Skanda Purana · Verses 1.13-2

//nārada uvāca//
iti tasya munīṃdrasya bhūpatiḥ śuśruvānvacaḥ//
prāha nāhaṃ gamiṣyāmi tvāṃ vihāya naraṃ kvacit

liṃgamārādhayiṣye'dya sarvasiddhipradaṃ nṛṇām//
tvayaivānugṛhīto'dya yāṃtu sarve yathāgatam

tadbhūpativacaḥ śrutvā bako gṛdhro'tha kacchapaḥ//
ulūkaśca tathaivocuḥ praṇatā lomaśaṃ munim

sa ca sarvasuhṛdviprastathetyevāha tāṃstadā//
praṇodyānpraṇatānsarvānanujagrāha śiṣyavat

śivadīkṣāvidhānena liṃgapūjāṃ samādiśat//
teṣāmanugrahaparo muniḥ pramatavatsalaḥ//
tīrthādapyadhikaṃ sthāne satāṃ sādhusamāgamaḥ

pacelimaphalaḥ sadyo duraṃtakalupāpahaḥ//
apūrvaḥ ko'pi sadgoṣṭhīsahasrakiraṇodayaḥ

ya ekāṃtatayātyaṃtamaṃtargatatamopahaḥ//
sādhugoṣṭhīsamudbhūtasukhāmṛtarasormayaḥ

sarve varāḥ sudhākārāḥ śarkarāmadhuṣaḍrasāḥ//
tataste sādhusaṃsargaṃ saṃprāptāḥ śivaśāsanāt

ārebhire kriyāyogaṃ mārkaṃḍanṛpapūrvakāḥ//
teṣāṃ tapasyatāmevaṃ samājagme kadācana//
tīrthayātrānuṣaṃgena lomaśālokanotsukaḥ

mukhyā puruṣayātrā hi tīrthayātrānuṣaṃgataḥ//
sadbhiḥ samāśrito bhūpa bhūmibhāgastathocyate

kṛtārhaṇātithyavidhiṃ viśrāṃtaṃ māṃ ca phālguna//
praṇamya te'tha papracchurnāḍījaṃghapuraḥ sarāḥ

//ta ucuḥ//
śāpabhraṣṭā vayaṃ brahmaṃścatvāro'pi svakarmaṇā//
tanmuktisādhanārthāya sthānaṃ kiṃcitsamādiśa

iyaṃ hi niṣphalā bhūmiḥ śapalaṃ bhārataṃ mune

tatrāpi kvacidekatra sarvatīrthaphalaṃ vada//
iti pṛṣṭastvahaṃ taiśca tānabravamidaṃ tadā

saṃvartaṃ paripṛcchadhvaṃ sa vo vakṣyati tattvataḥ//
sarvatīrthaphalāvāptikārakaṃ bhūpradeśakam

//ta ucuḥ//
kutrāsau vidyate yogī nājñāsiṣma vayaṃ ca tam//
saṃvartadarśanānmuktiriti cāsmadanugrahaḥ

yadi jānāsi taṃ brūhi suhṛtsaṃgo na niṣphalaḥ//
tato'hamabravaṃ tāṃśca vicāryedaṃ punaḥpunaḥ

vārāṇasyāmasāvāste saṃvarto guptaliṃgabhṛt//
maladigdho vivasano bhikṣāśī kutapādanu

karapātrakṛtāhāraḥ sarvathā niṣparigrahaḥ//
bhāvayanbrahma paramaṃ praṇavābhidhamīśvaram

bhuktvā niryāti sāyāhne vanaṃ na jñāyate janaiḥ//
yogīśvaro'sau tadrūpāḥ santyanye liṃgadhāriṇaḥ

vakṣyāmi lakṣaṇaṃ tasya jñāsyatha taṃ munim//
pratolyā rājamārge tu niśi bhūmau śavaṃ janaiḥ

avijñātaṃ sthāpanīyaṃ stheyaṃ tadavidūrataḥ//
yastāṃ bhūmimupāgamya akasmādvinirvatate

sa saṃvarto na cākrāmatyeṣa śalyamasaṃśayam//
praṣṭavyo'bhimataṃ cāsāvupāśritya vinītavat

yadi pṛcchati kenāhamākhyāta iti māṃ tataḥ//
nivedya caitadvaktavyaṃ tvāmākhyāyāgnimāviśat

tacchrutvā te tathā cakruḥ sarvepi vacanaṃ mama//
prāpya vārāṇasīṃ dṛṣṭvā saṃvartaṃ te tathā vyadhuḥ

