Skanda Purana · Chapter 1.42

//nārada uvāca//
tato mayā sthāpite ca sthāne kālāṃtareṇa ha//
ciṃtitaṃ hṛdaye bhūyo dvijānugrahakāmyayā

vāsudevavihīnaṃ hi tīrthametanna rocate//
asūryaṃ hi jagadyadvatsa hi bhūṣaṇa bhūṣaṇam

yatra naiva hariḥ svāmī tīrthe gehe'tha mānase//
śāstre vā tadasatsarvaṃ hāṃsaṃ tīrthaṃ na vāyasam

tasmātprasādya varadaṃ tīrthe'sminpuruṣottamam//
āneṣye kalayā sākṣādviśvanugrahakāmyayā

iti saṃciṃtya kauravya tato'haṃ cātra saṃsthitaḥ//
jñānayogena yogīṃdraṃ śataṃ varṣāṇyatoṣayam

aṣṭākṣaraṃ japanmaṃtraṃ saṃnigṛhyeṃdriyāṇi ca//
vāsudevamayo bhūtvā sarvabhūtakṛpāparaḥ

evaṃ mayārādhyamāno garuḍaṃ harirāsthitaḥ//
gaṇakoṭiparivṛtaḥ pratyakṣaḥ samajāyata

tamahaṃ prāṃjalirbhūtvā dattvārghyaṃ vidhivaddhareḥ//
pratyavocaṃ pramamyātha prabaddhakarasaṃ puṭaḥ

śvetadvīpe purā dṛṣṭaṃ mayā rūpaṃ tava prabho//
ajaṃ sanātanaṃ viṣṇo naranārāyaṇātmakam

tadrūpasya kalāmekāṃ sthāpayātra janārdana//
yadi tuṣṭo'si me viṣṇo tadidaṃ kriyatāṃ tvayā

evaṃ mayā prārthito'tha provāca garuḍadhvajaḥ//
evamastu brahmaputra yattvayābhīpsitaṃ hṛdi

tattathā bhavitā sarvamapyatrasthaṃ sadaiva hi//
evamuktvā gate viṣṇau niveśya svakalāṃ prabho

mayā saṃsthāpito viṣṇurlokānugrahakāmyayā//
yasmātsvayaṃ śvetadvīpanivāsyatra hariḥ sthitaḥ

vṛddho viśvasya viśvākhyo vāsudevastataḥ smṛtaḥ//
kārtike śuklapakṣe yā bhavatye kādaśī śubhā

snānaṃ kṛtvā vidhānena toyaprasravaṇādiṣu//
yorcayedacyutaṃ bhaktyā paṃcopacārapūjayā

upoṣya jāgaraṃ kuryādgītavādyaṃ hareḥ puraḥ//
kathāṃ vā vaiṣṇavīṃ kuryāddaṃbhakrodhavivarjitaḥ

dānaṃ dadyādyathāśaktyā niyato hṛṣṭamānasaḥ//
anekabhavasaṃbhūtātkalmaṣādakhilādapi

mucyate'sau na saṃdeho yadyapi brahmaghātakaḥ//
gāruḍena vimānena vaikuṃṭhaṃ padamāpnuyāt

kulānāṃ tārayetpārtha śatamekottaraṃ naraḥ//
śraddhāyuktaṃ mudā yuktaṃ sotsāhaṃ saspṛhaṃ tathā

ahaṃkāravihīnaṃ ca snānaṃ dhūpānupanam//
puṣpanaivedyasaṃyuktamarghadānasamanvitam

yāmeyāme mahābhaktyā kṛtārārtikasaṃyutam//
cāmarāhlādasaṃyuktaṃ bherīnādapuraskṛtam

purāṇaśrutisaṃpannaṃ bhaktinṛtyasamanvitam//
vinidraṃkṣṛttṛṣāsvādaspṛhāhīnaṃ ca bhārata

tatpādasaurabhaghrāṇasaṃyutaṃ viṣṇuvallabham//
sagītaṃ sārcanakaraṃ tatkṣetragamanānvitam

pāyurodhena saṃyuktaṃ brahmacaryasamanvitam//
stutipāṭhena saṃyuktaṃ pādodakavibhūṣitam

satyānvitaṃ satyayogasaṃyutaṃ puṇyavārtayā//
paṃcaviṃśatibhiryuktaṃ guṇairyo jāgaraṃ naraḥ//
ekādaśyāṃ prakurvīta punarna jāyate bhuvi

atra tīrthavare pūrvamaitareya iti dvijaḥ//
siddhiṃ prāpto mahābhāgo vāsudevaprasādataḥ

//arjuna uvāca//
aitareyaḥ kasya putro nivāsaḥ kvāsya vā mune//
kathaṃ siddhimāgāddhīmānvāsudevaprasādataḥ

