Skanda Purana · Verses 1.31-2

//nārada uvāca//
te cainaṃ yojya cāśīrbhirayācaṃta varaṃ guham//
eṣa eva varo'smākaṃ yatpāpaṃ tārakaṃ jahi

evamastviti tānuktvā yogoyoga iti bruvan//
tārakārimahātejā mayūraṃ cādhyarohata

śaktihasto vinadyātha guho devāṃstadābravīt//
yadyadya tārakaṃ pāpaṃ nāhaṃ hanmi surottamāḥ

gobrāhmaṇāvamantṝṇāṃ tato yāmi gatiṃ sphuṭam//
evaṃ tena pratijñāte śabdo'tisumahānabhūt

yogoyoga iti prāhurājñayā śarajanmanaḥ//
arajo vāsasī rakte vasānaḥ pārvatīsutaḥ

athāgre sarvadevānāṃ sthito vīro yayau mudā//
tasya keturalaṃ bhāti caraṇāyudhaśobhitaḥ

caraṇābhyāṃ caraṇābhyāṃ girīñchakto yo vidārayituṃ raṇe//
yā ceṣṭā sarvabhūtānāṃ prabhā śāṃtirbalaṃ yathā

tanmayā guhaśaktiḥ sā bhṛśaṃ haste vyarocata//
yaddārḍhyaṃ sarvalokeṣu tanmayaṃ kavacaṃ tathā

yotsyamānasya vīrasya deheprādurabhūtsvayam//
dharmaḥ satyamasaṃmohastejaḥ kāṃtatvamakṣatiḥ

balamojaḥ kṛpā cava baddhā karayugaṃ tathā//
ādeśakārīṇyagre'sya svayaṃ tasthurmahātmanaḥ

tamagre cāpi gacchaṃtaṃ pṛṣṭhatonuyayau haraḥ//
rathenādityavarṇena pārvatyā sahitaḥ prabhuḥ

nirmitena hareṇaiva svayamīśena līlayā//
sahasraṃ tasya siṃhānāṃ tasminyuktaṃ rathottame

abhīṣūnpuruṣavyāghra brahmā ca jagṛhe svayam//
te pibaṃta ivākāśaṃ trāsayaṃtaścarācaram

siṃhā rathasya gacchaṃto nadaṃtaścārukesarāḥ//
tasminrathe paśupatiḥ sthito bhātyumayā saha

vidyutā meḍitaḥ sūryaḥ seṃdracāpaghano yathā//
agratastasya bhagavāndhaneśo guhyakaiḥ saha

āsthāya ruciraṃ yāti puṣpakaṃ naravāhanaḥ//
airāvaṇaṃ samāstāya śakraścāpi suraiḥ saha

pṛṣṭhatonuyayau yāṃtaṃ varadaṃ vṛṣabhadhvajam//
tasya dakṣiṇato devā marutaścitrayodhinaḥ

gacchaṃti vasubhiḥ sārdhaṃ rudraiśca saha saṃgatāḥ//
yamaśca mṛtyunā sārdhaṃ sarvataḥ parivāritaḥ

ghorairvyādhiśataiścāpi savyato yāti kopitaḥ//
yamasya pṛṣṭhataścāpi ghorastriśikharaḥ sitaḥ

vijayonāma rudrasya yāti śūlaḥ svayaṃ kṛtaḥ//
tamugrapāśo bhagavanvaruṇaḥ salileśvaraḥ

parivārya śataiyāti yādobhirvividhairvṛtaḥ//
pṛṣṭhato vijayasyāpi yāti rudrasya paṭṭiśaḥ

gadāmuśalaśaktyādyairvarapraharaṇairvṛtaḥ//
paṭṭiśaṃ cānvagātpārtha astraṃ pāśupataṃ mahat

bahuśīrṣaṃ mahāghoramekapādaṃ bahūdaram//
kamaṃḍaluścāsya paścānmaharṣigaṇasevitaḥ

tasya dakṣiṇato bhāti daṇḍo gacchañchriyā vṛtaḥ//
bhṛgvaṃgirobhiḥ sahito devairapya bhipūjitaḥ

rākṣasāścānyadevāśca gandharvā bhujagāstathā//
nadyo nadāḥ samudrāśca munayo'psarasāṃ gaṇāḥ

nakṣatrāṇi grahāścaiva jaṃgamaṃ sthāvaraṃ tathā//
mātaraśca mahādevamanujagmuḥ kṣudhānvitāḥ

