Skanda Purana · Chapter 1.2.5

// naṃdikeśvara uvāca // //
śuddhasattvaguṇopeto loke'smindurlabhaḥ pumān //
rajastamoguṇopetā bhavaṃti sulabhā narāḥ

sāttvikaḥ puṇyaśīlatvānniḥśreyasamavāpnuyāt //
vaicitryātkarmaṇāmeṣāmanubhogāya vedhasā

vaicitryāṇyeva sṛṣṭāni narakāṇyatra tatra ca //
mahārauravabhāgbhūtvā kharaḥ śvā śūkaro'pi vā

caṃḍālo vā bhavetpretya puruṣo brahmahatyayā //
ciraṃ rauravasaṃruddhaḥ kṛmikīṭapataṃgatām //

prāpnuyātkarmakartṛtvaṃ surāpānena ca dvijaḥ //
brahmasvaharaṇādbrahmarākṣasatvamavāpnuyāt

yadyattu corayettattacchūnyaṃ syādanyajanmani //
asipatravane pīḍāmavāpya suciraṃ punaḥ

napuṃsakatvaṃ saṃgacchetpuruṣo gurutalpagaḥ //
taptaiḥ kālāyasairdaṃḍaiḥ pīḍito yamakiṃkaraiḥ

narake kālasūtrākhye nivasetparadāragaḥ //
agnido nivasedghore sughore garadāyakaḥ

mahāghore ca piśuno'vīcyāṃ dharmaviniṃdakaḥ //
vasetkarāle mitradhrugbhīme hiṃsaikatatparaḥ

saṃhāre channapāpiṣṭho mṛṣāvādī bhayānake //
asighore vasedvāpi kūpakṣetranarādihṛt

vajre paradroharato māṃsāśī tarale dvija //
tīkṣṇe mātṛpitṛdrohī tāpane japadūṣakaḥ

aśvaghnopi nirucchvāse vasedgoghnaśca dāruṇe //
bhrūṇahā nivaseccaṃḍe strīhatyākṛtkukūlake

devasvahārī dahane ghoraghore parasvahṛt //
kṛtāṃtadūtā narake sarvāneva hi pāpinaḥ

badhnaṃti pāśairnighnaṃti daṃḍairvidhyaṃti śaṃkubhiḥ //
tīkṣṇāyaścaṃcavaḥ kaṃkāḥ krūradaṃṣṭrā mahoragāḥ

kāleyakāśca vyāghrāśca hiṃsrāścānye daśaṃtyamūn //
śakalīkurvate śastrairdahaṃtidehameva ca

khanaṃti gahane śvabhre kaśābhistāḍayaṃti ca //
tailadroṇyāṃ vipacyaṃte tudyaṃte sūkṣmasūcibhiḥ

bāhyante durvahānbhārānyamadūtairhi pāpinaḥ //
brahmahā kṣayarogī syatsurāpaḥ śyāvadaṃtakaḥ

svarṇāpahārī kunakhī duścarmā gurutalpagaḥ //
apasmārī gurudrohī caṃḍālo vedadūṣakaḥ

kūṭasākṣī cākṣirogī maṃdāgniścāgrabhojanaḥ //
vidyāpahārī mūkaḥ syādaṃdhaḥ pustakacorakaḥ

paradārarataḥ paṃgu badhiraḥ paraniṃdakaḥ //
viḍvarāho nirācāro jihvārogī ca taskaraḥ

abhyāgatātithityāgī kapolakaṃṭako bhavet //
parvasu strīrato mehī pūtyāsyo'bhakṣyabhakṣakaḥ

maryādābhedako dāsastaṭākārāmahṛtkharaḥ //
pratiśrutāpradātā syādalpāyuḥ śvā vikatthanaḥ

viṣṇudrohī ca saraṭhaḥ śivadrohī ca mūṣakaḥ //
evaṃ pāpaphalaṃ jñātvā prāyaścittaṃ samācaret

taccāsminnaruṇakṣetre kartavyaḥ samyagāstikaiḥ

iti niśamya sa duṣkṛtakāriṇāṃ bahuvidhāṃ narakeṣu nṛṇāṃ vyathām //
caraṇayoḥ patitaśca tadā punaḥpunarayācata tacchamanakriyām

iti śrīskāṃde mahāpurāṇa ekāśītisāhasryāṃ sahitāyāṃ prathame māheśvarakhaṇḍe'ruṇācalamāhātmya uttarārdhe karmavipākavarṇanaṃ nāma paṃcamodhyāyaḥ