Skanda Purana · Chapter 2.20

// // nārada uvāca // //
patitaṃ vīrabhadraṃ tu dṛṣṭvā rudragaṇā bhayāt //
agamaṃste raṇaṃ hitvā krośamānā maheśvaram

atha kolāhalaṃ śrutvā gaṇānāṃ caṃdraśekharaḥ //
abhyayādvṛṣabhārūḍhaḥ saṃgrāmaṃ prahasanniva

rudramāyāṃtamālokya siṃhanādairgaṇāḥ punaḥ //
nivṛttāḥ saṃgare daityānnirjaghnuḥ śaravṛṣṭibhiḥ

daityāśca bhīṣaṇaṃ dṛṣṭvā sarve caiva vidudruvuḥ //
kārtikavratinaṃ dṛṣṭvā pātakānīva tadbhayāt

jalaṃdharotha tāndaityānnivṛttānprekṣya saṃgare //
roṣādadhāvaccaṃḍīśaṃ muṃcanbāṇānsahasraśaḥ

śuṃbho niśuṃbho'śvamukhaḥ kālanemirbalāhakaḥ //
khaḍgaromā pracaṃḍaśca ghasmarādyāḥ śivaṃ yayuḥ

bāṇāṃdhakārasaṃchannaṃ dṛṣṭvā gaṇabalaṃ śivaḥ //
bāṇajālamavācchidya svabāṇairāvṛṇonnabhaḥ

daityāṃśca bāṇavātyābhiḥ pīḍitānakarottadā //
pracaṃḍabāṇajālaughairapātayata bhūtale

khaḍgaromṇaḥ śiraḥ kāyāttadā paraśunā'cchinat //
balāhakasya ca śiraḥ khaṭvāṃgenā'karoddvidhā

baddhvā ca ghasmaraṃ daityaṃ pāśenābhyahanadbhuvi //
vṛṣabheṇa hatāḥ kecitkecidbāṇairnipātitāḥ

na śekurasurāḥ sthātuṃ gajāḥ siṃhārditā iva //
tataḥ krodhaparītātmā vegādrudraṃ jalaṃdharaḥ

āhvayāmāsa samare tīvrāśanisamasvanaḥ //
// jalaṃdhara uvāca // //
yudhyasva ca mayā sārddhaṃ kimebhirnihitaistava

yacca kiṃcidbalaṃ te'sti taddarśaya jaṭādhara //
ityuktvā bāṇasaptatyā jaghāna vṛṣabhadhvajam

tānprāptānniśitairbāṇaiściccheda prahasanniva//
tato hayāndhvajaṃ chatraṃ dhanuściccheda śaktibhiḥ

sa cchinnadhanvā viratho gadāmudyamya vegavān //
abhyadhāvacchivastāvadgadāṃ bāṇairdvidhā'cchinat

tathā'pi muṣṭimudyamya yayau rudraṃ jighāṃsayā //
tāvacchivena bāṇaughaiḥ krośamātramapākṛtaḥ

tato jalaṃdharo daityo matvā rudraṃ balādhikam //
sasarja māyāṃ gāṃdharvīmadbhutāṃ rudramohinīm

tato jaguśca nanṛturgaṃdharvāpsarasāṃ gaṇāḥ //
tālaveṇumṛdaṃgādyānvādayaṃti sma cā'pare

taddṛṣṭvā mahadāścaryaṃ rudro nādavimohitaḥ //
patitānyapi śastrāṇi karebhyo na viveda saḥ //

ekāgrībhūtamālokya rudraṃ daityo jalaṃdharaḥ //
kāmārtaḥ sa jagāmāśu yatra gaurī sthitā'bhavat

yuddhe śuṃbhaniśuṃbhākhyau sthāpayitvā mahābalī //
daśadordaṃḍapacāsyastrinetraśca jaṭādharaḥ

mahāvṛṣabhamārūḍhaḥ sa babhūva jalaṃdharaḥ //
atho rudraṃ samāyāṃtamālokya bhavavallabhā

abhyāyayau sakhīmadhyāttaddarśanapathe'bhavat //
yāvaddadarśa cārvaṃgī pārvatī danujeśvaraḥ

tāvatsvavīryaṃ mumuce jaḍāṃgaścā'bhavattadā //
atha jñātvā tadā gaurī dānavaṃ bhayavihvalā

jagāmā'ntarhitā vegātsā tadottaramānase //
tāmadṛṣṭvā tato daityaḥ kṣaṇādvidyullatāmiva

javenā''gātpunaryuddhaṃ yatra devo vṛṣadhvajaḥ //
pārvatyapi bhayādviṣṇuṃ sasmāra manasā tadā

tāvaddadarśa taṃ devaṃ sūpaviṣṭaṃ samīpagam //
// pārvatyuvāca// //
viṣṇo jalaṃdharo daityaḥ kṛtavānparamādbhutam

tatkiṃ na viditaṃ te'sti ceṣṭitaṃ tasya durmateḥ //
// viṣṇuruvāca // //
tenaiva darśitaḥ paṃthā vayamapyanvayāmahe

nā'nyathā sa bhavedvadhyaḥ pātivratyasurakṣitḥ //
// nārada uvāca // //
jagāma viṣṇurityuktvā punarjālaṃdharaṃ puram

atha rudraśca gaṃdharvā'nugataḥ saṃgare sthitaḥ //
aṃtardhānaṃ gatāṃ māyāṃ dṛṣṭvā sa bubudhe tadā

tato bhavo vismitamānasaḥ punarjagāma yuddhāya jalaṃdharaṃ ruṣā //
sa cā'pi daityaḥ punarāgataṃ śivaṃ dṛṣṭvā śaraughaiḥ samavākiradraṇe

iti śrīskāṃde mahāpurāṇa ekāśītisāhasryāṃ sahitāyāṃ dvitīye vaiṣṇavakhaṇḍe kārtikamāsamāhātmye jalaṃdharopākhyāne śivajalaṃdharayuddhavarṇanaṃnāma viṃśo'dhyāyaḥ