Skanda Purana · Chapter 1.7

//lomaśa uvāca//
tadā ca te surāḥ sarva ṛṣayopi bhayānvitāḥ//
īḍire liṃgamaiśaṃ ca brahmādyā jñānavihvalāḥ

//brahmovāca//
tvaṃ liṃgarūpī tu mahāprabhāvo vedāṃtavedyosi mahātmarūpi//
yenaiva sarve jagadātmamūlaṃ kṛtaṃ sadānaṃdapareṇa nityam

tvaṃ sākṣī sarvalokānāṃ hartā tvaṃ ca vicakṣaṇaḥ//
rakṣaṇosi mahādeva bhairavosi jagatpate

tvayā liṃgasvarūpeṇa vyāptametajjagattrayam//
kṣudrāścaiva vayaṃ nātha māyāmohitacetasaḥ

ahaṃ surā'surāḥ sarve yakṣagaṃdharvarākṣasāḥ//
pannagāśca piśācāśca tathā vidyādharā hyamī

tvaṃhi viśvasṛjāṃ sraṣṭā tvaṃ hi devo jagatpatiḥ//
kartā tvaṃ bhuvanasyāsya tvaṃ hartā puruṣaḥ paraḥ

trāhyasmākaṃ mahādeva devadeva namo'stu te//
evaṃ stuto hi vai dhātrā liṃgarūpī maheśvaraḥ

ṛṣayaḥ stotukāmāste maheśvaramakalmaṣam//
astuvangīrbhiragryābhiḥ śrutigītābhirādṛtāḥ

//ṛṣaya ūcuḥ//
ajñānino vayaṃ kāmānna viṃdāmo'sya saṃsthitim//
tvaṃ hyātmā paramātmā ca prakṛtistvaṃ vibhāvinī

tvameva mātā ca pitā tvameva tvameva baṃdhuśca sakhā tvame//
tvamīśvaro vedavidekarūpo mahānubhāvaiḥ pariciṃtyamānaḥ

tvamātmā sarvabhūtānāmeko jyotirivaidhasām//
sarvaṃ bhavati yasmāttvattasmātsarvo'si nityadā

yasmācca saṃbhavatyetattasmācchaṃbhuriti prabhuḥ

tvatpādapaṃkajaṃ prāptā vayaṃ sarve surādayaḥ//
ṛṣayo devagaṃdharvā vidyādharamahoragāḥ

tasmācca kṛpayā śaṃbho pāhyasmāñjagataḥ pate

//mahādeva uvāca//
śrṛṇudhvaṃ tu vaco me'dya kriyatāṃ ca tvarānvitaiḥ//
viṣṇuṃ sarve prārthayaṃtu tvaritena tapodhanāḥ

tasya tadvacanaṃ śrutvā śaṃkarasya mahātmanaḥ//
viṣṇuṃ sarve namaskṛtya īḍire ca tadā surāḥ

//deva ūcuḥ//
vidyādharāḥ suragaṇā ṛṣayaśca sarve trātāstvayādya sakalājagadekabaṃdho//
tadvatkṛpākarajanānparipālayādya trailokyanātha jagadīśa jagannivāsa

prahasya bhagavanviṣṇuruvācedaṃ vacastadā//
daityaiḥ prapīḍitā yūyaṃ rakṣitāśca purā mayā

adyaiva bhayamutpannaṃ liṃgādasmācciraṃtanam//
na śakyate mayā trātumasmālliṃgabhayātsurāḥ

acyutenaivamuktāste devā ściṃtānvitābhavan//
tadā nabhogatā vāṇī uvācāśvāsya vai surān

etalliṃgaṃ saṃvṛṇuṣva pūjanāya janārdana//
piṃḍibhūtvā mahābāho rakṣasva sacarācaram//
tatheti matvā bagavānvīrabhadro'bhyapūjayat

brahmādibhaḥ suragaṇaiḥ sahitaistadānīṃ saṃpūjitaḥ śivavidhānarato mahātmā//
sravīrabhadraḥ śaśiśekharo'sau śivapriyo rudrasamastrilokyām

liṃgasyārcanayukto'sau vīrabhadro'bhavattadā//
tadrūpasyaiva liṃgasya yena sarvamidaṃ jagat

udbhāti sthitimāpnoti tathā vilayameti ca//
talliṃgaṃ liṃgamityāhurlayanāttattvavittamāḥ

brahmāṇḍāgolakairvyāptaṃ tathā rudrākṣabhūṣitam//
tathā liṃgaṃ mahajjātaṃ sarveṣāṃ duratikramam

tadā sarve'tha vibudhā ṛṣo vai mahāprabhāḥ//
tuṣṭuvuśca mahāliṃgaṃ vedāvādaiḥ pṛthakpṛthak

aṇoraṇīyāṃstvaṃ deva tathā tvaṃ mahato mahān//
tasmāttvayā vidhātavyaṃ sarvaiṣāṃ liṃgapūjanam

tadānīmeva sarveṇa liṃgaṃ ca bahuśaḥ kṛtam//
satye brahmeśvaraṃ liṃgaṃ vaikuṇṭhe ca sadāśivaḥ

amarāvatyāṃ supratiṣṭhamamareśvarasaṃjñakam//
varuṇeśvaraṃ ca vāruṇyāṃ yāmyāṃ kāleśvaraṃ prabhum

nairṛteśvaraṃ ca nairṛtyāṃ vāyavyāṃ pāvaneśvaram//
kedāraṃ mṛtyuloke ca tathaiva amareśvaram