//nārada uvāca//
asminneva mama sthāne hārītasyānvaye'bhavat

māṃḍūkiriti viprāgryo vedavedāṃgapāragaḥ

tasyāsī ditarā nāma bhāryā sādhvīguṇairyutā//
tasyāmutpadyata sutastvaitareya iti smṛtaḥ

sa ca bālyātprabhṛtyeva prāgjanmanyanuśikṣitam//
jajāpamaṃtraṃ tvaniśaṃ dvādaśākṣarasaṃjñitam

na śrṛṇoti na vaktyeva manasāpi ca kiṃcana//
evaṃprabhāvaḥ so'bhūcca bālye viprasutastadā

tato mūko'yamityeva nānopāyaiḥ prabodhitaḥ//
pitrā yadā na kurute vyavahārāya mānasam

tato niścitya manasā jaḍoyamiti bhārata//
anyāṃ vivāhayāmāsa dārānputrāṃstathādadhe

piṃgānāma ca sā bhāryā tasyāḥ putrāśca jajñire//
catvāraḥ karmakuśalā vedavedāṃgavādinaḥ

yajñeṣu śāṃtihomeṣu dvijaiḥ sarvatra pūjitāḥ//
aitareyopi nityaṃ ca trikālaṃ harikaṃdire

jajāpa paramaṃ jāpyaṃ nānyatra kurute śramam//
tato mātā nirīkṣyaiva sapatnītanayāṃstathā

dāryamāṇena manasā tanayaṃ vākyamabravīt//
kleśāyaiva ca jāto'si dhigme janma ca jīvitam

nāryāstasyā nṛloke'tra varaivājananiḥ sphuṭam//
vimānitā yā bhartrāsyānna putraḥ syādguṇairyutaḥ

piṃgeyaṃ kṛtapuṇyā vai yasyāḥ putrā mahāguṇāḥ//
vedavedāṃgatattvajñāḥ sarvatrābhyarcitā guṇaiḥ

tadahaṃ putra durbhāgyā mahīsāgarasaṃgame//
nimajjīṣye varaṃ mṛtyurjīvite kiṃ phalaṃ mama//
tvamapyevaṃ mahāmaunī nanda bhakto hareściram

//nārada uvāca//
iti māturvacaḥ śrutvā prahasannaitareyakaḥ

dhyātvā muhurtaṃ dharmajño mātaraṃ praṇato'bravīt//
mātarmithyābhibhūtāsi ajñāne jñānavatyasi

aśocye śocasi śubhe śocye naivā'pi śocasi//
dehasyāsya kṛte mithyāsaṃsāre kiṃ vimuhyasi

mūrkhācaritametaddhi manmāturucitaṃ na hi//
anyatsaṃsārasāraṃ ca sāramanyacca mohitāḥ

prapaśyaṃti yathā rātrau khadyotaṃ dīpavatsthitam//
yadidaṃ manyase sāraṃ śrṛṇu tasyāpyasāratām

evaṃvidhaṃ hi mānu'yamā garbhāditi kaṣṭadam
asthipaṭṭatulāstambhe snāyubandhena yaṃtrite

raktamāṃsamadālipte viṇmūtradravyabhājane//
keśaromatṛṇacchanne suvarṇatvaksudhūtake

vadanaikamahādvāre ṣaḍgavākṣavitabhūṣite//
oṣṭhadvayakāṭe ca tathā daṃtārgalānvite

nāḍīsvedapravāhe ca kālavaktrānalasthite//
evaṃvidhe gṛhe gehī jīvo nāmāsti śobhane

guṇatrayamayī bhāryā prakṛtistasya tatra ca//
bodhāhaṃkārakāmāśca krodhalobhādayo'pi ca

apatyānyasya hā kaṣṭamevaṃ mūḍhaḥ pravartate//
tasya yoyo yathā mohastathā taṃ śrṛṇu tattvataḥ

srotāṃsi yasya satataṃ prasravaṃti gireriva//
kaphamūtrādikānyasya kṛte dehasya muhyati

sarvāśucinidhānasya śarīrasya na vidyate//
śucirekapradeśo'pi viṇmūtrasya dṛteriva

spṛṣṭvā svadehasrotāṃsi mṛttoyaiḥ śodhyate karaḥ//
tathāpyaśucibhāṃḍasya na virajyati kiṃ naraḥ

kāyaḥ sugandhatoyādyairyatnenāpi susaṃskṛtaḥ//
na jahāti svakaṃ bhāvaṃ śvapucchamiva nāmitam

svadehāśucigaṃdhena na virajyati yo naraḥ//
virāge kāraṇaṃ tasya kimanyadu padiśyate

gandhalepāpanodārthaṃ śaucaṃ dehasya kīrtitam//
dvayasyāpagamātpaścādbhāvaśuddhyā viśudhyati

gaṃgātoyena sarveṇa mṛdbhāraiḥ parvatopamaiḥ//
ā mṛtyorācarañchaucaṃ bhāvaduṣṭo na śudhyati

tīrthasnānaistapobhirvā duṣṭātmā naiva śudhyati//
sveditaḥ kṣālitastīrthe kiṃ śuddhimadhigacchati

aṃtarbhāvapraduṣṭasya viśato'pi hutāśanam//
na svargo nāpapargaśca dehanirdahanaṃ param

bhāvaśuddhiḥ paraṃ śaucaṃ pramāṇaṃ sarvakarmasu//
anyathāliṃgyate kāṃtā bhāvena duhitā'nyathā

anyathaiva stanaṃ putraściṃtayatyanyathā patiḥ//
cittaṃ viśodhayettasmātkimanyairbāhyaśodhanaiḥ

bhāvataḥ saṃviśuddhātmā svargaṃ mokṣaṃ ca viṃdati//
jñānāmalāṃbhasā puṃsaḥ sadvairāgyamṛdā punaḥ

avidyārāgaviṇmūtralepagaṃdhaviśodhanam//
evametaccharīraṃ hi nisargādaśuci viduḥ

tvaṅmātrasāraniḥsāraṃ kadalīsārasaṃnibham//
jñātvaivaṃ doṣavaddehaṃ yaḥ prājñaḥ śithilībhavet

