Skanda Purana · Chapter 1.43

//śrīnārada uvāca//
tato'haṃ pārtha bhūyo'pi janānugrahakāmyayā//
pratyakṣadevaṃ mārtaṃḍamatrānetumiyeṣa ha

sarveṣāṃ prāṇināṃ yasmāduḍupo bhagavānraviḥ//
ihāmutra ca kauṃteya viśvaddhārī ravirmataḥ

ye smaraṃti raviṃ bhaktyā kīrtayaṃti ca ye narāḥ//
pūjayaṃti ca ye nityaṃ kṛtārthāste na saṃśayaḥ

sūryabhaktiparā ye ca nityaṃ tadgatamānasāḥ//
ye smaraṃti sadā sūryaṃ na te duḥkhasya bhājinaḥ

bhavanāni manojñāni vividhābharaṇāḥ striyaḥ//
dhanaṃ cādṛṣṭaparyaṃtaṃ sūryapūjāvidheḥ phalam

durlabhā bhaktiḥ sūrye vā durlabhaṃ tasya cārcanam//
dānaṃ ca durlabhaṃ tasmai tato homaśca durlabhaḥ

namaskārādisaṃyuktaṃ ravirityakṣaradvayam//
jihvāgre vartate yasya saphalaṃ tasya jīvitam

ityahaṃ hṛdi saṃciṃtya māhātmyaṃ ravijaṃ mahat//
pūrṇaṃ varṣaśataṃ pārtha raviṃ bhaktyā hyatoṣayam

japena suviśuddhena cchandasāṃ vāyubhojanaḥ//
tataḥ khāddvitīyāṃ mūrtiṃ kṛtvā yogabalādvibhuḥ

tejasā durdṛśo bhāsvānpratyakṣaḥ samajāyata

tamahaṃ prāṃjalirbhūtvā namaskṛtya raviṃ prabhum//
sāmabhirvividhairdevaṃ paryatoṣayamīśvaram

tuṣṭo māmāha varado devarṣe suciraṃ tvayā//
tapasārādhito'smīti varaṃ vṛṇu yathepsitam

ityukto'haṃ lokanāthaṃ prāṃjaliḥ prāstuvaṃ vacaḥ//
yadi tuṣṭo bhavānmahyaṃ yadi deyo varo mama

tataste kāmarūpe yā kalā nātha pravartate//
rājavardhanarājñā yā''rādhitā ca janaiḥ purā

tayā ca kalayā bhāno sadātra sthātumarhasi//
tatastatheti devena prokte tuṣṭena bhārata

asthāpayamahaṃ sūryaṃ bhaṭṭādityābhidhānakam//
bhaṭṭenasthāpitaṃ yasmānmayā tasmādravirjagau

tataḥ saṃpūjya taṃ puṣpaiḥ kṛtāveśamahaṃ ravim//
bhaktyudrekāplutāṃgo'tha stutimetāmathācaram

sarvavedarahasyaiśca nāmabhiśca śatāṣṭabhiḥ//
saptasaptiraciṃtyātmā mahākāruṇikottamaḥ

saṃjīvano jayo jīvo jīvanātho jagatpatiḥ//
kālāśrayaḥ kālakartā mahāyogī mahāmatiḥ

bhūtāṃtakaraṇo devaḥ kamalānandanandanaḥ//
sahasrapācca varado divyakuṇḍalamaṇḍitaḥ

dharmapriyocitātmā ca savitā vāyuvāhanaḥ//
ādityo'krodhanaḥ sūryo raśmimālī vibhāvasuḥ

dinakṛddinahṛnmaunī suratho rathināṃvaraḥ//
rājñīpatiḥ svarṇaretāḥ pūṣā tvaṣṭā divākaraḥ

ākāśatilako dhātā saṃvibhāgī manoharaḥ//
prajñaḥ prajāpatirdhanyo viṣṇuḥ śrīśo bhiṣagvaraḥ