śavaṃ dṛṣṭvā ca tairnyastaṃ saṃvarto vai nyavartata//
kṣutparīto'pi taṃ jñātvā yayustamanu śīghragam

tiṣṭha brahmankṣaṇamiti jalpaṃto rājamārgagam//
yāti nirbhartsayatyeṣa nivartadhvamiti bruvan

samayā māmare bho'dya nāgaṃtavyaṃ na vo hitam//
palāyanamasau kṛtvā gatvā dūrataraṃ saraḥ//
kupitaḥ prāha tānsarvānkenākhyāto'hamityuta

nivedayata śīghraṃ me yathā bhasma karomi tam//
śāpāgninātha vā yuṣmānyadi satyaṃ na vakṣyatha

atha prakaṃpitāḥ prāhurnāradeneti taṃ munim//
sa tānāha punaryātaḥ piśunaḥ kva nu saṃprati

lokānāṃ yena sāpāgnau bhasmaśeṣaṃ karomi tam//
brahmabaṃdhumahaṃ prāhurbhītāste taṃ punarmunim

//ta ūcuḥ//
tvaṃ nivedya sa cāsmākaṃ praviṣṭo havyavāhanam//
tatkālameva vipreṃdra na vidmastatra kāraṇam

//saṃvarta uvāca//
ahamapyevamevāsya kartā tena svayaṃ kṛtam//
tadbrūta kāryaṃ naivātra ciraṃ sthāsyāmi vaḥ kṛte

//arjuna uvāca//
yadi nārada devarṣe praviṣṭo'si hutāśanam//
jīvitastatkathaṃ bhūya āścaryamiti me vada

//nārada uvāca//
na hutāśaḥ samudro vā vāyurvā vṛkṣaparvataḥ//
āyudhaṃ vā na me śaktā dehapātāya bhārata

punaretatkṛtaṃ cāpi saṃvarto manyate yathā//
ahaṃ sanmānitaśceti vahniṃ prāpyāpyagāmaham

yathā puṣpagṛhe kaścitpraviśatyaṃga phālguna//
tathāhamagniṃ saṃviśya yātavānuttaraṃ śrṛṇu

saṃvartastānpunaḥ prāha mārkaṃḍeyamukhāniti//
viśalyaḥ paṃthāḥ kṣudhito'haṃ punaḥ purīm//
bhikṣārthaṃ paryaṭiṣyāmi praśraṃ prabrūta caiva me

//ta ūcuḥ//
śāpabhraṣṭā vayaṃ mokṣaṃ prāpsyāmastavadanugrahāt//
pratīkāraṃ tadākhyāhi praṇatānāṃ mahāmune

yatra tīrthe sarvatīrthaphalaṃ prāpnoti mānavaḥ//
tattīrthaṃ brūhi saṃvarta tiṣṭhāmo yatra vai vayam

//saṃvarta uvāca//
namaskṛtya kumārāya durgābhyaśca narottamāḥ//
tīrthaṃ ca saṃpravakṣyāmi mahīsāgarasaṃgamam

amunā rājasiṃhena iṃdradyumnena dhīmatā//
yajanāddvyaṃgulotsedhā kṛteyaṃ vasudhāyadā

tadā saṃtāpyamānāyā bhuvaḥ kāṣṭhasya vai yathā//
susrāva yo jalaughaśca sarvadevanamaskṛtaḥ

mahīnāma nadī ca pṛthivyāṃ yānikānicit//
tīrthāni teṣāṃ salilasaṃbhavaṃ tajjalaṃ viduḥ

mahīnāma samutpannā deśe mālavakābhidhe//
dakṣiṇaṃ sāgaraṃ prāptā puṇyobhayataṭāśivā

sarvatīrthamayī pūrvaṃ mahīnāma mahānadī//
kiṃ punaryaḥ samāyogastasyāśca saritāṃ pateḥ

vārāṇasī kurukṣetraṃ gaṃgā revā sarasvatī

tāpī payoṣṇī nirvidhyā candrabhāgā irāvatī//
kāverī śarayūścaiva gaṃḍakī naimiṣaṃ tathā

gayā godāvarī caiva aruṇā varuṇā tathā//
etāḥ puṇyāḥ śataśonyā yāḥ kāścitsarito bhuvi

sahasraviṃśatiścaiva ṣaṭ‌śatāni tathaiva ca//
tāsāṃ sārasamudbhutaṃ mahītoyaṃ prakīrtitam

pṛthivyāṃ sarvatīrtheṣu snātvā yatphalamāpyate//
tanmahīsāgare proktaṃ kumārasya vaco yathā

ekatra sarvatīrthānāṃ yadi saṃyogamicchatha//
tadgacchatha mahāpuṇyaṃ mahīsāgarasaṃgamam

ahaṃ cāpi ca tatraiva bahūnvarṣagaṇānpurā//
avasaṃ cāgataścātra nāradasya bhayāttathā

sa hi tatra samīpasthaḥ piśunaśca viśeṣataḥ//
maruttaḥ kurute yatnaṃ tasmai brūyādidaṃ bhayam

