Śivapurāṇa, Books 1 and 7 · Chapter 7.1.10

iti śrīśivamahāpurāṇe saptamyāṃ vāyavīyasaṃhitāyāṃ pūrvabhāge sṛṣṭipālanapralayakartṛtvavarṇanaṃ nāma navamo 'dhyāyaḥ
Chapter 10
vāyuruvāca
puruṣādhiṣṭhitātpūrvamavyaktādīśvarājñayā
buddhyādayo viśeṣāṃtā vikārāścābhavan kramāt

tatastebhyo vikārebhyo rudro viṣṇuḥ pitāmahaḥ
kāraṇatvena sarveṣāṃ trayo devāḥ prajajñire

sarvato bhuvanavyāptiśaktimavyāhatāṃ kvacit
jñānamapratimaṃ śaśvadaiśvaryaṃ cāṇimādikam

sṛṣṭisthitilayākhyeṣu karmasu triṣu hetutām
prabhutvena sahaiteṣāṃ prasīdati maheśvaraḥ

kalpāntare punasteṣāmaspardhā buddhimohinām
sargarakṣālayācāraṃ pratyekaṃ pradadau ca saḥ

ete parasparotpannā dhārayanti parasparam
paraspareṇa vardhaṃte parasparamanuvratāḥ

kvacidbrahmā kvacidviṣṇuḥ kvacidrudraḥ praśasyate
nānena teṣāmādhikyamaiśvaryaṃ cātiricyate

mūrkhā niṃdaṃti tānvāgbhiḥ saṃraṃbhābhiniveśinaḥ
yātudhānā bhavaṃtyeva piśācāśca na saṃśayaḥ

devo guṇatrayātītaścaturvyūho maheśvaraḥ
sakalassakalādhāraśakterutpattikāraṇam

soyamātmā trayasyāsya prakṛteḥ puruṣasya ca
līlākṛtajagatsṛṣṭirīśvaratve vyavasthitaḥ

yassarvasmātparo nityo niṣkalaḥ parameśvaraḥ
sa eva ca tadādhārastadātmā tadadhiṣṭhitaḥ

tasmānmaheśvaraścaiva prakṛtiḥ puruṣastathā
sadāśivabhavo viṣṇurbrahmā sarvaśivātmakam

pradhānātprathamaṃ jajñe vṛddhiḥ khyātirmatirmahān
mahattattvasya saṃkṣobhādahaṃkārastridhā 'bhavat

ahaṃkāraśca bhūtāni tanmātrānīṃdriyāṇi ca
vaikārikādahaṃkārātsattvodriktāttu sāttvikaḥ

vaikārikaḥ sa sargastu yugapatsaṃpravartate
buddhīndriyāṇi pañcaiva pañcakarmeṃdriyāṇi ca

ekādaśaṃ manastatra svaguṇenobhayātmakam
tamoyuktādahaṃkārādbhūtatanmātrasaṃbhavaḥ

bhūtānāmādibhūtatvādbhūtādiḥ kathyate tu saḥ
bhūtādeśśabdamātraṃ syāttatra cākāśasaṃbhavaḥ

ākāśātsparśa utpannaḥ sparśādvāyusamudbhavaḥ
vāyo rūpaṃ tatastejastejaso rasasaṃbhavaḥ

rasādāpassamutpannāstebhyo gandhasamudbhavaḥ
gandhācca pṛthivī jātā bhūtebhyonyaccarācaram

puruṣādhiṣṭhitatvācca avyaktānugraheṇa ca
mahadādiviśeṣāntā hyaṇḍamutpādayanti te

512a
tatra kāryaṃ ca karaṇaṃ saṃsiddhaṃ brahmaṇo yadā
tadaṃḍe supravṛddho 'bhūt kṣetrajño brahmasaṃjñitaḥ

sa vai śarīrī prathamaḥ sa vai puruṣa ucyate
ādikartā sa bhūtānāṃ brahmāgre samavartata

tasyeśvarasya pratimā jñānavairāgyalakṣaṇā
dharmaiśvaryakarī buddhirbrāhmī yajñe 'bhimāninaḥ

avyaktājjāyate tasya manasā yadyadīpsitam
vaśī vikṛtvāttraiguṇyātsāpekṣatvātsvabhāvataḥ

