Skanda Purana · Chapter 1.44

//arjuna uvāca//
divyaprākāramicchāmi śrotuṃ cāhaṃ munīśvara//
kathaṃ kāryāṇi kānīha sphuṭaṃ yaiḥ puṇyapāpakam

//nārada uvāca//
śapaṣāḥ pośaghaṭakau viṣāgna taptamāṣakau//
phalaṃ ca taṃdulaṃ caiva divyānyaṣṭau vidurbudhāḥ

asākṣikeṣu cārtheṣu mitho vivadamānayoḥ//
rājadrohābhiśāpeṣu sāhaseṣu tathaiva ca

avidastattvataḥ satyaṃ śapathenābhilaṃghayet//
maharṣibhiśca devaiśca satyārthāḥ śapathāḥ kṛtāḥ

javano nṛpatiḥ kṣīṇo mithyāśapathamācaret//
vasiṣṭhāgre varṣamadhye sānvayaḥ kila bhārata

aṃdhaḥ śatrugṛhaṃ gacchedyo mithyāśapathāṃścaret//
rauravasya svayaṃ dvāramuddhāṭayati durmatiḥ

manyaṃte vai pāpakṛto na kaścitapaśyatīti naḥ//
tāṃśca devāḥ prapaśyaṃti svasyaivāṃtarapauruṣāḥ

ādityacaṃdrāvanilo'nalaśca dyaurbhūmirāpo hṛdayaṃ yamaśca//
ahaśca rātriśca ubhe ca saṃdhye dharmo hi jānāti narasya vṛttam

evaṃ tasmādabhijñāya satyarthaśapathāṃścaret//
vṛthā hi śapathānkurvanpretya ceha vinaśyati

idaṃ satyaṃ vadāmīti bruvansākṣī bhavānyataḥ//
śubhāśubhaphalaṃ dehi śuciḥ pādau raveḥ svṛśet

atha śāstrasya vipro'pi śastrasyāpi ca kṣatriyaḥ//
māṃ saṃspṛśaṃstathā vaiśyaḥ śudraḥ svagurumeva ca

mātaraṃ pitaraṃ pūjyaṃ spṛśetsādhāraṇaṃ tvidam//
kośasya rūpaṃ pūrvaṃ te vyākhyātaṃ pāṃḍunaṃdana

vipravarjyaṃ tathā keśaṃ varṇināṃ dāpayennṛpaḥ//
yo yo yaddevatābhaktaḥ pāyayettasya taṃ naram

samabhaktaṃ ca devānāmādityasyaiva pāyayet//
sarveṣāṃ cogradevānāṃ snāpayedāyudhāstrakam

snānodakaṃ vā saṃkalpaṃ gṛhītvā pāyayennavam//
trisaptarātramadhye ca phalaṃ kośasya nirdiśet

ataḥ paraṃ mahādivyavidhānaṃ śrṛṇu yadbhavet//
saṃśayacchedi sarveṣāṃ dhārṣṭyattaddivyameva ca

saśiraskaṃpradātavyamiti brahmā purābravīt//
mahogrāṇāṃ ca dātavyamaśiraskamapi sphuṭam

sādhūnāṃ varṇināṃ rājā na śiraskaṃ pradāpayet//
na pravātedhaṭaṃ deyaṃ noṣṇakāle hutāśanam

varṇināṃ ca tathā kālaṃ taṃdulaṃ mukharogiṇām

kuṣṭhapittārditānāṃ ca brāhmaṇānāṃ ca no viṣam//
taptamāṣakamarhaṃti sarve dharmyaṃ niratyayam

na vyādhimarake deśe śapathānkośameva ca//
divyānyāsurakairmaṃtraiḥ staṃbhayaṃtīha kecana

pratighātavidasteṣāṃ yojayeddharmavatsalān//
divyānāṃ stabhakāñjñātvā pāpānnityaṃ mahīpatiḥ

vivāsayetsvakādrāṣṭrātte hi lokasya kaṃṭakāḥ//
teṣāmanveṣaṇe yatnaṃ rājā nityaṃ samācaret

te hi pāpasamācārāstaskarebhyo'pi taskarāḥ//
prāgdṛṣṭadoṣānsvalpeṣu divyeṣu viniyojayet

mahatsvapi na cārtheṣu dharmajñāndharmavatsalān//
na mithyāvacanaṃ yeṣāṃ janmaprabhṛti vidyate

