Skanda Purana · Verses 2.24-2

// jaiminiruvāca // //
āgatya ca jagannāthaṃ cirādutkaṃṭhamānasaḥ //
daṃḍavatpraṇanāmāsau ghanaromāṃcakaṃcukaḥ

namo brahmaṇyadevāya gobrāhmaṇahitāya ca //
praṇatārtivināśāya caturvargaikahetave

hiraṇyagarbhapuruṣapradhānavyaktarūpiṇe //
ॐ namo vāsudevāya śuddhajñānasvarūpiṇe

ityuccaranstutiṃ bhūpaḥ sānaṃdāśruvilocanaḥ //
pradakṣiṇaṃ punaḥ kurvannanāma ca punaḥpunaḥ

tato'nyā devatā yā vai tatrāgacchanmudānvitāḥ //
tuṣṭuvuḥ praṇatā devaṃ kṛtāṃjalipuṭā mudā

// devā ūcuḥ // //
sahasraśīrṣā puruṣaḥ sahasrākṣaḥ sahasrapāt //
sa bhūmiṃ sarvato vyāpya adhyatiṣṭhaddaśāṃgulam //

yaḥ pumānparamaṃ brahma paramātmeti gīyate //
bhūtaṃ bhavyaṃ bhaviṣyaṃ ca sarvaṃ puruṣa eva tat

etāvānasya mahimā jyāyāneṣa pumānprabhuḥ //
pādo'sya viśvā bhūtāni tripādasyāmṛtaṃ divi

chandāṃsi jajñire tvattastvatto yajñapumānapi //
tvatto'śvāśca vyajāyaṃta gāvo meṣādayastathā

brāhmaṇā mukhato jātā bāhujāḥ kṣatriyāstava //
viśastavorujā padbhyāṃ tathā śūdrāḥ samāgatāḥ

manasaścaṃdramā jātaścakṣuṣaste divākaraḥ//
karṇābhyāṃ śvasanaḥ prāṇairjihvāyā havyavāḍapi

nābhito gaganaṃ dyauśca mūrdhnaste samavarttata //
pādābhyāṃ te dharā jātā diśaścāṣṭau śrutergatāḥ

saptāsanparidhayastvatta ekaviṃśatsamicca vai //
carācarāḥ sarvabhāvāstvatta eva hi jajñire

tvameva jagatāṃ nāthastvameva paripālakaḥ //
ugrarūpaśca saṃhartā tvameva parameśvara

tvameva yajño yajñāṃśastvaṃ yajñeśaḥ parātparaḥ //
śabdabrahmaparaṃ tvaṃ hi śabdabrahmāsi viśvarāṭ

svarāṭ samrāḍjagannātha virāḍasi jagatpate //
adhaścordhvaṃ ca tiryaktvaṃ tvayā vyāptaṃ jaganmaya

prāpnuvaṃti paraṃ sthānaṃ tvāṃ yajaṃtaśca yājñikāḥ//
bhojyaṃ bhoktā havirhotā havanaṃ tvaṃ phalapradaḥ

samastakarmabhoktā tvaṃ sarvakarmātmakaḥ prabho //
sarvakarmopakaraṇaṃ sarvakarmaphalapradaḥ

karmaprerayitā tvaṃ hi dharmakāmārthasiddhidaḥ //
tvāmṛte muktidaḥ ko'nyo hṛṣīkeśa namo'stu te

namo'stvanantāya sahasramūrttaye sahasrapādākṣiśirorubāhave //
sahasranāmne puruṣāya śāśvate sahasrakoṭīyugadhāriṇe namaḥ

vayaṃ cyutādhikārāstvāṃ prapannāḥ śaraṇaṃ prabho //
trāhi naḥ puṃḍarīkākṣa agatīnāṃ gatirbhava

saṃsārapatitasyaiko jantostvaṃ śaraṇaṃ prabho //
tvatsṛṣṭau tvādṛśo nāsti yo dīnaparipālakaḥ

dīnānāthaikaśaraṇaṃ pitā tvaṃ jagataḥ prabho //
pātā poṣṭā tvameveśa sarvāpadvinivārakaḥ

