Skanda Purana · Chapter 1.2.1

// śrīgaṇeśāya namaḥ //
athāruṇācalamāhātmyottarārdham
// vyāsa uvāca //
vasaṃto naimiṣāraṇye munayaḥ sūtamabruvan //
// munaya ūcuḥ // //
sthānānāmuttamaṃ śaivaṃ yatsthalaṃ tadvadasva naḥ

sūta uvāca // //
yūyaṃ śṛṇuta yatpūrvaṃ naṃdīśvaramukhācchrutam//
mārkaṇḍeyena tadvakṣye munayaḥ śṛṇutādarāt

//mārkaṃḍeya uvāca //
naṃdīśvara tvayā prokto mahimā mādhyameśvaraḥ//
mayāpyavadhṛtaḥ sarvo bhaktiśraddhārdracetasā

tathāpi vada me bhūyo devadeva dayānidhe//
ahaṃ yatparipṛcchāmi bhavaṃtaṃ vihitādaraḥ

tvayāpyaviditaṃ kiṃcinnāstyatra bhuvanatraye //
sarvāgamapurāṇeṣu bāhyeṣvābhyaṃtareṣu ca

svargāpavargayoḥ puṃsāṃ bhūmireva viśiṣyate //
sarvakarmāṇi nirmātuṃ tattatphalaparāyaṇaiḥ

phalaṃ ca trividhaṃ puṃsāṃ tvayaiva kathitaṃ purā //
bhūmau sukhaṃ svargabhogaḥ kaivalyamiti bhedataḥ

puṇyakṣayeṇa kṣīyeta prāyaḥ prāthamikaṃ dvayam//
kṣīyate na tṛtīyaṃ tu karmaṇāmeva nāśrayāt

tatsiddhistu tvayā proktā viśuddhajñānagocarā //
sarveṣāṃ durlabhaṃ śuddhajñānaṃ dehabhṛtāṃ punaḥ

tajjñānaṃ kutra vā kṣetre śāstrādipaṭhanaṃ vinā //
śivapūjanamātreṇa siddhyetsarvaśarīriṇām

jñānayogakriyācaryāsvaśeṣāṇāṃ śarīriṇām //
api śaivāgamoktāsu na buddhiḥ saṃpravarttate

yasya sthānasya māhātmyādalpairapi śarīriṇaḥ //
lapsyate niyamaiḥ śuddhajñānaṃ tanmama kathyatām

bhasmarudrākṣavahanādīśvarasmaraṇātsakṛt //
yatra mugdhairapi śreyo labhyaṃ tatsthānamucyatām

abuddhipūrvakeṇāpi yatra vāsena dehinām //
avighnaṃ setsyate śreyaḥ sthānaṃ tanme'nugṛhyatām

jātānāṃ varṇasāṃkaryye tairaścī yonimīyuṣām //
sthāvarāṇāmapi śreyo yatra tatkṣetramucyatām

itīrayitvā sa mṛkaṃḍunaṃdanaḥ samaṃ munīṃdrairaparairmahātmabhiḥ//
papāta tasyāṃghrisaroruhadvaye śilādasūnorakhilāgamābdheḥ

iti śrīskāṃde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe'ruṇācalamāhātmya uttarārdhe sthānamāhātmyaprastāvavarṇanaṃnāma prathamo'dhyāyaḥ /