sa niṣkrāmati saṃsāre dṛḍhagrāhī sa tiṣṭhati//
evametanmahākaṣṭaṃ janma duḥkhaṃ prakīrtitam

puṃsāmajñātadoṣeṇa nānākarmavaśena ca//
yathā girivarākrāṃtaḥ kaścidduḥkhena tiṣṭhati

yathā jarāyuṇā dehī duḥkhaṃ tiṣṭhati veṣṭitaḥ//
patitaḥ sāgare yadvaddṛḥkhamāste samākulaḥ

garbhodakena siktāṃgastathā''ste vyākulaḥ pumān//
lohakumbhe yathānyasta pacyate kaścidagninā

garbhakumbhe tathā kṣiptaḥ pacyate jaṭharāgninā//
sūcībhiragnivarṇābhirvibhinnasya nirantaram

yadduḥkhaṃ jāyate tasya tadgarbhe'ṣṭaguṇaṃ bhavet//
ityetadgarbhaduḥkhaṃ hi prāṇināṃ parikīrtitam

carasthirāṇāṃ sarveṣāmātmagarbhānurūpataḥ//
tatrasthasya ca sarveṣāṃ janmanāṃ smaraṇaṃ bhavet

mṛtaścāhaṃ punarjāto jātaścāhaṃ punarmṛtaḥ//
nānāyonisahasrāṇi mayā dṛṣṭānvanekadhā

adhunā jātamātro'haṃ prāptasaṃskāra eva ca//
tataḥ śreyaḥ kariṣyāmi yena garbho na saṃbhavet

adhyeṣyāmi harerjñānaṃ saṃsāravinivartanam//
evaṃ saṃciṃtayannāste mokṣopāyaṃ vicintayan

gabhātkoṭiguṇaṃ duḥkhaṃ jāyamānasya jāyate//
garbhavāse smṛtiryāsītsā jātasya praṇaśyati

spṛṣṭamātrasya bāhyena vāyunā mūḍhatā bhavet//
saṃmūḍhasya smṛtibhraṃśaḥ śīghraṃ saṃjāyate punaḥ

smṛtibhraṃśāttatastasya pūrvakarmavaśena ca//
ratiḥ saṃjāyate tūrṇaṃ jaṃtostatraiva janmani

rakto mūḍhaśca lokoyamakārye saṃpravartate//
tatrātmānaṃ na jānāti na paraṃ na ca daivatam

na śrṛṇoti paraṃ śreyaḥ sati cakṣuṣi nekṣate//
same pathi samairgacchanskhalatīva padepade

satyāṃ buddhau na jānāti bodhyamāno budhairapi//
saṃsāre kliśyate tena rāgamohavaśānugaḥ

garbhasmṛterabhāvena śāstramuktaṃ maharṣibhiḥ//
taddṛḥkhakathanārthāya svargamokṣaprasādhakam

ye śāstrajñāne satyasminsarvakarmārthasādhake//
na kurvaṃtyātmanaḥ śreyastadatra paramadbhutam

avyaktendriyavṛttitvādbālye duḥkhaṃ mahatpunaḥ//
icchannapi na śaknoti vaktuṃ kartuṃ ca kiñcana

daṃtotthāne mahadduḥkhaṃ maulena vyādhinā tathā//
bālarogaiśca vividhaiḥ pīḍā bālagrahairapi

tṛḍbubhukṣāparītāṃgaḥ kvacittiṣṭhati rāraṭan//
viṇmūtrabhakṣaṇādyaṃ ca mohādbālaḥ samācaret

kaumāre karṇavedhena mātāpitrorvitāḍanaiḥ//
akṣarādhyayanādyaiśca duḥkhaṃ syādguruśāsanāt

pramatteṃdriyavṛttaiśca kāmarāgaprapīḍanāt//
rāgodvṛttasya satataṃ kutaḥ saukhyaṃ hi yauvane

īrṣyayā sumahadduḥkhaṃ mohādraktasya jāyate//
mattasya kupitasyaiva rāgo doṣāya kevalam

na rātrau viṃdate nidrā kāmāgniparikheditaḥ//
divāpi hi kutaḥ saukhyamarthopārjanaciṃtayā

nārīṣu tvanubhūtāsu sarvadoṣāśrayāsu ca//
viṇmutrotsargasadṛśaṃ saukhyaṃ maithunajaṃ smṛtam

sanmānamapamānena viyogeneṣṭasaṃgamaḥ//
yauvanaṃ jarayā grastaṃ kva saukhyamanupadravam

valīpalitakāyena śithilīkṛtavigrahaḥ//
sarvakriyāsvaśaktaśca jarayājarjjarīkṛtaḥ

strīpuṃsoryauvanaṃ rūpaṃ yadanyonyāśrayaṃ purā//
tadevaṃ jarayā grastamubhayorapi na priyam

jarābhibhūtaḥpuruṣaḥ patnīputrādibāṃdhavaiḥ//
aśaktatvāddurācārairbhṛtyaiśca paribhūyate

dharmamarthaṃ ca kāmaṃ ca mokṣaṃ ca nāturo yataḥ//
śaktaḥ sādhayituṃ tasmādyuvā dharmaṃ samācaret

vātapittakaphādīnāṃ vaiṣamyaṃ vyādhirucyate//
vātādīnāṃ samūhaśca deho'yaṃ parikīrtitaḥ

tasmādvyādhimayaṃ jñeyaṃ śarīramidamātmanaḥ//
rogairnānāvidhairyāṃti dehe duḥkhānyanekaśaḥ