atra digvāsasāṃ madhye bahūnāṃ tatsamastvaham//
nivasāmyatipracchanno maruttādatibhītavat

punaratrāpi māṃ nūnaṃ kathayiṣyati nāradaḥ//
tathāvidhā hi ceṣṭāsya piśunasya pradṛśyate

bhavadbhiśca na cāpyatra vaktānāṃ kasyacitkvacit//
maruttaḥ kurute yatnaṃ bhūpālo yajñasiddhaye

devācāryeṇa saṃtyakto bhrātrā me kāraṇāṃ tare//
guruputraṃ ca māṃ jñātvā yajñārtvijyasya kāraṇāt

avidyāṃtargatairyajñakarmabhirna prayojanam//
mama hiṃsātmakairasti nigamoktairacetanaiḥ

samitpuṣpakuśaprāyaiḥ sādhanairyadyacetanaiḥ//
kriyate tattathā bhāvi kāryaṃ kāraṇavannṛṇām

tadyūyaṃ tatra gacchadhvaṃ śīghrameva nṛpānugāḥ//
asti vipraḥ svayaṃ brahmā yājñavalkyaśca tatra vai

sa hi pūrvaṃ mitheḥ puryāṃ vasannāśramamuttamam//
āgacchamānaṃ nakulaṃ dṛṣṭvā gārgīṃ vaco'bravīt

gārgi rakṣa payo bhadre nakulo'yamupeti ca//
payaḥ pātuṃ kṛtimatiṃ nakulaṃ taṃ nirākuru

ityukto nakulaḥ kruddhaḥ sa hi kruddhaḥ purā'bhavat//
jamadagneḥ pūrvajaiśca śaptaḥ provāca taṃ munim

aho vā dhigdhigityeva bhūyo dhigiti caiva hi//
nirlajjatā manuṣyāṇāṃ dṛśyate pāpakāriṇām

kathaṃ te nāma pāpāni prakurvaṃti narādhamāḥ//
maraṇāṃtaritā yeṣāṃ narake tīvravedanā

nimeṣo'pi na śakyeta jīvite yasya niścitam//
tanmātraparamāyuryaḥ pāpaṃ kuryātkathaṃ sa ca

tvaṃ mune manyase cedaṃ kulīno'smīti buddhimān//
tataḥ kṣipasi māṃ mūḍha nakulo'yamiti smayan

kimadhītaṃ yājñavalkya kā yogeśvaratā tava//
niraparādhaṃ kṣipasi dhigadhītaṃ hi tattava

kasminvedaṃ smṛtau kasyāṃ proktametadbravīhi me//
paruṣairiti vākyairmāṃ nakuleti bravīṣi yat

kimidaṃ naiva jānāsi yāvatyaḥ paruṣā giraḥ//
paraḥ saṃśrāvyate tāvacchaṃkavaḥ śrotrataḥ punarā

kaṃṭhe yamānugāḥ pādaṃ kṛtvā tasya sudurmateḥ//
atīva rudato lohaśaṃkūnkṣepsyaṃti karṇayoḥ

vāvadūkāśca dhvajino muṣṇaṃti kṛpaṇāñjanān//
svayaṃ hastasahasreṇa dharmasyaivaṃ bhavadvidhāḥ

vajrasya digdhaśastrasya kālakūṭasya cāpyuta//
samena vacasā tulyaṃ mṛtyoriti mamābhavat

karṇanāsikanārācānnirharaṃti śarīrataḥ//
vākchalyastu na nirhartuṃ śakyo hṛdiśayo hi saḥ

yaṃtrapīḍaiḥ samākramya varameṣa hato naraḥ//
na tu taṃ paruṣairvākyairjighāṃseta kathaṃcana

tvayā tvahaṃ yājñavalkya nityaṃ paṃḍitamāninā//
nakulosīti tīvreṇa vacasā tāḍitaḥ kutaḥ

//saṃvarta uvāca//
iti śrutvā vacastasya bhṛśaṃ vismitamānasaḥ//
yājñavalkyo'bravīdetatprabaddhakarasaṃpuṭaḥ

namo'dharmāya mahate na vidmo yasya vai bhavam//
paramāṇumapi vyaktaṃ kotra vidyāmadaḥ satām

viraṃciviṣṇuprasamukhāḥ someṃdrapramukhāstathā//
sarvajñāste'pi muhyati gaṇanāsmādṛśaṃ ca kā

dharmajño'smīti yo mohādātmānaṃ pratipadyate//
sa vāyuṃ muṣṭinā baddhumīhate kṛpaṇo naraḥ

kecidajñānato naṣṭāḥ kecijjñānamadādapi//
jñānaṃ prāpyāpi naṣṭāśca kecidālasyato'dhamāḥ

vedasmṛtītihāseṣu purāṇeṣu prakalpitam//
catuḥpādaṃ tathā dharmaṃ nācaratyadhamaḥ paśuḥ

sa purā śocate vyaktaṃ prāpya taccāṃtakaṃ gṛham//
tathāhi gṛhyakāreṇa śrutau proktamidaṃ vacaḥ

nakulaṃ sakulaṃ brūyānna kaṃcinmarmaṇi spṛśet//
prapaṭhannapi caivāhamidaṃ sarvaṃ tathā śukaḥ