oṃkāraṃ narmadāyāṃ ca mahākālaṃ tathaiva ca//
kāśyāṃ viśveśvaraṃ devaṃ prayāge laliteśvaram

triyambakaṃ brahmagirau kalau bhadreśvaraṃ tathā//
drākṣārāmeśvaraṃ liṃgaṃ gaṃgāsāgarasaṃgame

saurāṣṭre ca tathā liṃgaṃ someśvaramiti smṛtam//
tathā sarveśvaraṃ vindhye śrīśaile śikhareśvaram//
kāntyāmallālanāthaṃ ca siṃhanāthaṃ ca siṃgale

virūpākṣaṃ tathā liṃgaṃ koṭiśaṅkarameva ca//
tripurāntakaṃ bhīmeśamamareśvarameva ca

bhogeśvaraṃ ca pātāle hāṭakeśvarameva ca//
evamādīnyanekāni liṃgāni bhuvanatraye//
sthāpitāni tadā devairviśvopakṛtihetave

liṃgeśaiśca tathā sarvaiḥ pūrṇamāsījjagattrayam//
tathā ca vīrabhadrāṃśāḥ pūjārthamamaraiḥ kṛtāḥ// ७.३६
tatra viṃśatisaṃskārāsteṣāmaṣṭādhikābhavan//
kathitāḥ śaṃkareṇaiva liṃgasyācanasūcakāḥ

saṃti rudreṇa kathitāḥ śivadharmā sanātanāḥ//
vīrabhadro yathā rudrastathānye guravaḥ smṛtāḥ

gurorjātāśca guravo vikhyātā bhuvanatraye//
liṃgasya mahimāna tu nandī jānāti tattvataḥ

tathā skando hi bhagavānnye te nāmadhārakāḥ//
yathoktāḥ śivadharamā hi nandinā parikīrttitāḥ

śailādena mahābhāgā vicitrā liṃgadhārakāḥ//
śavasyopari liṃgaṃ ca dhriyate ca purātanaiḥ

liṃgena saha pañcatvaṃ liṃgena saha jīvitam//
ete dharmāḥ supratiṣṭhāḥ śailādena pratiṣṭhitāḥ

dharmaḥ pāśupataḥ śreṣṭhaḥ skandena pratipālitaḥ

śuddhāpañcākṣarīvidyāprāsādī tadanantaram//
ṣaḍakṣarī tathā vidyā prāsādasya ca dīpikā

skandāttatsamanuprāptamagastyena mahātmanā//
paścādācāryabhedena hyāgamā bahavo'bhavan

kiṃ tu vai bahunoktena śvi ityakṣaradvayam//
uccārayaṃti sa nityaṃ te rudrā nātra saṃśayaḥ

satāṃ mārgaṃ puraskṛtya ye sarve te purāṃtakāḥ//
vīrā māheśvarājñeyāḥ pāpakṣayakarā nṛṇām

prasaṃgenānupaṃkṣeṇa śradvayā ca yadṛcchayā//
śivabhaktiṃ prakurvanti ye vai te yāṃti sadgatim

śrṛṇudhvaṃ kathayāmīha itihāsaṃ purātanam//
kṛtaṃ śivālayaṃ yacca pataṃgyā mārjanaṃ purā

āgatā bhakṣaṇārthaṃ hi naivedyaṃ kena cārpitam//
mārjanaṃ rajastasyāḥ pakṣābhyāmabhavatpurā

tena karmavipākena uttamaṃ svargamāgatā//
bhuktvā svargasukhaṃ cograṃ punaḥ saṃsāramāgatā

kāśirājasutā jātā sundarīnāma viśrutā//
pūrvābhyāsācca kalyāṇī babhūva paramā satī

uṣasyuṣasi tanvaṃgī śivadvāraratā sadā//
saṃmārjanaṃ ca kurute bhaktyā paramayā yutā

svayameva tadā devī sundarī rājakanyakā//
tathābhūtāṃ ca tāṃ dṛṣṭvā ṛṣiruddālako'bravīt

sukumārī satī bāle svayameva kathaṃ śubhe//
saṃmārjanaṃ ca kuruṣe kanyake tvaṃ śucismite

dāsī dāsyaśca bahavaḥ saṃti devi tavāgrataḥ//
tavājñayā kariṣyaṃti sarvaṃ saṃmārjanādikam

ṛṣestadvacanaṃ śrutvā prahasyedamuvāca ha

śivasevāṃ prakurvāṇāḥ śivabhaktipuraskṛtāḥ//
ye narāścaiva nāryyaśca śivalokaṃ vrajaṃti vai

saṃmārjanaṃ ca pāṇibhyāṃ padbhyāṃ yānaṃ śivālaye//
tasmānmayā ca kriyate saṃmārjanamataṃdritam

anyatkiñcinna jānāmi ekaṃ saṃmārjanaṃ vinā//
ṛṣistadvacanaṃ śrutvā manasā ca vimṛśya hi

anayā kiṃ kṛtaṃ pūrvaṃ keyaṃ kasya prasādataḥ//
tadā jñānaṃ ca ṛṣiṇā tatsarvaṃ jñānacakṣuṣā//
vismayena samāviṣṭastūṣṇīṃbhūto'bhavattadā

savismayo'bhūdatha tadviditvā uddālako jñānavatāṃ variṣṭhaḥ//
śivaprabhāvaṃ manasā viciṃtya jñānātparaṃ bodhamavāpa śāṃtaḥ

iti śrīskāṃde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe saptamo'dhyāyaḥ