śraddadhyātpārthivasteṣāṃ vacanā deva bhārata//
jñātvā dharmiṣṭhatāṃ rājā puruṣasya vicakṣaṇaḥ

krodhāllobhātkārayaṃśca svayameva praduṣyati//
tasmātpāpiṣu divyaṃ syāttatrādau procyate dhaṭe

susamāyāṃ pṛthivyāṃ ca digbhāge pūrvadakṣiṇe//
yajñiyasya tu vṛkṣasya sthāpyaṃ syānmuṃḍakadvayam

staṃbhakasya pramāṇaṃ ca saptahastaṃ prakīrtitam//
dvau hastau nikhanetkāṣṭhaṃ dṛśyaṃ syāddhastapaṃcakam

aṃtaraṃ tu tayoḥ kāryaṃ tathā hastacatuṣṭayam//
muṃḍakopari kāṣṭhaṃ ca dṛḍhaṃ kuryādvicakṣaṇaḥ

caturhastaṃ tulākāṣṭhamavraṇaṃ kārayetsthiram//
khadirārjunavṛkṣāṇāṃ śiṃśapāśālajaṃ tvatha

tulākāṣṭhe tu kartavyaṃ tathā vai śikyakadvayam//
prāṅmukho niścalaḥ kāryaḥ śucau deśe dhaṭastathā

pāṣāṇasyāpi jāyet staṃbheṣu ca dhaṭastathā//
vaṇiksuvarṇakāro vā kuśalaḥ kāṃsyakārakaḥ

tulādhāradharaḥ kāryo ripau mitre ca yaḥ samaḥ//
śrāvayetprāḍvivāko'pi tulādhāraṃ vicakṣaṇaḥ

brahmaghne ye smṛtā lokā ye ca strībālaghātake//
tulādhārasya te lokāstulāṃ dhārayato mṛṣā

ekasmiṃstolayecchikye jñātaṃ sūpoṣitaṃ naram//
dvitīye mṛttikāṃ śubhrāṃ gaurāṃ tu tulayedbudhaḥ

iṣṭikābhasmapāṣāṇakapālāsthīni varjayet//
tolayitvā tataḥ pūrvaṃ tasmāttamavatārayet

mūrdhni patraṃ tato nyasya nyastapatraṃ niveśayet//
patre maṃtrastvayaṃ lekhyo yaḥ puroktaḥ śvayaṃbhuvā

brahmaṇastvaṃ sutā devī tulānāmneti kathyate//
tukāro gaurave nityaṃ lakāro laghuni smṛtaḥ

gurulāghavasaṃyogāttulā tena nigadyase//
saṃśayānmocayasvainamabhiśastaṃ naraṃ śubhe

bhūya āropayettaṃ tu naraṃ tasminsapatrakam//
tulito yadi vardheta śuddho bhavati dharmataḥ

hīyamāno na śuddhaḥ syāditi dharmavido viduḥ//
śikyacchede tulābhaṃge punarāropayennaram

evaṃ niḥsaṃśayaṃ jñānaṃ yaccānyāyaṃ na lopayet//
etatsarvaṃ ravau vāre kāryaṃ saṃpūjya bhāskaram

athātaḥ saṃpravakṣyāmi viṣadivyaṃ śrṛṇuṣva me

dviprakāraṃ ca tatproktaṃ ghaṭasarpaviṣaṃ tathā//
śṛṃgiṇo vatsanābhasya himaśailabhavasya vā

yavāḥ sapta pradātavyā athavā ṣaḍghṛtaplutāḥ//
mūrdhni vinyastapatrasya patre caivaṃ niveśayet

tvaṃ viṣa brahmaṇaḥ putra satyadharme vyavasthitaḥ//
trāyasvainaṃ naraṃ pāpātsatyenāsya bhavāmṛtam

yena vegairvinā jīrṇaṃ chardimūrcchāvivarjitam//
taṃ tu śuddhaṃ vijānīyāditi dharmavido viduḥ

kṣudhitaṃ kṣudhitaḥ sarpaṃ ghaṭasthaṃ procya pūrvavat//
saṃspṛśettālikāḥ sapta na daśecchudhyatīti saḥ

agnidivyaṃ yathā prāha viraṃcistacchṛṇuṣva me//
saptamaṃḍalakānkuryāddevasyāgre ravestathā

maṃḍalānmaṃḍalaṃ kāryaṃ pūrveṇeti viniścayaḥ//
ṣoḍaśāṃtulakaṃ kāryaṃ maṃḍalāttāvadaṃ taram

ārdravāsasamāhūya tathā caivāpyupopitam//
kārayetsarvadivyāni devabrāhmaṇasaṃnidhau

pratyakṣaṃ kārayeddivyaṃ rājño vādhikṛtasya vā//
brāhmaṇānāṃ śrutavatāṃ prakṛtīnāṃ tathaiva ca

paścime dinakāle hi prāṅmukhaḥ prāñjaliḥ śuciḥ//
caturasre maṃḍale'nye kṛtvā caiva samau karau

lakṣayeyuḥ kṛtādīni hastayostasya hāriṇaḥ//
saptāśvatthasya patrāṇi bhadhnīyuḥ karayostataḥ

navena kṛtasūtreṇa kārpāsena dṛḍhaṃ yathā//
tatastu susamaṃ kṛtvā aṣṭāṃgulamathāyasam