ālasyenāpyanācārādvṛthākāryekamaṃga tat

kevalaṃ pāṭha mātreṇa yaśca saṃtuṣyate naraḥ//
tathā paṃḍitamānī ca konyastasmātpaśurmataḥ

na cchaṃdāṃsi vṛjināttārayaṃti māyāvinaṃ māyayā''vartamānam//
nīḍaṃ śakuṃtā iva jātapakṣāśchaṃdāsyenaṃ prajahatyaṃtakāle

svārgāya baddhakakṣo yaḥ pāṭhamātreṇa brāhmaṇaḥ//
sa bālo māturaṃkastho grahītuṃ somamicchati

tadbhavānsarvathā mahyamanayaṃ soḍhumarhasi//
sarvaḥ ko'pi vadatyevaṃ tanmayaivamudāhṛtam

//nakula uvāca//
vṛthedaṃ bhāṣitaṃ tubhyaṃ sarvalokena yatsamam//
ātmānaṃ manyase naitadvaktuṃ yogyaṃ mahātmanām

vājivāraṇalohānāṃ kāṣṭhapāṣāṇavāsasām//
nārīpuruṣatoyānāmaṃtaraṃ mahadaṃtaram

anye cetprākṛtā lokā bahupāpāni kurvate//
pradhānapuruṣeṇāpi kāryaṃ tatpṛṣṭhatonu kim

sarvārthaṃ nirmitaṃ śāstraṃ manobuddhī tathaiva ca//
datte vidhātrā sarveṣāṃ tathāpi yadi pāpinaḥ

tato vidhātuḥ ko doṣasta eva khalu durbhagāḥ//
brāhmaṇena viśeṣeṇa kiṃ bhāvyaṃ lokavadyataḥ

yadyadācarati śreṣṭhastattadevetaro janaḥ//
sa yatpramāṇaṃ kurute lokastadanuvartate

tasmātsadā mahadbhiśca ātmārthaṃ ca parārthataḥ//
satāṃ dharmo na saṃtyājyo nyāyyaṃ tacchikṣaṇaṃ tava

yasmāttvayā pīḍito'haṃ ghoreṇa vacasā mune//
tasmācchīghraṃ tvāṃ śapsyāmi śāpayogyo hi me mataḥ

nakulo'sīti māmāha bhavāṃstasmātkulādhamaḥ//
śīghramutpatsyase mohāttvameva nakulo mune

//saṃvarta uvāca//
iti vācaṃ samākarṇya bhāvyarthakṛtaniścayaḥ//
yājñavalkyo marau deśe viprasyājāyatātmajaḥ

durācārasya pāpasya nighṛṇasyātivādinaḥ//
duṣkulīnasya jāto'sau tadā jātismaraḥ sutaḥ

so'tha jñānātsamālokya bhartṛyajña iti dvijaḥ//
guptakṣetraṃ samāpanno mahīsāgarasaṃgamam

tatra pāśupato bhūtvā śivārādhanatatparaḥ//
svāyaṃbhuvaṃ mahākālaṃ pūjayanvartate'dhunā

yo hi nityaṃ mahākālaṃ śraddhayā pūjayetpumān//
sa dauṣkulīnadoṣebhyo mucyate'hiriva tvacaḥ

yathāyathā śraddhayāsau talliṃgaṃ paripaśyati//
tathātathā vimucyeta doṣairjanmaśatodbhavaiḥ

bhartṛyajñastu tatraiva liṃgasyārādhanātkramāt//
bījadoṣādvinirmuktastalliṃgamahimā tvasau

babhruṃ ca nakulaṃ prāha vimukto duṣṭajanmataḥ//
yasmāttasmādidaṃ tīrthaṃ khyātaṃ vai babhru pāvanam

tasmādvrajadhvaṃ tatraiva mahīsāgarasaṃgamam//
paṃca tīrthāni sevanto muktimāpsyatha niścitam

ityevamuktvā saṃvarto yayāvabhimataṃ dvijaḥ//
bhartṛyajñaṃ muniṃ prāpya te ca tatra sthitābhavan

tatastānāha sa jñātvā gaṇāñjñānena śāṃbhavān//
mahadvo vimalaṃ puṇyaṃ guptakṣetre yadatra vai

bhavanto'bhyāgatā yatra mahīsāgarasaṃgamaḥ//
snānaṃ dānaṃ japo homaḥ piṃḍadānaṃ viśeṣataḥ

akṣayaṃ jāyate sarvaṃ mahīsāgara saṃgame//
kṛtaṃ tathā'kṣayaṃ sarvaṃ snānadānakriyādikam

yadātra stānakaṃ cakre devarṣirnāradaḥ purā//
tadā grahairvarā dattāḥ śaninā ca varastvasau