sarveṣāṃ pṛṣṭhataścāsīttārkṣyastho buddhimānhariḥ//
pālayanpṛtanāṃ sarvāṃ svaparīvārasaṃvṛtaḥ

evaṃ sainyasamopeta uttaraṃ taṭamāgataḥ//
tāmraprākāramāśritya tasthau tryaṃbakanaṃdanaḥ

sa tārakapurasyāpi paśyanṛddhi manuttamām//
visiṣmiye mahāsenaḥ praśaśaṃsa tapo'sya ca

sthitaḥ paśyansa śuśubhe mayūrastho guhastadā//
chatreṇa dhriyamāṇena svayaṃ somasamastviṣā

vījyamānaścāmarābhyāṃ vāyvagribhyāṃ mahādyutiḥ//
mātṛbhiśca surairdattaiḥ svairgaṇairapi saṃvṛtaḥ

tataḥ praṇamya taṃ śakro deva madhye vaco'bravīt//
paśyapaśya mahāsena daityānāṃ balaśālinām

ye tvāṃ kālaṃ na jānaṃti martyā gṛharatā iva//
eteṣāṃ ca gṛhe dūto yastvāṃ śaṃsatu tārakam

vīrāṇāmucitaṃ tvetatkīrtidaṃ ca mahājane//
anujñayā tataḥ skandabhaktaṃ śakro dhanaṃjaya

māmādiśyāsurendrāya prāhiṇoddautyayogyakam//
ahaṃ svayaṃ gantukāmaḥ śakreṇāpi ca preṣitaḥ

prāsāde strīsahasrāṇāṃ prāvocaṃ madhyato'pyaham//
asurādhamadurbuddhe śakrastvāmāha tacchṛṇu

yajjagaddalanādāptaṃ kilbiṣaṃ dānava tvayā//
tasyāhaṃ nāśakaste'dya puruṣaścedbhaviṣyasi

śīghraṃ niḥsara pāpiṣṭha niḥsariṣyasi cenna hi//
kṣaṇāttava puraṃ kṣepsye pāvitryāyaiva sāgare

iti śrutvā rūkṣavācaṃ kruddhaḥ strīgaṇasaṃvṛtaḥ//
muṣṭimudyamyamā'dhāvadbhītaścāhaṃ palāyitaḥ

vyākulastatra vṛttāṃtaṃ kumārāya nyavedayam//
mayi cāpyāgate daityaściṃtayāmāsa cetasi

nālabdha saṃśrayaḥ śakro vaktumetadihārhati//
nimittāni ca ghorāṇi saṃtrāsaṃ janayaṃti me

evaṃ viciṃtya cotthāya gavākṣaṃ sodhyarohata//
sahasrabhaumikāvāsaśrṛṅgavātāyanasthitaḥ

apaśyaddevasainyaṃ sa divaṃ bhūmiṃ ca saṃvṛtam//
ratairgajairhayaiścāpi nāditāśca diśo daśa

vimānaiścādbhutākāraiḥ kiṃnarodgītanāditaiḥ//
dundubhibhirgoviṣāṇaistālaiḥ śaṃkhaiśca nāditaiḥ

akṣobhyāmiva tāṃ senāṃ dṛṣṭvā so'ciṃtayattadā//
ete mayā jitāḥ pūrvaṃ kasmādbhūyaḥ samāgatāḥ

iti ciṃtāparo daityaḥ śuśrāva kaṭukākṣaram//
devabaṃdibhirudvuṣṭaṃ ghoraṃ hṛdayadāraṇam

jayātu laśaktidīdhitipiṃjararucāruṇamaṃḍalabhujodbhāsitadevasainya puravanakumudakānanavikāsaneṃdo kumāranātha jaya ditikulamahodadhivaḍavānala madhuraravamayūraravāsuramukuṭakūṭakuṭṭitacaraṇanakhāṃkura mahāsena tārakavaṃśaśuṣkatṛmadāvānala yogīśvarayaॉ yogijanahṛdayagaganavitataciṃtāsaṃtānasaṃtamasanodanakharakiraṇakalpanakhanikaravirājitacaraṇakamala skanda jaya bāla saptavāsara bhuvanāvaliśokasaṃdahana

namo namastestu manoramāya namostu te sādhubhayāpahāya//
namostu te bālakṛtācalāya namonamo nāśaya devaśatrūn

iti śrīskāṃde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe kaumārikākhaṇḍe kumāreśvaramāhātmye kumārasya tārakāsunaranagaraṃ prati gamanavarṇanaṃnāmaikatriṃśo'dhyāyaḥ