Skanda Purana · Chapter 1.26

//lomaśa uvāca//
atha te parvataśreṣṭhā mervādyā jātasaṃbhramāḥ//
ūcuste caikapadyena himavaṃtaṃ mahāgirim

//parvatā ūcuḥ//
kanyādānaṃ kriyatāṃ cādya śaila śrīmāñchambhurbhāgyataste'dya labdhaḥ//
hṛnmadhye vai nātra kāryo vimarśastasmādeṣā dīyatāmīśvarāya

tacchrutvā vacanaṃ teṣāṃ suhṛdāṃ vai himālayaḥ//
samyaksaṃkalpamakarodbrahmamā noditastadā//
imāṃ kanyāṃ tubhyamahaṃ dadāmi parameśvara

bhāryārthaṃ pratigṛhṇīṣvamaṃtreṇānena dattavān//
asmai rudrāya mahate devadavāya śaṃbhava//
kanyā dattā maheśāya girīṃdreṇa mahātmanā

vedyāṃ ca bahirānītau daṃpatīva kamalekṣaṇau//
upaveśitau bahirvedyāṃ pārvatīparameśvarau

ācāryeṇātha tatraiva kaśyapena mahātmanā//
āhvānaṃ havanārthāya kṛtamagnestadā dvijāḥ

brahmā brahmāsanagato babhūva śivasannidhau//
pravartamāne havana ṛṣayaśca vicakṣaṇāḥ

ūcuḥ parasparaṃ tatra nānādarśanavedinaḥ//
vedavādaratāḥ kecidavadansaṃmatena vai

evameva na cāpyevamevameva na cānyathā//
kāryameva na vā kāryaṃ kāryākāryaṃ tathā pare

ityevaṃ bruvatāṃ śabdaḥ śrūyate śivasannidhau//
svakīyaṃ matamāsthāya hyabruvaṃste parasparam//
tattvajñānavihīnāste kevalaṃ vedabuddhayaḥ

teṣāṃ tadvacanaṃ śrutvā parasparajayaiṣiṇām//
prahasya nārado vākyamuvāca śivasannidhau

yūyaṃ sarve vādinaśca vedavādaratāstathā//
maunamāsthāya bhoviprā hṛdi kṛtya sadāśivam

ātmānaṃ paramātmānaṃ parāṇāṃ paramaṃ ca tat//
yenedaṃ kāritaṃ viśvaṃ yataḥ sarvaṃ pravarttate//
yasminnilīyate viśvaṃ tasmai sarvātmane namaḥ

so'yamāste'dhunā gehe parvateṃdrasya bho dvijāḥ//
mukhādasyaiva saṃjātāḥ sarve yūyaṃ vicakṣaṇāḥ

evamuktāstadā tena nāradena dvijottamāḥ//
upadeśakarairvākyairbodhitāste dvijottamāḥ

varttamāne ca yajñe ca brahmā lokapitāmahaḥ//
dadarśa caraṇau devyā nakheṃduṃ ca manoharam

darśanātskhalitaḥ sadyo babhūvāṃbujasaṃbhavaḥ//
madanena samāviṣṭo vīryaṃ ca prācyavadbhuvi

retasā kṣaramāṇena lajjito'bhūtpitāmahaḥ//
caraṇābhyāṃ mamarddātha mahadgopyaṃ duratyayam

bahavaścarṣayo jātā vālakhilyāḥ sahasraśaḥ//
upatasthustadā sarvetātatāteti cābruvan

nāradena tadoktāste vālakhilyāḥ prakopinā//
gacchaṃtu baṭavo yūyaṃ parvataṃ gaṃdhamādanam

na sthātavyaṃ bhavadbhiśca bhavatāṃ na prayojanam//
ityevamuktāste sarve vālakhilyāśca parvatam//
nāradena samādiṣṭā yayuḥ sarve tvarānvitāḥ

nāradena tato brahmā''śvāsito vacanaiḥ śubhaiḥ//
tāvacca havanaṃ pūrṇaṃ jātaṃ tasya mahātmanaḥ

maheśasya tathā viprāḥ śāṃtipāṭhaparā babhuḥ//
brahmaghoṣeṇa mahatā vyāpta māsīddigaṃtaram

tato nīrājito devo devapatnībhiruttamaḥ//
tathaiva ṛṣipatnībhirarcitaḥ pūjitastathā

tathā girīndrasya manoramāḥ śubhā nīrājayāmāsurathaiva yoṣitaḥ//
gītaiḥ sugītajñaviśāradāśca tathaiva cānye stutibhirmaharṣayaḥ

ratnāni ca mahārhāṇi dadau tebhyo mahāmanāḥ//
himālayo mahāśailaḥ saṃhṛṣṭaḥ paritoṣayan

babhau tadānīṃ surasiddhasaṃghairvedyāṃ sthito'sau sakalatrako vibhuḥ//
sarvairupetī nijapārṣadairgaṇaiḥ prahṛṣṭacetā jagadekasundarāḥ