tāni na svātmavedyāni kimanyatkathayāmyaham//
ekottaraṃ mṛtyuśatamasmindehe pratiṣṭhitam

tatraikaḥ kālasaṃyuktaḥ śeṣāstvāgaṃtavaḥ smṛtāḥ//
ye tvihāgaṃtavaḥ proktāste praśāmyanti bheṣajaiḥ

japahomapradānaiśca kālamṛtyurna śāmyati//
vividhā vyādhayaḥ śastāḥ sarpādyāḥ prāṇinastathā

viṣāṇi cābhicārāśca mṛtyordvārāṇi dehinām//
pīḍitaṃ sarparogādyairapi dhanvaṃtariḥ svayam

svasthīkartuṃ na śaknoti kālaprāptaṃ hi dehinam//
naiṣadhaṃ na tapo maṃtrā na mitrāṇi na bāṃdhavāḥ

śaknuvaṃti paritrātuṃ naraṃ kālena pīḍitam//
rasāyanatapojapyairyogasiddhairmahātmabhiḥ

kālamṛtyurapi prājñairnīyate nāpi saṃyutaiḥ//
nāsti mṛtyusamaṃ duḥkhaṃ nāsti mṛtyusamaṃ bhayam

nāsti mṛtyusamasrāsaḥ sarveṣāmapi dehinām//
sadbhāryāputramitrāṇi rājyaiśvaryasukhāni ca

ābaddhāni snehapāśairmṛtyuḥ sarvāṇi kṛṃtati//
kiṃ na paśyasi mātastvaṃ sahasrasyāpi madhyataḥ

janāḥ śatāyuṣaḥ paṃcabhavaṃti na bhavanti vā//
aśītikā vipadyante kecitsaptatikā narāḥ

paramāyuḥ sthitā ṣaṣṭistadapyasti na niṣṭhitam//
tasya yāvadbhavedāyurdehinaḥ pūrvakarma bhiḥ

tasyārdhamāyuṣo rātrirharate mṛtyurūpiṇī//
bālabhāvena mohena vārdhake jarayā tathā

varṣāṇāṃ viṃśatiryāti dharmakāmārthavarjitaḥ//
āgantukairbhavaiḥ puṃsāṃ vyādhiśokairanekadhā

hriyaterddhaṃ hi tatrāpi yaccheṣaṃ taddhi jīvitam//
jīvitāṃteca maraṇaṃ mahāghoramavāpnuyāt

jāyate yonikoṭīṣu mṛtaḥ karmavaśātpunaḥ//
dehabhedena yaḥ puṃsāṃ viyogaḥ karmasaṃkhyayā

maraṇaṃ tadvinirddiṣṭaṃ na nāśaḥ paramārthataḥ//
mahātamaḥpraviṣṭasya cchidyamāneṣu marmasu

yadduḥkhaṃ maraṇaṃ jaṃtorna tasyehopamā kvacit//
hā tāta mātarhā kāṃte kraṃdatyevaṃ suduḥkhitaḥ

maṇḍūka iva sarpeṇa gīryate mṛtyunā janaḥ//
bāṃdhavaiḥ saṃparityaktaḥ priyaiśca parivāritaḥ

niḥśvasandīrghamuṣṇaṃ ca mukena pariśuṣyatā//
caturaṃteṣu khaṭvāyāḥ parivartanmuhurmuhuḥ

saṃmūḍhaḥ kṣipatetyarthaṃ hastapādāvitastataḥ//
khaṭvāto vāṃchate bhūmiṃ bhūmeḥ khaṭvāṃ punarmahīm

vivastro muktalajjaśca viṣṭhānulepitaḥ//
yācamānaśca salilaṃ śuṣkakaṇṭhoṣṭhatālukaḥ

ciṃtayānaḥ svavittāni kasyaitāni mṛte mayi//
paṃcāvaṭānkhanamānaḥ kālapāśena karṣitaḥ

mriyate paśyatāmeva gale ghurghurarāvakṛt//
jīvastṛṇajalūkeva dehāddehaṃ viśetkramāt

saṃprāpyottaramaṃśena dehaṃ tyajati pūrvakam//
maraṇātprārthanā duḥkhamadhikaṃ hi vivekinaḥ

kṣaṇikaṃ maraṇe duḥkhamanaṃtaṃ prārthanākṛtam//
jñātaṃ mayaitadadhunā mṛto bhavati yadguruḥ

na paraḥ prārthayedbhūyastṛṣṇā lāghavakāraṇam//
ādau duḥkhaṃ tathā madhye hyantye duḥkhaṃ ca dāruṇam

nisargātsarvabhūtānāmiti duḥkhaparaṃparā//
kṣudhā ca sarvarogāṇāṃ vyādhiḥ śreṣṭhatamaḥ smṛtaḥ

sa cānnauṣadhilepena kṣaṇamātraṃ praśāmyati//
kṣuddhyādhervedanā tīvrā niḥśeṣabalakṛntanī

tayābhibhūto mriyate yathānyairvyādhibhirnnaraḥ//
rājño'bhimānamātraṃ hi mamaiva vidyate gṛhe

sarvamābharaṇaṃ bhāraṃ sarvamālepanaṃ mama//
sarvaṃ pralāpitaṃ gītaṃ nityamunmattaceṣṭitam

ityevaṃ rājyasaṃbhogaiḥ kutaḥ saukhyaṃ vicārataḥ//
nṛpāṇāṃ vyagracittānāmanyonyavijigīṣayā

