṇuvrataparāyaṇaḥ

ā bālatvācchubhaṃ tvetadyattvayā kārtikavratam //
kṛtaṃ tasyā'rddhadānena puṇyaṃ dvaiguṇyamāgamat

janmāṃtaraśatodbhūtaṃ pāpaṃ tadvilayaṃ gatam//
snānaireva gataṃ pāpaṃ yadasyāḥ pūrvakarmajam

harijāgaraṇādyaiśca vimānamidamāsthitā//
vaikuṇṭhe nīyate sādho nānābhogayutā tviyam

dīpadānabhavaiḥ puṇyaistejaḥsārūpyamāsthitā //
tulasīpūjanādyaiśca kārtikavratakaiḥ śubhaiḥ //
viṣṇusānnidhyagā jātā tvayā dattaiḥ kṛpānidhe

tvamapyasya bhavasyāṃte bhāryābhyāṃ saha yāsyasi //
vaikuṇṭha bhuvanaṃ viṣṇoḥ sānnidhyaṃ ca sarūpatām

te dhanyāḥ kṛtakṛtyāste teṣāṃ ca saphalo bhavaḥ//
yairbhaktyārādhito viṣṇurdharmadatta yathā tvayā //

samyagārādhito viṣṇuḥ kiṃ na yacchati dehinām //
auttānacaraṇiryena dhruvatve sthāpitaḥ purā

yannāmasmaraṇādeva dehino yāṃti sadgatim

grāhagrasto hi nāgeṃdro yannāmasmaraṇātpurā //
vimuktaḥ saṃnidhiṃ prāpto jāto'yaṃ jayasaṃjñakaḥ

yatastvayā'rcito viṣṇustatsānnidhyaṃ prayāsyasi //
bahūnyabdasahasrāṇi bhāryādvayayutaḥ kila

tataḥ puṇyakṣayejāte yadā yāsyasi bhūtalam //
sūryavaṃśodbhavo rājā vikhyātastvaṃ bhaviṣyasi

nāmnā daśarathastatra bhāryādvayayutaḥ punaḥ //
tṛtīyayā'nayā cā'pi yā te puṇyārddhabhāginī

tatrā'pi tava sānnidhyaṃ viṣṇuryāsyati bhūtale //
ātmānaṃ tava putratve prakalpyā'marakāryakṛt

tava janmavratādasmādviṣṇusaṃtuṣṭikārakāt //
na yajñā na ca dānāni na tīrthānyadhikāni vai

dhanyo'si viprāgrya yatastvayaitadvrataṃ kṛtaṃ tuṣṭikaraṃ jagadguroḥ//
yadardhabhāgātsaphalā murāreḥ praṇīyate'smābhiriyaṃ salokatām

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe kārtikamāsamāhātmye dharmadattopākhyāne kalahāmokṣakathanaṃnāma pañcaviṃśo'dhyāyaḥ