ālokakṛllokanātho lokapālanamaskṛtaḥ//
viditāśayaśca sunayo mahātmā bhaktavatsalaḥ

kīrtikīrtikaro nityo rociṣṇuḥ kalmaṣāpahaḥ//
jitānando mahāvīryo haṃsaḥ saṃhārakārakaḥ

kṛtakṛtyaḥ susaṃgaśca bahujño vacasāṃ patiḥ//
viśvapūjyo mṛtyuhāri ghṛṇī dharmasya kāraṇam

praṇatārtiharo'roga āyuṣyamānsukhadaḥ sukhī//
maṅgalaṃ puṇḍarīkākṣo vratī vrataphalapradaḥ

śuciḥ pūrṇo mokṣamārgadātā bhoktā maheśvaraḥ//
dhanvaṃtariḥ priyābhāṣī dhanurvedavidekarāṭa

jagatpitā dhūmaketurvidhūto dhvāṃtahā guruḥ//
gopatiśca kṛtātithyaḥ śubhācāraḥ śucipriyaḥ

sāmapriyo lokabandhurnaikarūpo yugādikṛt//
dharmaseturlokasākṣī kheṭataṛ sarvadaḥ prabhuḥ

mayaivaṃ saṃstuto bhānurnāmnāmaṣṭaśatena ca//
tuṣyatāṃ sarvalokānāṃ sarvalokapriyo vibhuḥ

ityevaṃ saṃstavātprīto bhāskaro māmavocata//
sadātra kalayā sthāsye devarṣe tvatpriyepsayā

yo māmatra mahābhaktyā bhaṭṭādityaṃ prapūjayet//
sahasraśaḥ kā marūpe saṃpūjyāpnoti tatphalam

māmuddiśya ca yo vipraḥ svalpaṃ vā yadi vā bahu//
dāsyate'trākṣayaṃ tacca grahīṣye karajaṃ yathā

raktotpalaiśca kahlāraiḥ kesaraiḥ karavīrakaiḥ//
śatatrayairmahāpdamai ravivāreṇa mānavaḥ

saptamyāmatha ṣaṣṭhyāṃ vā ye'rcayiṣyaṃti māmiha//
yānyānprārthayate kāmāṃstāṃtānprāpsyati niścitam

darśanānmama bhaktyā ca nāśo vyādhidaridrayoḥ//
praṇāmātsvargamāpnoti śrutvā mokṣaṃ ca nityaśaḥ

abhaktiṃ yaśca kartā me sa gacchenniściṃtaṃ kṣayam//
aṣṭottaraśataṃ nāma mamāgre yattvayeritam

trikālamekakālaṃ vā paṭhataḥ śrṛṇuyatphalam//
kīrtimānsubhago vidvānsusukhī priyadarśanaḥ

bhavedvarṣaśatāyuśca sarvarogavivarjitaḥ//
yastvidaṃ śrṛṇuyānnityaṃ paṭhedvā prayataḥ śuciḥ

akṣayaṃ svalpamapyannaṃ bhavettasyopasādhitam//
vijayī ca bhavennityaṃ tathā jātismaro bhavet

tasmādetattvayā jāpyaṃ paraṃ svastyayanaṃ mahat//
tathā mamāgre kuṃḍaṃ ca kuru snānārthamuttamam

kāmarūpakalā yatra tatra kuṃḍaṃ vane bhavet//
evaṃ dattvā varānbhānustatraivāṃ taradhīyata

tato bhāskaravākyena siddheśasya ca savyataḥ//
vanamadhye mayā kuṃḍaṃ kṛtaṃ darbhaśalākayā

kāmarūpabhavaṃ kuṃḍaṃ vṛkṣāste cāpi bhārata//
saṃlīnāstanmahāścaryaṃ mamājāyata cetasi

māghamāsasya śuklāyāṃ saptamyāṃ strī naro'pi vā//
snānaṃ kuṃḍe śubhaṃ kṛtvā bhaṭṭādityaṃ prapaśyati

tasyānaṃtaṃ bhavetpuṇyaṃ rathaṃ yaśca prapūjayet//
rathayātrāṃ ca kurute yasminyasminnasau pathi

ye ca paśyaṃti lokāste dhanyāḥ sarve na saṃśayaḥ//
putradhānyadhanairyuktā nīrujastejasā'nvitāḥ

bhaviṣyaṃti narāste ye kārayaṃti rathotsavam//
gaṃgādisarvatīrtheṣu yatphalaṃ kīrtitaṃ budhaiḥ

bhaṭṭādityasya kuṃḍe ca tatphalaṃ saptamīdine//
tatra kuṃḍe ca yaḥ snātvā sūryārghyaṃ prayacchati//
kapilā gośatasyāsau dattasya phalamaśnute

