Skanda Purana · Chapter 1.1.11

// brahmovāca // //
sa tu siṃhasthitāṃ gaurīṃ jvalaṃtī vividhāyudhām //
śailavarṣeṇa mahatā kupitaḥ samapūrayat

śaravarṣeṇa mahatā tannivārya vidūrataḥ //
bibheda niśitaiḥ śastrairaśeṣaṃ tasya vigraham

bhidyamāno'pi daityeṃdraḥ śailasārapradurdharaḥ //
viṣādaṃ nāgamatkiṃcidvavṛdhe yuddhadurmadaḥ

bhidyamānaḥ sa khaḍgena cakrairasibhirṛṣṭibhiḥ //
śūlena cāyudhaiścānyairaṃtardhānamagāhata //

tataḥ siṃhākṛtirbhīmaḥ pracaṃḍaninadānanaḥ //
tīkṣṇadaṃṣṭraḥ śitanakhaḥ paribabhrāma kesarī

devīsiṃhaścapeṭena tāḍayāmāsa pāṇinā //
daityasiṃhasya ca nakhaistasya vakṣo vyadārayat

atha vyāghratayā prāptaḥ sphuṭavyāttānano mahān //
taṃ haṃtuṃ ca balāddevī vegena karamakṣipat

dīrghābhirnnīlarekhābhiḥ pūrṇaḥ piṃgalavigrahaḥ //
yānāvalibhirākīrṇaḥ svarṇādririva saṃcaran

mṛgairiva paritrātuṃ mucyamāno'grato balī //
jvalaṃtamiva roṣāgniṃ jihvāhetibhirāvahan

āgacchaṃtaṃ rayāddevī bhallena śaśivarcasā //
prativivyādha taṃ vyāghraṃ puratrayamiveśvaraḥ

sa bāṇastanmukhe magnastadraktena samukṣitaḥ //
jagāhe gaganaṃ bhittvā dehamasya vinirgataḥ

sa daityo vāraṇo bhūtvā devīmāśvabhyupāgamat //
balibhiḥ paśubhirbhinnaistasyāḥ prītimivāvahan

taṃ gajeṃdraṃ samāyāṃtaṃ madaklinnamahītalam //
devīsiṃhastadā dṛṣṭvā nanarda ca jaghāna ca

atha khaḍgadharo vīraścarmapāṇiḥ samudgataḥ //
vaktraṃ dadhāno babhrāma daṃṣṭrābhrukuṭibhīṣaṇam

devī ca vilasatkhaḍgacakracakralasatkarā //
yuyodha tena vīreṇa bhagnaśīrṣābhyapadyata

bhūyaḥ sa māhiṣaṃ rūpamāsthāyāsuramāyayā //
devyā yoddhuṃ pravavṛte yathāpūrvamanākulam

atha devaimunīṃdraiśca codito gautamo muniḥ //
prabodhayitumārebhe stutibhirjagadaṃbikām

tvayi sarvasya jagataḥ prāṇaśaktiḥ parā matā //
ojaḥśaktirjñānaśaktirbalaśaktiśca gamyate

kimetadadya mohāya yuddhamārabhyate tvayā //
upasaṃhriyatāmeṣa daityo bhuvanaguptaye

bhinnānāmasya dehānāmupasaṃharaṇāttava //
valayaścopadiśyante nigamoktā varapradāḥ

anyathā tṛṇakalpasya śatrorasya nibarhaṇe //
kālāgnivarcaso devi kimarthaṃ saṃbhramastviyān

svaśaktimavasaṃstabhya samākarṣayatāṃ ripoḥ //
prāṇaśaktiṃ triśūlena guṇatrayavapurdhṛtā

iti sma bodhitātena purā bhagavatī tadā //
mahiṣāsuramākramya triśūlenābhyadhārayat

anekagirisaṃkāśaṃ devyā vigrahamātmanaḥ//
aśaktastaṃ dhārayituṃ sasāda mahiṣāsuraḥ