śanaiścareṇa saṃyuktā tvamāvāsyā yadā bhavet//
śrāddhaṃ prakurvīta snānadānapuraḥ saram

yadi śrāvaṇamāsasya śanaiścaradine śubhā//
kuhūrbhavati tasyāṃ tu saṃkrāṃtiṃ kurute raviḥ

tasyāmeva tithau yogo vyatīpāto bhavedyadi//
puṣkaraṃnāma tatparva sūryaparvaśatādhikam

sarvayogasamāvāpaḥ sathaṃcidapi labhyate//
tasmindine śaniṃ lohaṃ kāṃcanaṃ bhāskaraṃ tathā

mahīsāgarasaṃsarge pūjayīta yathāvidhi//
śanimaṃtraiḥ śaniṃ dhyātvā sūryamaṃtrairdivākaram

arghyaṃ dadyādbhākarasya sarvapāpapraśāṃtaye//
prayāgādidhikaṃ snānaṃ dānaṃ kṣetrātkurorapi

piṃḍadānaṃ gayākṣetrādadhikaṃ pāṃḍunaṃdana//
idaṃ saṃprāpyate parva mahadbhiḥ puṇyarāśibhiḥ

pitṝṇāmakṣayā tṛptirjāyate divi niścitam//
yathā gayāśiraḥ puṇyaṃ pitṝṇāṃ tṛptidaṃ param

tathā samadhikaḥ puṇyo mahīsāgarasaṃgamaḥ

agniśca reto mṛḍayā ca dehe retodhā viṣṇuramṛtasya nābhiḥ//
evaṃ bruvañchraddhayā satyavākyaṃ tato'vagāheta mahīsamudram

mukhaṃ ca yaḥ sarvanadīṣu puṇyaḥ pāthodhiraṃbā pravarā mahī ca//
samastatīrthākṛtiretayośca dadāmi cārghyaṃ praṇamāmi naumi

tāmrā rasyāḥ payovāhāḥ pitṛprītipradāḥ śabhāḥ//
sasyamālā mahāsindhurdāturdātrī pṛthustutā//
indradyumnasya kanyā ca kṣitijanmā rāvatī

mahīparṇā mahīśṛṃgā gaṃgā paścimavāhinī//
nadī rājanadī ceti nāmāṣṭāśamālikām

snānakāle ca sarvatra śrāddhakāle paṭhennaraḥ//
pṛthunoktāni nāmāni yajñamūrtipadaṃ vrajet

mahīdohe mahānaṃdasaṃdohe viśvamohini//
jātāsi saritāṃ rājñi pāpaṃ hara mahīdrave//
//ityarghyamaṃtraḥ

kaṃkaṇaṃ rajatasyāpi yo'tra nikṣipate naraḥ//
sa jāyate mahīpṛṣṭhe dhanadhānyayute kule

mahīṃ ca sāgaraṃ caiva raupyakaṃkaṇa pūjayā//
pūjayāmi bhavenmā me dravyānāśo daridratā

//kaṃkaṇakṣepaṇam//
yatphalaṃ sarvatīrtheṣu sarvayajñaiśca yatphalam//
tatphalaṃ snānadānena mahīsāgarasaṃgame

vivāde ca samutpanne aparādhī ca yo mataḥ//
jalahastaḥ sadā vācyo mahīsāgarasaṃgame

saṃsnāpyāghoramaṃtreṇa sthāpya nābhipramāṇake//
jale karaṃ samuddhṛtya dakṣiṇaṃ vācayeddrutam

yadi dharmo'tra satyo'sti satyaścetsaṃgamastvasau//
satyāścetkratudraṣṭāraḥ satyaṃ syānme śubhāśubham

evamuktvā karaṃ kṣipya dakṣiṇaṃ sakalaṃ tataḥ//
niḥsṛtaḥ pāpakārī cejjvareṇāpīḍyate kṣaṇāt

saptāhāddṛśyate cāpi tāvannirdoṣavānmataḥ//
atra snātvā ca japtvā ca tapastaptvā tathaiva ca

rudralokaṃ subahavo gatāḥ puṇyena karmaṇā//
somavāre viśeṣeṇa snātvā yotra subhaktitaḥ

paṃca tīrthāni kurute mucyate paṃcapātakaiḥ//
ityādyuktaṃ bahuvidhaṃ tīrthamāhātmyamuttamam

bhartṛyajñaḥ śivasyo ca teṣāmārādhane kramam//
śivāgamoktamādiśya pūjāyogaṃ yathāvidhi

