Skanda Purana · Verses 1.15-2

//varāṃgyuvāca//
nāśitāsmyapaviddhāsmi trāsitā pīḍitāsmi ca//
raudroṇa devanāthena naṣṭanāthena bhūriśaḥ

duḥkhapāramapaśyaṃtī prāṇāṃstyaktuṃ vyavasthitā//
putraṃ me ghoraduḥkhasya tārakaṃ dehi cetkṛpā

evamuktastu daityeṃdro duḥkhito'ciṃtayaddhṛdi//
āsureṣvapi bhāveṣu spṛhā yadyapi nāsti me

tathāpi manye śāstraibhyastvanukaṃpyā priyeti yat//
sarvāśramānupādāya svāśrameṇa kalatravān

vyasanārṇavamatyeti jalayānairivārṇavam//
yāmāśrityeṃdriyārātīndurjayānitarāśrayaiḥ

gehino helayā jigyurdasyūndūrga patiryathā//
na ke'pi prabhavastāṃ cāpyanukartuṃ gṛheśvarīm

athāyuṣā vā kārtsnyena dharme ditsuryathaiva ca//
yasyāṃ bhavati cātmaiva tato jāyā nigadyate

bhartavyā eva yasmācca tasmādbhāryeti sā smṛtā//
sā eva gṛhamuktaṃ ca gṛhīṇī sā tataḥ smṛtā

saṃsārakalmaṣāttrātrī kalatramiti sā tataḥ//
evaṃvidhāṃ priyāṃ ko vai nānukaṃpitumarhati

trīṇi jyotīṃṣi puruṣa iti vai devalo'bravīt//
bhāryā karma ca vidyā ca saṃsādhyaṃ yatnatastrayam

tadenāṃ pīḍitāṃ cedyaḥ patirbhūtvā na pālaye//
tato yāsye śāstravādānnarakāṃtaṃ na saṃśayaḥ

aha mapyenamiṃdraṃ vai śakto jetuṃ yathā'nṛṇām//
punaḥ kāmaṃ kariṣye'syā dāsye putraūṃ mahābalam

iti saṃciṃtya vajrāṃgaḥ kopavyākulalocanaḥ//
pratikartuṃ maheṃdrāya tapo bhūyo vyavasyata

jñātvā tu tasya saṃkalpaṃ brahmā krūrataraṃ punaḥ//
ājagāma tvarāyukto yatrā'sau ditinaṃdanaḥ

uvācainaṃ sa bhagavānprabhurmadhurayā girā

//brahmovāca//
kimarthaṃ bhūya eva tvaṃ niyamaṃ krūramicchasi//
āhārābhimukho daitya tanme brūhi mahāvrataḥ

yāvadabdasahasreṇa nirāhāreṇa vai phalam//
tyajatā prāptamāhāraṃ labdhaṃ te kṣaṇamātrataḥ

tyāgo hyaprāptakāmānāṃ na tathā ca guruḥ smṛtaḥ//
yathā prāptaṃ parityajya kāmaṃ kamalalocana//
śrutvaitadbrahmaṇo vākyaṃ daityaḥ prāṃjalirabravīt

//daitya uvāca//
patnyarthe'haṃ kariṣyāmi tapo ghoraṃ pitāmaha//
putrārthamudyataścāhaṃ yaḥ syādgīrvāṇadarpahā

etacchrutvā vaco devaḥ padmagarbhodbhavastadā//
uvāca daityarājānaṃ prasannaścaturānanaḥ

//brahmovāca//
alaṃ te tapasā vatsa mā kleśe vistare viśa//
putraste tārakonāma bhaviṣyati mahābalaḥ

devasīmaṃtinīkāmyadhammillakavimokṣaṇaḥ//
ityukto daityarājastu praṇamya prapitāmaham

visṛjya gatvā mahiṣīṃ naṃdayā māsa tāṃ mudā//
tau daṃpatī kṛtārthau ca jagmatuścāśramaṃ tadā

āhitaṃ ca tato garbhaṃ varāṃgī varavarṇinī//
pūrṇaṃ varṣasahasraṃ tu dadhārodara eva hi

tato varṣasahasrāṃte varāṃgī samasūyata//
jāyamāne tu daityeṃdre tasmim̐llokabhayaṃkare

cacāla sakalā pṛthvī proddhūtāśca mahārṇavā//
celurdharādharāścāpi vavurvātā vibhīṣaṇāḥ

jepurjapyaṃ munivarā vyādhaviddhā mṛgā iva//
jahuḥ kāṃtiṃ ca sūryādyā nīhārāśchāṃdayandiśaḥ

jāte mahāsure tasminsarva eva mahāsurāḥ//
ājagmurharṣitāstatra tathā cāsurayoṣitaḥ

jagurharṣasamāviṣṭā nanṛtuścāsurāṃganāḥ//
tato mahotsave jāte dānavānāṃ pṛthāsuta

viṣaṇṇamanaso devāḥ samaheṃdrāstadābhavan//
jātāmātrastu daityeṃdrastārakaścaṃḍavikramaḥ

abhiṣikto'suro daityaiḥ kuraṃgamahiṣādibhiḥ//
sarvāsuramahārājye yutaḥ sarvairmahāsuraiḥ

sa tu prāptamahārājyastārakaḥ pāṃḍusattama//
uvāca dānavaśreṣṭhānyuktiyuktamidaṃ vacaḥ

