Skanda Purana · Chapter 1.2.20

// mārkaṃḍeya uvāca // //
aho mahiṣadaityasya durācāratvamīdṛśam //
aho duritahāriṇyā durgāyāśca parākramaḥ

evaṃ tayā bhadrakālyā nihate mahiṣāsure //
kiṃ cakāra girīṃdrasya naṃdinī tapasi sthitā

// naṃdikeśvara uvāca // //
anaṃtaraṃ sā hastena dadhatī daityamastakam //
nanāma gaurīmanyena pāṇinā khaṅgadhāriṇā

atha harṣeṇa nṛtyaṃtīṃ tāmālokya dayārdrayā //
dṛṣṭyā devī jagādaināṃ daṃtāṃśudyotitāṃbarā

tvayātiduṣkaraṃ karma nirmitaṃ viṃdhyavāsini //
jātaṃ tava prabhāvena niṣpratyūhaṃ ca me tapaḥ

athaitanmāhiṣaṃ śīrṣamapavitra bhayaṃkaram //
jagatpavitracāritre tyaktumarhasi hastataḥ

iti gauryoditā durgā jugupsākulamānasā //
mūrdhnastasya nipātāya vyadhunodbahuśaḥ karam

tīrthamutpādyatāṃ devi navaṃ pāpavināśanam //
tasminnimajjanāddurge prāyaścittaṃ bhaviṣyati

itīritā gautamena durgā duritaśaṃkinī //
pāṭayāmāsa khaṅgena śilāpaṭṭaṃ paṭīyasā

pātālāvadhi nirbhinnātpāṣāṇatalatastataḥ //
udajṛṃbhattaraṃgāṃbhaḥ saccittamiva nirmalam

mamajja sāpi gaṃbhīre tasminnaṃbhasi pāvane //
namaḥ śoṇādrināthāyetyuktvā maṃtramanuttamam

tāvanmahiṣakaṃṭhasthaṃ liṃgaṃ tadgalitaṃ tale //
taṭe pratiṣṭhitaṃ jātaṃ pāpanāśanasaṃjñayā

unmamajja tato durgā tīrthāṃbhodhūtakalmaṣā //
nipapātātha tatpāṇermahiṣāsuramastakam

kṛtapradakṣiṇā natvā pāpanāśanamīśvaram //
purastādasti sā gauryā gautamenābhinaṃditā

evaṃ pratyakṣaniratapāpāṃ tāṃ vīkṣya pārvatī//
jagāda dīrghatapasaṃ jagatīdharanaṃdinī

mahiṣāsurasaṃhāreṃ'jasā svanumatiḥ kṛtā //
viṃdhyavāsinīyamaho duṣṭamāhiṣavigraham

gṛhītvā bhakṣayāmāsa tasya liṃgamidaṃ śivam //
prāyaścittaṃ tato brūhi mamāpi munisattama

// gautama uvāca // //
devi sarvajagatsargasthitisaṃhārakāriṇi //
tvaddhyānameva jagatāṃ sarvapātakanāśanam //

athāpi laukikaṃ vṛttamavalaṃbya tvayeritam //
svakṛtāpi hi maryādā na mahadbhirvilaṃghyate

antaḥkaraṇakāluṣyakṣālinī kācana kriyā //
kathyate'dya mayā mātaravadhānaṃ vidhīyatām

aruṇādrirayaṃ sākṣādanalādristirohitaḥ //
jvalatijyotiṣā svena kṛttikāpūrṇimā niśi

tatsaparyātapaścaryā kāryā kātyāyani tvayā //
tajjyotirdarśanātsarvamabhīṣṭaṃ tava sidhyati

ityuktā gautamenāṃbā tadāprabhṛti dāruṇā //
iyaṃ ca śivabhaktā hi śivapūjāratā tadā

tapaścacāra paṃcānāmagnīnāṃ madhyamāśritā //
caturṇāṃ śikhināṃ madhye sthitā sūryaniviṣṭadṛk

reje haimī śalākeva dyotamānā girīṃdrajā //
athākṛṣṭevapārvatyāḥ premapāśairnirāyataiḥ

sā kārttikī paurṇamāsī samāpede śubhā tithiḥ //
tatastasya dinasyāṃte śṛṃge śoṇamahībhṛtaḥ

adarśi kimapi jyotiranupādhikavaibhavam //
tadarthopagatairbrahmamadhubhidvāsavādibhiḥ

upāsyamānamabhito devairdivyarṣisaṃgataiḥ //
tadaniṃdhanamasnehamadaśāvartisaṃbhavam

mahāpradīpamālokya vismayaṃ prāpa pārvatī //
kṛtapradakṣiṇā sātha praṇamaṃtī padepade //
aruṇādrīśvaraṃ nāthaṃ tuṣṭā tuṣṭāva śailajā

namaste merucāpāya kailāsācalavāsine //
nīhāraśailajāmātre śoṇakṣmādhararūpiṇe

varuṇādisurārcyāya taruṇādityavarcase //
aruṇācalanāthāya karuṇāmūrttaye namaḥ //

jaya jahnusutācandra lekhālaṃkṛtaśekhara //
sauṃdaryamohitāśeṣamunipatnījanāśaya

jaya śailasutāsaṃgasaṃbhṛtānaṃgavaibhava //
māyā nārāyaṇābhogakrīḍāmreḍanapaṃḍita

jaya saṃdhyāsamopetasaṃbhṛtānaṃdatāṃḍava //
jaya gīrvāṇagaṃdharvasiddhavidyādharārcita

jaya heraṃbajanaka jaya ṣaṇmukhavatsala //
jaya haimavatīprārthya jaya pārthivadurlabha

iti stutvā muhustasmiñjyotiṣi nyastalocanām //
dṛṣṭvā devīṃ dayāvyājādvililye vṛṣabhadhvajaḥ

layitvā nijamāsthāya rūpamutkaṭasundaram //
āsthāya vṛṣabhaṃ divyamamūṃ dṛṣṭvā śivāṃ śubhām

mānātirekādapahāya sarvamaiśvaryamevaṃ tapasi pravṛttām //
mugdhāṃ punaḥ sāṃtvayituṃ girīśaḥ pracakrame parvatarājaputrīm

iti śrīskānde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe'ruṇācalamāhātmya uttarārdhe pārvatīkṛtāruṇācaleśvarastutivarṇanaṃnāma viṃśatitamo'dhyāyaḥ