śivabhaktisamudraikapūritaḥ prāha tānmuniḥ//
na śivātparamo devaḥ satyametacchivavratāḥ

śivaṃ vihāya yo hyānyadasatkiṃcidupāsate//
karasthaṃ so'mṛtaṃ tyaktvā mṛgatṛṣṇāṃ pradhāvati

śivaśaktimayaṃ hyetatpratyakṣaṃ dṛśyate jagat//
liṃgāṃkaṃ ca bhagāṃkaṃ ca nānyadevāṃkitaṃ kvacit

yaśca taṃ pitaraṃ rudraṃ tyaktvā mātaramaṃ bikām//
vartate'sau svapitaraṃ tyaktodapitṛpiṃḍakaḥ//
yasya rudrasya māhātmyaṃ [http://%5Bhttps://www.youtube.com/watch?v=QO_dukpU5xo&t=4729s%20aptoryāma%20somayāge%20agnicayane%20pañcamī%20cityāṃ%20śatarudrīyam%5D śatarudrīya]muttamam

śrṛṇudhvaṃ yadi pāpānāmicchadhvaṃ kṣālanaṃ param//
brahmā hāṭakaliṃgaṃ ca samārādhya kapardinaḥ

jagatpradhānamiti ca nāma japtvā virājate//
kṛṣṇamūle kṛṣṇaliṃgaṃ nāma cārjitameva ca

sanakādyaiśca talliṃgaṃ pūjyājayurjagadgatim//
darbhāṃkuramayaṃ sapta munayo viśvayonikam

nāradastvaṃtarikṣe ca jadadbījamidaṃ gṛṇan//
vajramidro liṃgamevaṃ viśvātmānaṃ ca nāma ca

sūryastāmraṃ tathā liṃgaṃ nāma viśvasṛjaṃ japan//
caṃdraśca mauktikaṃ liṃgaṃ japannāma jagatpatim

iṃdranīlamayaṃ vahnirnāma viśveśvaraṃ japan//
puṣparāgaṃ guruliṃgaṃ viśvayoniṃ japanharam

padmarāgamayaṃ śukro viśvakarmeti nāma ca//
hemaliṃgaṃ ca dhanado japannāmnā tatheśvaram

raupyajaṃ viśvadevāśca nāmāpi jagatāṃpatim//
vāyavo rītijaṃ liṃgaṃ śaṃbhumityeva nāma ca

kāśajaṃ vasavo liṃgaṃ svayaṃbhumiti nāma ca//
trilohaṃ mātaro liṃgaṃ nāma bhūteśameva ca

lauhaṃ ca rakṣasāṃ nāma bhūtabhavyabhavodbhavam//
guhyakāḥ sīsajaṃ liṃgaṃ nāma yogaṃ japaṃti ca

jaigīṣavyo brahmarandhraṃ nāma yogeśvaraṃ japan//
nimirnayanayorliṃge japañśarveti nāma ca

dhanvaṃtarirgomayaṃ ca sarvalokeśvareśvaram//
gaṃdharvā dārujaṃ liṃgaṃ sarvaśreṣṭheti nāma ca

vaiḍūryaṃ rāghavo liṃgaṃ jagajjyeṣṭheti nāma ca//
bāṇo mārakataṃ liṃgaṃ vasiṣṭhamiti nāma ca

varuṇaḥ sphāṭikaṃ liṃgaṃ nāmnā ca parameśvaram//
nāgā vidrumaliṃgaṃ ca nāma lokatrayaṃkaram

bhāratī tāraliṃgaṃ ca nāma lokatrayāśritam//
śaniśca saṃgamāvarte jagannātheti nāma ca

śanideśe madhyarātrau mahīsāgarasaṃgame//
jātījaṃ rāvaṇo liṃgaṃ japannāma sudurjayam

siddhāśca mānasaṃ nāma kāmamṛtyujarātigam//
uṃchajaṃ ca balirliṃgaṃ jñānātmetyasya nāma ca

marīcipāḥ puṣpajaṃ ca jñānagamyeti nāma ca//
śakṛtāḥ śakṛtaṃ liṃgaṃ jñānajñeyeti nāma ca

phenapāḥ phenajaṃ liṃgaṃ nāma cāpi sudurvidam//
kapilo vālukāliṃgaṃ varadaṃ ca japanharam

sārasvato vāciliṃgaṃ nāma vāgīśvareti ca//
gaṇā mūrtimayaṃ liṃgaṃ nāma rudreti cābruvan

jāṃbūnadamayaṃ devāḥ śitikaṇṭheti nāma ca//
śaṃkhaliṃgaṃ budho nāma kaniṣṭhamiti saṃjapan

