Śivapurāṇa, Books 1 and 7 · Chapter 7.1.11

iti śrīśivamahāpurāṇe saptamyāṃ vāyavīyasaṃhitāyāṃ brahmāṃḍasthitivarṇanaṃ nāma daśamo 'dhyāyaḥ
Chapter 11
munaya ūcuḥ
manvaṃtarāṇi sarvāṇi kalpabhedāṃśca sarvaśaḥ
teṣvevāṃtarasargaṃ ca pratisargaṃ ca no vada

vāyuruvāca
kālasaṃkhyāvivṛttasya parārdho brahmaṇassmṛtaḥ
tāvāṃścaivāsya kālonyastasyāṃte pratisṛjyate

divase divase tasya brahmaṇaḥ pūrvajanmanaḥ
caturdaśamahābhāgā manūnāṃ parivṛttayaḥ

anāditvādanaṃtatvādajñeyatvācca kṛtsnaśaḥ
manvaṃtarāṇi kalpāśca na śakyā vacanātpṛthak

ukteṣvapi ca sarveṣu śṛṇvatāṃ vo vaco mama
kimihāsti phalaṃ tasmānna pṛthak vaktumutsahe

ya eva khalu kalpeṣu kalpaḥ saṃprati vartate
tatra saṃkṣipya vartaṃte sṛṣṭayaḥ pratisṛṣṭayaḥ

yastvayaṃ vartate kalpo vārāho nāma nāmataḥ
asminnapi dvijaśreṣṭhā manavastu caturdaśa

svāyaṃbhuvādayassapta sapta sāvarṇikādayaḥ
teṣu vaivasvato nāma saptamo vartate manuḥ

manvaṃtareṣu sarveṣu sargasaṃhāravṛttayaḥ
prāyaḥ samābhavaṃtīti tarkaḥ kāryo vijānatā

pūrvakalpe parāvṛtte pravṛtte kālamārute
samunmūlitamūleṣu vṛkṣeṣu ca vaneṣu ca

jagaṃti tṛṇavaktrīṇi deve dahati pāvake
vṛṣṭyā bhuvi niṣiktāyāṃ viveleṣvarṇaveṣu ca

dikṣu sarvāsu magnāsu vāripūre mahīyasi
tadadbhiścaṭulākṣepaistaraṃgabhujamaṇḍalaiḥ

prārabdhacaṇḍanṛtyeṣu tataḥ pralayavāriṣu
brahmā nārāyaṇo bhūtvā suṣvāpa salile sukham

513a
imaṃ codāharanmaṃtraṃ ślokaṃ nārāyaṇaṃ prati
taṃ śṛṇudhvaṃ muniśreṣṭhāstadarthaṃ cākṣarāśrayam

āpo nārā iti proktā āpo vai narasūnavaḥ
ayanaṃ tasya tā yasmāttena nārāyaṇaḥ smṛtaḥ

śivayogamayīṃ nidrāṃ kurvantaṃ tridaśeśvaram
baddhāṃjali puṭāssiddhā janalokanivāsinaḥ

stotraiḥ prabodhayāmāsuḥ prabhātasamaye surāḥ
yathā sṛṣṭyādisamaye īśvaraṃ śrutayaḥ purā

tataḥ prabuddha utthāya śayanāttoyamadhyagāt
udaikṣata diśaḥ sarvā yoganidrālasekṣaṇaḥ

nāpaśyatsa tadā kiṃcitsvātmano vyatireki yat
savismaya ivāsīnaḥ parāṃ ciṃtāmupāgamat

kva sā bhagavatī yā tu manojñā mahatī mahī
nānāvidhamahāśailanadīnagarakānanā

evaṃ saṃciṃtayanbrahmā bubudhe naiva bhūsthitim
tadā sasmāra pitaraṃ bhagavaṃtaṃ trilocanam

smaraṇāddevadevasya bhavasyāmitatejasaḥ
jñātavānsalile magnāṃ dharaṇīṃ dharaṇīpatiḥ

tato bhūmessamuddhāraṃ kartukāmaḥ prajāpatiḥ
jalakrīḍocitaṃ divyaṃ vārāhaṃ rūpamasmarat

mahāparvatavarṣmāṇaṃ mahājaladaniḥsvanam
nīlameghapratīkāśaṃ dīptaśabdaṃ bhayānakam

pīnavṛttaghanaskaṃdhapīnonnatakaṭītaṭam
hrasvavṛttorujaṃghāgraṃ sutīkṣṇapuramaṇḍalam

padmarāgamaṇiprakhyaṃ vṛttabhīṣaṇalocanam
vṛttadīrghamahāgātraṃ stabdhakarṇasthalojjvalam

udīrṇocchvāsaniśvāsaghūrṇitapralayārṇavam
visphuratsusaṭācchannakapolaskaṃdhabaṃdhuram

maṇibhirbhūṣaṇaiścitrairmahāratnaiḥpariṣkṛtam
virājamānaṃ vidyudbhirmeghasaṃghamivonnatam

āsthāya vipulaṃ rūpaṃ vārāhamamitaṃ vidhiḥ
pṛthivyuddharaṇārthāya praviveśa rasātalam

sa tadā śuśubhe 'tīva sūkaro girisaṃnibhaḥ
liṃgākṛtermaheśasya pādamūlaṃ gato yathā

tatassa salile magnāṃ pṛthivīṃ pṛthivīṃdharaḥ
uddhṛtyāliṃgya daṃṣṭrābhyāmunmamajja rasātalāt

taṃ dṛṣṭvā munayassiddhā janalokanivāsinaḥ
mumudurnanṛturmūrdhni tasya puṣpairavākiran

vapurmahāvarāhasya śuśubhe puṣpasaṃvṛtam
patadbhiriva khadyotaiḥ prāśuraṃjanaparvataḥ

tataḥ saṃsthānamānīya varāho mahatīṃ mahīm
svameva rūpamāsthāya sthāpayāmāsa vai vibhuḥ

pṛthivīṃ ca samīkṛtya pṛthivyāṃ sthāpayangirīn
513b
bhūrādyāṃścaturo lokān kalpayāmāsa pūrvavat

iti saha mahatīṃ mahīṃ mahīdhraiḥ pralayamahājaladheradhaḥsthamadhyāt
upari ca viniveśya viśvakarmā caramacaraṃ ca jagatsasarja bhūyaḥ