prāyeṇa śrīmadālepānnahuṣādyā mahānṛpāḥ//
svargaṃ prāpyāpi patitāḥ kaḥ śriyo viṃdate sukham

uparyupari devānāmanyonyātiśaye sthitam//
naraiḥ puṇyaphalaṃ svarge mūlacchedena bhujyate

na cānyatkriyate karma so'tra doṣaḥ sudāruṇaḥ//
chinnamūlataruryadvadavaśaḥ patate kṣitau

puṇyamūlakṣaye tadvatpātayaṃti divaukasaḥ//
iti svargepi devānāṃ nāsti saukhyaṃ vicārataḥ

tathā nārakiṇāṃ duḥkhaṃ prasiddhaṃ kiṃ ca varṇyate//
sthāvareṣvapiduḥkhāni dāvāgnihimaśoṣaṇam

kuṭhāraiśṭhedanaṃ tīvraṃ valkalānāṃ ca takṣaṇam//
parṇaśakhāphalānāṃ ca pātanaṃ caṃḍavāyunā

apamardaśca satataṃ gajairvanyaiśca dehibhiḥ//
tṛḍ‌bubhukṣā ca sarpāṇāṃ krodho duḥkhaṃ ca dāruṇam

duṣṭānāṃ ghātanaṃ loke pāśena ca nibandhanam//
evaṃ sarīsṛpāṇāṃ ca duḥkhaṃ mātarmuhurmuhuḥ

akasmājjanmamaraṇaṃ kīṭādīnāṃ tathāvidham//
varṣāśītātapairduḥkhaṃ sukaṣṭaṃ mṛgapakṣiṇām

kṣuttṛṭ‌kleśena mahatā saṃtrastāśca sadā mṛgāḥ//
paśunāganikāyānāṃ śrṛṇu duḥkhāni yāni ca

kṣuttṛṭ‌chītādidamanaṃ vadhabandhanatāḍanam//
nāsāpravedhanaṃ trāsaḥ pratodāṃkuśatāḍanam

veṇukuntādinigaḍamudgarāṃ'kuśatāḍanam//
bhārodvahanasaṃkleśaṃ śikṣāyuddhādipīḍanam

ātmayūthaviyogaśca vane ca nayanādikam//
durbhikṣaṃ durbhagatvaṃ ca mūrkhatvaṃ ca daridratā

adharottarabhāvaśca maraṇaṃ rāṣṭravibhramaḥ//
anyonyābhibhavādduḥkhamanyonyātiśayātpunaḥ

anityatā prabhāvāṇāmucchrayāṇāṃ ca pātanam//
ityevamādibhirduḥkhairyasmādvyāptaṃ carācaram

nirayādimanuṣyāṃtaṃ tasmātsarvaṃ tyajedbudhaḥ//
skandhātsakandhaṃ nayedbhāraṃ viśrāmaṃ manyatenyathā

tadvatsarvamidaṃ loke duḥkhaṃ duḥkhena śāmyati//
evametajjagatsarvamanyonyātiśayocchritam

duḥkhairākulitaṃ jñātvā nirvedaṃ paramāpnuyāt//
nirvedācca virāgaḥ syādvirāgājjñānasaṃbhavaḥ

jñānena taṃ paraṃ jñātvā viṣṇuṃ muktimavāpnuyāt//
nāhametādṛśe loke rameyaṃ janani kvacit

rājahaṃso yathā śuddhaḥ kākāmedhyapradarśakaḥ//
śrṛṇu mātaryatra saṃstho rameyaṃ nirupadravaḥ

avidyāyanamatyugraṃ nānākarmātiśākhinam//
saṃkalpadaṃśamakaraṃ śokaharṣahimātapam

mohāṃdhakāratimiraṃ lobhavyālasarīsṛpam//
viṣayānanyathādhvānaṃ kāmakrodhavimokṣakam

tadatītya mahādurgaṃ praviṣṭo'smi mahadvanam//
na tatpraviśya śocaṃti na praduṣyaṃti tadvidaḥ

na ca bibhyati keṣāṃcinnāsya bibhyati kecana

tasminvane saptamahādrumāstu saptaiva nadyaśca phalāni sapta//
saptāśramāḥ sapta samādhayaśca dīkṣāśca saptaitadaraṇyarūpam

paṃcavarṇāni divyāni caturvarṇāni kānicit//
tridvivarṇaikavarṇāni puṣpāṇi ca phalāni ca

sṛjaṃtaḥ pādapāstatra vyāpya tiṣṭhanti tadvanam

sapta striyastatra vasaṃti satyastvavāṅmukhyo bhānumato bhavaṃti//
ūrdhvaṃ rasānādadate prajābhyaḥ sarvāśca tāstattvataḥ kopi vade

saptaiva girayaścātra dhṛtaṃ yairbhuvanatrayam//
nadyaśca saritaḥ sapta brahmavārivahāḥ sadā

tejaścābhayadānatvamadrohaḥ kauśalaṃ tathā//
acāpalyamathākrodhaḥ priyavādaśca saptamaḥ

ityete girayo jñeyāstasminvidyāvane sthitāḥ//
dṛḍhaniścayastathā bhāsā samatā nigraho guṇaḥ

nirmamatvaṃ tapaścātra santoṣaḥ saptamo hradaḥ//
bhagavadguṇavijñānādbhaktiḥ syātprathamā nadī

puṣpādipūjā dvitīyā tṛtīyā ca pradakṣiṇā//
caturthī stutivāgrūpā pañcamī īśvarārpaṇā