piṃḍaṃ hutāśasaṃtaptaṃ paṃcāśatpalikaṃ dṛḍham//
ādau pūjāṃ raveḥ kṛtvā hutāśasyātha kārayet

raktacaṃdanadhūpābhyāṃ raktapuṣpaistathaiva ca//
abhiśastasya patraṃ ca badhnīyāccaiva mūrdhani

maṃtreṇānena saṃyuktaṃ brāhmaṇābhihitena ca//
tvamagne vedāścatvārastvaṃ ca yajñeṣu hūyase

pāpaṃ punāsi vai yasmāttasmātpāvaka ucyase//
tvaṃ mukhaṃ sarvadevānāṃ tvaṃ mukhaṃ brahmavādinām

jaṭharastho'si bhūtānāṃ tato vetsi śubhāśubham//
pāpeṣu darśayātmānamarciṣmānbhava pāvaka

athavā śuddhabhāveṣu śīto bhavamahābala//
tato'bhiśastaḥ śanakairmaṃḍalāni parikramet

parikramya śanairjahyāllohapiṃḍaṃ tataḥ kṣitau//
vipatrahastaṃ taṃ paścātkārayedvrīhimardanam

nirvikārau karau dṛṣṭvā śuddho bhavati dharmataḥ//
bhayādvā pātayedyastu tadadho vā vibhāvyate

punastvāhārayellohaṃ vidhireṣa prakīrtitaḥ//
athātaḥ saṃpraaivakṣyāmi taptamāṣavidhiṃ śrṛṇu

kārayedāyasaṃ pātraṃ tāmraṃ vā ṣoḍaśāṃgulam//
caturaṃgulakhātaṃ tu mṛnmayaṃ vāpi kārayet

pūrayed‌ghṛtatailābhyāṃ palairviśatibhistataḥ//
sutapte nikṣipettatra suvarṇasya tu māṣakam

vahnyuktaṃ vinyasenmaṃtramabhiśastasya mūrdhani//
aṃguṣṭhāṃguliyogena taptamāṣaṃ samuddharet

śuddhaṃ jñeyamasaṃdigdhaṃ visphoṭādivivarjitam//
phālaśuddhiṃ pravakṣyāmi tāṃ śrṛṇu tvaṃ dhanaṃjaya

āyasaṃ dvādaśapalaṃ ghaṭitaṃ phālamucyate//
aṣṭāṃgulamadīrghaṃ ca caturaṃgulavistṛtam

vahnyuktaṃ vinyasenmaṃtramabhiśastasya mūrdhani//
triḥparāvartayejjihvā lihannasmātṣaḍaṃgulam

gavāṃ kṣīraṃ pradātavyaṃ jihvāśodhanamuttamam//
jihvāparīkṣaṇaṃ kuryāddagdhā cenna tu vimocyate

taṃ viśuddhaṃ vijānīyādviśuddhā cettu jāyate//
taṃdulasyātha vakṣyāmi vidhidharmaṃ sanātanam

caurye tu taṃdulā deyā na cānyatra kathaṃcana//
taṃdulānudake siktvā rātrau tatraiva sthāpayet

prabhāte kāriṇe deyā bhakṣaṇāya na saṃśayaḥ//
triḥkaॉtvaḥ prāṅ‌mukhaścaiva patre niṣṭhīvayettataḥ

pippalasyātha bhūrjasya na tvanyasya kathaṃcana//
tāṃstu vai kārayecchuddhāṃstaṃdulāñchālisaṃbhavān

mṛnmaye bhājane kṛtvā savituḥ purataḥ sthitaḥ//
tandulānmaṃtrayecchuddhānmantreṇānena dharmataḥ

dīyase dharmatattvajñairmānuṣāṇāṃ viśodhanam//
stutastandula satyena dharmatastrātumarhasi

niṣṭhīvane kṛte teṣāṃ savituḥ purataḥ sthite//
śoṇitaṃ dṛśyate yasya tamaśuddhaṃ vinirdiśet

evamaṣṭavidhaṃ divyaṃ pāpasaṃśayacchedanam//
bhaṭṭādityasya purato jāyate kurunaṃdana

jaladivyaṃ tathā prāhurdviprakāraṃ purāvidaḥ//
jalahastaṃ smṛtaṃ caikaṃ majjanaṃ cāparaṃ viduḥ

bāṇakṣepastathādānaṃ yāvadvīryavatā kṛtam//
tāvattaṃ majjayejjīvettathā tacchuddhimādiśet

evaṃvidhamidaṃ sthānaṃ bhaṭṭādityasya bhārata//
mamaiva kṛpayā bhānorjātametanmahītale

iti śrīskāṃde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe kaumārikākhaṇḍe bhaṭṭādityamāhātmye divyavarṇanaṃnāma catuścatvāriṃśo'dhyāyaḥ