Skanda Purana · Chapter 2.24

// pṛthuruvāca // //
yadūrjavratinaḥ puṃsaḥ phalaṃ mahadudādṛtam //
tatpunarbrūhi māhātmyaṃ kena cīrṇamidaṃ śubham

// nārada uvāca // //
āsītsahyādriviṣaye karavīrapure purā //
brāhmaṇo dharmavitkaściddharmadatteti viśrutaḥ

viṣṇuvratakaraḥ samyagviṣṇupūjārataḥ sadā //
kadācitkārtike māsi harijāgaraṇāya saḥ

rātryāṃ turyāvaśeṣāyāṃ jagāma harimandiram//
haripūjopakaraṇānpragṛhya vrajatā tadā

tena dṛṣṭā samāyātā rākṣasī bhīmadarśanā //
tāṃ dṛṣṭvā bhayavitrastaḥ kaṃpitāvayavastadā

pūjopakaraṇaiḥ sarvaiḥ payobhiścāhanadbhayāt //
saṃsmṛtya taddharernāma tulasīyuktavāriṇā //
tena vai hatamātre tu pāpaṃ tasyā hyagāllayam

atha saṃsmṛtya sā pūrvajanmakarmavipākajām //
svāṃ daśāmabravīdvipraṃ daṃḍavacca praṇamya vai

// kalahovāca // //
pūrvakarmavipākena daśāmetāṃ gatāsmyaham //
tatkathaṃ nu punarvipra prayāsyāmyuttamāṃ gatim

// nārada uvāca // //
tāṃ dṛṣṭvā praṇatāṃ samyagvadamānāṃ svakarma tat //
atīva vismito viprastadā vacanamabravīt

//
// dharmadatta uvāca // //
kena karmavipākena tvaṃ daśāmīdṛśīṃ gatā //
kutratyā kā ca kiṃ śīlā tatsarvaṃ kathayasva me

// kalahovāca // //
saurāṣṭranagare brahmanbhikṣurnāmā'bhavaddvijaḥ //
tasyāhaṃ gṛhiṇī pūrvaṃ kalahākhyā'tiniṣṭhurā

na kadācinmayā bharturvacasā'pi śubhaṃ kṛtam //
nā'rpitaṃ tasya miṣṭānnaṃ bharturvacanaśīlayā

kalahapriyayā nityaṃ mayodvignamanā yadā //
pariṇetuṃ yadā'nyāṃ sa matiṃ cakre patirmama

tato garaṃ samādāya prāṇāstyaktā mayā dvija //
atha baddhvā badhyamānāṃ māṃ ninyuryamakiṃkarāḥ

yamaśca māṃ tadā dṛṣṭvā citraguptamapṛcchata //

// yama uvāca // //
anayā kiṃ kṛtaṃ karma citragupta vilokaya //
prāpnotveṣā ca tatkarma śubhaṃ vā yadi vā'śubham

// // kalahovāca // //
citraguptastadā vākyaṃ bhartsayanmāmuvāca saḥ //
// citragupta uvāca // //
anayā tu kṛtaṃ karma śubhaṃ kiṃcinna vidyate

miṣṭānnaṃ bhuṃjamāneyaṃ na bhartari tadarpitam //
ataśca valgulīyonyāṃ svaviṣṭhādā'vatiṣṭhatu

bharturdveṣāttadāpyeṣā nityaṃ kalahakāriṇī //
viṣṭhādāṃ sūkarīṃ yoniṃ tasmāttiṣṭhatviyaṃ hare

pākabhāṃḍe sadā bhuṃkte bhuṃkte caikā yatastataḥ //
tasmādeṣā biḍālyastu svajātā'patyabhakṣiṇī

bhartāramapi coddiśya hyātmaghātaḥ kṛto'nayā //
tasmātpretaśarīre'pi tiṣṭhatvekā'tiniṃditā

ataścaiṣā maruddeśaṃ prāpitavyā bhaṭairiyam //
tatra pretaśarīrasthā ciraṃ tiṣṭhatviyaṃ tataḥ

ūrdhvaṃ yonitrayaṃ caiṣā bhunaktvaśubhakāriṇī

// kalahovāca // //
sāhaṃ paṃcaśatābdāni pretadehe sthitā kila//
kṣutṛḍbhyāṃ pīḍitā''viśya śarīraṃ vaṇijasya ca//
āyātā dakṣiṇaṃ deśaṃ kṛṣṇāveṇyośca saṃgamam

tattīraṃ saṃśritā yāvattāvattasya śarīrataḥ //
śivaviṣṇugaṇairdūramapakṛṣṭā balādaham

tataḥ kṣutkṣāmayā dṛṣṭo mayā hi tvaṃ dvijottama //
tvaddhastatulasīvārisaṃsargagatapāpayā

tatkṛtyaṃ kuru vipreṃdra kathaṃ muktimiyāmyaham//
yonitrayādagrabhavādasmācca pretadehataḥ

itthaṃ viciṃtya kalahāvacanaṃ dvijāgryastatkarmapākabhayavismayaduḥkhayuktaḥ //
tadglānidarśanakṛpācalacittavṛtti dhyātvā ciraṃ sa vacanaṃ nijagāda duḥkhāt

iti śrīskānde mahāpurāṇa ekāśītisāhasryāṃ sahitāyāṃ dvitīye vaiṣṇavakhaṇḍe kārtikamāsamāhātmye dharmadattetihāsakathanaṃnāma caturviṃśo'dhyāyaḥ