ṣaṣṭhī brahmaikatā proktā saptamī siddhireva ca//
sapta nadyo'tra kathitā brahmaṇā parameṣṭhinā

brahmā dharmo yamaścāgniriṃdro varuṇa eva ca

dhanadaśca dhruvādīnāṃ saptakānarcayaṃtyamī//
nadīnāṃ saṃgamastatra vaikuṃṭhasamupahvare

ātmatṛptā yato yāṃti śāṃtā dāṃtāḥ parātparam//
keciddrumāḥ striyaḥ kecitkecittattvavido'pare

saritaḥ kecidāhuḥ sma saptaiva jñānavittamāḥ//
anapetavratakāmo'tra brahmacaryaṃ carāmi ca

brahmaiva samidhastatra brahmāgnirbrahma saṃstaraḥ//
āpo brahma gurubrahma brahmacaryamidaṃ mama

etadevedṛśaṃ sūkṣmaṃ brahmacaryaṃ vidurbudhāḥ//
guruṃ ca śrṛṇu me mātaryo me vidyāprado'bhavat

ekaḥ śāstā na dvitīyo'sti śāstā hṛdyeva tiṣṭhanpuruṣaṃ praśāsti//
tenābhiyuktaḥ praṇavādivodakaṃ yatā niyuktosmi tathācarāmi

eko gururnāsti tathā dvitīyo hṛdi sthitastamahaṃ nṛ bravīmi//
yaṃ cāvamānyaiva guruṃ mukundaṃ parābhūtā dānavāḥ sarva eva

eko baṃdhurnāsti tato dvitīyo hṛdī sthitaṃ tamahamanubravīmi//
tenānuśiṣṭā bāṃdhavā baṃdhumaṃtaḥ saptarṣayaḥ sapta divi prabhāṃti

brahmacaryaṃ ca saṃsevyaṃ gārhasthya śrṛṇu yādṛśam//
patnī prakṛtirūpā me taccitto nāsmi karhicit

maccittā sā sadā mātarmama sarvārthasādhanī//
ghrāṇaṃ jihvā ca cakṣuśca tvakca śrotraṃ ca paṃcamam

mano buddhiśca saptaite dīpyaṃte pāvakā mama//
gaṃdho rasaśca rūpaṃ ca śabdaḥ sparśaśca paṃcamam

maṃtavyamatha boddhavyaṃ saptaitāḥ samidho mama//
hutaṃ nārāyaṇadhyānādbhuṃkte nārāyaṇaḥ svayam

evaṃvidhena yajñena yajāmyasmi tamīśvaram//
akāmayānasya ca sarvakāmo bhavedadviṣāṇasya ca sarvadoṣaḥ

na me svabhāveṣu bhavaṃti lepāstoyasya biṃdoriva puṣkareṣu//
nityasya me naiva bhavaṃtyanityā nirīkṣamāṇasya bahusyabhāvāt

na sajjate karmasu bhogajālaṃ divīva sūryasya mayūkhajālam

evaṃvidhena putreṇa mā mātarduḥkhinī bhava//
tatpadaṃ tvā ca neṣyāmi na yatkratuśatairapi

iti putravacaḥ śrutvā vismitā itarābhavat//
ciṃtayāmāsa yadyevaṃ vidvānmama suto dṛḍham

lokeṣu khyātimāyāti tato me syādyaśaḥ param//
ityādi ciṃtayaṃtyāṃ ca rajanyāṃ bhagavānhariḥ

prahṛṣṭastasya tairvākyairvismitaḥ prādurāsa ca//
mūrteḥ svayaṃ viniṣkramya śaṃkhacakragadādharāḥ

jagadudbhāsayanbhāsā sūryakoṭisamaprabhaḥ//
tato niṣpatya dharaṇīṃ hṛṣṭaromāśrudgadaḥ

mūrdhni baddhāṃjaliṃ dhīmānaitareyo'tha tuṣṭuve

namastubhyaṃ bhagavate vāsudevāya dhīmahi//
pradyumnāyāniruddhāya namaḥ saṃkarṣaṇāya ca

namo vijñānamātrāya paramānaṃdamūrtaye//
ātmārāmāya śāṃtāya nivṛttadvaitadṛṣṭaye

ātmānaṃdānuruddhāya samyaktayaktormaye namaḥ//
hṛṣīkeśāya mahate namaste'naṃtaśaktaye

vacasyuparate prāpyo ya eko manasā saha//
anāmarūpacinmātraḥ so'vyānnaḥ sadasatparaḥ

yasminnidaṃ yataścedaṃ tiṣṭhatyapaiti jāyate//
mṛnmayeṣviva mṛjjātistasmai te brahmaṇe namaḥ

yaṃ na spṛśaṃti na vidurmanobuddhīṃdriyāsavaḥ//
aṃtarbahiśca vitataṃ vyomavatpraṇato'smyaham

deheṃdriyaprāṇamanodhiyo'mī yadaṃśabddhāḥ pracaraṃti karmasu//
naivānyadālohamiva prataptaṃ sthāneṣu taddṛṣṭapadena ete

caturbhiśca tribhirdvābhyāmekadhā praṇamāmi tam//
pūrvāparāparayuge śāstāraṃ paramīśvaram

hitvā gatīrmokṣakāmā yaṃ bhajaṃti daśātmakam//
taṃ paraṃ satyamamalaṃ tvāṃ vayaṃ paryupāsmahe

