Skanda Purana · Chapter 1.48

// nārada uvāca // //
athātaḥ saṃpravakṣyāmi somanāthamahiṃ sphuṭam //
śṛṇvanyāṃ kīrta yiṣyāmi pāpamokṣamavāpnuyāt

purā tretāyuge pārtha cauḍadeśasamudbhavau //
ūrjayaṃtaśca prāleyo viprāvāstāṃ mahādyutī

tāvekadā purāṇārthe ślokamekamapaśyatām //
taṃ dṛṣṭvā sarvaśāstrajñāvāstāṃ kaṃṭakitatvacau

prabhāsādyāni tīrthāni pulastyāyāha padmabhūḥ /
na yaistatrāplutaṃ caiva kiṃ taistīrthamupāsitam

iti ślokaṃ paṭhitvā tau punaḥpunarabhiṣṭutam //
tarhyeva ca prabhāsāya niḥsṛtau snātumuttamau

tau vanāni nadīścaiva vyatikramya śanaiḥśanaiḥ //
maharṣigaṇasaṃkīrṇāmuttīṇau narmadāṃ śivām

guptakṣetrasya māhātmyaṃ mahīsāgarasaṃgamam //
tatra snātvā prabhāsāya tanmadhyena pratasthatuḥ

tato mārgasya śūnyatvāttṛṭkṣudhāpīḍitau bhṛśam //
āstāṃ vicetanau viprau siddhaliṃgasamīpataḥ

siddhanāthaṃ namaskṛtya saṃprayātau sudhairyataḥ //
kṣudhāvegena tīvreṇa tṛṣā madhyārkatāpitau

sahasā patitau bhūmau sthūṇapādau vimūrchitau //
tato muhūrtātprāleya ūrjayaṃtamabhāṣata

kiṃcidviśvasya dhairyācca sakhe kiṃ na śrutaṃ tvayā //
yathā yathā vivarṇāṃgo jāyate tīrthayātrayā

tathātathā bhaveddānairdīnaḥ someśvaro haraḥ //
tathā''stāṃ luṃṭhamānau tāvevamukte śrute'pi ca

luṃṭhamāno jagāmaiva prāleyaḥ kiṃcidaṃtare //
utthitaṃ sahasā liṃgaṃ bhūmiṃ bhittvā sudurdṛśam

khe vāṇī cābhavattatra puṣpavarṣapuraḥsarā //
prāleya tava hetostu somanāthasamaṃ phalam //
utthitaṃ sāgarataṭe liṃgaṃ tiṣṭhātra suvrata

// prāleya uvāca // //
yadyevaṃ satyametacca tathāpyātmā prakalpitaḥ

prabhāsāya prayātavyaṃ yadā'' mṛtyormayā sphuṭam //
tataścaivorjjayaṃto'pi mūrchābhāvālluṭhanpuraḥ

apaśyadutthitaṃ liṃgaṃ sa caivaṃ pratyapadyata //
tataḥ pratyakṣatāṃ prāpto bhavaścakre tayordṛḍhe

dṛṣṭyā tanū tato yātau prabhāsaṃ śivasadma ca //
tāvetau somanāthau dvau siddheśvarasamīpataḥ

ūrjayaṃtaḥ pratīcyāṃ ca prāleyasyeśvaro'paraḥ //
somakuḍāṃbhasi śanaiḥ snātvārṇavamahījale

somanāthadvayaṃ paśyejjanmapāpātpramucyate //
brahmātra sthāpayitvā tu hāṭakeśvara saṃjñitam

mahīnagarake liṃgaṃ pātālātsumanoharam //
tuṣṭāva devaṃ prayataḥ stutiṃ tāṃ śṛṇu pāṃḍava

namaste bhagavanrudra bhāskarāmitatejase //
namo bhavāya rudrāya rasāyāṃbumayāya te

śarvāya kṣitirūpāya sadā surabhiṇe namaḥ //
īśāya vāyave tubhyaṃ saṃsparśāya namonamaḥ

paśūnāṃ pataye cāpi pāvakāyātitejase //
bhīmāya vyomarūpāya śabdamātrāya te namaḥ

mahādevāya somāya amṛtāya namo'stu te //
ugrāya yajamānāya namaste karmayogine

ityevaṃ nāmabhirdivyaiḥ stava eṣa udīritaḥ //
yaḥ paṭhecchṛṇuyādvāpi pitāmahakṛtaṃ stavam

hāṭakeśvaraliṃgasya nityaṃ ca prayato naraḥ //
aṣṭamūrteḥ sa sāyujyaṃ labhate nātra saṃśayaḥ

hāṭakeśvaraliṃgaṃ ca prayato yaḥ smaredapi //
tasya syādvarado brahmā tenedaṃ sthāpitaṃ jaya

evaṃvidhāni tīrthāni mahīsāgarasaṃgame //
bahūni saṃti puṇyāni saṃkṣepādvarṇitāni me

iti śrīskāṃde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe kaumārikākhaṇḍe stambhatīrthamāhātmye somanāthavṛttāṃtavarṇanaṃnāmāṣṭacatvāriṃśo'dhyāyaḥ