Skanda Purana · Chapter 1.2.15

// naṃdikeśvara uvāca // //
tejaḥstaṃbhaṃ vinirbhidya saṃdhyābhramiva caṃdramāḥ //
kailāsakūṭadhavalaṃ vṛṣendramadhitasthivān

jaṭājūṭavatā bālacaṃdracūḍena maulinā //
kapālamālikāṃ vaidhīṃ srajaṃ cāragvadhī dadhat

nāgakuṃḍalibhiḥ phālaphalakodbhāsilocanaiḥ //
paṃcabhirvadanairdīptaiḥ kṣveḍakalmāṣakaṃdharaiḥ

śūlaṃ kapālaṃ ḍamaruṃ sāraṃgaṃ paraśuṃ dhanuḥ //
khaṭvāṃgamamalaṃ khaḍgaṃ dorbhirnāgaṃ ca dhārayan

śvasitoddhūlitākāro gajacarmottarīyavān //
sarvālaṃkārasaṃpannaḥ sarvadevairabhiṣṭutaḥ

paridhānīkṛtavyāghracarmā tābhyāmadarśi saḥ //
rūpaṃ dṛṣṭvā sa ānaṃdaṃ nanartta nalinekṣaṇaḥ

na kiṃcidapi jānāno mumoha ca sarojabhūḥ

dṛśābhinaṃdya mādhavaṃ prasannayā maheśvaraḥ //
athodatiṣṭhipacca taṃ sahuṃkriyaścaturmukham

jagāda cādhikāritāmadādyuvāṃ samuddhatau //
na lajjitavyamatra vāmayaṃ kramo'dhikāriṇām

parīkṣya vaibhavaṃ mama prabodhavānabhūddhariḥ //
ayaṃ na jātupadmabhūśchalanmano durātmavān

aśāsi paṃcavaktratā yadopahāsito hyaham //
punaḥsvaputrikāratirmayaiṣa śikṣito'bhavat

tṛtīya eṣa maṃturapyaho kathaṃ nu sahyate //
tadasya tu pratiṣṭhayā kvacinna bhūyatāṃ vidheḥ

ayaṃ ca ketakacchado yadāpa kūṭasākṣitām //
ataḥ paraṃ na jātu tanmamaitu mūrdhni saṃsthitim

śaptvaivametau giriśaḥ prītyā viṣṇumabhāṣata //

// śrīmaheśvara uvāca // //
vatsa mā bhaiḥ prasanno'smi bhavate bhaktiśāline //
nanu tvamaṃgānme jātassāttviko'si viśeṣataḥ //
māheśvarāgragaṇyo'si jagatyāṃ hi yathā purā

na tavātaḥ paraṃ jātu bhaktihānirbhavenmayi //
pratikṣaṇaṃ varddhamānā kalpate ca vimuktaye //

ityanugrahakṛtaṃ trilocanaṃ bhaktibhāji nirahaṃkriye harau //
bhītimānavanataḥ svayaṃ vidhiḥ stotumārabhata klṛptavaṃdanaḥ

iti śrīskāṃde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe'ruṇācalamāhātmye uttarārdhe brahmakṛtaśivastutyudyamavarṇanaṃnāma pañcadaśo'dhyāyaḥ