ॐnamo bhagavate mahāpuruṣāya mahānubhāvāya vibhūtipataye sakalasātvataparivṛḍhanikarakarakamalotpalakuḍmalopalālitacaraṇāraviṃdayugala paramaparameṣṭhinnamaste

tavāgnirāsyaṃ vasudhāṃghriyugmaṃ nabhaḥ śiraścaṃdraravī ca netre//
samastalokā jaṭharaṃ bhujāśca diśaścatasro bhagavannamaste

janmāni tāvaṃti na saṃti deva niṣpīḍya sarvāṇi ca sarvakālam//
bhūtāni yāvaṃti mayātra bhīme pītāni saṃsāramahāsamudre

saṃpacchilānāṃ himavanmaheṃdrakailāsamervādiṣu naiva tādṛk//
dehānanekānanugṛhṇato me prāptāsti saṃpanmahatī tatheśa

na saṃtite deva bhuvi pradeśā na yeṣu jāto'smi tathā vinaṣṭaḥ//
bhūtvā mayā yeṣu na jaṃtavaśca saṃbhakṣito vā na ca bhūtasaṃghaiḥ

śokābhibhūtasya mamāśru deva yāvatpramāṇaṃ patitaṃ bhaveṣu//
tāvatpramāṇaṃ na jalaṃ payodā muṃcaṃti divyairapi varṣalakṣaiḥ

manye dharitrīparamāṇusaṃkhyāmupaiti pitrorgaṇanā na mahyam//
mitrāvyamitrāṇyanujīvyabaṃdhūnsaṃkhyātumīśo'smina devadeva

tvayyarpitaṃ nātha punaḥ punarme manaḥ samākṣipya sudurddharāri//
kāmo vaśaṃ kradhamukhaiḥ sahāyaiḥ karoti kiṃ tadbhagavankaromi

so'haṃ bhṛśārtaḥ karuṇākarastvaṃ saṃsāragarte patitasya viṣṇo//
mahātmanāṃ saṃśrayamabhyupeto naivāvasīdatyapi durgato'pi

parāyaṇaṃ rogavato hi vaidyo mahābdhimagnasya ca naurnarasya//
bālasya mātāpitarau sughorasaṃsārakhinnasya hare tvameva

prasīda sarveśvara sarvabhūta sarvasya heto paramārthasāra//
māmuddharāsmāduruduḥkhasaṃghātsaṃsāragartātsvaparigraheṇa

kṣṛttṛṭ‌tridhātubhirimaṃ muhurardyamānaṃ śītoṣṇa vātasalilairitaretarācca//
kāmāgninācyuta ruṣā ca sudurbhareṇa saṃpaśyato mama urukrama sīdato hi

bhavaṃtu bhadrāṇi samastadoṣāḥ prayāṃtu nāśaṃ jagato'khilasya//
mayādya bhaktyā parameśvare prabhau stute jagaddhātari vāsudeve

ye bhūtale ye divi cāṃtarikṣe rasātale prāṇigaṇāśca kecit//
bhavaṃtu te siddhiyujo mayādya stute jagaddhātari vāsudeve

ajñānino jñānavido bhavaṃtu praśāntibhājaḥ satatogracittāḥ//
mayā ca viśvaṃbharaṇe hyanaṃte stute jagaddhātari vāsudeve

śrṛṇvaṃti ye me stuvatastathānye paśyaṃti ye māmidamīrayaṃtam//
devāsurādyā manujāstiraśco bhavaṃtu te'pyacyutayogabhājaḥ

ye cāpi mūkā vikaleṃdriyatvātpaṭhaṃti no naiva vilokayaṃti//
paśvādayaḥ kīṭapipīlikādyā bhavaṃtu te'pyacyutayogabhājaḥ

naśyaṃtu duḥkhāni jagatyapetu lobhādiko doṣagaṇaḥ prajābhyaḥ//
yathātmani bhrātari cātmaje vā tathā narasyāstu janepi bhāvaḥ

saṃsāravaidyai'khiladoṣahānivicakṣaṇe nirvṛtihetubhūte//
saṃsārabaṃdhāḥ śithilībhavaṃtu hṛdi sthite sarvajanasya viṣṇau

pāpaṃ praṇāśaṃ mama ca prayātu yanmānasaṃ yacca karomi vācā//
śarīramapyācaritaṃ ca yanme smṛte jagaddhātari vāsudeve

yathā hi vā vāsudeveti prokte saṃkīrttane viṣṇubhaktasya vāpi//
smṛte harau vāpi prayāti pāpaṃ satyena me naśyatāṃ tena pāpam

mūḍho'yamalpamatiralpaviceṣṭito'yaṃ kliṣṭaṃ mano'pi viṣayairmayi na prasaṃgi//
itthaṃ kṛpāṃ kuru mayi praṇate'khileśa tvāṃ stotumaṃbujabhavo'pi hi deva neśaḥ

sa tvaṃ prasīda bhagavankuru mayyanāthe viṣṇo kṛpāṃ paramakāruṇikaḥ kila tvam//
saṃsārasāgaranimagnamanaṃta dīnamuddhartumarhasi hare puruṣottamosi

itthaṃ stutaḥ sa bhagavānaitareyeṇa bhārata//
vāsudevo viśālātmā sānaṃdamidamāha tam

vatsaitareya tuṣṭosmi bhaktyānena stavena te//
varaṃ vṛṇuṣva mattastvaṃ durlabhaṃ yadabhīpsitam