//arjura uvāca//
vāsudevādayaḥ sarve vadaṃtyevaṃ mahāmune

bhāskarārghaṃ vinā pātaḥ kṛtaṃ sarvaṃ ca niṣphalam//
tasyāhaṃ śrotumicchāmi vidhiṃ vidhividāṃ vara

//nārada uvāca//
yathā brahmādayo devā yacchaṃtyarghaṃ mahātmane//
bhāskarāya śrṛṇu tvaṃ taṃ vidhiṃ sarvāghanāśanam

prathamaṃ tāvatpratyuṣe udite sūrye śucirbhūtvā gomayakṛtamaṃḍalasyopari raktacaṃdanena maṃḍalakaṃ kṛtvā tatastāmrapātre raktacaṃdanodakaśvetacaṃdanādidravyaiḥ prapūraṇaṃ kṛtvā tanmadhye hemākṣatadūrvādadhisarpīṣi parikṣipya sthāpayet

svaśarīramālabhet anena maṃtreṇa//
ॐkhakholkāya namaḥ//
saptavārānuccārya sthātavyam//
tena śuddhirupasaṃjāyate dehasyārcārhatā bhavati//
paścādāsanasthaṃ devaṃ savitāraṃ maṃḍalamadhye dvādaśātmakaṃ surādibhiḥ saṃpūjyamānaṃ dhyātvā pūrvoktamarghapātraṃ śirasi kṛtvā bhūmau jānunī nipātya sūryābhimukhastadgatamanābhūtvārghamaṃtramudāharet//
taducyate sūryavaktrādvinirgatamiti

yasyoccāraṇaśabdena rathaṃ saṃsthāpya bhāskaraḥ//
pratigṛhṇāti caivārghyaṃ varamiṣṭaṃ ca yacchati

ॐyasyāhuḥ sapta cchaṃdāṃsi rathe tiṣṭhaṃti vājinaḥ//
aruṇaḥ sārathiryasya rathavāho'grataḥ sthitaḥ

jayā ca vijayā caiva jayaṃtī pāpanāśanī//
iḍā ca piṃgalā caiva vahaṃto'śvamukhāstathā

ḍiṃḍiśca śeṣanāgaśca gaṇādhyakṣastathaiva ca//
skaṃdarevaṃtatārkṣyāśca tathā kalmāṣapakṣiṇau

rājñī ca nikṣubhā devī lalitā caiva saṃjñikā//
tathā yajñabhujo devā ye cānye parikīrtitāḥ

ebhiḥ parivṛto yo'sāvadharottaravāsibhiḥ//
tamahaṃ lokakartāramāhvayāmi tamopaham

ammayo bhagavānbhānuramuṃ yajñaṃ pravartayan//
idamarghyaṃ ca pādyaṃ ca pragṛhāṇa namonamaḥ

//āvāhanam//
sahasrakiraṇa varada jīvanarūpa te namaḥ//
iti sāṃnidhyakaraṇam//
ॐvaṣaṭ ityuccārya sūryasya caraṇayugalaṃ paśyan bhuvi padmyāṃ pātrīṃ nirvāpayet pādyaṃ taducyate//
evaṃ pādyaṃ dattvā baddhāṃjaliḥ susvāgatamiti kuryāt//
svāgataṃ bhagavannehi mama prasādaṃ vidhāya āsyatām//
iha gṛhāṇa pūjāṃ ca prasādaṃ ca dhiyā kuru//
tiṣṭha tvaṃ tāvadatraiva yāvatpūjāṃ karomyaham

