Skanda Purana · Verses 2.13-3

// śrībhagavānuvāca // //
śṛṇu putra pravakṣyāmi jāgarasya ca lakṣaṇam //
yena vijñātamātreṇa sulabho'haṃ sadā kalau

gītaṃ vādyaṃ ca nṛtyaṃ ca purāṇapaṭhanaṃ tathā //
dhūpaṃ dīpaṃ ca naivedyaṃ puṣpaṃ gandhānulepanam

phalārpaṇaṃ ca śraddhāṃ ca dānamiṃdriyasaṃyamam //
satyānvitaṃ vinidraṃ ca mudā madyajanānvitam

sāścaryaṃ caiva sotsāhaṃ pāpālasyādivarjanam //
pradakṣiṇāsamāyuktaṃ namaskārapuraḥsaram

nīrājanasamāyuktamatihṛṣṭena cetasā //
yāmeyāme mahābhāga kuryādārārtikaṃ mama

ṣaḍviṃśadguṇasaṃyuktamekādaśyāṃ ca jāgaram //
yaḥ karoti naro bhaktyā na punarjāyate bhuvi

ya evaṃ kurute bhaktyā vittaśāṭhyavivarjitaḥ //
jāgaraṃ parayā bhaktyā sa līno jāyate mayi

daṣṭāḥ kalibhujaṃgena svapante ye dine mama //
kurvaṃti jāgaraṃ naiva māyāpāśavimohitāḥ

prāptāpyekādaśī yeṣāṃ kalau jāgaraṇaṃ vinā //
te vinaṣṭā na saṃdeho yasmājjīvitamadhruvam

uddhṛtaṃ netrayugmaṃ ca dattvā vai hṛdaye padam //
kṛtaṃ ye naiva paśyaṃti pāpino mama jāgaram

abhāve vācakasyā'tha gītaṃ nṛtyaṃ ca kārayet //
vācake sati deveśa purāṇaṃ prathamaṃ paṭhet

aśvamedhasahasrasya vājapeyaśatasya ca //
puṇyaṃ koṭiguṇaṃ putra mama jāgaraṇe kṛte

pitṛpakṣe mātṛpakṣe bhāryāpakṣe ca mānada //
kulānyuddharate caitanmama jāgaraṇe kṛte //

upoṣaṇadine vighne prārabdhe jāgare sati //
vihāya sthānaṃ tatrāhaṃ śāpaṃ dattvā vrajāmyaham

aviddhavāsare ye me prakurvaṃti hi jāgaram //
teṣāṃ madhye prahṛṣṭaḥ sannṛtyaṃ vai prakaromyaham

yāvaddināni kurute jāgaraṃ mama sannidhau //
yugā'yutāni tāvaṃti vasate mama veśmani //

na gayāpiṃḍadānena na tīrthairbahubhirmakhaiḥ //
pūrvajā muktimāyāṃti vinaikādaśijāgarāt

yaḥ kuryājjāgare pūjāṃ kusumairmama vāsare /
puṣpepuṣpe'śvamedhasya phalamāpnoti mānavaḥ //१-//
yaḥ kuryāddīpadānaṃ ca rātrau jāgaraṇe mama //
nimiṣe nimiṣe putra labhate go'yutaṃ phalam

yo dadyājjāgare putra haviṣyānnasamudbhavam //
naivedyaṃ labhate puṇyaṃ śāliśailasamudbhavam

pakvānnāni ca yo dadyātphalāni vividhani ca //
jāgare me caturvaktra labhate gośataṃ phalam

karpūreṇa ca tāṃbūlaṃ dadāti mama jāgare //
madbhakto matprasādena saptadvīpā'dhipo bhavet

jāgare mama deveśa yaḥ kuryātpuṣpamaṇḍapam //
sa puṣpakavimānena krīḍate mama sadmani

jāgare me tu yo dhūpaṃ sakarpūraṃ saguggulam//
dadāti dahate pāpaṃ janmalakṣasamudbhavam

snāpayejjāgare yo māṃ dadhikṣīraghṛtāṃbukaiḥ //
bhogāniha labhedvai sa hyante ca paramāṃ gatim

divyāṃ'barāṇi yo dadyātphalāni vividhāni ca //
sa ciraṃ vasate svarge taṃ tu saṃkhyāsamāni vai

dadyādābharaṇaṃ yo me hemajaṃ ratnasaṃbhavam //
saptakalpāni vasate sotsaṃge matpriyo mama

ghṛtena dīpakaṃ yo me gavyena ca viśeṣataḥ //
jvālayejjāgare rātrau nimiṣe goyutaṃ phalam

jāgare me caturvaktra karpūreṇa ca dīpakam //
yo jvālayeta nīrājaṃ kapilādānajaṃ phalam

yaḥ punaḥ kurute dīpaṃ gītaṃ nṛtyaṃ ca pūjanam //
śatakratusamaṃ puṇyaṃ vratairdānaśatairapi

svayaṃ yaḥ kurute gītaṃ vilajjo nṛtyate yadi //
sa labhennimiṣārdhena koṭiyajñakṛtaṃ phalam

nivārayati yo gītaṃ nṛtyaṃ jāgaraṇe mama //
ṣaṣṭiyugasahasrāṇi pacyate rauravādiṣu

nṛtyamānasya martyasya ye kecinnikaṭe gatāḥ //
vimuktā dharmarājena muktā yāṃti ca matpadam

nṛtyamānasya martyasya upahāsaṃ karoti yaḥ //
jāgare yāṃti nirayaṃ yāvadiṃdrāścaturdaśa //

jāgare mama yaḥ kuryādbhaktyā pustakavācanam //
ślokasaṃkhyāyugānyeva sa vasenmama sannidhau

pradakṣiṇāpradānena yatphalaṃ kathitaṃ budhaiḥ //
na tatkoṭimakhaiḥ puṇyaṃ yugasaṃkhyairavāpyate

dīpamālā mamāgre vai yaḥ kuryājjāgare suta //
vimānakoṭisaṃyukta ākalpaṃ vasate divi //