//aitareya uvāca//
eṣa eva varo nāthamama nityamabhīpsitaḥ//
majjato ghorasaṃsāre karṇadhāro hare bhava

//śrībhagavānuvāca//
mukta evāsi saṃsārādyasya te bhaktirīdṛśī//
grahairmahāgrahairbaddho naiva te dvitrayodaśī

yaśca stotreṇa satataṃ guptakṣetrasamīhitam//
stoṣyate vāsudevaṃ māṃ sa pāpakṣayamāpsyati

yasmādetena stotreṇa pāpaṃ nāśamavāpsyati//
aghanāśanamityeva tasmātkhyātimavāpsyati

ekādaśyāmupoṣyaiva mamāgre yaḥ paṭhiṣyati//
stavamenaṃ sa pūtātmā mama lokamavāpsyati

sarveṣāmeva kṣetrāṇāṃ guptakṣetraṃ priyaṃ yathā//
tathā sarvastavānāṃ ca stavoyaṃ supriyomama

yāni coddiśya bhūtāni japyate'sau mahātmabhiḥ//
tāni śāṃtiṃ bhagaṃ prajñāṃ prāpsyaṃti kṛpayā mama

tvaṃ ca vatsa śrautadharmānsamyagācara śraddhayā//
na tairbaṃdhaṃ mayi nyastairāpsyasyanabhisaṃdhitaiḥ

yaja yajñairavāpyaiva dārānnandaya mātaram//
mayi dhyānena tīvreṇa māmavāpsyasyasaṃśayam

buddhirmanotha bhūtāni buddhikarmendriyāṇi ca//
trayodaśagrahairye syustrayodaśa mahāgrahāḥ

boddhavyamatha maṃtavyamahaṃtā śabda eva ca//
sparśo raso rūpagandhau vacanādānameva ca

vihṛtyutsarga ānaṃdastrayodaśa mahāgrahāḥ//
etānmahāgrahanputra śuddhāñchuddhaiḥ svakairgrahaiḥ

gṛhāṇa dhyānayogena mamaivaṃ mokṣamāpsyasi//
evaṃ tvaṃ karmabhirvīra naiṣkarmyaṃ samavāpsyasi

śulbaṃrasena saṃviddhaṃ dakṣo hema yathāśnute//
varṇāśramācāravatā mayi saṃnyastakarmaṇā

madanudhyānayuktena mokṣo nāstīha durlabhaḥ//
tasmādevaṃ vartamāno nanda vrataparāyaṇaḥ

uddhṛtya saptapuruṣāllam̐yaṃ mayi gamiṣyasi//
sāṃprataṃ pratibhāsyaṃti vedaścāpaṭhitā api

tatastvaṃ koṭitīrthe ca yajñe vai harimedhasaḥ//
yāhi tatra bhaviṣyaṃ te sarvaṃ māturabhīpsitam

ityuktvā bhagavānviṣṇurmūrtimadhye viveśa ha//
vilokya māno nimiṣaṃ mātrā caiva sutena ca

tato mūrti namaskṛtya vāsudevasya vismitaḥ//
aitareyaḥ svajananīṃ mudito vākyamabravīt

purāhamabhavaṃ śūdro bhītaḥ saṃsāradoṣataḥ//
pariniṣṭhāgataṃ dharmaṃ brāhmaṇaṃ śaraṇaṃ gataḥ

sa kṛpālurmama prāha mantraṃ vai dvādaśākṣaram//
sademaṃ japacetyuktvā tamahaṃ japtavānsadā

tena jāpyaprabhāvena mamotpattistavodarāt//
jātasmṛtirviṣṇubhaktiḥ sthitiratra ca sarvadā

idānīṃ ca prayāmyeṣa yajñaṃ taṃ harimedhasaḥ//
tvadrūpaṃ viṣṇuprītyarthaṃ praṇamya tvāṃ prasādaye

tato mahīnagarakākhye koṭitīrthatalasthitam//
yajantaṃ saṃvṛtaṃ vipraiḥ koṭiśastamupāgamat

gehāya mātaraṃ procya sa yajñe proktavāndvijaḥ//
namastasmai bhagavate viṣṇave'kuṇṭhamedhase

yanmāyāmohitadhiyo bhramāmaḥ karmasāgare//
iti ślokaṃ mahārthaṃ te harimedhamukhā dvijāḥ

ākarṇyāsanapūjādyaiḥ pūjayāmāsuraṃga tam//
tato vedārthanaipuṇyaistena te toṣitā dvijāḥ

pradadurdakṣiṇāṃ sarvāṃ harimedhāḥ sutāmapi//
dravyaṃ kanyāṃ ca saṃgṛhya svagṛhaṃ samupāgamat

vandayitvā svajananīṃ putrānutpādya cāmalān//
iṣṭvā yajñairaitareyo dvādaśīvratatatparaḥ

vāsudevānudhyānena mokṣaṃ paścādupāgataḥ//
evaṃvidho vāsudevaḥ svayamatrāsti bhārata

yoryayetpūjayetstauti sarvaṃ tasyākṣayaṃ viduḥ//
śivadharmeṣu yatproktaṃ phalaṃ pūrvaṃ mayā tava

tādṛśaṃ labhate martyo vāsudevaprasādataḥ

iti śrīskāṃde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe kaumārikākhaṇḍe śrīvṛddhavāsudevamāhātmyavarṇana aitareyabrāhmaṇacaritravarṇanaṃnāma dvicatvāriṃśo'dhyāyaḥ