tridhā vibhajya cātmānaṃ trailokye saṃpravartate
sṛjate grasate caiva vīkṣate ca tribhissvayam

caturmukhastu brahmatve kālatve cāṃtakassmṛtaḥ
sahasramūrdhā puruṣastisrovasthāssvayaṃbhuvaḥ

sattvaṃ rajaśca brahmā ca kālatve ca tamo rajaḥ
viṣṇutve kevalaṃ sattvaṃ guṇavṛddhistridhā vibhau

brahmatve sṛjate lokān kālatve saṃkṣipatyapi
puruṣatve 'tyudāsīnaḥ karma ca trividhaṃ vibhoḥ

evaṃ tridhā vibhinnatvādbrahmā triguṇa ucyate
caturdhā pravibhaktatvāccāturvyūhaḥ prakīrtitaḥ

āditvādādidevo 'sāvajātatvādajaḥ smṛtaḥ
pāti yasmātprajāḥ sarvāḥ prajāpatiriti smṛtaḥ

hiraṇmayastu yo merustasyolbaṃ sumahātmanaḥ
garbhodakaṃ samudrāśca jarāyuścā 'pi parvatāḥ

tasminnaṃḍe tvime lokā aṃtarviśvamidaṃ jagat
caṃdrādityau sanakṣatrau sagrahau saha vāyunā

adbhirdaśaguṇābhistu bāhyatoṇḍaṃ samāvṛtam
āpo daśaguṇenaiva tejasā bahirāvṛtāḥ

tejo daśaguṇenaiva vāyunā bahirāvṛtam
ākāśenāvṛto vāyuḥ khaṃ ca bhūtādināvṛtam

bhūtādirmahatā tadvadavyaktenāvṛto mahān
etairāvaraṇairaṇḍaṃ saptabhirbahirāvṛtam

etadāvṛttya cānyonyamaṣṭau prakṛtayaḥ sthitāḥ
sṛṣṭipālanavidhvaṃsakarmakartryo dvijottamāḥ

evaṃ parasparotpannā dhārayaṃti parasparam
ādhārādheyabhāvena vikārāstu vikāriṣu

kūrmoṃgāni yathā pūrvaṃ prasārya viniyacchati
vikārāṃśca tathā 'vyaktaṃ sṛṣṭvā bhūyo niyacchati

avyaktaprabhavaṃ sarvamānulomyena jāyate
prāpte pralayakāle tu pratilomyenulīyate

guṇāḥ kālavaśādeva bhavaṃti viṣamāḥ samāḥ
guṇasāmye layo jñeyo vaiṣamye sṛṣṭirucyate

tadidaṃ brahmaṇo yoniretadaṃḍaṃ ghanaṃ mahat
brahmaṇaḥ kṣetramuddiṣṭaṃ brahmā kṣetrajña ucyate

itīdṛśānāmaṇḍānāṃ koṭyo jñeyāḥ sahasraśaḥ
sarvagatvātpradhānasya tiryagūrdhvamadhaḥ sthitāḥ

512b
tatra tatra caturvaktrā brahmāṇo harayo bhavāḥ
sṛṣṭā pradhānena tathā labdhvā śaṃbhostu sannidhim

maheśvaraḥ parovyaktādaṃḍamavyaktasaṃbhavam
aṇḍājjajñe vibhurbrahmā lokāstena kṛtāstvime

abuddhipūrvaḥ kathito mayaiṣa pradhānasargaḥ prathamaḥ pravṛtaḥ
ātyaṃtikaśca pralayontakāle līlākṛtaḥ kevalamīśvarasya

yattatsmṛtaṃ kāraṇamaprameyaṃ brahmā pradhānaṃ prakṛteḥ prasūtiḥ
anādimadhyāntamanantavīryaṃ śuklaṃ suraktaṃ puruṣeṇa yuktam

utpādakatvādrajasotirekāllokasya saṃtānavivṛddhihetūn
aṣṭau vikārānapi cādikāle sṛṣṭvā samaśnāti tathāṃtakāle

prakṛtyavasthāpitakāraṇānāṃ yā ca sthitiryā ca punaḥ pravṛttiḥ
tatsarvamaprākṛtavaibhavasya saṃkalpamātreṇa maheśvarasya