/
mama bālacaritrāṇi jāgare paṭhate hi yaḥ//
yugakoṭisahasrāṇi śvetadvīpe vasennaraḥ

tasmājjāgaraṇaṃ kāryaṃ pakṣayoḥ śuklakṛṣṇayoḥ

yo gītāṃ paṭhate rātrau mama nāmasahasrakam//
vedoktānāṃ purāṇānāṃ jāgarātpuṇyamāpnuyāt

dhenudānaṃ tu yaḥ kuryājjāgare mama putraka//
labhate nātra saṃdehaḥ saptadvīpavatīphalam

sarveṣāmeva puṇyānāṃ mahatpuṇyaṃ mahītale //
dvādaśījāgaraṃ putra prasiddhaṃ bhuvanatraye

jāgaraṃ ye ca kurvaṃti karmaṇā manasā girā //
na teṣāṃ punarāvṛttirmama lokātkathaṃcana

protsāhayitvā lokānyaḥ kurute jāgaraṃ niśi //
prāpnoti cakravartitvaṃ satyaṃ me vyāhṛtaṃ suta

saṃmānitāḥ kakutsthena rātrau jāgarakāriṇaḥ//
svaśaktyā caiva dānena prāptaṃ rājyaṃ sudurlabham

ye kecidgāyakā viprā vādakā nartakāśca ye //
nartakīsahitā yāṃti mama loke sanātane

duryoniṣu gataiḥ sarvaiḥ kṛtvā jāgaraṇaṃ mama//
saṃprāptaṃ pṛthivīśatvaṃ kāmukairmunisattama

niṣkāmā muktimāpannāḥ śvapacādyāśca jāgarāt//
viveko nāsti varṇānāṃ mama jāgarakāriṇām//

na kalau pāvanaṃ dhyānaṃ na kalau jāhnavījalam //
na kalau pāvanaṃ jāpyaṃ muktvaikaṃ jāgaraṃ mama

dvādaśīdivase prāpte ye kurvaṃti hi jāgaram //
te dhanyāste kṛtārthā vai kalikāle na saṃśayaḥ

na bhūyānmānuṣe loke dvādaśīvimukho naraḥ //
atītānāgatānvā'pi pātayennarake hi saḥ

varameko guṇairyuktaḥ kiṃ jātairbahubhiḥ sutaiḥ //
dvādaśījāgarātsarvāṃstārayedyo hi pūrvajān

māhātmyaṃ paṭhate bhaktyā mayoktaṃ jāgarodbhavam //
dvādaśīsaṃbhavaḥ putraḥ kulānāṃ tārayecchatam

agamyāgamane pāpamabhakṣyasyāpi bhakṣaṇe //
pāpaṃ vilayamāyāti kṛte jāgaraṇe suta

ajñānādyatkṛtaṃ pāpaṃ jñātvā yatpātakaṃ kṛtam //
pūrvajanmārjitaṃ pāpamiha janmani yatkṛtam //

siddhyaṃti sarvakāryāṇi manasā ciṃtitānyapi //
dvādaśyāṃ vai caturvaktra rātrau jāgaraṇe kṛte

dvādaśījāgareṇaiva muktiṃ gacchaṃti mānavāḥ

na tatpuṇyaṃ kurukṣetre prayāge vasatāṃ kalau //
māhātmyaṃ vasatāṃ puṃsāṃ yatphalaṃ dvādaśīṣu ca

nā'śvamedhasahasraistu tīrthakoṭyavagāhanāt //
tatphalaṃ prāpyate putra dvādaśījāgare kṛte

paṭhedvā śṛṇuyādvā'pi māhātmyaṃ dvādaśībhavam //
sarvapāpaviśuddhātmā sa labhecchāśvatīṃ gatim

sarve duṣṭāḥ samastāśca saumyāstasya sadā grahāḥ //
saṃtaterna viyogastu dvādaśī yasya kāraṇam

mama kīrtirucirnityaṃ na vipadyeta karhicit //
raṇe rājakule caiva sarvadā vijayī bhavet

dharmopari matirnityaṃ bhaktirmayi sunirmalā //
pātakaṃ naiva lipyeta dvādaśībhaktito naram

pretatvaṃ naiva tasyā'sti kṛte jāgaraṇe mama //
ekādaśyā vihīnasya paralokagatirnahi //
tasmātsarvaprayatnena kalau kāryaṃ hi taddinam

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe brahmaviṣṇu saṃvāde mārgaśīrṣamāsamāhātmya ekādaśīvratajāgaraṇaphalakathanaṃnāma trayodaśo'dhyāyaḥ