aśvinau mṛnmayaṃ liṃgaṃ nāmnā caiva suvedhasam//
vināyakaḥ piṣṭaliṃgaṃ nāmnā cāpi kapardinam

nāvanītaṃ kujo liṃgaṃ nāma cāpi karālakam//
tārkṣya odanaliṃgaṃ ca haryakṣeti hi nāma ca

gauḍaṃ kāmastathā liṃgaṃ ratidaṃ ceti nāma ca//
śacī lavaṇaliṃgaṃ tu babhrukeśeti nāma ca

viśvakarmā ca prāsādaliṃgaṃ yāmyeti nāma ca//
vibhīṣaṇaśca pāṃsūtthaṃ suhṛttameti nāma ca//
vaṃśāṃkurotthaṃ sagaro nāma saṃgatameva ca

rāhuśca rāmaṭhaṃ liṃgaṃ nāma gamyeti kīrtayan//
lepyaliṃgaṃ tathā lakṣmīrharinetreti nāma ca

yoginaḥ sarvabhūtasthaṃ sthāṇurityeva nāma ca//
nānāvidhaṃ manuṣyāśca puruṣaṃnāma nāma ca

tejomayaṃ ca ṛkṣāṇi bhagaṃ nāma ca bhāsvaram//
kiṃnarā dhātuliṃgaṃ ca sudīptamiti nāma ca

devadeveti nāmāsti liṃgaṃ ca brahmarākṣasāḥ//
daṃtajaṃ vāraṇā liṃgaṃ nāma raṃhasameva ca

saptalokamayaṃ sādhyā bahūrūpeti nāma ca//
dūrvāṃkuramayaṃ liṃgamṛtavaḥ sarvanāma ca

kauṃkumamapsaraso liṃgaṃ nāma śaṃbhoḥ priyeti ca//
siṃdūrajaṃ corvaśī ca nāma ca priyavāsanam

brahmacāri gururliṃgaṃ nāma coṣṇīṣiṇaṃ viduḥ//
alaktakaṃ ca yoginyo nāma cāsya subabhrukam

śrīkhaṃḍaṃ siddhayoginyaḥ sahasrākṣeti nāma ca//
ḍākinyo māṃsa liṃgaṃ ca nāma cāsya ca mīḍhuṣam

apyannajaṃ ca manavo giriśeti ca nāma ca//
agastyo vrīhijaṃ vāpi suśāṃtamiti nāma ca

yavajaṃ devalo liṃgaṃ patimityeva nāma ca//
valmīkajaṃ ca vālmīkiściravāsīti nāma ca

pratardano bāṇaliṃgaṃ hiraṇyabhujanāma ca//
rājikaṃ ca tathā daityā nāma ugreti kīrtitam

niṣpāvajaṃ dānavāśca liṃganāma ca dikpatim//
meghā nīramayaṃ liṃgaṃ parjanyapatināma ca

rājamāṣamayaṃ yakṣā nāma bhūtapatiṃ smṛtam//
tilānnajaṃ ca pitaro nāma vṛṣapatistathā

gautamo gorajamayaṃ nāma gopatireva ca//
vānaprasthāḥ phalamayaṃ nāma vṛkṣāvṛteti ca

skaṃdaḥ pāṣāṇaliṃgaṃ ca nāma senānya eva ca//
nāgaścāśvataro dhānyaṃ madhyametyasya nāma ca

puroḍāśamayaṃ yajvā sruvahasteti nāma ca//
yamaḥ kālāyasamayaṃ nāma prāha ca dhanvinam

yavāṃkuraṃ jāmadagnyo bhargadaityeti nāma ca//
purūravāścāścānnamayaṃ bahurūpeti nāma ca

māṃdhātā śarkarāliṃgaṃ nāma bāhuyugeti ca//
gāvaḥ payomayaṃ liṃgaṃ nāma netrasahasrakam

sādhyā bhartṛmayaṃ liṃgaṃ nāma viśvapatiḥ smṛtam//
nārāyaṇo naro mauṃjaṃ sahasraśiranāma ca

tārkṣyaṃ pṛthustathā liṃgaṃ sahasracaraṇābhidham//
pakṣiṇo vyomaliṃgaṃ ca nāma sarvātmaketi ca

pṛthivī meruliṃgaṃ ca dvitanuścāsya nāma ca//
bhasmaliṃgaṃ paśupatirnāma cāsya maheśvaraḥ

ṛṣayo jñānaliṃgaṃ ca cirasthāneti nāma ca//
brāhmaṇā brahmaliṃgaṃ ca nāma jyeṣṭheti taṃ viduḥ

gorocanamayaṃ śeṣo nāma paśupatiḥ smṛtam//
vāsukirviṣaliṃgaṃ ca nāma vai śaṃkareti ca

takṣakaḥ kālakūṭākhyaṃ bahurūpeti nāma ca//
hālāhalaṃ ca karkoṭa ekākṣa iti nāma ca