śrṛṇudhvamasurāḥ sarve vākyaṃ mama mahābalāḥ//
śrutvā vaḥ stheyasī buddhiḥ kriyatāṃ vacane mama

asmākaṃ jātidharmeṇa virūḍhaṃ vairamakṣayam//
kariṣyāmyahaṃ tadvairaṃ teṣāṃ ca vijayāya ca

kiṃ tu tattapasā sādhyaṃ manyehaṃ surasaṃgamam//
tasmādādau kariṣyāmi tapo ghoraṃ danoḥ sutāḥ

tataḥ surānvijeṣyāmo bhokṣyāmo'tha jagattrayam//
yuktopāyo'hi puruṣaḥ sthiraśrīreva jāyate

ayuktaścapalaḥ prāptāmapi rakṣitumakṣamaḥ//
tacchrutvā dānavāḥ sarve vākyaṃ tasyāsurasya tu

sādhusādhvityathocuste vacanaṃ tasya vismitāḥ//
so'gacchatpāriyātrasya gireḥ kaṃdaramuttamam

sarvartukusumākīrṇanānauṣadhividipitam//
nānādhāturasasrāvicitranānāgṛhāśrayam

anekākārabahulaṃ pṛthakpakṣikulākulam//
nānāprasravaṇopetaṃ nānāvidhajalāśayam

prāpya tatkaṃdaraṃ daityaścakāra vipulaṃ tapaḥ//
vahanpāśupatīṃ dīkṣāṃ paṃca maṃtrāñjajāpa saḥ

nirāhāraḥ paṃcatapā varṣāyutamabhūtkila//
tataḥ svadehādutkṛttya karṣaṃkarṣaṃ dinedine

māṃsasyāgnau juhāvaiva tato nirmāṃsatāṃ gataḥ//
tato nirmāṃsadehaḥ sa taporāśirajāyata

jajvaluḥ sarvabhūtāni tejasā tasya sarvataḥ//
udvignāśca surāḥ sarve tapasā tasya bhīṣitāḥ

etasminnaṃtare brahmā paramaṃ toṣamāgataḥ//
tārakasya varaṃ dātuṃ jagāma śikharaṃ gireḥ

prāpya taṃ śailarājānaṃ haṃsasyaṃdanamāsthitaḥ//
uvāca tārakaṃ devo girā madhurayā tadā

//brahmovāca//
uttiṣṭha putra tapaso nāstyasādhyaṃ tavādhunā//
varaṃ vṛṇīṣvābhimataṃ yatte manasi vartate

ityuktastārako daityaḥ prāṃjaliḥ prāha taṃ vibhum

//tāraka uvāca//
vayaṃ prabho jātidharmāḥ kṛtavairāḥ sahamaraiḥ//
taiśca niḥśeṣitā daityāḥ kṛtāḥ krūrainṛśaṃ savat

teṣāmahaṃ samuddhartā bhaveyamiti me matiḥ//
avadhyaḥ sarvabhūtānāmastrāṇāṃ ca mahaujasām

syāmahaṃ cāmaraiścaiṣa varo mama hṛdisthitaḥ//
etanme dehi deveśa nānyaṃ vai rocaye varam

tamuvāca tato daityaṃ viraṃco'maranāyakaḥ//
na yujyate vinā mṛtyuṃ dehino dehadhāraṇam//
jātasya hi dhruvo mṛtyuḥ satyametacchrutīritam

iti saṃciṃtya varaya varaṃ yasmānna śaṃkase//
tataḥ saṃciṃtya daityeṃdraḥ śiśutaḥ saptavāsarāt

//tāraka uvāca//
vāsarāṇāṃ ca saptānāṃ varjayitvā tu bālakam//
devānāmapyavadhyo'haṃ bhūyāsaṃ tena yācitaḥ

vavre mahāsuro mṛtyuṃ brahmāṇaṃ mānamohitaḥ//
brahmā proce tatastaṃ ca tatheti haravākyataḥ

jagāma tridivaṃ devo daityo'pi svakamālayam//
uttīrṇaṃ tapasastaṃ ca daityaṃ daityeśvarāstadā

parivavruḥ phalākīrṇaṃ vṛkṣaṃ śakunayo yathā//
tasminmahati rājyasthe tārake ditinaṃdane

brahmaṇābhihi tasthāne mahārṇavataṭottare//
taravo jajñire pārtha tatra sarvartavaḥ śubhāḥ

kāṃtirdyutirdhṛtirmedhā śrīrakhaṃḍā ca dānavam//
parivavrurguṇā kīrṇaṃ niśchidrāḥ sarva eva hi

kālāgaruviliptāṃgaṃ mahāmukuṭamaṃḍitam//
rucirāṃgadasannaddhaṃ mahāsiṃhāsane sthitam

nṛtyaṃtyapsarasaḥ śreṣṭhā gandharvā gāyayaṃti ca//
candrārkau dīpamārgeṣu vyajaneṣu ca mārutaḥ//
grahā agresarāstasya jīvādeśaprabhāṣiṇaḥ

evaṃ svakādbāhubalātsa daityaḥ saṃprāpya rājyaṃ parimodamānaḥ//
kadācidābhāṣya jagāda maṃtriṇaḥ proddhṛttasarvāṃgabalena darpitaḥ

iti śrīskāṃde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe kaumārikakhaṇḍe kumāreśamāhātmaye tārakāsurotpattivarṇanaṃnāma paṃcadaśo'dhyāyaḥ