Śiṣyalekha · Verses 102-115

avidyādhūmrāndhabhramaparigatavyākulagatipradīpte duḥkhāgnau patitamavaśaṃ vīkṣya bhuvanam |
sphuradvahnijvālā pramathitaśiroveṣṭananibhā yātante ye 'trādbhuta iha puruṣāste sukṛtinaḥ

avīciṃ gāhante hutavahaśikhāpūritamapi prasarpadromāñcā himanikaracandrāṃśuśiśiram |
parārthe x x x sphuṭanalinahāsāpi nalinī karotyeṣāṃ tāpaṃ hutavahaśikhāsaṃhatiriva

parahitakaraṇāya baddhakakṣāḥ sukhamasipattravane vasanti santaḥ |
na punaramarasundarīsahāyāḥ kṣaṇamapi nandanakānane ramante

aśaraṇajanatāraṇāya tīrṇāḥ punarapi vaitaraṇīṃ taranti dhīrāḥ |
na tu gaganasarittaraṃgabhaṅgavyatikarasaṅgasukhaṃ svayaṃ bhajante

iti sucaritaratnaṃ bhūṣaṇaṃ bhūṣaṇānāṃ śivamamṛtamudāraṃ bhāsuraṃ bhāsurāṇām |
asulabhamakṛtajñairnandanaṃ nandanānāṃ bhaja samasukhahetuṃ maṅgalaṃ maṅgalānām

sugatavacanapuṣpaṃ sarvadā sevanīyaṃ phalati phalamudāraṃ puṣpameva drumāṇām |
sugatavacanapuṣpādartharāśirniṣevyo madhuni mudhakarāṇāṃ yasya vāñchāprakarṣam

visṛja viṣayānnītyākīrṇāṃ kṣaṇavyayasaṅgino bhaja samasukhaṃ sākāṅkṣaṃ kṛtāntabhayojjhitam |
vikara timiraṃ mohavyājaṃ vimokṣayathārgalaṃ na khalu suciraṃ nidrāyante sadaśvakiśorakāḥ

vinayavisaro vīryaskandhaḥ kṣamādamapallavaḥ śamathakusumaḥ prajñāśākhaḥ pradānaghanacchadaḥ |
praṇidhiśikharaḥ śīlacchāyaḥ praśāntiphalaprado bhava bhava marau tāpārtānāṃ tvamekamahādrumaḥ

bahujanahito mābhairvādapradānamahāsvanaḥ pṛthutaraśodhārāsāraḥ kṛpānilacoditaḥ |
praśamitarajaḥ śīlacchāyāvibhūṣitabhūtalo bhava bhava marau tāpārtānāṃ tvamekamahāghanaḥ

prakaṭavipulaṃ paṅkāgādhaḥ prasannatarāśrayaḥ satataśiśiro jālavyālapramādavivarjitaḥ |
prakṛtisubhagastṛṣṇācchedāvimardabharakṣamo bhava bhava marau tāpārtānāṃ tvamekamahāhradaḥ

iti nigadatā yadupārjitaṃ puṇyaṃ mayā kiyatsugatacarite kṛtvā śraddhāmanena jano 'khilaḥ |
satatasukhito ramyābhogaḥ samṛddhamanorathaḥ parahitarataḥ sarvajñatvaṃ prayātu tataḥ śanaiḥ

karatalasamāḥ spaṣṭālokāḥ praśāntakṛśānavaḥ sthalakamalinīpattracchannā bisāṅkuradanturāḥ |
śucisurabhayaḥ sphullāmbhojairvibhūṣitabhūmayo dadhatu narakāḥ sphītāṃ śobhāṃ saśīkaravāyavaḥ

vijitaṃvirutamārānīkāḥ kṛtābhayaghoṣaṇā gaganasalilakrīḍā ramyā sameta narāmarāḥ |
jananamaraṇakleśāyāsaprabandhavighātino diśi diśi sadā buddhotpādā bhavantu samīhitāḥ

bhavatu jagatāṃ dharmāmodaḥ prabandhamahotsavaḥ suciraguṇitā mṛtyorbandhyā bhavantu manorathāḥ |
munijanakathāgoṣṭhībandhaiḥ samāvṛtavarṣibhiḥ satataśiśiraḥ subhagacandrālokaḥ prayātu kṛtārthatām