niṣpiṣṭo viluṭhankrośannākrāṃtaśca parisphuran //
nirgaṃtumudgataśirā na śaśākāsurādhipaḥ

triśūlamukhabhinnāṃgaraktadhārāsamuddhataḥ //
samudra iva saṃjātaḥ saṃdhyāruṇakalevaraḥ //

atha khaḍgena tīkṣṇena kartayitvā ca tacchiraḥ //
nanartta tasya śirasi tiṣṭhantī mahiṣārdinī

durgāṃ siddhāśca gandharvāḥ praśaśaṃsurmaharṣayaḥ //
puṣpavṛṣṭiśca mahatī devairmuktā samaṃtataḥ //
praṇataḥ prāṃjalirdevīṃ tuṣṭāva vibudhādhipaḥ

// indra uvāca // //
namaste jagatāṃ mātre bhūtānāṃ bījasaṃvide

bhaktiḥ śraddhā ca bhajatāṃ śaktiścāsi tvamaṃbike //
kāraṇaṃ paramā kīrtiḥ śātirdāṃtiḥ kalā kṣamā

ekaiva viśvarūpā tvaṃ nāmabhedernigadyase //
teṣuteṣu padeṣvasmāṃstapo'nuguṇasiddhiṣu

niyujya śatruṃ nirbhidya śivā jñeyā prakāśase //
hatoyaṃ mahiṣo duṣṭo vinikṛttaśca śāṃbhavi

chinnametasya tu śiraḥ sajīvamiva lakṣyate //
raktanetraṃ tīkṣṇaśṛgaṃ jvalajjihvaṃ calaṃ śiraḥ

ākramya tava tiṣṭhantyā rūpameva sadāstu naḥ //
cakraśṛṃgadhanurbāṇakhaṅgacarmavarābhayaiḥ

śūlaghaṇṭāṃkuśakaśākapālakuliśādibhiḥ //
aśeṣadevatāmūrtiraśeṣaideṃvatāyudhaiḥ

āpūritā tvamevāṃba sarvaśatrūnnihaṃsi naḥ //
āyudhānāṃ sahasrāṇi tanmayāste vibhūtayaḥ

tvajjitārātayaḥ sarve vividhāyudhavāhanāḥ //
rathanāgahayairyuktāḥ sasainyā api bhūbhṛtaḥ

kṣaṇena dagdhavīryāḥ syustvatprasādavivarjitāḥ //
apado'pyalpavīryo'pi tvatpādāṃbujasevakaḥ

trilokanāthatāṃ prāptaḥ prathate kīrtimaṇḍitaḥ //
tadrūpamidamatyugraṃ dhyāyatāmarcatāṃ sadā

na śatrubhyo bhayaṃ kiṃcidbhavedvijayaśālinām //
īdṛśaṃ sarvalokeṣu rūpaṃ te devavaṃditam

pūjyatāmiṣṭasiddhyarthaṃ devairbhṛtyaiśca sarvadā //
mātaraśca tvayā sṛṣṭāḥ sarvābhīṣṭaphalapradāḥ

sagaṇāḥ pratipūjyaṃtāṃ sarvasthāneṣu sarvadā //
ayaṃ ca nihato daityastvatpādakṛtalāṃchanaḥ

tava bhaktaiḥ sadā pūjyastvatpramādāttvadagrataḥ //
itthaṃ surendrapraṇutā sarvarṣisurasevitā

tatheti varadā devī sasarja ca divaṃ prati //
svayamapyātmanastatra tadrūpaṃ vividhāyudham //

saṃsthāpya mātṛbhiḥ sārdhaṃ sthānarakṣaṇamātanot //
saṃgṛhya vimalaṃ rūpaṃ sakhījanasamāvṛtā

mahiṣasya śiro'paśyadvikṛtaṃ khaṅgadhārayā //
kathayantī punastasya citraṃ lokavibhūṣaṇam

sakhībhiḥ saha sā bālā kaṇṭhaṃ tasya vyalokayat //
apaśyacca tadā ligaṃ karttuṃ tasya ca pūjanam