evaṃ vijñāpanaṃ dadyādanena maṃtreṇa kamalāsanam//
tatkamalāsanaṃ kamalanaṃdana upāviśati//
āsana upaviṣṭasya śeṣāṃ pūjāṃ niyojayet anena vidhānena//
ॐsomamūrtikṣīrodapataye namaḥ//
iti kṣīrādisnapanam//
ॐbhāskarāya nīrava sine namaḥ//
//iti jalasnānam//
tato vāsoyugaṃ śubhraṃ dadyāt anena maṃtreṇa//
idaṃ vāsoyugaṃ sūrya gṛhāṇa kṛpayā mama//
kaṭibhūṣaṇamekaṃ te dvitīyaṃ cāṃgaprāvaraṇam

tato yajñopavītaṃ dadyāt anena maṃtreṇa//
sūtrataṃtumayaṃ śuddhaṃ pavitramidamuttamam//
yajñopavītaṃ deveśa pragṛhāṇa namo'stu te

tato yathāśakti śvetamukuṭamudrikādibhūṣaṇāni dadyāt anena maṃtreṇa//
mukuṭo ratnanaddho'yaṃ mudrikāṃ bhūṣaṇāni ca//
alaṃkāraṃ gṛhaṇemaṃ mayā bhaktyā samarpitam

evamalaṃkāraṃ nivedya paścātkeśarakuṃkumakarpūraraktacaṃdanamiśramanulepanaṃ dadyāt

ॐtavātipriya vṛkṣāṇāṃ raso'yaṃ tigmadīdhite//
sa tavaivocitaḥ svāmingṛhāṇa kṛpayā mama

tataścaṃpakajapākaravīrakarṇakakesarakokanadādibhiḥ pūjāṃ kuryāt

ॐvanaspatiraso divyo gaṃdhāḍhyo gaṃdha uttamaḥ//
āhāraḥ sarvadevānāṃ dhūpo'yaṃ pratigṛhyatām

//śallakīdhūpamaṃtraḥ//
tataḥ pāyasādiniṣpannaṃ naivedyaṃ nivedayedanena maṃtreṇa//
naivedyamamṛtaṃ sarvabhūtānāṃ prāṇavardhanam//
pūrṇapātre mayā dattaṃ pratigṛhṇa prasīda me

tataḥ śaucodakatāṃbūladīpārārtikaśītalikāpunaḥ pūjādi nivedya yathāśaktyā stutvā sukṛtaṃ duṣkṛtaṃ vā kṣamasveti procya visarjayet//
tato bhūyo namasya hemavastropavītālaṃkārān brāhmaṇāya nivedya nirmālyaṃ saṃhṛtyāṃbhasi nikṣipet

//ityarghyadānavidhiḥ//
ya evaṃ bhāskarāyārghyaṃ mūrtau maṃḍalake'pi vā//
nityaṃ nivedayetprātaḥ syādraverātmavatpriyaḥ

anena vidhinā karṇo bhāskarārghyaṃ prayacchati//
tataḥ sūryasya pārthāsāvātmavadvallabho mataḥ

aśaktaścennityamekamarghyaṃ dadyāddivākṛte//
tato'tra rathasaptamyāṃ kuṃḍe deyaḥ prayatnataḥ

aśvamedhaphalaṃ prāpya sūryaloka mavāpnuyāt//
tasmātsarvaprayatnena dātavyo'rgho'tra bhārata

evaṃvidhastvasau devo bhaṭṭādityo'tra tiṣṭhati//
bhūyānato'pi bahuśaḥ pāpahā dharmavardhanaḥ

divyamaṣṭavidhaṃ cātra sadyaḥ pratyayakārakam//
pāpānāṃ copabhuktaṃ hi yathā pārtha halāhalam

iti śrīskāṃde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe kaumārikākhaṇḍe sāgarasaṃgame bhaṭṭādityamāhātmyavarṇanaṃnāma tricatvāriṃśo'dhyāyaḥ