etasminnaṃtare tatra brahmaviṣṇupurogamāḥ//
ṛṣigaṃdharvayakṣāśca yenye tatra samāgatāḥ

sarvānsamabhyarcya tadā mahātmā mahāngirīśaḥ parameṇa varcasā//
sadratnavastrābharaṇāni samyagdadau ca tāmbūlasugandhavāryapi

tadā śivaṃ puraskṛtyābhyava jahruḥ sureśvarāḥ//
tathā sarve militvā tu aikapadyena moditāḥ

paṃktībhūtāśca bubhurliṃginā śrṛṃgiṇā saha//
kecidgaṇāḥ pṛthagbhūtā nānāhāsyarasairvibhum

atoṣayannāradādyā anekālīkasaṃyutāḥ//
tathā caṇḍīgaṇāḥ sarve babhujuḥ kṛtabhājanāḥ

vaitālāḥ kṣetrapālāśca bubhujuḥ kṛtabhājanāḥ//
śākinī ḍākinī caiva yakṣiṇyo mātṛkādayaḥ

yoginyo'tha catuḥ ṣaṣṭiryogino hi tathā pare//
daśa koṭyo gaṇānāṃ ca koṭyekā ca mahātmanām

evaṃ tu ṛṣayaḥ sarve tathānaye vibudhādayaḥ//
yogino hi mayā cānye kathitāḥ pūrvameva hi

yoginyaścaiva kathitāstāsāṃ bhakṣyaṃ vadāmi vaḥ//
khaḍgānāṃ kecidānīya kravyaṃ pavitrameva ca

bhuṃjaṃti cāsthisaṃyuktaṃ tathāṃtrāṇi bubhukṣitāḥ//
ānīya kecicchīrṣāṇi mahiṣāṇāṃ gurūṇi ca

tathā kecinnṛtyamānāstadānīṃ rorūyyamāṇāḥ pramathāścaiva cānye//
kecittūṣṇīmāsthitā rudrarūpāḥ parecānyām̐llokamānāstathaiva

yoginīcakramadhyastho bhairavo hi nanarta ca//
tathānye bhūtavetālā māmetyevaṃ pralāpinaḥ

evaṃ teṣāmuddhavaṃ hi nirikṣya madhusūdanaḥ//
uvāca prahasanvākyaṃ śaṃkaraṃ lokaśaṃkaram

etāngaṇānvāraya bho atra mattāṃśca saṃprati//
asminkāle ca yatkāryaṃ sarvaistatkāryame va ca

pāṃḍityena mahādeva tasmādetānnivāraya//
tacchrutvā bhagavānrudro vīrabhadramuvāca ha

//rudra uvāca//
vārayasva pramattāṃśca kṣībāṃścaiva viśeṣataḥ//
tenokto vīrabhadraśca śaṃbhunā parameṣṭhinā

ājñāpitāḥ pramattāśca vīrabhadreṇa dhīmatā//
pramathā vāritāstena tūṣṇīmāśritya te sthitāḥ

niścalā yoginīmadhye bhūtapramathaguhyakāḥ//
śākinyo yātudhānāśca kūṣmāṃḍāḥ kopikarpaṭāḥ

tathānye bhūtavetālāḥ kṣetrapālāśca bhairavāḥ//
sarve śāṃtāḥ pramattāśca babhūvuḥ pramathādayaḥ

evaṃ vistārasaṃyuktaṃ kṛtamudvahanaṃ tadā//
himādriṇā paraṃ viprāḥ sumaṃgalyaṃ suśobhanam

catvāro divasā jātāḥ paripūrṇena cetasā//
himādriṇā kṛtā pūjā devadevasya śūlinaḥ

vastrālaṃkārābharaṇai ratnairuccāvacaistataḥ//
pūjayitvā mahādevaṃ viṣṇorvacanaparo'bhavat

lakṣmīsametaṃ viṣṇuṃ ca vastrālaṃkaraṇaiḥ śubhaiḥ//
pūjayāmāsa himavāṃstathā brahmāṇameva ca

iṃdraṃ purodhasā sārddhamiṃdrāṇyā sahitaṃ vibhum//
tathaiva lokapālāṃśca pūjayitvā pṛthakpṛthak

tathaiva pūjitā caṃḍī bhūtapramathaguhyakaiḥ//
vastrālaṃkaraṇaiścaiva ratnairnānāvidhairapi//
ye cānya āgatāstatra te ca sarve prapūjitāḥ

evaṃ tadānīṃ pratipūjitāśca devāśca sarve ṛṣayaśca yakṣāḥ//
gaṃdharvavidyādharasiddhacāraṇāstathaiva marttyāpsarasāṃ gaṇāśca

iti śrīskāṃde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe kedārakhaṇḍe śivapārvativivāhamaṃgalotsavavarṇanaṃ nāma ṣaḍviśo'dhyāyaḥ