ādatta sahasā gaurī ligaṃ tasya gale sthitam //
ālokayacca suciraṃ raktadhārāpariplutam

āsajjata punarliṃgamasyāḥ pāṇitalaṃ gatam //
vimocayitumudyuktā nāśaknollagnamaṃjasā

aciṃtayacca sā devī kimetaditi vismayāt //
viṣādena ca saṃyuktā maharṣīṇāṃ puraḥ sthitā

āhataḥ śivabhakto'yamiti śokaṃ samāviśat //
agarhata bhṛśaṃ mauḍhyamātmanaḥ strīsvabhāvajam

avicāra samārabdhaṃ śivabhaktanibarhaṇam //
upatāpaparītāṃgī gautamaṃ munisattamam

upagamyābravīdbālā sāhasaṃ kṛtamātmanā //
bhagavansarvadharmajña gautamārya munīśvara

mānyayā dharmarūpeṇa ko'pyadharmaḥ prakalpitaḥ //
devānāṃ rakṣaṇaṃ kartumabhayaṃ dātumudyatā

ajñānānmahiṣaṃ daityaṃ śivabhaktimamardayam //
rajasākrāntabuddhīnāṃ na bhaveddharmasaṃgrahaḥ

guruprasādasulabhaḥ sphuradvighnaśatākulaḥ //
sudurdharṣā nirācāradurdamāḥ śivasaṃśrayāḥ

viśeṣato liṃgadharāḥ śivastānbahu manyate //
purā puratrayāvāsā daiteyā liṃgadhārakā

ajitāḥ śaṃbhunā pūrvaṃ muktaliṃgā niṣūditāḥ //
asya kaṃṭhasthitaṃ liṃgaṃ mama pāṇiṃ na muṃcati

kathaṃ pāpaṃ nirasyāmi śivabhaktavadhāśritam //
asya kaṃṭhasthitaṃ liṃgaṃ dhārayaṃtī taponvitā

tīrthayātrāṃ kariṣyāmi yāvacchaṃbhuḥ prasīdati //
punaḥ kailāsamukhyeṣu śaṃbhusthāneṣu bhūriṣu

tīrtheṣu racitasnānā lapsye pāpaviśodhanam //
iti tasyāḥ pariśrāṃtiṃ durdharmapariśaṃkayā

ākarṇya śivadharmajño bhayārttāṃ tāmavocata //
mā bhaiṣīrgirije mohācchivabhakto hatastviti

dharmasūkṣmārthavettārau durlabhā girikanyake //
sadā śivasya vadanaiḥ sadyojātādi saṃśritaiḥ

āgamāḥ paṃcabhiḥ proktā aṣṭāviṃśatikoṭayaḥ //
nirṇayāḥ śivabhaktānāṃ śivamārgasya śobhanāḥ //

teṣuteṣu munīṃdraiśca natvaiva pratipadyate //
kālo mukhaṃ ca kaṃkālaṃ śaivaṃ pāśupataṃ tathā

mahāvrataṃ paṃca caitāḥ śivamārgapravṛttayaḥ //
bhedāśca bahavasteṣāmanyonyasya śive ratāḥ

sādhya eko hi balavānsarvaistairaniśaṃ śivaḥ //
sarva eva sadā pūjyāḥ svadharmapariniṣṭhitaiḥ

amatsaraiḥ śive bhaktaiḥ śivājñāparipālakaiḥ //
vedaiśca bahubhiryajñairbhaktyā ca parayā śivaḥ

ārādhyate mahādevaḥ sarvadā sarvadāyakaḥ //
jīvahiṃsā na karttavyā viśeṣaṇa tapasvibhiḥ

śivadharmasya bhettāro nihaṃtavyāstathāṃjasā //
na veṣajuṣi vīkṣeta na ligaṃ naiva saṃbhavam