trāhi viṣṇo jagannātha trāhi naḥ parameśvara //
tvāmṛte kamalākāṃta kaḥ śaktaḥ parirakṣaṇe

antaryāminnamaste'stu sarvatejonidhe namaḥ

iti stuvaṃtaste devāḥ praṇipatya punaḥpunaḥ//
iṃdradyumnena sahitā bahirbhūya dvijottamāḥ

kṣetraṃ śrīnarasiṃhasya gatvā taṃ praṇipatya ca //
namaskṛtya parāṃ bhaktiṃ kṛtvābhyarcya nṛkesarim //

nīlācalādreḥ śikharaṃ yatra prāsāda uttamaḥ //
yayuste padmanidhinā sārddhaṃ saṃbhārakāraṇāt

dadṛśuste mahāprāṃśuṃ vyāptaṃ gaganamaṇḍale //
uttiṣṭhaṃtaṃ viṃdhyagiriṃ roddhuṃ bhānorgatiṃ kimu

vyaśnuvānaṃ diśaḥ sarvā vicitraghaṭanojjvalam //
bahukālavyatikrāṃtasvastibhaṃgivicitrakam //

tataśca ciṃtayāmāsa indradyumnaḥ sa vaiṣṇavaḥ //
ghaṭanārthe mayā yātaḥ satyalokamitaḥ purā

sucirāddṛṣṭipathagaḥ pūrṇaḥ prāsāda uttamaḥ //
anugrahādvai devasya nātra mānuṣapauruṣam

manvaṃtarasamāptiḥ kva sūryacandreṃdrarodhikā //
tathāpi tiṣṭhate cāyaṃ prāsādo hyeṣa durlabhaḥ /

valmīkasadṛśā hyete prāsādā mānuṣaiḥ kṛtāḥ //
śīryaṃti rohaṇairvṛkṣaiḥ svalpakālagatāyuṣaḥ

madanukrośabuddhyā tu rakṣitaṃ bhavanaṃ hareḥ //
tatastānsa sahāyānvai jagāda praśrayaṃ vacaḥ

jānīta jagadīśasya prāsādaṃ kāritaṃ mayā //
āvirbabhūva bhagavāndārurūpavapuḥ svayam //
tadāṃtarikṣagā vāṇī māmuvācāśarīriṇī

sahasrapāṇisaṃmitaṃ nīlādreḥ śikharopari //
prāsādaṃ kārayasveti sthitaye jagadīśituḥ

etatpratiṣṭhānavidhau svayamatrāgamiṣyati //
padmayoniḥ svayaṃ sārddhaṃ siddhabrahmarṣidaivataiḥ

tadatra kriyate ko vā saṃbhāro jñāyate katham //
ityuktavaṃtaṃ te procurdevā bhagnādhikāriṇaḥ

// devā ūcuḥ // //
na jānīmo vayamapi tadasmākaṃ gururguruḥ //
idānīṃ na vaśe'smākaṃ sa hi svargaparo hitaḥ

// padmanidhiruvāca // //
svāminvidheranujñānādāgato'smi tvayā saha //
kartavyaṃ kiṃ mayā cātra kiṃ vā vastu pratīkṣyate

// jaiminiruvāca // //
iti hyālapyamānānāṃ nāradaḥ purataḥ sthitaḥ //
brahmaṇā preṣitaḥ pūrvaṃ sarvaśāstraviśāradaḥ

sarvasaṃbhāravastūni yathāśāstraṃ mune kuru //
saṃpādayiṣyati tava śāsanātpadmako nidhiḥ

taṃ dṛṣṭvā te mudā yuktā uttasthurbrahmaṇaḥ sutam //
ṣaḍarghyapūjayā tasya pūjāṃ cakre nṛpottamaḥ

praṇemuste'pi taṃ devā manuṣyākāradhāriṇaḥ //
ūce tamiṃdradyumno'pi pratiṣṭhāvidhivastuni //

nāhaṃ vedmi muniśreṣṭha cirāttyaktaḥ purodhasā //
ādeśaya kramādbrahmansaṃpādyaṃ yadyadeva hi

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe puruṣottamakṣetramāhātmye jaiminiṛṣisaṃvāde caturviṃśo'dhyāyaḥ