śrṛṃgī viṣamayaṃ padmo nāma dhūrjaṭireva ca//
putraḥ pitṛmayaṃ liṃgaṃ viśvarūpeti nāma ca

pāradaṃ ca śivā devī nāma tryambaka eva ca//
matsyādyāḥ śāstraliṃgaṃ ca nāma cāpi vṛṣākapiḥ

evaṃ kiṃ bahunoktena yadyatsattvaṃ vibhūtimat//
jagatyāmasti tajjātaṃ śivārādhanayogataḥ

bhasmano yadi vṛkṣatvaṃ jñāyate nīrasevanāt//
śivabhaktivihīnasya tato'sya phalamucyate

dharmārthakāmamokṣāṇāṃ yadi prāptau bhavenmatiḥ//
tato haraḥ samārādhyastrijagatyāḥ prado mataḥ

ya idaṃ śatarudrīyaṃ prātaḥprātaḥ paṭhiṣyati//
tasya prītaḥ śivo devaḥ pradāsyatyakhilānvarān

nātaḥ paraṃ puṇyatamaṃ kiṃcidasti mahāphalam//
sarvavedarahasyaṃ ca sūryeṇoktamidaṃ mama

vācā ca yatkṛtaṃ pāpaṃ manasā vāpyupārjitam//
pāpaṃ tannāśamāyāti kīrtite śatarudriye

rogārto mucyate rogādbaddho mucyeta bandhanāt//
bhayānmucyeta bhītaśca japedyaḥ śatarudriyam

nāmnāṃ śatena yaḥ kumbhaiḥ puṣpaistāvadbhirīśvaram//
praṇāmānāṃ śatenāpi mucyate sarvapātakaiḥ

liṃgānāṃ śatametacca śatamārādhakāstathā//
nāmāni ca śataṃ sarvadoṣasaṃnāśakaṃ smṛtam

viśeṣādeṣu liṃgeṣu yaḥ paṭhiṣyati paṃcasu//
paṃcabhirviṣayodbhūtaiḥ sa doṣaiḥ parimucyate

//nārada uvāca//
niśamyaivaṃ prārthyate'pi guptakṣetre mudānvitāḥ//
paṃcaliṃgānayarcayaṃtaḥ śivadhyānaparābhavan

tato bahutithe kāle pratyakṣībhūya śaṃkaraḥ//
prāhatānmudito devasteṣāṃ bhaktiviśeṣataḥ

//śiva uvāca//
bakolūkagṛdhrakūrmā indradyumna ca pārthiva//
sārūpyāṃ muktimāpannā malloke nivasiṣyatha

lomaśaścāpi mārkaṃḍo jīvanmuktau bhaviṣyataḥ//
ityukte devadevena liṃgaṃ sthāpitavānnṛpaḥ

indradyumneśvaraṃ nāma mahākālākhyamityuta//
jñātvā tīrthaguṇānrājā kīrtimicchaṃściraṃtanīm

triramyamatulaṃ liṃgaṃ saṃsthāpyedamuvāca ha//
yāvaccaṃdraśca sūryaśca yāvattiṣṭhati medinī

indradyumneśvaraṃ liṃgaṃ naṃdatācchāśvatīḥ samāḥ//
tatastatheti bhagavācchivaḥ procyābravītpunaḥ

atra yo niyataṃ liṃgamaiṃdradyumnaṃ prapūjayet//
sa gaṇo jāyate nūnaṃ mama loke nivatsyati

ityuktvā saha taiścaiva paṃcabhiḥ śaśiśekharaḥ//
rudralokama gāddevaste'pi jātā gaṇāḥ punaḥ

evaṃ prabhāvo rājābhūdiṃdradyumno mahīpatiḥ//
yajatā yena vīreṇa nirmiteyaṃ mahīnadī

evaṃvidhaḥsa puṇyo'yaṃ mahīsāgarasaṃgamaḥ//
abhūttato'pi saṃkṣepāttava pārtha prakīrtitaḥ

snātvātra saṃgame yaśca indradyumneśvaraṃ naraḥ//
pūjayettasya vāsaḥ syādyatreśaḥ pārvatīpatiḥ

sarvabandhaharaṃ liṃgaṃ gāṇapatyapradaṃ tvidam//
yato bandhānvihāyaiva sthāpitaṃ tena phālalguna

itīdamuktaṃ tava puṇyakāri māhātmyamasyottamasaṃgamasya//
māhātmyamatyadbutapuṇyamindradyumneśvarasyāpi ca puṇyakāri

iti śrīskāṃde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe kaumārikākhaṇḍe mahīsāgarasaṃgamamāhātmyaśatarudriyaliṃgamāhātmyendradyumneśvaraliṃgamāhātmya varṇanaṃnāma trayodaśo'dhyāyaḥ