śivadharmasya bhettāraṃ hanyādevāvicārayan //
bahubhiḥ sphūrtayā buddhyā dharmavidbhirnirūpite

śivadharmasya vilaye sadyaḥ śaktiḥ pravartate //
asya karma punardiṣṭaṃ liṃgamaiśvaryacarcitam

na jetuṃ śakyate devi tenāsau sarvadaivataiḥ //
yadayaṃ nihato devi tvayā śaṃkaramānyayā

ākrāṃtaḥ śāpadoṣeṇa maharṣīṇāṃ śivāśrayāt //
atha te kupitāstasya vaiṣamyādavamānataḥ

śepurmahiṣavadduṣṭo mahiṣo'yaṃ bhavatviti //
tatastadvacanātsadyo mahiṣo'bhūtkṣaṇāttathā

praṇamya toṣayāmāsa yayāce śāpamocanam //
dattvā prakāmarūpatvaṃ dadurasmai prasāditāḥ

mahiṣatvepi saṃhāraṃ svayaṃ devyā śivājñayā //
viṣādo na ca karttavyo aṃgadarśanatastvayā

siddhānāṃ śivarūpāṇāmavajñā kaṃ na bādhate //
mahiṣatve samutpanne doṣeṇa samupasthite

siddhaprasādāllabdho'yaṃ śāpanāśastvayā kṛtaḥ //
sarve lokāśca saṃtrātā duṣṭoyaṃ parirakṣitaḥ

śāpadoṣasamutpanne mahiṣatve vimocite //
tvayā ca giriśaprītyai tapaḥ kurvāṇayādrije

draṣṭavyaṃ taijasaṃ liṃgamaruṇācalasaṃjñitam //
pūrvajanmani bhakto'yamaruṇādripateḥ sphuṭam

mahiṣatve madākrāṃtaḥ paraṃ liṃgena saṃgataḥ //
bhaktyā liṃgadharaṃ haṃtuṃ kaḥ samartho jagattraye

dṛṣṭāḥ puratraye pūrvaṃ rudreṇa pūjitāstrayaḥ //
tvatkhaḍgaparikṛttena kaṃṭhenāsya varānane

dīkṣādirahitaṃ liṃgaṃ dattaṃ haṃtīti coditam //
kṛtaṃ hi mahiṣeṇāpi bhaktito liṃgadhāraṇam

kadācitkṣapaṇoktānāṃ vibhāṣātpratyayaṃ gataḥ//
pūrvajanmatapoyogātsmaraṇo liṃgadhāraṇāt

tvatpādapadmasaṃsparśādayaṃ mukto na saṃśayaḥ//
maduktaniṣkṛtīnāṃ tu pātakānāṃ ca nāśanam

darśanaṃ śailavaryasya prāyaścittaṃ paraṃ matam //
saṃsthāpya vividhāñchaivāñchivasiddhāṃtavedinaḥ

āvāhya sarvatīrthāni sarvadoṣanivṛttaye//
saraḥ kimapi saṃpādya snātvā tatra varānane

aghamarṣaṇasaṃyuktā saliṃgā snānamācara //
trisaṃdhyaṃ caiva māsāṃte devayāgamahotsave

ārādhayopacāraistvamaruṇādrimayaṃ śivam

evaṃ tasya munerniśamya vacanaṃ śaivārthasaṃbhāvitaṃ prītā devanamaskṛtā girisutā devī jagadrakṣikā //
śaivaṃ dharmamimaṃ vidhātumucitaṃ śoṇācalasyāgratastīrthāgāhanabuddhimāśu vidadhe kartuṃ tvaghakṣālanam

iti śrīskānde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe'ruṇācalamāhātmye pūrvārdhe mahiṣāsuravadhottaraṃ devīpāṇau mahiṣāsuraśiraḥsaṃlagratāvṛttāṃtavarṇanaṃnāmaikādaśo'dhyāyaḥ